Ko e Ha ke Papatiso Ai?
Ko e Ha ke Papatiso Ai?
“Kia o atu a . . . ke eke e tau motu oti kana mo tutaki, ti papatiso atu a lautolu.”—MATAIO 28:19.
1, 2. (a) I lalo hifo he tau tutuaga fe ne taute ai e falu papatisoaga? (e) Ko e heigoa e tau huhu ne fakatu hagaao ke he papatisoaga?
NE OMOI he patuiki Frankish ko Charlemagne e tau Sakono ne fakapaea ke papatiso katoatoa he 775-77 V.N. “Ne omoi e ia e liliuina ha lautolu ke he faka-Kerisiano talahaua teao,” he tohi he tagata fakamau tala tuai ko John Lord. Tatai ai, he mole e mau ke he tama fifine patuiki Ofotoko Heleni he 987 V.N., ko e pule Rusia ko Vladimir I ne fifili kua lata he tau tagata hana ke eke mo “tau Kerisiano.” Ne poaki e ia ke papatiso oti e tau tagata hana—ha ko e mate ke he pelu kaeke ke nakai papatiso!
2 Kua lata kia e tau papatisoaga pihia? Fai kakano moli kia? Kua lata kia ke papatiso ha tagata he tau tagata?
Papatisoaga—Fefe?
3, 4. Ko e ha e fuifui po ke liligi he vai ke he ulu kua nakai ko e papatisoaga faka-Kerisiano tonu?
3 He magaaho ne omoi e Charlemagne mo Vladimir I e tau tagata ke taute e papatisoaga, ne nakai gahua fakatatau e tau pule ia mo e Kupu he Atua. Kua nakai fai aoga moli ka putoia e tau papatisoaga ke he fuifui, liligi e vala vai ke he ulu, po ke lomoki e tau tagata kua nakai fakaako ki ai e kupu moli faka-Tohiaga Tapu.
4 Manamanatu ke he mena ne hoko he magaaho ne fano a Iesu ko e Nasareta ki a Ioane Papatiso he 29 V.N. Ne papatiso e Ioane e tau tagata ke he Vaitafe i Ioritana. Ne o mai noa ne lautolu a lautolu ki a ia ma e papatisoaga. Fakaata noa ni kia e ia a lautolu ke tutu i Ioritana ka e liligi e ia e vala vailele tote ke he tau ulu ha lautolu po ke fuifui aki a lautolu? Ko e heigoa e mena ne tupu he papatiso e Ioane a Iesu? Kua hokotaki e Mataio he mole e papatiso “ti hake mai agataha a ia he vai.” (Mataio 3:16) Ne hifo a ia ke he vai, he lomoki ke he Vaitafe i Ioritana. Tuga a ia, ko e eunuka Aitiope fakamoli ne kua papatiso ke he “vai.” Ko e tau vai pihia kua lata ha ko e papatisoaga ha Iesu mo e hana tau tutaki ne putoia e lomoki katoatoa.—Gahua 8:36.
5. Papatiso fefe he tau Kerisiano fakamua e tau tagata?
5 Ne fakaliliu e tau kupu Heleni “papatiso,” “papatisoaga,” mo e falu atu foki, hagaao ke he fakatomo hifo ki lalo he vai. Kua pehe e Smith’s Bible Dictionary: “Ko e papatisoaga fakamitaki mo e kua kakano ai ko e lomoki hifo.” Ko e falu fakaliliuaga he Tohi Tapu kua hagaao ki a “Ioane ko e Lomoki.” (Mataio 3:1, Rotherham; Diaglott interlinear) Kua talahau he History of the Christian Religion and Church, During the Three First Centuries ha Augustus Neander: “Na tupu fakamua mai e papatisoaga he lomoki hifo.” Ne talahau he tohi Falani talahaua ko e Larousse du XXe Siècle (Paris, 1928): “Ko e tau Kerisiano fakamua ne moua e papatisoaga he lomoki he ha matakavi ni ne moua ai e vai.” Ti talahau he New Catholic Encyclopedia: “Kua kitia maali ai ko e Papatisoaga he Lotu fakamua ne puhala he lomoki hifo.” (1967, Volume II, lau 56) Ti he vaha nei, ko e papatisoaga he eke mo taha he Tau Fakamoli a Iehova ko e lakaaga taute noa ne putoia e lomoki hifo katoatoa ke he vai.
Kakano Fou he Papatisoaga
6, 7. (a) Ko e heigoa e kakano ne taute e Ioane e tau papatisoaga? (e) Ko e heigoa e mena fou hagaao ke he papatisoaga he tau tutaki ha Iesu?
6 Ko e tau papatisoaga ne taute e Ioane kua kehe e kakano mai he tau papatisoaga ne taute he tau tutaki ha Iesu. (Ioane 4:1, 2) Ne papatiso e Ioane e tau tagata ko e fakamailoga ha lautolu he fakatokihala ke he ha lautolu a tau agahala ne totoko ke he Fakatufono. * (Luka 3:3) Ka e fai mena fou ne lauia ai e papatisoaga he tau tutaki ha Iesu. He Penetekoso 33 V.N., ne fakamafana he aposetolo ko Peteru hana tau tagata fanogonogo: “Ati tokihala a, ti takitaha mo e papatiso a mutolu oti ke he higoa a Iesu Keriso; mo e fakamagaloaga he tau hala.” (Gahua 2:37-41) Pete ni e hagaao a ia ke he tau Iutaia mo e tau tagata liliuina, ne nakai tutala a Peteru hagaao ke he papatisoaga ke fakamailoga e fakamagaloaga ki luga he tau agahala totoko ke he Fakatufono; po ke nakai kakano foki a ia ko e papatisoaga he higoa ha Iesu ne kua fakatino ko e holoholo kehe he tau agahala.—Gahua 2:10.
7 He magaaho ia, ne fakaaoga e Peteru e “tau kei [fakamua] he kautu.” Ma e kakano fe? Ke maeke ai ke fakakite ke he tau tagata fanogonogo hana e iloilo hagaao ke he monuina ha lautolu ke huhu atu ke he Kautu he lagi. (Mataio 16:19) Tali mai he fakaheu he tau Iutaia a Iesu ko e Mesia, ko e fakatokihala mo e fakagahua he tua ki a ia ko e mena fou mo e aoga he kumi mo e moua e fakamagaloaga he Atua. Maeke ia lautolu ke fakakite e fakamoliaga ki mua he tau tagata he tua pihia he fakatomo he vai ke he higoa ha Iesu Keriso. He puhala ia to fakamailoga e lautolu e tukuleleaga fakatagata ha lautolu ke he Atua he puhala he Keriso. Ko lautolu oti kua manako ke he taliaaga faka-Atua he vaha nei kua lata ke fakagahua e tua taha ia, he tukulele a lautolu ki a Iehova ko e Atua, mo e taute e papatisoaga faka-Kerisiano he fakamailoga e tukuleleaga katoatoa ke he Atua Mua ue Atu.
Latatonu e Iloilo Moli
8. Ko e ha e papatisoaga faka-Kerisiano nakai ko e mena ma e tau tagata oti?
8 Nakai ko e papatisoaga faka-Kerisiano ma e tau tagata oti. Ne poaki e Iesu hana tau tutaki: “Kia o atu a a mutolu ke eke e tau motu oti kana mo tutaki, ti papatiso atu a lautolu ke he higoa he Matua, mo e Tama, mo e Agaga Tapu; ti fakaako atu a mutolu kia lautolu kia omaoma ke he tau mena oti ne tala atu e au kia mutolu.” (Mataio 28:19, 20) Fakamua to hoko e papatiso, kua lata e tau tagata ke ‘fakaako atu kia omaoma ke he tau mena oti ne tala atu e Iesu ke he hana tau tutaki.’ Ti ko e tau papatisoaga omoi ha lautolu kua nakai fai tua ne fakave ke he iloilo moli he Kupu he Atua kua nakai aoga mo e kehe mamao ke he poakiaga ne foaki e Iesu ke he hana tau tutaki moli.—Heperu 11:6.
9. Ko e heigoa e kakano ke papatiso ‘ke he higoa he Matua’?
9 Ko e heigoa e kakano ke papatiso ‘ke he higoa he Matua’? Kua kakano ke mailoga he tagata papatiso e tuaga mo e pule he Matua ha tautolu he lagi. Kua fakakite a Iehova ko e Atua e Tufuga ha tautolu, ko e “Mua ue atu ke he lalolagi oti,” mo e Pule Katoa he Lalolagi mo e Lagi Katoatoa.—Salamo 83:18; Isaia 40:28; Gahua 4:24.
10. Ko e heigoa e kakano ke papatiso ‘ke he higoa he Tama’?
10 Ke papatiso ‘ke he higoa he Tama’ kua kakano ke mailoga e tuaga ha Iesu mo e pule ko e Tama fuataha he Atua. (1 Ioane 4:9) Ko lautolu ne lata ma e papatisoaga kua talia a Iesu ko ia ne foaki mai he Atua e “lukutoto ke hukui aki e tau tagata tokologa.” (Mataio 20:28; 1 Timoteo 2:5, 6) Kua lata foki he tau tagata papatiso ke fakailoa e ‘tuaga tokoluga’ nukua fakamatalahi he Atua hana Tama.—Filipi 2:8-11; Fakakiteaga 19:16.
11. Ko e heigoa e kakano he papatiso ‘ke he higoa he Agaga Tapu’?
11 Ko e heigoa e aoga he papatisoaga ‘ke he higoa he agaga tapu’? Fakakite ai he mena nei kua mailoga he tau tagata papatiso e agaga tapu ko e malolo gahuahua ha Iehova, ne fakaaoga ke he tau puhala kehekehe he fakatatau mo e hana finagalo. (Kenese 1:2; 2 Samuela 23:1, 2; 2 Peteru 1:21) Ko lautolu kua lata ma e papatisoaga nukua iloa na lagomatai he agaga tapu a lautolu ke maama e “tau mena hokulo ia he Atua,” ke matutaki e gahua fakamatala he Kautu, mo e ke fakatata e tau fua he agaga he ‘fakaalofa, fiafia, mafola, fakauka, totonu, mahani mitaki, tua, mahani molu, mo e manako fakalatalata.’—1 Korinito 2:10; Kalatia 5:22, 23; Ioelu 2:28, 29.
Aoga he Fakatokihala mo e Liliuina
12. Matutaki fefe e papatisoaga faka-Kerisiano mo e fakatokihala?
12 Kehe ai e mena ne tupu ke he tagata nakai agahala ko Iesu, ko e papatisoaga ko e fakamailoga he taliaaga he Atua ne matutaki mo e fakatokihala. Ka tokihala a tautolu, kua tupetupe lahi a tautolu ke he taha mena kua liga taute e tautolu po ke kaumahala ke taute. Ko e tau Iutaia he senetenari fakamua ne manako ke fakafiafia e Atua ne kua lata ke tokihala he tau agahala ha lautolu ne totoko ke he Keriso. (Gahua 3:11-19) Ko e falu he tau tagata talitonu Motu Kehe i Korinito ne tokihala he faivao, tapuaki tupua, kaiha, mo e falu agahala lalahi. Ha ko e fakatokihala ha lautolu, ne “koukou tuai” a lautolu he toto ha Iesu; ne “fakatapu,” po ke toka kehe ma e gahua he Atua; ti kua “talahaua tututonu” ai ke he higoa he Keriso mo e agaga he Atua. (1 Korinito 6:9-11) Ko e fakatokihala e lakaaga aoga ke moua e loto manamanatu mitaki mo e fakatotoka ne foaki he Atua mai he agahala he hala.—1 Peteru 3:21.
13. Hagaao ke he papatisoaga, ko e heigoa kua putoia e liliuina?
13 Kua lata e liliuina ke taute mua to hoko e papatisoaga ha tautolu ke eke mo Tau Fakamoli a Iehova. Ko e gahua noa e liliuina ne taute he taha kua fakatoka e fifiliaga loto katoa ke muitua ki a Keriso Iesu. Ko e tau tagata pihia kua tiaki e tau puhala hehe fakamua ha lautolu mo e fifili ke taute e mena kua hako ke he fofoga he Atua. He tau Tohiaga Tapu, ko e tau vepi Heperu mo e Heleni hagaao ke he liliuina kua ha ha ai e kakano ke liliu mai, mafokifoki mai. Ko e tauteaga nei kua kakano ko e liliu mai ke he Atua he puhala hehe. (1 Tau Patuiki 8:33, 34) Kua ui e liliuina ma e “mahani ke lata mo e tokihala.” (Gahua 26:20) Kua lata ke toka kehe e tautolu e tapuakiaga fakavai, he gahua fakatatau mo e tau poakiaga he Atua, mo e foaki e tapuakiaga katoatoa ki a Iehova. (Teutaronome 30:2, 8-10; 1 Samuela 7:3) Kua fua mai e liliuina he tau hikihikiaga he ha tautolu a manamanatuaga, tau foliaga, mo e aga fakatagata ha tautolu. (Esekielu 18:31) Kua “mafokifoki” a tautolu he hukui he tau aga fou e tau aga nakai mahani Atua.—Gahua 3:19; Efeso 4:20-24; Kolose 3:5-14.
Aoga e Tukuleleaga Loto Katoa
14. Ko e heigoa e kakano he tukuleleaga he tau tutaki ha Iesu?
14 Ko e papatisoaga he tau tutaki ha Iesu kua lata foki ke hau mua he tukuleleaga loto katoa ke he Atua. Kua fakakite he tukuleleaga e toka kehe ma e finagalo tapu. Kua aoga lahi e lakaaga nei ti kua lata ia tautolu ke fakakite ki a Iehova ke he liogi e fifiliaga ha tautolu ke foaki ki a ia e fakamoli katoatoa tukulagi. (Teutaronome 5:9) Moli, ko e tukuleleaga ha tautolu ko e gahua nakai ke he tagata ka ke he Atua hokoia.
15. Ko e ha kua fakatomo hifo e tau tagata papatiso?
15 He magaaho ne tukulele a tautolu ke he Atua he puhala ia Keriso, kua fakakite e tautolu e fifiliaga ke fakaaoga e tau momoui ha tautolu he taute e finagalo faka-Atua ne kua fakatoka mai he tau Tohiaga Tapu. He fakamailoga e tukuleleaga ia, ko e tau tagata papatiso kua fakatomo ke he vai, tuga ni ne papatiso a Iesu ke he Vaitafe i Ioritana ke fakakite aki a ia ki mua he Atua. (Mataio 3:13) Kua mailoga lahi ai ne liogi a Iesu ke he magaaho tonu ia.—Luka 3:21, 22.
16. Fakakite fefe e tautolu e olioli kua lata ka kitia e tautolu e tau tagata ka papatiso?
16 Ko e papatisoaga ha Iesu ko e magaaho hokulo lahi ka e olioli foki. Ti pihia foki e papatisoaga faka-Kerisiano he vaha fou nei. Ka kitia e tautolu e tau tagata kua fakamailoga ha lautolu a tukuleleaga ke he Atua, maeke ia tautolu ke fakakite ha tautolu a olioli he talia fakalilifu mo e nava mafanatia. Kia fehola kehe mai he lutu, mapu, mo e falu mena pihia ha ko e tapuina he fakakiteaga nei he tua. Ko e olioli ha tautolu kua fakakite ai ke he puhala lilifu.
17, 18. Ko e heigoa ka lagomatai ke fifili kua lata nakai e tau tagata takitaha ma e papatisoaga?
17 Nakai tuga a lautolu e tau tama mukemuke ne fuifui e matale po ke tau tagata tokologa ne omoi faka-Tohiaga Tapu ke papatiso, ne nakai omoi he Tau Fakamoli a Iehova ha tagata ke he papatisoaga. Moha ia, ne nakai papatiso e lautolu a lautolu kua nakai lata fakaagaga. Ato maeke he ha tagata ke eke mo tagata fakamatala nakai papatiso he tala mitaki, kia iloa mitaki he tau motua Kerisiano kua maama e ia e tau fakaakoaga aoga he Tohi Tapu, he moui fakatatau ai ki ai, ti talia malolo ke he huhu tuga anei, “Manako moli nakai a koe ke eke mo taha he Tau Fakamoli a Iehova?”
18 Laulahi ai, ka folafola fai aoga he tau tagata e gahua fakamatala he Kautu mo e fakakite e manako ke papatiso, maeke he tau motua Kerisiano ke tututala mo lautolu ke iloa moli ko lautolu e tau tagata talitonu ne kua taute e tukuleleaga ki a Iehova mo e kua felauaki mo e tau poakiaga faka-Atua ma e papatisoaga. (Gahua 4:4; 18:8) Ko e tau tali fakatagata ke molea e 100 huhu ke he tau fakaakoaga he Tohi Tapu ka lagomatai e tau motua ke fifili ko e hokotia nakai e tau tali ia ke he tau tuaga faka-Tohiaga Tapu ma e papatisoaga. Nakai lata e falu ti ko e mena ia kua nakai fakaata ma e papatisoaga faka-Kerisiano.
Fai Mena Kia kua Taofi a Koe?
19. He onoonoaga ki a Ioane 6:44, ko hai e tau hakega ka fakalataha mo Iesu?
19 Tokologa e tau tagata ne omoi ke he tau papatisoaga lalahi ne kua liga talahau to o a lautolu ke he lagi ka mamate. Ka e hagaao atu ke he tau tuaga hui he tau tutaki hana, ne pehe a Iesu: “Nakai maeke ia taha ke hau kia au, ka nakai futia mai he Matua ne fakafano mai au.” (Ioane 6:44) Ne futiaki e Iehova ki a Keriso e 144,000 ka eke mo tau hakega fakalataha ha Iesu ke he Kautu he lagi. Ko e papatisoaga omoi ne nakai la fakatapu ha tagata ma e tuaga lilifu he fakatokatokaaga he Atua.—Roma 8:14-17; 2 Tesalonia 2:13; Fakakiteaga 14:1.
20. Ko e heigoa ka liga lagomatai e falu ne nakai la papatiso ia?
20 Mahomo atu tali mai he lotouho he atu tau 1930, ko e tokologa kua amanaki ke hao mai he “matematekelea lahi” mo e moui tukulagi he lalolagi ne fakalataha ke he tau vahega ha Iesu ko e ‘tau mamoe kehe.’ (Fakakiteaga 7:9, 14; Ioane 10:16) Kua lata a lautolu ma e papatisoaga ha kua fakatatai e lautolu ha lautolu a tau momoui ke he Kupu he Atua mo e fakaalofa ki a ia mo e ‘ha lautolu a loto katoa, agaga katoa, malolo katoa, mo e manatu katoa.’ (Luka 10:25-28) Pete ni kua mailoga he falu tagata e Tau Fakamoli a Iehova ke ‘tapuaki ke he Matua mo e agaga mo e fakamoli,’ ne nakai la muitua a lautolu ke he fakafifitakiaga ha Iesu mo e fakakite e fakamoliaga he fakaalofa moli mo e tapuakiaga katoatoa ki a Iehova he papatiso ai. (Ioane 4:23, 24; Teutaronome 4:24; Mareko 1:9-11) Ko e liogi eketaha mo e fakahako hagaao ke he lakaaga aoga nei ka foaki mitaki ki a lautolu e mahani mo e malolo ke fakatatau katoatoa ke he Kupu he Atua, ke taute e tukuleleaga katoa ki a Iehova ko e Atua, ti papatiso ai.
21, 22. Ko e heigoa e tau kakano nukua taofi falu mai he tukuleleaga mo e papatisoaga?
21 Kua taofi e falu mai he tukuleleaga mo e papatisoaga ha kua hufia lahi a lautolu he tau gahua he lalolagi po ke tau koloa he velevele mena ti kua tote e magaaho ha lautolu ma e tau mena fakaagaga. (Mataio 13:22; 1 Ioane 2:15-17) To fiafia ha ia kaeke ke hiki e lautolu ha lautolu a tau onoonoaga mo e tau foliaga! Ko e fakatata ki a Iehova ka fakamonuina a lautolu fakaagaga, ke lagomatai ke fakatote hifo e fakaatukehe, mo e to ta mai ki a lautolu e mafola mo e makona kua fua mai he taute e finagalo faka-Atua.—Salamo 16:11; 40:8; Tau Fakatai 10:22; Filipi 4:6, 7.
22 Kua pehe e falu kua fakaalofa a lautolu ki a Iehova ka e nakai taute e tukuleleaga mo e ke papatiso ha kua manatu a lautolu to nakai fai fakalagoaga a lautolu ki ai. Ka e igatia a tautolu mo e fai fakalagoaga ki mua he Atua. Hau e matagahua ki luga ha tautolu he magaaho ne logona e tautolu e kupu ha Iehova. (Esekielu 33:7-9; Roma 14:12) Ha ko e ‘tau tagata fifili,’ ne fanau e tau Isaraela i tuai ke he motu ne tukulele ki a Iehova, ko e mena ia ne ha ha ia lautolu e kotofaaga ke fekafekau fakamoli ki a ia fakatatau atu ke he tau matafakatufono hana. (Teutaronome 7:6, 11) Nakai fai tagata kua fanau ke he motu pihia he vaha nei, ka e ka moua e tautolu e fakaakoaga faka-Tohiaga Tapu tonu, kua lata ia tautolu ke gahua ki ai he tua.
23, 24. Ko e heigoa e tau fakauaua nukua nakai lata ke taofi aki e tau tagata mai he papatisoaga?
23 He fakauaua kua nakai iloilo lahi a lautolu kua liga ke taofi aki e falu mai he papatisoaga. Ka e, igatia a tautolu mo e lahi e mena ke ako ha ko e “[to] nakai kitia he tagata e gahua kua eke he Atua tali mai he kamataaga ke hoko ke he fakahikuaga.” (Fakamatalaaga 3:11) Manamanatu la ke he eunuka Aitiope. Ko e tagata liliuina, ne fai iloilo a ia ke he tau Tohiaga Tapu, ka e nakai ha ha ia ia e tau tali ke he tau huhu oti hagaao ke he finagalo he Atua. He mole e ako hagaao ke he foakiaga ha Iehova ma e fakamouiaga he puhala he poa lukutoto ha Iesu, ne fakamafiti e eunuka mo e papatiso ke he vai.—Gahua 8:26-38.
24 Kua fakauaua e falu ke taute e tukuleleaga ke he Atua ha kua matakutaku a lautolu neke kaumahala. He talahau e Monique ne 17 e tau he moui: “Kua taofi au mai he papatisoaga he matakutaku neke nakai tumau au ke he haku a tukuleleaga.” Ka falanaki a tautolu ki a Iehova mo e loto katoa ha tautolu, ‘to fakahakohako ai e ia ha tautolu a tau puhala.’ To lagomatai e ia a tautolu ke ‘o mo e kupu moli’ ko e tau fekafekau tukulele fakamoli hana.—Tau Fakatai 3:5, 6; 3 Ioane 4.
25. Ko e heigoa e huhu he mogonei kua lata ke manamanatu ki ai?
25 Ha ko e falanaki katoatoa ki a Iehova mo e fakaalofa mai he loto ki a ia, ne fakalagalaga e tokoafe he tau tau takitaha ke taute e tukuleleaga mo e papatiso ai. Ti moli ai ne manako e tau fekafekau tukulele oti he Atua ke fakamoli ki a ia. Ka kua nonofo a tautolu he tau aho fakahiku, ti fehagai a tautolu mo e tau kamatamata kehekehe he tua. (2 Timoteo 3:1-5) Ko e heigoa ha tautolu ka taute ke fakatatau mo e tukuleleaga ha tautolu ki a Iehova? To fakatutala a tautolu ke he mena nei he vala tala ka hau.
[Matahui Tala]
^ para. 6 Ha kua nakai agahala a Iesu, ne nakai papatiso a ia ke fakamailoga e fakatokihala. Ko e papatisoaga hana kua fakamailoga e fakakite hana tuaga ke he Atua ke taute e finagalo he hana a Matua.—Heperu 7:26; 10:5-10.
Manatu Nakai e Koe?
• Gahuahua fefe e papatisoaga faka-Kerisiano?
• Ko e heigoa e iloilo kua lata ma hana ka papatiso?
• Ko e heigoa e tau lakaaga kua takitaki atu ke he papatisoaga he tau Kerisiano moli?
• Ko e ha kua taofi e falu mai he papatisoaga, ka e liga ke lagomatai fefe atu ki a lautolu?
[Tau Huhu he Fakaakoaga]
[Tau Fakatino he lau 24]
Iloa nakai e koe e kakano ke papatiso ‘ke he higoa he Matua, Tama, mo e agaga tapu’?