Kikila e Lilifu ha Iehova ke he Hana Tau Tagata
Kikila e Lilifu ha Iehova ke he Hana Tau Tagata
“Ha ko e mena to eke a Iehova māu mo maama tukulagi.”—ISAIA 60:20.
1. Foaki fefe e Iehova e monuina ke he hana tau tagata tua fakamoli?
“KUA fiafia a Iehova ke he hana motu; to fakafulufuluola e ia e tau tagata mahani molu ke he fakamouiaga.” (Salamo 149:4) Pihia he talahau he salamo i tuai, ti fakamoli ai he fakamauaga tala e moli he hana tau kupu. He magaaho ne tua fakamoli e tau tagata ha Iehova, kua leveki e ia a lautolu, he taute a lautolu ke fua loga mai, mo e puipui a lautolu. He vaha i tuai, ne age e ia ki a lautolu e kautuaga ki luga he tau fi ha lautolu. He vaha nei, kua foaki age agaia e ia ki a lautolu e malolo fakaagaga mo e fakamafana a lautolu ke he fakamouiaga ne fakave ke he poa ha Iesu. (Roma 5:9) Kua taute e ia e mena nei ha kua fulufuluola a lautolu ke he fofoga hana.
2. Pete ni e feleveia a lautolu mo e totokoaga, ko e heigoa kua mauokafua e tau tagata he Atua?
2 Moli, he lalolagi kua hufia ke he pouligia, ko lautolu kua “nonofo mo e mahani Atua” ka feleveia mo e totokoaga. (2 Timoteo 3:12) Moha ia, kua mailoga e Iehova e tau tagata totoko, ti hataki e ia a lautolu: “Ha ko e mena to mahaikava e motu mo e kautu kua nakai fekafekau atu kia koe; to fakaoti ni e tau motu ia.” (Isaia 60:12) He vaha nei, kua kitia fahi loga ai e totokoaga. He falu motu, kua lali e tau tagata totoko ke fakakaupa po ke pa e tapuakiaga kua foaki he tau Kerisiano moli ki a Iehova. He falu, ko e tau tagata totoko lahi kua ekefakakelea fakatino e tau tagata tapuaki ha Iehova mo e tugi e tau koloa ha lautolu. Ka e manatu, kua fita he fifili e Iehova e fua he ha totokoaga ke fakamoli aki e hana finagalo. To kaumahala e tau tagata totoko. Ko lautolu ka tau ki a Siona, nukua hukui he hana fanau he lalolagi, kua nakai kautu ai. Nakai kia ko e fakamaloloaga mafanatia a ia mai he ha tautolu a Atua lahi, ko Iehova?
Lahi Atu e Monuina
3. Fakataitai fefe e fulufuluola mo e fua loga he tau tagata tapuaki ha Iehova?
3 Ko e moli ke he tau aho fakamui he fakatokaaga nei, ne fakamonuina lahi atu e Iehova hana tau tagata. Mua atu ne fakafulufuluola fakalahi e ia e matakavi hana he tapuakiaga mo lautolu i ai kua lagaki hana higoa. Hagaao ke he perofetaaga ha Isaia, kua pehe a ia ki a Siona: “To tamai kia koe e tau mena ne talahaua i Lepanona, ko e perosi, mo e titara, mo e tasura fakalataha, ke fakafulufuluola aki e mena ne ha i ai haku a faituga; to fakalilifu foki e au e mena ke tu ai haku a tau hui.” (Isaia 60:13) Ko e tau mouga ne ufitia he tau akau uhiuhi ko e matakavi fulufuluola lahi. Ti ko e tau fakamailoga latatonu e tau akau moui olaola ke he tau tagata tapuaki ha Iehova kua fulufuluola mo e fua loga.—Isaia 41:19; 55:13.
4. Ko e heigoa e “faituga” mo e he “mena ke tu ai [ha Iehova] a tau hui,” ti kua fakafulufuluola fefe e tau mena nei?
4 Ko e heigoa e “faituga” mo e “mena ke tu ai [ha Iehova] a tau hui” ne talahau ia Isaia 60:13? Kua hagaao e tau kupu nei ke he tau lotopa he faituga fakaagaga lahi ha Iehova, nukua fakatoka ke o atu ki a ia he tapuaki he puhala ia Iesu Keriso. (Heperu 8:1-5; 9:2-10, 23) Ne talahau e Iehova hana finagalo ke fakaheke e faituga fakaagaga ia he fakapotopoto mai e tau tagata he tau motu oti ke tapuaki i ai. (Hakai 2:7) Ne kitia e Isaia e moto tagata mai he tau motu ne tafe ke he mouga tokoluga ha Iehova he tapuakiaga. (Isaia 2:1-4) He totou teau e tau tau fakamui, ne kitia he aposetolo ko Ioane e fakamailoga he “moto tagata tokologa, kua nakai maeke ia taha ke totou, mai he tau motu oti, mo e tau faoa, mo e tau tagata kehekehe, mo e tau vagahau kehekehe.” Ko lautolu nei kua tutu ki “mua he nofoaiki he Atua, mo e fekafekau kia ia ke he aho mo e po ke he faituga hana.” (Fakakiteaga 7:9, 15) He fakamoli e tau perofetaaga nei he vaha ha tautolu, ne kitia mata e tautolu e fakafulufuluola he fale ha Iehova.
5. Ko e heigoa e hikiaga lahi ma e mitaki ne moua he fanau ha Siona?
5 Ko e hikiaga lahi ha ia ma e mitaki he tau mena oti nei ma Siona! Kua talahau e Iehova: “Ne eke a koe mo motu kua tiaki mo e vihiatia, ti nakai fina age ai taha, ka to eke e au a koe mo motu fulufuluola tukulagi, mo motu ke fiafia ai ke hahau mo hahau.” (Isaia 60:15) Tata atu ke he fakaotiaga he felakutaki fakamua he lalolagi, kua moua moli he “Isaraela he Atua” e magaaho matematekelea. (Kalatia 6:16) Ne logona hifo e ia e ‘tiaki moli’ ha ko e tau fanau hana he lalolagi kua nakai iloa mitaki e finagalo he Atua ma lautolu. Ti, he 1919, ne liu fakamoui e Iehova hana tau fekafekau fakauku, ti tali mai ai ne fakamonuina e ia a lautolu aki e monuina fakaagaga homo ue atu. Lafi ki ai, nakai kia hahau e maveheaga he kupu nei? To onoono a Iehova ki Siona ko e “motu fulufuluola.” E, ko e fanau ha Siona, mo Iehova ni, ka matalahi ha ko Siona. To eke a ia mo “fiafia ai” ko e tupuaga ma e olioli lahi. To nakai ni ke he magaaho ku e mena ia. Ko e tuaga fiafia ha Siona, ne hukui he fanau hana he lalolagi, ka tumau ai “ke hahau mo hahau.” To nakai galo ai.
6. Fakaaoga fefe he tau Kerisiano moli e tau koloa mai he tau motu?
6 Fanogonogo la, mogonei, ke he taha maveheaga faka-Atua foki. He vagahau ki a Siona, kua pehe a Iehova: “To kai e koe e puke huhu he tau motu kehe, to kai foki e koe e tau huhu he tau patuiki; ti iloa ai e koe au ko Iehova ko e hau a Fakamoui, mo e hau a Laveaki, ko ia ko e Malolo a Iakopo.” (Isaia 60:16) Fagai fefe a Siona ke he “puke huhu he tau motu kehe” mo e kai “e tau huhu he tau patuiki”? He mena ia ko e tau Kerisiano fakauku mo e ha lautolu a ‘tau mamoe kehe’ kua fakaaoga e tau koloa mai he tau motu ke maeke ke fakatupu ki mua aki e tapuakiaga mea. (Ioane 10:16) He foaki noa ai e tau mena fakaalofa tupe ke maeke ke lagomatai aki e lahi, he gahua fakaako mo e fakamatala ke he lalolagi katoa. Ko e fakaaoga fakamitaki he tau koloa matini he vaha fou nei ke lolomi aki e tau Tohi Tapu mo e tau tohi faka-Tohi Tapu ke he teau he tau vagahau. He vaha nei, kua moua he tau tagata tokologa e kupu moli he Tohi Tapu ne nakai la pihia ia fakamua. Ko e tau tagata he tau motu loga mo loga kua ako ko Iehova ne laveaki hana tau fekafekau fakauku mai he paeaaga fakaagaga, ko ia moli e Fakamoui.
Holo ki Mua ke he Fakatokatokaaga
7. Ko e heigoa e tupu lahi ki mua ne moua he tau fanau ha Siona?
7 Kua fakafulufuluola e Iehova hana tau tagata ke he taha puhala foki. Ne fakamonuina e ia a lautolu aki e tupu ki mua ke he fakatokatokaaga. Kua totou e tautolu ia Isaia 60:17: “To tamai e au e auro ke totogi aki e a[p]a kula; to tamai e au e ario ke totogi aki e lapatoa; mo e apa kula ke totogi aki e tau akau, mo e lapatoa ke totogi aki e tau maka; to eke foki e au hau a tau iki ke mafola, mo e hau a tau pule ke tututonu.” He hukui he ario e apa kula ko e tupu ki mua haia, ti ko e mena taha ia ke he falu koloa ne talahau. He lautatai mo e mena nei, ne moua he Isaraela he Atua e tupu ki mua he fakatokatokaaga ke he tau aho fakamui. Manamanatu la ke he tau fakataiaga gahoa.
8-10. Fakamaama falu holo ki mua he fakatokatokaaga ne tupu tali mai he 1919.
8 Ato hoko e 1919, ko e tau fakapotopotoaga he tau tagata he Atua ne leveki he tau motua mo e tau tiakono, ko lautolu oti ia ne fifili fakatemokarasi he tau tagata he fakapotopotoaga. Kamata he tau ia, ne fifili he “fekafekau fakamoli mo e loto matala” e takitaki fekafekau he tau fakapotopotoaga takitaha ke leveki e tau gahua he fonua. (Mataio 24:45-47) Pete ia, he tau fakapotopotoaga loga ne nakai lauia mitaki e fakatokaaga ia ha ko e falu he tau motua ne vili ki ai kua nakai lagomatai katoatoa e gahua fakamatala. Ti, he 1932, ne fakaako e tau fakapotopotoaga ke fakagata e vili ke he tau motua mo e tau tiakono. Ka e, maeke ia lautolu ke fifili e tau tagata ke gahua he komiti fekafekau fakalataha mo e takitaki fekafekau. Kua tuga e “apa kula” a ia ka e nakai ko e “akau”—ko e holoaga lahi ki mua!
9 He 1938, ko e tau fakapotopotoaga he lalolagi katoa ne fifili ke talia e fakatokaaga holo ki mua, nukua tatai lahi ke he fakatokaaga faka-Tohiaga Tapu. Ne tuku age e fakatokatokaaga he fakapotopotoaga ke he fekafekau lagomatai mo e falu fekafekau, kua kotofa oti ki lalo he takitakiaga he fekafekau fakamoli mo e loto matala. Nakai liu vili! Ti ko e tau kotofaaga he fakapotopotoaga ne taute ke he puhala fakateokarasi. Kua tuga e “lapatoa” a ia he nakai ko e “tau maka” po ke “auro” nakai ko e “apa kula.”
10 Tali mai he magaaho ia kua fakatumau ni e holo ki mua. Ma e fakatai, he 1972, ne kitia ki ai ko e kau he tau motua fakalataha ne fifili fakateokarasi ke leveki e tau fakapotopotoaga, ne nakai fai motua ke pule ke he falu ia lautolu, kua tata lahi mahaki ke he puhala ne leveki aki e tau fakapotopotoaga Kerisiano he senetenari fakamua. Lafi ki ai, teitei ua e tau he mole, ha ha i ai taha lakaaga foki. Ne hiki ai e takitakiaga he falu kaufakalatahaaga matafakatufono, ka e fakaata e Kau Fakatufono ke hagaaki fakalahi atu ke he tau mena fakaagaga he tau tagata he Atua ka e nakai fakatauhele he tau mena fakatufono he tau aho takitaha.
11. Ko hai i tua he tau hikiaga he fakatokatokaaga he vahaloto he tau tagata ha Iehova, ti ko e heigoa e fua he tau hikiaga nei?
11 Ko hai i tua he tau hikihikiaga tolomaki ki mua nei? Nakai fai ka ko Iehova ko e Atua. Ko ia haia ne pehe: “To tamai e au e auro.” Ti matutaki atu a ia ke pehe: “To eke foki e au hau a tau iki ke mafola, mo e hau a tau pule ke tututonu.” E, ko Iehova kua fai fakalagoaga ma e levekiaga he hana tau tagata. Ko e talahau tuai he tupu ki mua he fakatokatokaaga ko e taha puhala kua fakafulufuluola e ia hana tau tagata. Ti ko e fua kua fakamonuina tuai e Tau Fakamoli a Iehova ke he tau puhala loga. Ia Isaia 60:18, kua totou e tautolu: “To nakai tuai logona e favale ke he hau a motu; ko e moumou mo e lipilipi ko e tau mena nakai tuai logona ia ke he hau a motu; ka to fakahigoa aki hau a tau kaupa Ko e fakamouiaga, mo e hau a tau pahala, Ko e fakahekeaga.” Ko e fulufuluola ha ia he tau kupu ia! Ka kua fakamoli fefe a lautolu?
12. Maeke fefe e mafola ke kautu ke he vahaloto he tau Kerisiano moli?
12 Kua onoono fakamakutu e tau Kerisiano moli ki a Iehova ma e hatakiaga mo e takitakiaga, ti ko e fua nukua talahau tuai mai e Isaia: “To fakaako e Iehova hau a fanau oti, ti lahi e monuina he fanau hau.” (Isaia 54:13) Lafi ki ai, kua gahuahua e agaga ha Iehova ki luga he hana tau tagata, ti ko e vala he tau fua he agaga ia ko e mafola. (Kalatia 5:22, 23) Ko e fua he tuaga mafola he tau tagata ha Iehova kua taute a lautolu ko e huaga hahau he lalolagi favale. Ko e tuaga mafola ha lautolu, ne fakave ke he fakaalofa kua ha ha he tau Kerisiano moli ke he falu, ko e kamata tuai haia he nonofo ke he lalolagi fou. (Ioane 15:17; Kolose 3:14) Moli igatia a tautolu mo e fiafia ke olioli mo e fai vala ke he mafola ia, ka tamai e fakaheke mo e lilifu ke he Atua ha tautolu ti ko e matapatu vala a ia he parataiso fakaagaga ha tautolu!—Isaia 11:9.
To Fakatumau e Maama ha Iehova ke Kikila
13. Ko e ha kua moli a tautolu to fakatumau ni e maama ha Iehova ke kikila ki luga he hana tau tagata?
13 To fakatumau nakai e maama ha Iehova ke kikila ke he tau tagata hana? E! Ia Isaia 60:19, 20, kua totou e tautolu: “To nakai tuai eke e la mo maama māu ke he aho; to nakai tuai fakamaama mai he mahina kia koe ke he hana huhulu mai, ka to eke a Iehova māu mo maama tukulagi, to eke foki hau a Atua mo lilifu hau. To nakai tuai to hau a la, to nakai mole atu foki hau a mahina; ha ko e mena to eke a Iehova māu mo maama tukulagi; ti oti ai e tau aho he hau a tagi.” He magaaho ne oti e “tagi” he tau tagata paea fakaagaga he 1919, ne kamata e maama ha Iehova ke kikila ki a lautolu. Molea e 80 e tau fakamui, kua olioli agaia e lautolu e taliaaga ha Iehova ha kua tumau hana maama ke kikila. To nakai oti ai. Hagaao ke he tau tagata tapuaki hana, to nakai “to” e Atua ha tautolu tuga e la po ke “mole atu” tuga e mahina. Ka e, to fakakikila tukumalagi e ia e maama ki luga ha lautolu. Ko e fakamafanaaga homo ue atu ha ia ma tautolu kua nonofo ke he tau aho fakamui he lalolagi pouliuli nei!
14, 15. (a) Ke he puhala fe ne “tututonu” e tau tagata oti he Atua? (e) Hagaao ke he Isaia 60:21, ko e heigoa e fakamoliaga aoga ne onoono atu lahi e tau mamoe kehe ki ai?
14 Logona foki mogonei taha maveheaga kua talahau e Iehova hagaao ke he tau hukui ha Siona he lalolagi, ko Isaraela he Atua. Kua pehe e Isaia 60:21: “To tututonu foki hau a tau tagata oti kana; to eke ma lautolu e motu tukulagi; ko e huli ne to e au, ko e gahua he haku tau lima, ke eke mo fakahekeaga kia au.” He 1919 he magaaho ne liu fakafou e tau Kerisiano fakauku ke gahua, ko lautolu e matakau kehe lahi he tau tagata. He lalolagi agahala kelea nei, kua “talahaua tututonu” a lautolu he fakave ke he tua nakai maueue ha lautolu ke he poa lukutoto ha Keriso Iesu. (Roma 3:24; 5:1) Ti, tuga e tau Isaraela ne fakatoka mai he paeaaga Papelonia, ne maukoloa a lautolu ke he “motu,” ko e motu fakaagaga, po ke hakega he tau gahua, ka olioli auloa a lautolu he parataiso fakaagaga. (Isaia 66:8) Ko e fulufuluola fakaparataiso he motu ia to nakai galo ha kua nakai tatai ai mo Isaraela i tuai, ko Isaraela he Atua ko e motu ka fakamau kua tua fakamoli. Ko e ha lautolu a tua, ha lautolu a fakauka, mo e ha lautolu a fakamakai ka nakai oti e fakalilifu ke he higoa he Atua.
15 Ko e tau tagata oti he motu fakaagaga ia kua o mai ke he maveheaga fou. Kua tohi he tau loto ha lautolu e fakatufono ha Iehova, mo e he fakaveaga he poa lukutoto ha Iesu, ne fakamagalo e Iehova e tau hala ha lautolu. (Ieremia 31:31-34) Kua talahau tututonu e ia a lautolu ko e ‘tau tama’ mo e taute fakamitaki a lautolu ke tuga na mitaki katoatoa a lautolu. (Roma 8:15, 16, 29, 30) Ko e tau hoa he tau mamoe kehe kua fakamagalo foki e tau hala ha lautolu he fakave ke he poa ha Iesu mo e, tuga a Aperahamo, ne talahau tututonu ko e tau kapitiga he Atua ha ko e tua. “Kua unu foki ha lautolu a tau tapulu, mo e fakahina ha lautolu a tau tapulu ke he toto he Punua mamoe.” Mo e tau hoa mamoe kehe nei kua onoono atu ke he taha monuina ofoofogia foki. He mole atu e hao mai he “matematekelea lahi” po ke he mole e fakaliu tu mai, to kitia e lautolu e fakamoliaga moli he tau kupu ha Isaia 60:21 ka eke ai e lalolagi katoa mo parataiso. (Fakakiteaga 7:14; Roma 4:1-3) He magahala ia, “ko e tau tagata mahani molu, to eke ma lautolu e motu; ti fakafiafia foki e lautolu a lautolu ha ko e monuina kua lahi.”—Salamo 37:11, 29.
Matutaki e Tupu ki Mua
16. Ko e heigoa e maveheaga mua ue atu ne taute e Iehova, ti kua fakamoli fefe?
16 He kupu fakahiku he Isaia 60, kua totou e tautolu e maveheaga fakahiku a Iehova he veveheaga nei. Pehe a ia ki a Siona: “Ko e tokogahoa to eke ia mo tokoafe, mo e maga fakateaga to eke ia mo motu malolo; ko au ko Iehova to fakaave au ke eke ke he hana ni a aho.” (Isaia 60:22) He vaha ha tautolu, kua tumau a Iehova ke he hana kupu. He magaaho ne liliu e tau Kerisiano fakauku ke he matagahua he 1919, ne tokogahoa a lautolu—moli, ko e “tokogahoa” ni. Kua tupu e numera ha lautolu he tamai fakahaga e tau Isaraela fakaagaga ki loto. Ti kamata e tau mamoe kehe ke fuhifuhi ki a lautolu ke he numera lahi. Ko e tuaga mafola he tau tagata he Atua, ko e parataiso fakaagaga kua ha ha ai ke he ha lautolu a “motu,” nukua futiaki mai e tokologa ha lautolu ne loto fakamoli ati eke moli ai e “maga fakateaga” mo “motu malolo.” Mogonei, ko e “motu”—ko Isaraela he Atua mo e molea e ono e miliona he “tau tagata kehe”—nukua molea e tokologa mai he tau motu lalahi he lalolagi. (Isaia 60:10) Ko e tau tagata ne nonofo ai kua fakaata e maama ha Iehova, ti taute he mena ia a lautolu ke fulufuluola ke he hana fofoga.
17. Lauia fefe a koe ke he fakatutalaaga nei he Isaia veveheaga 60?
17 E, ko e ati hake ha ia he tua ke manamanatu ke he tau matapatu manatu he Isaia veveheaga 60. Kua mafanatia ha ia ke kitia tuai, kua fita he iloa e Iehova to o hana tau tagata ke he paeaaga fakaagaga mo e to liu fakafou ai. Kua fakaofomate aki a tautolu, ha kua kitia tuai e Iehova e tupu lahi he tau numera he tau tagata tapuaki moli he vaha ha tautolu. Lafi ki ai, ko e mafanatia ha ia ke manatu to nakai tiaki e Iehova a tautolu! Ko e mitaki ha ia he fakamaloloaga to hafagi tumau e tau gutuhala he “maga” ke fakafeleveia fiafia aki a lautolu kua “kotofa ke he moui tukulagi”! (Gahua 13:48) To matutaki ni a Iehova ke kikila ki luga he hana tau tagata. To tumau ni a Siona ke fakatupu e matalahi he fakakikila fakalahi he fanau hana e maama. (Mataio 5:16) Moli kua fifili fakalahi a tautolu mogonei ke nonofo tata ki a Isaraela he Atua mo e ofania e kotofaaga ha tautolu he fakaata e maama ha Iehova!
Maeke Nakai a Koe ke Fakamaama?
• Hagaao ke he totokoaga, ko e heigoa kua mauokafua a tautolu ki ai?
• Maeke fefe e fanau a Siona ke ‘kai e huhu he tau motu’?
• Ke he tau puhala fe ha Iehova ne ‘tamai e apa kula ke totogi aki e akau’?
• Ko e heigoa e tau fua ne ua nukua fakakite mai ia Isaia 60:17, 21?
• Maeke fefe he “tokogahoa” ke eke mo “motu malolo”?
[Tau Huhu he Fakaakoaga]
[Puha/Tau Fakatino he lau 29]
PEROFETAAGA HA ISAIA—Maama ma e Tau Tagata Oti
Ko e alito he tau vala tala he tohi nei ne fakakite ai he fakatutalaaga he tau Fonoaga Fahimotu “Tau Faiaoga he Kupu he Atua” he 2001/02. He matahiku he lauga, ne fakatoka mai he tagata lauga e tohi fou ne mataulu Isaiah’s Prophecy—Light for All Mankind, Volume Ua. He tau fakamua, ne fakatoka mai e Isaiah’s Prophecy—Light for All Mankind, Volume Taha. Fakalataha mo e fakatoka mai he tohi fou nei, ha ha i ai e fakatutalaaga fou ke he laulahi he tau kupu takitaha he tohi ha Isaia. Kua eke moli e tau volume nei mo lagomatai mitaki he fakahokulo e maamaaga mo e loto fakaaue ha tautolu ma e tohi ha Isaia nukua fakaperofeta ne omoomoi ke he tua.
[Tau Fakatino he lau 26]
He tau totokoaga favale, ‘kua fakafulufuluola e Iehova hana tau tagata aki e fakamouiaga’
[Tau Fakatino he lau 27]
Fakaaoga he tau tagata he Atua e tau koloa uho mai he tau motu ke fakatupu aki e tapuakiaga mea
[Fakatino he lau 28]
Kua fakamonuina e Iehova hana tau tagata aki e tupu ki mua he fakatokatokaaga mo e mafola