Ko e Moumou He Ha e Lalolagi Tuai Ia?

NAKAI ko e mena tupu pauaki e Fakapuke he lalolagi katoa. Ko e fakafiliaga mai he Atua. Ne foaki e hatakiaga, ka kua fakaheu lahi ai. Ko e ha? Ne fakamaama e Iesu: “Ha ko e mena tuga ne eke ke he vaha ka e nakaila hoko e fakapuke, [ko e tau tagata ne] kai a lautolu mo e inu, ti fai hoana a lautolu mo e fakafaitane, kua hoko ni ke he aho ne hu atu ai a Noa ke he vaka, Ti nakai iloa e lautolu ato hoko mai e fakapuke, mo e uta kehe a lautolu oti.”—Mataio 24:38, 39.

Ko e Kaufakalatahaaga ne Tupu ki Mua

He falu puhala pauaki, ko e kaufakalatahaaga fakamua ato Fakapuke ne olioli e tau koloa kua nakai moua e tautolu he vaha nei. Ma e fakatai, ne vagahau he tau tagata oti kana taha e vagahau mahani mau. (Kenese 11:1) To ha ha he mena nei e tau mouaaga ati hake he feua vali fakatino mo e tau saiene kua lata mo e gahua auloa he tau tagata tokologa mo e tau pulotu kehekehe. Pihia foki, ko e loa he moui nukua olioli he tau tagata tokologa ne kua kakano kua fakatumau a lautolu ke fakaputuputu hake e tau mena ne ako e lautolu he tau senetenari loga kua mole.

Ne talahau he falu ko e loa he moui he tagata ne nakai leva lahi he magahala i tuai ti ko e tau tau ia ne totoku he fakamauaga he Tohi Tapu ko e tau mahina haia. Moli kia e mena ia? Manamanatu la, ke he mena ne tupu ki a Maalaelu. Kua pehe e Tohi Tapu: “Ne moui a Maalaelu ke he tau tau ne ono gofulu ma lima, ti fanau ai e ia a Iareto. . . . Ti ko e katoatoa he tau aho a Maalaelu, ko e valu e teau ia he tau tau, ti hivagofulu ma lima e tau; ti mate ai a ia.” (Kenese 5:15-17) Kaeke hagaao e mahina ke he tau, ne matua tane a Maalaelu ke he hana tama tane he lima la ia e tau! Nakai, na tata lahi e tau tagata he magahala ia ke he tino mitaki katoatoa he tagata fakamua, ko Atamu. Ne momoui moli a lautolu ke he tau senetenari loga. Ko e heigoa ne moua e lautolu?

Loga e tau senetenari to hoko e Fakapukeaga, ne tupu lahi e puke tagata ati maeke ai ia Kaino, ko e tama tane ha Atamu ke ati e maaga, ne fakahigoa e ia ko Enoka. (Kenese  4:17) Tali mai he vaha ia fakamua ato Fakapuke, ne fakatutu ai e tau fahi gahua kehekehe. Ha ha i ai e tau fale gahua ma e “tau mena oti kua eke ke he apa kula, mo e lapatoa.” (Kenese 4:22) Nakai fakauaua ai ko e tau koloa hanei ne fakaaoga ma e fakatutuaga, talaga, tuitui, mo e gahua fonua. Ko e tau feua oti nei kua hagaao ke he tau matagahua he tau tagata fakamua he lalolagi.

Ko e iloilo holo ki mua nukua maeke ai ma e tau atuhau tupu hake ke fakatupu e tau lotomatala tuga ia e taute lapatoa, leveki he gahua fonua, feaki he tau mamoe mo e tau manu huifa, tohitala, vali fakatino fakafulufuluola. Ko Iupalu, ma e fakatai, “ko ia ko e tupuna ha lautolu oti kua ta kitara, mo e fakatagi kofe.” (Kenese 4:21) Ne tupu lahi e kaufakalatahaaga. Ka e, amanaki ni ti fakahiku e tau mena oti kana. Ko e heigoa e mena ne tupu?

Ko e Heigoa e Mena ne Hepe?

Fakalataha mo e tau aogaaga, ne kamata kelea e kaufakalatahaaga ato hoko e Fakapuke. Ko ia e tupuna, ko Atamu, ne totoko ke he Atua. Ko Kaino, ko e tagata talaga he maaga fakamua ne fakamau tohi, ne kelipopo hana ni a matakainaga. Ko e mena ia ni ne tupu lahi e mahani kelea! Ko e tau fua he palepale nakai mitaki ne toka hifo e Atamu ke he hana fanau kua loga lahi.—Roma 5:12.

Ne maaliali e tau mena nei ke hokotia ke he tapunu he magaaho ne fifili a Iehova to fakaata e ia e tuaga ke matutaki atu foki ke he taha 120 tau. (Kenese 6:3) Kua pehe e Tohi Tapu: “Kua lahi ni e mahani kelea he tau tagata ke he lalolagi; ko e tau fatuakiloto oti foki he tau manatu he tau loto ha lautolu, ko e kelea hokoia ni ke he tau aho oti kana . . . ti puke ni e lalolagi ke he favale.”—Kenese 6:​5, 11.

Nakai leva, ne tala age fakatonu ai ki a Noa to moumou he Atua e tau mena momoui oti kana he fakapuke. (Kenese 6:13, 17) Pete ni he eke a Noa mo “ogo he tututonu,” kua uka moli e tau tagata ke talitonu to moumou e tau mena oti kana ne viko takai ia lautolu. (2 Peteru 2:5) Toko valu ni e tagata ne fanogonogo ke he hatakiaga ti hao ai. (1 Peteru 3:20) Ko e aoga he ha e mena nei ma tautolu he vaha nei?

Ko e Heigoa e Aoga ma Tautolu?

Nonofo a tautolu he vaha tatai tonu ke he ha Noa. Logona tumau e tautolu e tau gahua matakutakuina he fakamatakutaku pauaki, tau fakaohoohoaga kelipopo, tau keliaga lalahi he tau tagata fana fakahanoa, mo e favaleaga fakakaina kua tapunu ofoofogia. Kua liu foki e lalolagi puke ke he tau favaleaga, ti tuga ni fakamua, kua fakailoa ke he laloagi e fakahala ka hau. Ne talahau e ia ko Iesu to hau a ia ko e Iki Fakafili ne kotofa he Atua mo e vehe e tau tagata tuga he vehe he leveki mamoe e tau mamoe mai he tau koti. Ko lautolu nakai lata, ne pehe a Iesu, ‘ati o atu ke he fakahala tukulagi.’ (Mataio 25:31-33, 46) Kua pehe e Tohi Tapu ke he magaaho nei, to totou miliona a lautolu ka hao—ko e moto tagata tokologa ka tapuaki ke he Atua tokotaha maka. He lalolagi ka hau, ko lautolu nei ka olioli e moui ke he mafola tukulagi mo e haohao mitaki nakai la tuga fakamua.—Mika 4:3, 4; Fakakiteaga 7:9-17.

Tokologa kua vaiga e tau talahauaga faka-Tohi Tapu pihia mo e tau hatakiaga hagaao ke he fakahala ka fakakite e moli he tau talahauaga pihia. Ka e fakamaama he aposetolo ko Peteru ko e tau tagata tuaha pihia kua fakaheu e tau mena moli. Ne tohi e ia: “To o mai ke he tau aho fakamui e tau tagata va . . . pehe mai foki a lautolu, Ko fe e kupu talahaua ai ke haele mai a ia? . . . Ha kua loto a lautolu ke galo ia lautolu e mena nai, ha i ai e lagi i tuai, ko e lalolagi foki mai e vai ia, ko e vai foki ne eke ai e lalolagi ha ko e kupu he Atua, Ko e tau mena ia foki ne fakaotioti ai e lalolagi tuai he vai ne puapuā; Ka ko e lagi a enei mo e fonua kua fakatoka ha ko e kupu ia ni, kia taofi ma e afi ke he aho ke fakafili ai mo e mahakava ai e tau tagata matahavala.”—2 Peteru 3:3-7.

 Ko e hatakiaga he lalolagi katoa hagaao ke he aho he fakafiliaga nei ha ne hau mo e fekau he tala mitaki hagaao ke he mafola ka mui mai he vaha nei kua fakamatala fakamakai ai he omaoma ke he poakiaga fakaperofeta ha Iesu. (Mataio 24:14) Ko e hatakiaga nei kua nakai lata ke uta fakateaga. Na fakamoli he Atua Mua Ue Atu hana kupu.

Ko e Lalolagi ka Hau

Ko e heigoa e vaha anoiha he tau tagata, hagaao ke he hikiaga aoga hane hau? He kamataaga ke he hana Lauga talahaua he Mouga, ne mavehe a Iesu: “Uhoaki a lautolu ne mahani molu; ha ko e mena to eke ma lautolu e motu.” Ti holo atu a ia ke fakaako hana tau tutaki ke liogi ke he Atua: “Kia hoko mai hau a kautu. Kia eke hau a finagalo ke he lalolagi, tuga ne eke ke he lagi.” (Mataio 5:5; 6:10) E, ne fakaako e Iesu na kua fakatoka mai tuai e vaha anoiha kua homo ue atu ma e tau tagata tua fakamoli ke he lalolagi nei. Ne hagaao a ia ki ai “ke he fakafouaga.”—Mataio 19:28.

He manamanatu a koe ke he vaha anoiha, kia nakai fakaata e tau tagata vaiga ke fakauaua a koe ke he hatakiaga he Atua. Moli, ko e tau takatakaiaga ha tautolu kua tuga e mauokafua, mo e kua leva tuai e fakatokatokaaga nei he lalolagi. Ka e nakai lata agaia a tautolu ke tuku e mauokafua ha tautolu ki ai. Nukua fakafili ai e tau tagata he lalolagi. Kia fakamalolo, mogoia, mai he fakaotiaga he tohi he aposetolo ko Peteru:

“Ko e hanai, to fakaotioti e tau mena oti ia, po ke fefe ha mutolu a mahani mitaki mo e tau mahani Atua; ka fakatalitali mo e foli atu kia hoko mai e aho he Atua; . . . Ha ne fakatalitali ke he tau mena ia, kia lalilali atu a mutolu, kia moua e ia a mutolu mo e monuina, kua nakai fai ila mo e nakai talahaua kelea. . . . Kia tutupu a mutolu ke he fakalofa noa mo e maama ke he Iki ha tautolu, ko e Fakamoui ia ko Iesu Keriso.” (2 Peteru 3:11, 12, 14, 18) Ti, ako mai he mena ne tupu ke he vaha ha Noa. Fakatata atu ke he Atua. Tupu ke he iloilo ha Iesu Keriso. Feaki e mahani fakamoli mahani Atua, ti fakalataha auloa mo e tau miliona kua fifili ke hao mai he fakaotiaga he lalolagi nei ke he lalolagi mafola mai i mua.

[Fakatino he lau 3]

Talahaua e gahua lapatoa fakamua to hoko e Fakapukeaga

[Fakatino he lau 5]

Ha ha i ai e vaha i mua kua homo ue atu