Omoomoi he “Tau Mana he Atua”

“Kua fanogonogo atu a tautolu kia lautolu ha ne talahau mai ke he tau vagahau ha tautolu e tau mana he Atua.”—GAHUA 2:11.

1, 2. Ko e heigoa e mena ofogia ne tupu i Ierusalema he Penetekoso 33 V.N.?

HE TAHA pogipogi he vaha tau tupu he tau 33 V.N., ne tupu e mena ofogia ke he matakau he tau tagata tane mo e tau fifine, ko e tau tutaki ha Iesu Keriso ne fakapotopoto ke he loto kaina i Ierusalema. “Ati fakaofo mai ai he tomumu mai he lagi tuga ne matagi kua havili lahi mai, kua puke oti ai e fale ne nonofo ai a lautolu. Ne kitia foki e lautolu e tau alelo tuga ne afi . . . ne fakapuke foki a lautolu oti ke he [a]gaga [t]apu, kua kamata ai he vagahau ke he tau vagahau kehekehe.”—Gahua 2:2-4, 15.

² Ne fakapotopoto e moto tagata tokologa ki mua he fale. Ia lautolu ia ko e tau Iutaia ne fanau he tau motu kehe, “na matakutaku ke he Atua” nukua o mai ki Ierusalema ke fakamanatu e galue he Penetekoso. Ne ofo a lautolu he logona e lautolu takitokotaha e tau tutaki ne vagahau ke he tau vagahau motu ha lautolu ni ‘ke he tau mana he Atua.’ Fefe la e mena ia ha ko lautolu oti ne vagahau ko e tau tagata Kalilaia?—Gahua 2:5-8, 11.

3. Ko e heigoa e ogo ne tala age he aposetolo ko Peteru ke he moto tagata he Penetekoso?

³ Taha he tau Kalilaia ia ko e aposetolo ko Peteru. Ne fakamaama e ia he tau fahi tapu fakamua kua kelipopo he tau tagata kelea a Iesu Keriso. Pete ni ia, kua fakatu hake he Atua e Tama hana mai he mate. He mole, ne finatu a Iesu  ke he tokologa he tau tutaki hana, mo Peteru mo e falu foki ne hane ha ha ai mogonei. He tau aho hogofulu fakamua, ne haele hake a Iesu ke he lagi. Ko ia ne liligi hifo e agaga tapu ki luga he tau tutaki hana. Fai kakano nakai e mena nei ma lautolu ne fakamanatu e Penetekoso? E, fai. Ne fakatokatoka he mate ha Iesu e puhala ma lautolu ke moua e fakamagaloaga ma e tau hala ha lautolu mo e ke moua e “mena foaki noa mai, ko e [a]gaga [t]apu haia” kaeke fakagahuahua e lautolu e tua ki a ia. (Gahua 2:22-24, 32, 33, 38) Ti fefe e tali ha lautolu ne ha ha ai ke he “tau mana he Atua” kua logona e lautolu? Mo e maeke fefe he fakamauaga nei ke lagomatai a tautolu ke fakatokoluga aki e fekafekau ni ha tautolu ki a Iehova?

Omoi ke Gahua!

4. Ko e heigoa e perofetaaga ha Ioelu ne fakamoli he aho he Penetekoso 33 V.N.?

⁴ Ha kua moua e agaga tapu, ne nakai fakatuai e tau tutaki i Ierusalema ke fakamatala e tala mitaki he fakamouiaga mo e falu, kamata ai mo e moto tagata ne fakapotopoto ki ai he pogipogi ia. Ne fakamoli he fakamatalaaga ha lautolu e perofetaaga mitaki lahi, ne fakamau e Ioelu he tau senetenari ne valu fakamua, ko e tama tane ha Petueli: “To liligi hifo e au haku [a]gaga ki luga he tau tagata oti; ti perofeta ai ha mutolu a tau tama tane, mo e ha mutolu a tau tama fifine, to miti ha mutolu a tau patu, to kitia he tau fuata ha mutolu e tau fakakiteaga. To liligi hifo foki e au haku [a]gaga ke he tau fekafekau mo e tau fekafekau fifine ke he aho ia . . . to hoko mai e aho a Iehova kua lahi mo e matakutakuina.”—Ioelu 1:1; 2:28, 29, 31; Gahua 2:17, 18, 20.

5. Ko e kakano fe ne perofeta ai e tau Kerisiano he senetenari fakamuaaki? (Kikite matahui tala.)

⁵ Kua pehe kia e mena nei to fakatu hake he Atua e atuhau katoa he tau perofeta, ko e tau tane mo e tau fifine, ke he puhala ia ha Tavita, Ioelu, mo Tapora, mo e fakaaoga a lautolu ke talahau tuai e tau mena anoiha? Nakai. Ko e ‘tau tama tane mo e tau tama fifine, tau fekafekau mo e tau fekafekau fifine’ Kerisiano to perofeta mai ke he kakano kua omoi he agaga ha Iehova a lautolu ke fakapuloa e “tau mana” ne taute e Iehova mo e ka liu taute foki. Ti to eke a lautolu mo tau tagata liliu kupu ma e Mua ue Atu. * Ka e fefe, mogoia, e tali he tau tagata?—Heperu 1:1, 2.

6. He logona e lauga ha Peteru, kua omoi e moto tagata ke taute e heigoa?

⁶ He mole e logona he moto tagata e fakamaamaaga ha Peteru, ne omoomoi ai e tokologa ia lautolu ke gahuahua. Ne ‘talia e lautolu hana kupu mo e fiafia’ mo e ‘papatiso ai, mo e he aho ia kua lafi ai po ke tolu e afe tagata.’ (Gahua 2:41) Ha ko e tau Iutaia moli mo e tau tagata liliuina faka-Iutaia, kua fita he ha ha ia lautolu e iloilo he tau Tohiaga Tapu. He fakalataha e iloilo ia mo e tua ke he mena ne ako mai e lautolu ia Peteru, ne moua ai e matapatuaga ma lautolu ke papatiso “ke he higoa he Matua, mo e Tama, mo e [a]gaga [t]apu.” (Mataio 28:19) He mole e papatiso ha lautolu ne “tumau a lautolu ke he tau kupu he tau aposetolo.” He magaaho taha ia ni, ne kamata a lautolu ke fakamatala e tua moua fou ha lautolu ke he falu. Moli ni, “kua nonofo mau a lautolu ke he faituga mo e loto fakalataha ke he taha  aho mo e taha aho, . . . kua fakaheke atu a lautolu ke he Atua, kua ofania foki he motu oti kana.” Ti ko e fua he gahua fakamatala nei, “kua lafilafi he Iki ke he ekalesia ke he taha aho mo e taha aho a lautolu kua fakamomoui.” (Gahua 2:42, 46, 47) Nukua fakatutu ai e tau fakapotopotoaga Kerisiano ke he tau motu loga ne nonofo ai e tau tagata talitonu fou nei. Nakai fakauaua, kua ha ha ai e tupu tolomaki nei, ke he taha vala, ha ko e tau laliaga fakamakutu ha lautolu ke fakamatala e “tala mitaki” he magaaho ne liliu a lautolu ke he tau kaina.—Kolose 1:23.

Kua Gahua Malolo e Kupu he Atua

7. (a) Ko e heigoa ne futia e tau tagata he tau motu oti ke he fakatokatokaaga ha Iehova he vaha nei? (e) Ko e heigoa kua kitia e koe ke fakatolomaki aki e fonua he lalolagi katoa mo e he matakavi tata? (Kikite matahui tala.)

⁷ Ka e kua a lautolu ne manako ke eke mo tau fekafekau he Atua he vaha nei? Kua lata foki ia lautolu ke faala fakamitaki e Kupu he Atua. He taute pihia e lautolu, to o mai a lautolu ke iloa a Iehova ko e Atua “fakaalofa hofihofi, mo e fakaalofa noa; kua fakatuai hana ita, to lahi e fakaalofa, to fakamoli.” (Esoto 34:6; Gahua 13:48) Ne iloa e lautolu e foakiaga mokoina ha Iehova ke he lukutoto he puhala ia Iesu Keriso, ne fakamaligi e toto ke fakamea a lautolu mai he tau hala oti kana. (1 Ioane 1:7) Kua o mai foki a lautolu ke loto fakaaue ke he finagalo he Atua ke ha ha ai e ‘liu tutu mai ma lautolu ne tututonu katoa mo lautolu ne hepehepe.’ (Gahua 24:15) Ko e ofania ma e Punaaga he “tau mana” nei ne fakapuke e tau loto ha lautolu, mo e omoi ai a lautolu ke fakamatala e tau kupu moli uho nei. Ati eke ai a lautolu mo tau fekafekau tukulele mo e papatiso he Atua mo e fakatumau ke ‘fakatupu e maama mitaki ke he Atua.’ *—Kolose 1:10e; 2 Korinito 5:14.

8-10. (a) Fakakite moli fefe he mena ne tupu ke he fifine Kerisiano na “gahua malolo” e Kupu he Atua? (e) Ko e heigoa ne fakaako he mena tupu nei ki a koe hagaao ki a Iehova mo e tau fehagaiaga hana mo e hana tau fekafekau? (Esoto 4:12)

⁸ Ko e iloilo ne moua he tau fekafekau he Atua mai he fakaakoaga Tohi Tapu ha lautolu nakai ko e mena teao. Ko e iloilo pihia kua omoomoi e tau loto ha lautolu, hiki e tau puhala manamanatu ha lautolu, mo e eke ai mo taha vala ia lautolu. (Heperu 4:12) Ke fakatai ki ai, ne gahua e fifine ne higoa ko Camille ko e tagata leveki ke he tau matua fuakau. Taha e matua fuakau ne leveki e ia ko Martha, ko e taha he Tau Fakamoli a Iehova. Ha kua kai lahi he gagao dementia a Martha, ti kua lata a ia ke leveki tumau. Kua lata ni ke fakamanatu ki a ia ke kai—mo e ke folo e mena kai hana. Pete ia, ne taha e mena ne mauloto lahi e Martha, ka kitia ai e tautolu.

⁹ He taha aho, ne kitia e Martha a Camille ne tagi he fakaagitau ke he falu lekua fakatagata. Ne fakalago atu a Martha ki a Camille mo e uiina a ia ke fakaako e Tohi Tapu mo ia. Ka e maeke kia e tagata gagao tuga a Martha ke taute e fakaakoaga Tohi Tapu? E, kua maeke ia ia! Pete kua galo lahi e manamanatuaga hana, kua nakai nimo e Martha e Atua mana hana; nakai nimo foki e ia e tau kupu moli uho ne ako e ia mai he Tohi Tapu. He magahala he fakaakoaga, ne tala age e Martha ki a Camille ke totou e tau paratafa takitaha, fuke ke he tau Tohiaga Tapu ne tohi ai, totou e tau huhu i kelekele he lau tohi, mo e tali ai. Ne fai magaaho e mena nei, mo e pete ni ko e tau matulituli ha Martha, ne holo ki mua e iloilo ha Camille ke he Tohi Tapu. Ne mailoga e Martha kua lata ia Camille ke lafi atu mo e falu ne fiafia ke fekafekau ke he Atua. He mauloto e mena ia, ne age e ia ke he tagata fakaako hana e tapulu mo e tau tevae, ke fai mena mitaki a Camille ke tui ka finatu a ia ke he feleveiaaga fakamua hana he Fale he Kautu.

¹⁰ Ne omoi he lagomatai mokoina, fifitakiaga, mo e tua ha Martha a Camille. Ne talahau e ia ko e tau mena ne lali a Martha ke fakaako ki a ia kua mai he Tohi Tapu ti kua lahi mahaki e aoga, ha kua teitei ia Martha ke nimo e tau mena oti ka e nakai ko e tau mena ne ako e ia mai he tau Tohiaga Tapu. Fakamui, he magaaho ne  fakaholo atu a Camille ke he taha fale gahua, ne mailoga e ia kua lata a ia ke taute taha mena. He magaaho fakamua, ne hu atu a ia ki loto he Fale he Kautu, he tui e tapulu mo e tau tevae ne age e Martha ki a ia, mo e ole ke moua e fakaakoaga Tohi Tapu. Ne holo ki mua a Camille mo e papatiso ai.

Omoomoi ke Fakaata e Tau Tutuaga ha Iehova

11. Ke lafi ke he fakamakutu ke he gahua fakamatala, maeke fefe ia tautolu ke fakatata kua omoomoi he fekau he Kautu a tautolu?

¹¹ He vaha nei, kua mole e ono miliona he Tau Fakamoli a Iehova hane tuga a Martha ti ko Camille mogonei, kua fakamatala e “tala mitaki nai he kautu” ke he lalolagi katoa. (Mataio 24:14; 28:19, 20) Ke tuga e tau Kerisiano he senetenari fakamuaaki, kua omoi fakahokulo he “tau mana he Atua” a lautolu. Ne loto fakaaue a lautolu ha kua monuina a lautolu ke fua e higoa ha Iehova ti kua liligi hifo e ia e agaga tapu ki a lautolu. Ko e fua, nukua fakamakamaka a lautolu ke ‘mahani ke lata mo e Iki, kia fiafia mai a ia,’ he fakagahuahua e tau tutuaga hana ke he tau puhala oti he tau momoui ha lautolu. Ke he falu a mena, kua lata ke fakalilifu ke he tau tutuaga he Atua hagaao ke he tapulu mo e tauteuteaga.—Kolose 1:10a; Tito 2:10.

12. Ko e heigoa e fakatonuaga pauaki ke he tapulu mo e tauteuteaga ne moua e tautolu ne fakamau he 1 Timoteo 2:9, 10?

¹² E, nukua fakatoka e Iehova e tau tutuaga hagaao ke he tauteuteaga fakatagata ha tautolu. Ne fakakite he aposetolo ko Paulo e falu fakatufono he Atua ke he mena nei. “Kua pihia mo e tau fifine, kia taute e lautolu a lautolu ke he tau tapulu kua gali, mo e maimaina mo e mahani fakalatalata; aua neke taute mo e lauulu fili, po ke auro, po ke tau penina, po ke tapulu fakafua lahi; ka kia taute a lautolu ke he tau gahua mitaki, (ko e mena haia kua lata mo e tau fifine kua talahaua e lautolu a lautolu kua mahani  Atua.)” * Ko e heigoa ne ako mai e tautolu he tau kupu nei?—1 Timoteo 2:9, 10.

13. (a) Ko e heigoa e kakano ke ‘gali e tapulu’? (e) Ko e ha kua lata ia tautolu ke talahau kua mitaki lahi e tau tutuaga ha Iehova?

¹³ Ne fakakite he tau kupu ha Paulo kua lata he tau Kerisiano ke “taute e lautolu a lautolu ke he tau tapulu kua gali.” Kua nakai lata a lautolu ke fulufagu, fakateaga, po ke veveveve e tau tauteuteaga. Ko e tau tagata oti, pihia foki a lautolu ne mativa, kua lata ke mailoga e tau tutuaga tonu ia he mataala kua mitaki, mea, mo e gali e tau mena tui ha lautolu. Ke fakatai ki ai, he tau tau oti, kua loga e tau kilomita ne o hui ai e Tau Fakamoli he taha motu i Amerika Toga he vaouhi, oti ti lahi foki e tau matahola ne heheke he vaka ke o atu ke he fonoaga fahi motu ha lautolu. Kua nakai kehe ke to taha ke he vaitafe po kua tekaia e mena tui hana he la akau he fenoga hana. Ti he magaaho ka hohoko atu a lautolu ke he matakavi ka taute ai e fonoaga, kua veveveve e tau taute ha lautolu. Ati fai magaaho a lautolu ke tuitui e tau mahina, mo e tau sipi tapulu mo e unu mo e auli e tau mena tui ka tui e lautolu ke he fonoaga. Kua ofania e lautolu e uiina ha lautolu ke kai he laulau ha Iehova, ti kua manako a lautolu ke tui e tau mena tui kua lata.

14. (a) Ko e heigoa e kakano ke tapulu mo e “maimaina mo e mahani fakalatalata”? (e) Ko e heigoa kua lata ma tautolu ke tapulu ‘tuga e tau tagata talahaua kua mahani Atua’?

¹⁴ Ne fakakite mai e Paulo kua lata ia tautolu ke tapulu mo e “maimaina mo e mahani fakalatalata.” Kakano e mena nei kua nakai lata e tau tauteuteaga ha tautolu ke fia-kitia, fakalialia, hemu, fakatata, po ke putoia lahi ke he fasone. Lafi ki ai, kua lata ia tautolu ke tapulu ke he puhala ne fakatata e ‘talahaua kua mahani Atua.’ Nakai kia foaki he mena ia taha mena ke manamanatu ki ai? Kua nakai pehe ke gali ne tapulu ka o atu ke he tau feleveiaaga Kerisiano, ka oti ti tapulu fakahanoa he falu a magaaho. Ko e tauteuteaga fakatagata kua lata ke fakakite e aga mahani Atua mo e fakalilifu ha ko e tau Kerisiano a tautolu mo e tau fekafekau ke he 24 e matahola he aho. Kua mahinohino ai ko e tau taute gahua mo e taute aoga ha tautolu kua lata ni ma e foliga he tau gahua ka taute e tautolu. Pete ia, kua lata agaia a tautolu ke gali e tapulu fakalataha mo e lilifu. Kaeke fakatata tumau he tapulu ha tautolu e taofiaga ha tautolu ke he Atua, to nakai fakauaua a tautolu ke fakamatala he tau magaaho noa he kua ma he tau tauteuteaga ha tautolu.—1 Peteru 3:15.

‘Aua Fakaalofa ke he Lalolagi’

15, 16. (a) Ko e ha kua aoga ai ke kalo mai a tautolu he fifitaki e lalolagi ke he puhala tapulu mo e tauteuteaga? (1 Ioane 5:19) (e) Ko e heigoa e kakano mitaki ne kua lata ia tautolu ke kalo mai he putoia lahi ke he fasone he tau tapulu mo e tauteuteaga?

¹⁵ Ko e fakatonuaga ne fakamau he 1 Ioane 2:15, 16 kua foaki mai foki e takitakiaga ke he fifiliaga ha tautolu ke he tapulu mo e tauteuteaga. Kua totou e tautolu: “Aua neke fakaalofa a mutolu ke he lalolagi, po ke tau mena ha ha he lalolagi; kaeke kua fakaalofa taha ke he lalolagi, nakai nofo e fakaalofa ke he Matua ke he loto hana. Ha ko e tau mena oti ha ha he lalolagi, ko e manako lahi he tino, mo e manako lahi he tau  mata, katoa mo e tau mena he mouiaga nai ke hula ki ai, nakai mai he Matua ia, ka e mai he lalolagi.”

¹⁶ Kua tonu lahi ha e fakatonuaga ia! He vaha ne vevela lahi e peehi mai he tau atuhau, kua nakai lata ia tautolu ke fakaata e lalolagi ke pule ke he tapulu ha tautolu. Ko e talagaaga he tau tapulu mo e tauteuteaga nukua to hifo e gali he tau tau ne mole laia. Pihia foki e tauteuteaga ma e tau tagata pisinisi mo e he feua pauaki kua nakai tumau ke foaki mai e tapulu kua lata ma e tau Kerisiano. Ko e taha kakano foki ainei ne kua lata ia tautolu ke manamanatu mau ki ai ‘neke mahani foki a tautolu fakalataha mo e lalolagi nai’ kaeke ke momoui a tautolu hagaao ke he tau tutuaga he Atua mo e ‘fakalilifu ai e tau kupu he Atua, ha tautolu a Fakamoui ke he tau mena oti.’—Roma 12:2; Tito 2:10.

17. (a) Ko e heigoa e tau huhu kua lata ia tautolu ke manamanatu ki ai he magaaho ka o ke fakatau koloa po ke fifili taha talagaaga he tapulu? (e) Ko e ha kua lata he ulu magafaoa ke manamanatu ke he tauteuteaga fakatagata ha lautolu he magafaoa?

¹⁷ Ti fakamua to fifili ke fakatau taha tapulu, kua pulotu ke huhu ki a koe ni: ‘Ko e ha ne manako au ke he tapulu nei? Kua tatai kia mo e he taha tagata fakafiafia talahaua—ko ia ne fiafia lahi au ki ai? Na tui kia e lautolu he tau kege puhalatu po ke he matakau ne fakahakehake e agaga tu kehe mo e totoko?’ Kua lata foki ia tautolu ke kikite fakamitaki ke he tapulu. Kaeke ko e tapulu fifine po ke patutiti, ka e fefe e loa? Fefe e talagaaga? Kua gali mo e lilifu kia e tapulu, po kua makoto, hemu, po ke veveveve? Kia huhu ki a koe ni, ‘To fakalolelole nakai e falu ka tui e au e tapulu e?’ (2 Korinito 6:3, 4) Ko e ha kua lata ke manamanatu a tautolu ke he tau mena ia? Ha kua talahau e Tohi Tapu: “Ha ko Keriso ni, nakai fakafiafia e ia hana finagalo.” (Roma 15:3) Ko e tau ulu magafaoa Kerisiano kua lata ke manamanatu ke he tauteuteaga ha lautolu he magafaoa. He fakalilifu ke he Atua mua ue atu ne tapuaki e lautolu, kua lata he tau ulu magafaoa ke nakai fakauaua ke foaki e fakatonuaga mamafa mo e mokoina ka lata ai.—Iakopo 3:13.

18. Ko e heigoa ne omoi a koe ke manamanatu fakamitaki ke he tapulu mo e tauteuteaga hau?

¹⁸ Ko e fekau ne fua e tautolu kua mai ni ia Iehova, ko e fakafifitakiaga he lilifu mo e he tapuina. (Isaia 6:3) Kua fakamafana mai e Tohi Tapu ki a tautolu ke fifitaki a ia ko e “tau fanau fakahelehele.” (Efeso 5:1) Ko e tapulu mo e tauteuteaga ha tautolu kua maeke ke fakatata e mitaki po ke kelea ke he Matua he lagi ha tautolu. Moli kua manako a tautolu ke fakafiafia e loto hana!—Tau Fakatai 27:11.

19. Ko e heigoa e tau aoga ne mai he fakapuloa e “tau mana he Atua” ke he falu?

¹⁹ Fefe e manatu hau hagaao ke he “tau mana he Atua” ne ako e koe? Haia, ko e monuina ha a ia ha tautolu ke ako e kupu moli! Ha kua fakagahuahua e tautolu e tua ke he toto fakamaligi ha Iesu Keriso, ati fakamagalo ai e tau hala ha tautolu. (Gahua 2:38) Ko e fua, kua tokanoa ai a tautolu ke vagahau ki mua he Atua. Kua nakai matakutaku a tautolu ke he mate ke tuga a lautolu ne nakai fai amaamanakiaga. Ka kua ha ha ia tautolu e fakamoliaga ha Iesu ko e he taha aho ko ‘lautolu katoa ha he tau tukuaga to logona hana leo, mo e o mai ai.’ (Ioane 5:28, 29) Kua totonu lahi a Iehova he fakakite mai ki a tautolu e tau mena oti nei. Lafi ki ai, ne liligi mai e ia e agaga hana ki a tautolu. Ko e mena ia, ko e fakaaueina ma e tau mena fakaalofa noa oti nei kua lata ke omoi a tautolu ke fakalilifu e tau tutuaga tokoluga hana mo e ke fakaheke a ia mo e fakamakutu, he fakapuloa e “tau mana” nei ke he falu.

[Tau Matahui Tala]

To Tali Fefe e Koe?

• Ko e heigoa e “tau mana” ne logona he tau tagata he Penetekoso 33 V.N., mo e fefe e tali ha lautolu?

• Maeke fefe e taha ke eke mo tutaki ha Iesu Keriso, mo e heigoa ne putoia ke he taute tutaki?

• Ko e ha kua aoga ma tautolu ke manamanatu atu ke he tapulu mo e tauteuteaga ha tautolu?

• Ko e heigoa kua lata ke manamanatu ki ai he magaaho ka fifili ko e gali nakai e tapulu po ke talagaaga?

[Tau Huhu he Fakaakoaga]

[Fakatino he lau 28]

Ne fakapuloa e Peteru kua fakatu mai a Iesu he mate

[Tau Fakatino he lau 30]

Fakatata mitaki nakai e tauteuteaga fakatagata hau ke he Atua ne tapuaki e koe?

[Tau Fakatino he lau 31]

Kua lata he tau matua Kerisiano ke manamanatu atu ke he tauteuteaga ha lautolu he magafaoa