Kia Lafilafi e Mahani Atua ke he Fakauka Hau
Kia Lafilafi e Mahani Atua ke he Fakauka Hau
‘Lafilafi ke he tua hau e fakauka mo e mahani Atua foki ke he fakauka hau.’—2 PETERU 1:5, 6.
1, 2. (a) Ko e faga tupu fefe ne amanaki ke he tama? (e) Aoga fefe e tupu fakaagaga?
KUA aoga lahi e tupu hake ke he tama, ka kua mua atu e manako ke he tupu hakeaga he tino. Ko e tupu hake he manamanatuaga mo e loto manamanatu nukua amanaki foki ki ai. Fai magaaho, to tuku kehe he tama e tau puhala tama tote hana mo e tupu hake mo tagata tane po ke fifine lahi. Ne hagaao e aposetolo ko Paulo ke he mena nei he magaaho ne tohia e ia: “Ko e vaha tote au ne vagahau au poke tama tote, ne manamanatu au poke tama tote, ne fakafili au poke tama tote; ka kua lahi au, ti toka ai e tau mahani he tama tote.”—1 Korinito 13:11.
2 Ne taute he tau kupu ha Paulo e taha manatu aoga lahi hagaao ke he tupu hake fakaagaga. Ko e tau Kerisiano, kua lata ke holo ki mua mai he eke mo tau tama ikiiki fakaagaga ke eke “mo tau tagata lalahi ke he manamanatu.” (1 Korinito 14:20) Kua lata ia lautolu ke kakapa atu mo e fakamakau ke moua e “fafatiaga he loa kua lata mo e puke ha ia Keriso.” To nakai eke ai mogoia a lautolu ko e “tau tama ikiiki kua hikihikifano, mo e havilia he tau matagi oti he tau kupu fakaako.”—Efeso 4:13, 14.
3, 4. (a) Ko e heigoa kua lata ke taute e tautolu ke eke mo tau tagata fakaagaga? (e) Ko e heigoa e tau fua he mahani Atua ne kua lata ia tautolu ke fakatata, mo e aoga fefe a lautolu?
3 Maeke fefe ia tautolu ke eke mo tau tagata lalahi fakaagaga? Pete kua pauaki ke tupu hake fakatino i lalo he tau tutuaga fa mahani, ko e tupu fakaagaga kua lata ni ke lalilali fakamitaki. Kua kamata ai he moua e iloilo tonu ke he Kupu he Atua mo e gahua ke fakatatau mo e tau mena ne fakaako e tautolu. (Heperu 5:14; 2 Peteru 1:3) Ati taute ai he mena nei a tautolu ke fakatata e tau fua he mahani Atua. Ke tuga e tupu hake fakatino mo e hana tau puhala kehekehe foki, ko e tupu hake ke he tau fua mahani Atua kehekehe kua mahani ni ke tutupu he magaaho taha. Ne tohia he aposetolo ko Peteru: “Kia lalilali ai a mutolu ni ke lafilafi e mahani mitaki ke he tua ha mutolu, kia lafilafi foki e iloilo ke he mahani mitaki, kia lafilafi foki e nakai matagaoi ke he iloilo, mo e lafilafi e fakauka ke he nakai matagaoi, mo e mahani Atua foki ke he fakauka, kia lafilafi foki e fakaalofa ke he tau matakainaga ke he mahani Atua, ko e fakaalofa foki ke he fakaalofa ke he tau matakainaga.”—2 Peteru 1:5-7.
4 Ko e tau fua takitaha ne tohi hifo e Peteru kua aoga lahi, ti nakai lata ke tiaki taha. Ne lafi e ia: “Ko e mena ka ha ia mutolu e tau mena ia, mo e fakaloga, ti uta ai a mutolu mo tau tagata kua nakai teva, po ke teao ke he maama mitaki ke he Iki ha tautolu ko Iesu Keriso.” (2 Peteru 1:8) Kia mamata atu a tautolu ke he latatonu ke lafi e mahani Atua ke he fakauka ha tautolu.
Ko e Lata ke Fakauka
5. Ko e ha kua lata ia tautolu ke fakauka?
5 Ne fakamatutaki tokoua e Peteru mo Paulo e mahani Atua mo e fakauka. (1 Timoteo 6:11) Ke fakauka kua mua atu e kakano ke fakamalolo hokoia ni i lalo he matematekelea lahi mo e fakatumau ke fagahuatia. Kua putoia ai e fakamanava loa, fakamalolo, mo e mauokafua, nakai galo e amaamanakiaga he magaaho ka fehagaoaki mo e tau kamatamata, tau fakalavelave, mo e tau fakaohoohoaga, po ke favaleaga. Ke tuga a lautolu ne nonofo mo e “mahani Atua kia Keriso Iesu,” kua amanaki a tautolu ke favale mai. (2 Timoteo 3:12) Kua lata ai ia tautolu ke fakauka kaeke ke fakamoli e fakaalofa ha tautolu ma Iehova mo e feaki e tau fua ne kua lata ma e fakamouiaga. (Roma 5:3-5; 2 Timoteo 4:7, 8; Iakopo 1:3, 4, 12) Ka noa mo e fakauka, to nakai moua e tautolu e moui tukulagi.—Roma 2:6, 7; Heperu 10:36.
6. Ko e heigoa e kakano ke fakauka ke he fakahikuaga?
6 Pete ko e mitaki fefe e kamataaga ha tautolu, ko e mena ne mua ko e ha ha ia tautolu e fakauka. Ne pehe a Iesu: “Ko ia ke tumau ato hoko ke he fakaotiaga, to fakamoui na ia.” (Mataio 24:13) E, kua lata ia tautolu ke fakauka ke he fakahikuaga, pete ko e fakahiku a ia he ha tautolu a mouiaga nei po ke fakahikuaga he fakatokaaga kelea nei. Ke he taha mena fe ni, kua lata ia tautolu ke fakatumau e mahani fakamoli ha tautolu ke he Atua. Ka e, ka nakai lafilafi e mahani Atua ke he fakauka ha tautolu, to nakai maeke ia tautolu ke fakafiafia a Iehova, mo e to nakai moua e tautolu e moui tukulagi. Ka ko e heigoa e mahani Atua?
Ko e Kakano he Mahani Atua
7. Ko e heigoa e mahani Atua, mo e heigoa ne omoi he mahani Atua a tautolu ke taute?
7 Ko e mahani Atua ko e fakahekeaga, tapuaki, mo e fekafekau fakatagata ki a Iehova ko e Atua mai he loto fakamoli ke he pule katoatoa hana he lalolagi mo e lagi katoatoa. Ke fakagahuahua e mahani Atua he fakalilifu ki a Iehova, kua lata ke moua e tautolu e iloilo tonu hagaao ki a ia mo e tau puhala hana. Kua lata ia tautolu ke manako ke iloa fakatagata mo e ke iloa lahi e Atua. To omoi he mena nei a tautolu ke feaki e loto mokoina ki a ia, ne kua fakakite he tau gahua mo e puhala he moui ha tautolu. Kua lata ia tautolu ke manako ke tuga lahi a Iehova—ke fifitaki e tau puhala hana mo e fakaata e tau fua mo e aga fakaperesona hana. (Efeso 5:1) Haia, kua fakaohooho he mahani Atua a tautolu ke manako ke fakafiafia e Atua ke he tau mena oti ne taute e tautolu.—1 Korinito 10:31.
8. Tuilima fefe e mahani Atua mo e fakamoli katoatoa?
8 Ke maeke ke fakagahua e mahani Atua moli, kua lata ia tautolu ke tapuaki katoatoa ki a Iehova, he nakai fakaata ha mena foki ke fakatauhele aki e tuaga hana he tau loto ha tautolu. Ko e Tufuga ha tautolu, kua ha ha ia ia e tonuhia ke he fakamoli katoatoa ha tautolu. (Teutaronome 4:24; Isaia 42:8) Moha ia, kua nakai fakaohooho e Iehova a tautolu ke tapuaki a ia. Kua manako a ia ke he fakamoli fakamakai ha tautolu. Ko e fakaalofa ha tautolu ma e Atua, ne fakave ke he iloilo tonu ki a ia, ne omoi a tautolu ke fakamea e tau momoui ha tautolu mo e taute e tukuleleaga katoatoa ki a ia ti momoui mogoia hagaao ki ai.
Atihake e Fakafetuiaga mo e Atua
9, 10. Maeke fefe a tautolu ke atihake mo e fakatumau e fakafetuiaga tata mo e Atua?
9 He mole e fakamailoga e tukuleleaga ha tautolu ke he Atua he papatiso, kua lata agaia ia tautolu ke atihake e fakafetuiaga fakatagata tata lahi mo ia. Ko e manako ha tautolu ke taute e mena nei mo e ke fekafekau tua fakamoli ki a Iehova nukua omoi ai a tautolu ke fakatumau ke fakaako e Kupu hana mo e manamanatu fakahokulo ki ai. He fakaata e tautolu e agaga he Atua ke gahuahua ke he tau manamanatuaga mo e tau loto ha tautolu, kua hokulo ai e fakaalofa ha tautolu ma Iehova. Ko e fakafetuiaga ha tautolu mo ia kua fakatumau ke eke mo mena aoga lahi he tau momoui ha tautolu. Kua mailoga e tautolu a Iehova ko e Kapitiga mitaki lahi ha tautolu mo e manako ai ke fakafiafia a ia ke he tau magaaho oti. (1 Ioane 5:3) Ko e fiafia ha tautolu ke he fakafetuiaga mitaki ha tautolu mo e Atua kua tupu ki mua, ti kua fakaaueina a tautolu he fakaako fakaalofa e ia a tautolu mo e fakahako a tautolu ke he tau mena kua lata.—Teutaronome 8:5.
10 Ane mai nakai fakamakamaka a tautolu ke fakamalolo e fakafetuiaga uho ha tautolu mo Iehova, to maeke ai ke maaki kehe. Kaeke pihia, to nakai ko e hepe he Atua, ha kua “nakai ni mamao a ia mo tautolu takitokotaha.” (Gahua 17:27) Ko e fiafia ha ia ha tautolu he nakai fakauka e Iehova e puhala ke o atu ki a ia! (1 Ioane 5:14, 15) Moli, kua lata ia tautolu ke gahua fakalahi ke fakatumau e fakafetuiaga fakatagata mo Iehova. Ka kua lagomatai e ia a tautolu ke fakatata atu ki a ia he foaki ki a tautolu oti e tau foakiaga ne lata ia tautolu ke atihake mo e fakatumau aki e mahani Atua. (Iakopo 4:8) Maeke fefe ia tautolu ke fakaaoga katoatoa e tau foakiaga fakaalofa oti nei?
Kia Fakatumau ke Malolo Fakaagaga
11. Ko e heigoa falu a fakakiteaaga he mahani Atua ha tautolu?
11 Ko e fakaalofa hokulo ha tautolu ma e Atua ka fakaohooho a tautolu ke fakatata e hokulo he ha tautolu a mahani Atua, ke fakalautatai atu ke he fakatonuaga ha Paulo: “Kia lalilali atu a koe kia eke a koe mo tagata kua fiafia ki ai e Atua, ko e ekegahua nakai fai mena ke mā ai, kua fakatokatoka fakahako e kupu moli.” (2 Timoteo 2:15) He taute e mena nei, kua lata ia tautolu ke taute tumau e fakaholoaga mitaki he fakatumau ke fakaako e Tohi Tapu, o ke he tau feleveiaaga, mo e fakalataha ke he fekafekauaga he fonua. Kua maeke foki ia tautolu ke fakatata tumau ki a Iehova he “liogi nakai noa.” (1 Tesalonia 5:17) Ko e tau fakakiteaga kakano lahi anei he mahani Atua ha tautolu. Ke fakaheu taha ia lautolu ka tamai e gagao fakaagaga mo e taute a tautolu ke fakalolelole ke he tau lagatau ha Satani.—1 Peteru 5:8.
12. Maeke fefe a tautolu ke kautu mai he tau kamatamata?
12 He fakatumau ke fakamalolo mo e hakahakau fakaagaga ka lagomatai foki a tautolu ke fehagaoaki mo e tau kamatamata loga ne moua e tautolu. Ko e tau kamatamata kua liga mai he tau punaaga ne kua maeke ke kamatamata fakalahi a tautolu. Kua uka lahi ke fakauka ke he tau kehekeheaga, totokoaga, mo e favaleaga he magaaho ka tupu mai ai ia lautolu he magafaoa tata, tau faoa, po ke tau tuuta kaina. Ko e tau peehiaga hagahagakelea ke fakahui e tau fakaakoaga faka-Kerisiano ha tautolu ka liga mafuta hake he tau fale gahua ha tautolu po ke he aoga. Ko e loto mamahi, gagao, mo e fakaagitau ka fakalolelole fakatino a tautolu mo e taute ai ke uka lahi ke fahia ke he tau kamatamataaga he tua. Ka kua maeke ia tautolu ke kautu ke he tau kamatamata oti kaeke ukufeke a tautolu ke he “tau mahani mitaki mo e tau mahani Atua; kua fakatalitali mo e foli atu kia hoko mai e aho he Atua.” (2 Peteru 3:11, 12) Mo e maeke ia tautolu ke fakatumau e fiafia ha tautolu he taute pihia, he mauokafua ke he fakamonuinaaga he Atua.—Tau Fakatai 10:22.
13. Ko e heigoa kua lata ia tautolu ke taute kaeke ke fakatumau a tautolu ke fakagahuahua e mahani Atua?
13 Pete he fakamahao atu a Satani ki a lautolu ne fakagahuahua e mahani Atua, kua nakai lata ia tautolu ke matakutaku. Ko e ha? Ha kua ‘iloa e Iehova ke laveaki mai e tau tagata mahani Atua kua loto katoa mai he tau kamatamata.’ (2 Peteru 2:9) Ke fakauka ke he tau kamatamata mo e mailoga moli e laveaki pihia, kua lata ia tautolu ke “tiaki e tautolu e tau mahani hepehepe, katoa mo e tau manako lahi he lalolagi, . . . [mo e] nonofo fakalatalata a tautolu mo e tututonu katoa mo e mahani Atua ke he mouiaga nai.” (Tito 2:12) Ko e tau Kerisiano, kua lata ia tautolu ke mataala fakalahi ke nakai maeke ha loleloleaga ne putoia ke he tau manako mo e tau gahua fakatino ke holofa ke he ha tautolu a mahani Atua ti moumou ai. Kia manamanatu a tautolu mogonei ke he falu a fakamatakutaku nei.
Fakaeneene ke he Tau Matahavala ke he Mahani Atua
14. Ko e heigoa kua lata ia tautolu ke manatu kaeke kua fakaohooho he matahele he velevelekoloa a tautolu?
14Velevelekoloa ko e matahele ke he tokologa. Liga to fakavaia ni e tautolu a tautolu, he “manatu ko e mahani Atua ko e mena ke moua ai e koloa haia.” Ti maeke ai ia tautolu ke loto malolo ke fakahanoa e falanaki ne fakakite he tau katofia talitonu. (1 Timoteo 6:5) Liga hehe foki e fakahikuaga ha tautolu he manatu kua lata ke fakaohooho e Kerisiano mautu ma e kaitalofa ne liga to nakai maeke ia tautolu ke liu totogi. (Salamo 37:21) Ka ko e mahani Atua, nakai ko e mouaaga he tau koloa, ne “toka ai e mena kua talahaua mai ke he mouiaga nai katoa mo ia kua tatali.” (1 Timoteo 4:8) ‘Ha kua nakai ta mai e tautolu ha mena taha ke he lalolagi, ti nakai maeke ke uta kehe ai ha mena,’ kia tutuli fakalahi e tautolu e “mahani Atua mo e fakamate ko e koloa lahi ni haia” mo e fakaata ni e tautolu a tautolu ke ‘fakaaue ke he tau mena kai mo e tau mena ke fakatapulu ai.’—1 Timoteo 6:6-11.
15. Ko e heigoa kua lata ia tautolu ke taute kaeke ke fakamatakutaku mai he tutuliaga fiafia ke fakaapiapi e mahani Atua ha tautolu?
15Ko e tutuliaga he fiafia ka fakaapiapi e mahani Atua. Kua liga lata kia ia tautolu ke taute e tau hikihikiaga mafiti hagaao ke he mena nei? Moli, kua aoga fakatote e fakamahani ke he tau mena he tino mo e fakafiafiaaga. Ka ko e tau palepale pihia kua temotemoai ka fakatatai ke he moui tukulagi. (1 Ioane 2:25) He vaha nei, tokologa kua “manako lahi ke he tau mena ke fiafia ki ai, ka e manako tote ke he Atua; to ha i ai ia lautolu e gati he mahani Atua, ka kua tiaki e lautolu e malolo ne toka ai,” ti kua lata ia tautolu ke fakamamao mai he tau tagata pihia. (2 Timoteo 3:4, 5) Ko lautolu ne peehi ke he mahani Atua kua “tauteute e lautolu e koloa ma lautolu ni ko e fakaveaga mitaki mo e tau aho ne tatali, kia toto atu e lautolu ke he moui tukulagi.”—1 Timoteo 6:19.
16. Ko e heigoa e tau manako agahala ne mahala ai falu he momoui atu ke he tau fakatufono tututonu he Atua, mo e maeke fefe a tautolu ke kautu mai he tau manako nei?
16Ko e kava mo e fakaaoga kelea he tulaki, mahani feuaki, mo e tau manako agahala ka moumou e mahani Atua ha tautolu. He mahala ke he tau mena nei ka utakehe a tautolu mai he moui ke he tau fakatufono tututonu he Atua. (1 Korinito 6:9, 10; 2 Korinito 7:1) Kua fakauka foki a Paulo ke he totokoaga mau he hala he tino. (Roma 7:21-25) Kua lata tonu ma e tau fafatiaga malolo ke kakana kehe aki e tau manatu hehe. Ma e taha mena, kua lata ia tautolu ke fakamalolo ke fakatumau ke mahani mea. Ne talamai e Paulo ki a tautolu: “Kia tamate e mutolu ha mutolu a tau fahi tino ha he lalolagi, ko e feuaki, ko e mahani kelea, ko e manako kelea, ko e foli kelea, mo e mahekeheke, ko e hufeilo ke he tupua haia.” (Kolose 3:5) Ke tamate e tau fahi tino ha tautolu ne hagaaki ke he tau agahala pihia kua lata ke fakamalolo ke maeke ke moumou mo e kakana kehe e tau mena ia. Ko e liogi fakamakamaka ma e lagomatai he Atua ka lagomatai a tautolu ke tiaki e tau manako hehe mo e tutuli e tututonu mo e mahani Atua i loto he fakatokaaga kelea nei.
17. Lata ke fefe e onoonoaga ha tautolu ke he akonakiaga?
17Ko e loto mamahi ka fakalolelole e fakauka ha tautolu ti moua ai e lauiaaga hagahagakelea ke he mahani Atua ha tautolu. Tokologa e tau fekafekau ha Iehova ne kua fakafita ke he loto mamahi. (Numera 11:11-15; Esera 4:4; Iona 4:3) Ti mua atu he lauia kelea a tautolu he loto mamahi kaeke faihoani ai he ita ha kua hukia a tautolu po ke ha kua fakamamafa mai e hatakiaga mo e akonakiaga. Ka ko e hatakiaga mo e akonakiaga, ko e fakamoliaga he tau mena faka-Atua mo e manamanatuaga fakaalofa. (Heperu 12:5-7, 10, 11) Kua lata e akonakiaga ke mailoga nakai ko e fakahala ka ko e puhala ke fakaako a tautolu ke he puhala he tututonu. Kaeke loto fakatokolalo a tautolu, to fakaaueina mo e talia e tautolu e tau fakatonuaga, he mailoga ‘ko e tau hatakiaga ne akonaki ai ko e puhala he moui haia.’ (Tau Fakatai 6:23) Maeke he mena nei ke lagomatai a tautolu ke taute e holoaga fakaagaga mitaki he tutuli e mahani Atua.
18. Ko e heigoa kua lata ia tautolu ke taute he magaaho ka hokotia atu ke he tau hukia fakatagata?
18Ko e tau nakai femaamaaki mo e tau hukia fakatagata ka paleko mai ke he mahani Atua ha tautolu. Liga to fakatupu he tau mena ia e fakaatukehe po ke omoi falu ke taute e tau lakaaga goagoa he vevehe kehe ne lautolu a lautolu mai he tau matakainaga fakaagaga ha lautolu. (Tau Fakatai 18:1) Ka kua mitaki ke manatu, ka taofi e ita po ke fakafualoto ke he falu to maeke ke lauia hagahagakelea ai e fakafetuiaga ha tautolu mo Iehova. (Levitika 19:18) Ko e moli, “ko ia kua nakai fakaalofa ke he matakainaga hana kua kitia, maeke fefe ia ia ke fakaalofa ke he Atua, kua nakai kitia e ia?” (1 Ioane 4:20) He hana Lauga he Mouga, ne peehi e Iesu e lata ke taute e tau lakaaga mafiti ke fakamafola aki e tau lekua fakatagata. Ne tala age e ia ke he tau tagata fanogonogo hana: “Kaeke foki ke ta atu e koe hau a poa ke he fatapoa, ti manatu ai a koe ke he hau a matakainaga ha i ai taha mena kua mamahi ai kia koe. Kia toka ai hau a poa i mua he fatapoa, ka e fano a a koe ke fakafeilo fakamua mo e hau a matakainaga, ti hau ai a koe, mo e ta atu hau a poa.” (Mataio 5:23, 24) Liga lagomatai he ole fakamolemole ke tului e hukia ne fakatupu he tau kupu po ke tau gahua nakai totonu. Kua maeke e fai veha ke tului mo e liu ke moua e tau fakafetuiaga mafola kaeke ole fakamagalo mo e fakailoa kua nakai taute fakamitaki e tautolu e tau lekua ia. Ne foaki foki e Iesu e falu a fakatonuaga hagaao ke he fehagaiaga mo e tau mena uka. (Mataio 18:15-17) Ko e fiafia ha ia ha tautolu he magaaho ka kautu ai e tau laliaga ke fakamafola e tau mena vihi!—Roma 12:18; Efeso 4:26, 27.
Muitua ke he Fakafifitakiaga ha Iesu
19. Ko e ha ne kua aoga lahi ai ke fifitaki ke he fakafifitakiaga ha Iesu?
19 To tautaomi mai e tau kamatamata ki a tautolu, ka kua nakai lata ke hekeheke takina ai a tautolu mai he poitufi ma e moui tukulagi. Manatu na maeke ia Iehova ke laveaki a tautolu mai he kamatamata. He “tuku kehe e tautolu e tau mena mamafa oti kana” mo e “tafepoi fakauka a tautolu ke he poitufi kua toka ki mua ha tautolu,” kia “kikite atu [a tautolu] kia Iesu, ko e kamataaga mo e katoatoaaga he tua.” (Heperu 12:1-3) He kumikumi fakalahi atu ke he fakafifitakiaga ha Iesu mo e ukufakina ke fifitaki ki a ia ke he tau kupu mo e tau gahua ka lagomatai a tautolu ke feaki e mahani Atua mo e fakatata ai ke he puhala ne mua.
20. Ko e heigoa e tau palepale ne fua mai he tutuli e fakauka mo e mahani Atua?
20 Ko e fakauka mo e mahani Atua kua fegahuaaki ke lagomatai a tautolu ke fakamoli aki ha tautolu a fakamouiaga. He fakatata e tau fua uho nei, kua maeke ia tautolu ke fakatumau ke tua fakamoli he fekafekauaga tapu ha tautolu ke he Atua. Pete foki ka ha i lalo he kamatamata, to eke ma tautolu e fiafia he logona hifo e fakaalofa hofihofi mo e fakamonuina ha Iehova ha kua fakauka a tautolu mo e hane fa e fakagahuahua e mahani Atua. (Iakopo 5:11) Mua atu, ne fakamafana mai ni e Iesu ki a tautolu: “Ko e ha mutolu a fakauka, kia moua ai ha mutolu a moui.”—Luka 21:19.
To Tali Fefe e Koe?
• Ko e ha e fakauka ne aoga ai?
• Ko e heigoa e mahani Atua, mo e kitia fefe ai?
• Maeke fefe ia tautolu ke atihake mo e fakatumau e fakafetuiaga tata mo e Atua?
• Ko e heigoa falu a fakamatakutaku ke he mahani Atua ha tautolu, mo e maeke fefe a tautolu ke kalo mai ia lautolu?
[Tau Huhu he Fakaakoaga]
[Tau Fakatino he lau 8, 9]
Ko e mahani Atua kua fakatata ke he tau puhala loga