“Ti Fakatata Mai ai a Ia kia Mutolu”

“Nakai ni mamao mai [e Atua] mo tautolu takitokotaha.”—GAHUA 17:27.

1, 2. (a) He magaaho ka kitekite hake ke he lagi muhu fetu, ko e heigoa e huhu ka liga huhu e tautolu hagaao ke he Tufuga? (e) Fakamafana mai fefe e Tohi Tapu ki a tautolu kua mua atu e aoga he tau tagata ke he tau mata a Iehova?

KUA kitekite hake nakai a koe ke he lagi muhu fetu he po maamateka mo e puke ai he nava ofogia lahi? Nukua fakatupu ai he tau mano fetu mo e lahi mahaki toili he lagi likoliko e ofoofogia. I loto he lalolagi mo e lagi katoatoa lahi mahaki toili nei, kua eke e fua lalolagi ko e tama ila tote. Pehe kia e mena nei, ko e Tufuga, ‘ko e Mua Ue Atu ke he lalolagi oti,’ kua tokoluganea ke tupetupe hagaao ke he tau tagata po kua mamao ligo ti kua nakai maeke a ia ke iloa e lautolu?—Salamo 83:18.

² Ne fakamafana mai e Tohi Tapu ki a tautolu kua mua atu e aoga he tau tagata ke he tau mata a Iehova. Ko e moli, kua fakamalolo he Kupu he Atua a tautolu ke kumi a ia, he talahau: “Ka e nakai ni mamao a ia mo tautolu takitokotaha.” (Gahua 17:27; 1 Nofoaga he Tau Patuiki 28:9) Moli, kaeke taute e tautolu e tau lakaaga ke fakatata atu ke he Atua, to tali mai e ia e tau laliaga ha tautolu. Ke he puhala fe? Ko e tau lauga he tau ha tautolu ma e 2003, kua foaki mai e tali loto mafanatia nei: “Ti fakatata mai ai a ia kia mutolu.” (Iakopo 4:8) Kia fakatutala a tautolu ke he falu a monuina homo ue atu ne foaki mai e Iehova ki a lautolu ne tata ki a ia.

Ko e Mena Fakaalofa Fakatagata Mai ia Iehova

3. Ko e heigoa e mena fakaalofa ne foaki e Iehova ki a lautolu ne fakatata atu ki a ia?

³ Fakamuaaki, kua ha ha he tau fekafekau ha Iehova e mena fakaalofa uho ne toka e ia ma e hana tau tagata. Ko e tau malolo, muhukoloa, mo e tau fakaakoaga oti ne fofola mai he fakatokaaga nei kua nakai maeke ke foaki e mena fakaalofa nei. Ko e mena fakaalofa fakatagata, ne foaki hokoia e Iehova ki a lautolu ne tata ki a ia. Ko e heigoa e mena ia? Ne tali he Kupu he Atua: “Kaeke kua ui atu a koe ke he loto matala, mo e fakaleo lahi atu ke he loto manamanatu. Kaeke ke kumi e koe a ia, tuga he kumi ario; kaeke ke kumi fakamakutu ki ai, tuga he kumi e koloa galo. Ti iloa ai e koe e  matakutaku kia Iehova, mo e moua ai e koe e iloilo ke he Atua. Ha ko Iehova kua foaki mai e iloilo.” (Tau Fakatai 2:3-6) Manamanatu la kua maeke tuai he tau tagata nakai mitaki katoatoa ke moua e “iloilo ke he Atua”! Ko e mena fakaalofa ia—ko e iloilo ne moua he Kupu he Atua—kua fakatai ke he “koloa galo.” Ko e ha?

4, 5. Ko e ha kua maeke e “iloilo ke he Atua” ke fakatai ke he “koloa galo”? Fakamaama.

⁴ Ko e taha e mena, ko e iloilo he Atua kua mua atu e aoga. Ti ko e taha he tau monuina uho ko e amaamanakiaga ke moui tukulagi. (Ioane 17:3) Ka kua fakatolomaki he iloilo ia e moui ha tautolu he mogonei foki. Ke fakatai ki ai, ha ko e fua he ha tautolu a fakaako makutu ke he Kupu he Atua, nukua o mai a tautolu ke iloa e tau tali ke he tau huhu aoga lahi tuga a nei: Ko e hai e higoa he Atua? (Salamo 83:18) Ko e heigoa e tuaga moli he tagata mate? (Fakamatalaaga 9:5, 10) Ko e heigoa e finagalo he Atua ma e lalolagi mo e tagata? (Isaia 45:18) Kua o mai foki a tautolu ke iloa ko e puhala mitaki lahi ke moui ai koe fakagahuahua e fakatonuaga pulotu he Tohi Tapu. (Isaia 30:20, 21; 48:17, 18) Ko e mena ia, kua moua ai e tautolu e takitakiaga mitaki ke lagomatai a tautolu ke fahia ke he tau fakaatukehe he moui mo e ke tutuli e puhala ne fakamatalahi e fiafia moli mo e mauokafua. Ke he tau mena oti, kua taute he fakaako ke he Kupu he Atua a tautolu ke o mai ke iloa e tau mahani mitaki ue atu ha Iehova mo e ke fakatata atu ki a ia. Kua fai mena foki kia ke mua atu e aoga mai he fakafetuiaga tata mo Iehova ne fakave ke he “iloilo ke he Atua”?

⁵ Kua ha ha ai taha kakano ne maeke e iloilo ke he Atua ke fakatai ke he “koloa galo.” Ke tuga e tau koloa uho loga, ne kua temotemoai ke he lalolagi nei. Mai he ono piliona tagata he lalolagi, kua moua he falu ono miliona ne tapuaki ki a Iehova, po ke kavi ke taha ke he 1,000, e “iloilo ke he Atua.” Ke fakamaama ko e tote ha ia e monuina ke iloa e kupu moli he Kupu he Atua, kia kikite la ke he taha huhu faka-Tohi Tapu: Ko e heigoa ne tupu ke he tagata he mate? Iloa e tautolu mai he tau Tohiaga Tapu na mate e solu mo e nakai iloa he tau tagata mamate ha mena. (Esekielu 18:4) Ka ko e taofiaga fakavai na fai mena i loto he tagata ne tumau ke moui he mole e mate, nukua talia he laulahi he tau lotu he lalolagi. Ti ko e matapatu vala a ia he tau lotu ha Kerisitenitome. Kua holofa ai foki ke he tau lotu Hinitu, Isilama, Iutaia, Saini, Sikihi, Sinito, Tao, mo e Puta. Kia manamanatu la—kua totou piliona he tau tagata hane fakavaia he taofiaga fakavai taha nei!

6, 7. (a) Ko hai hokoia ka moua e “iloilo ke he Atua”? (e) Ko e heigoa e fakafifitakiaga ne fakakite kua fakamonuina e Iehova a tautolu aki e lotomatala ne nakai maama he “tau tagata iloilo mo e loto matala”?

⁶ Ko e ha ne nakai moua ai he tokologa atu foki he tau tagata e “iloilo ke he Atua”? Ha kua nakai maeke ia taha ke maama katoatoa e kakano he Kupu he Atua ka noa mo e Hana lagomatai. Kia manatu, ko e iloilo nei ko e mena fakaalofa. Kua foaki ni e Iehova ki a lautolu ne fakamakai ke kumikumi ke he Kupu hana katoa mo e loto moli mo e fakatokolalo. Liga, ko lautolu ia kua nakai pulotu “ke he tau mena tino.” (1 Korinito 1:26) Liga tokologa ia lautolu kua fioia ke ‘nakai ako mo e goagoa’ ke he tau tutuaga fakalalolagi. (Gahua 4:13) Ka ke moha e mena ia. Kua palepale e Iehova a tautolu aki e “iloilo ke he Atua” ha ko e tau mahani ne kitia e ia he tau loto ha tautolu.

⁷ Kikite ke he fakafifitakiaga. Kua tokologa e tau tagata fakaako i Kerisitenitome kua fakalaulahi atu e tau talahauaga ke he Tohi Tapu. Ko e tau kumikumiaga pihia ka liga fakamaama e feakiaga he fakamauaga tuai, ko e kakano he tau kupu Heperu mo e Heleni, mo e fai foki. Mo e tau iloaaga loga ha lautolu, kua moua moli kia he tau tagata fakaako pihia e “iloilo ke he Atua”? Haia, kua maamateka nakai ki a lautolu e matapatu tala he Tohi Tapu—ko e fakatokolugaaga he pule katoatoa ha Iehova he puhala he hana Kautu he lagi? Iloa nakai e lautolu ko Iehova ko e Atua nakai ko e vala he Tolu Taha? Ka ko tautolu ni kua moua moli e maama tonu ke he tau matakupu pihia. Ko e ha? Nukua fakamonuina e Iehova a tautolu aki e lotomatala ke he tau kupu moli fakaagaga ne nakai maama he “tau tagata iloilo mo e loto matala” ne tokologa. (Mataio 11:25) Kua fakamonuina ha ia e Iehova a lautolu ne tata ki a ia!

“Kua Leoleo e Iehova a Lautolu Oti kua Fakaalofa kia Ia”

8, 9. (a) Fakamaama fefe e Tavita e taha fakamonuinaaga ma lautolu ne tata ki a Iehova? (e) Ko e ha kua lata e tau Kerisiano moli mo e puipuiaga faka-Atua?

⁸ Ko lautolu ne tata ki a Iehova kua olioli e taha  fakamonuinaaga foki—ko e puipuiaga faka-Atua. Ne tohia he salamo ko Tavita, ko ia ne mahani ke he tau lekua loga: “Kua tata mai a Iehova kia lautolu oti kana ne ui atu kia ia, ko lautolu oti ne ui kia ia mo fakamoli. Kua eke e ia e mena kua manako ki ai e lautolu kua matakutaku kia ia; to fanogonogo a ia ke he ha lautolu a kalaga atu, ti fakamoui e ia a lautolu. Kua leoleo e Iehova a lautolu oti kua fakaalofa kia ia.” (Salamo 145:18-20) E, kua tata a Iehova ki a lautolu ne fakaalofa ki a ia ti kua maeke ia ia ke tali mafiti ke he tau tagi lagomatai ha lautolu.

⁹ Ko e ha kua manako a tautolu ma e puipui faka-Atua? Ke lafi mai ke he tau mena ne lauia ai ha kua nonofo he “tau aho uka” nei, nukua eke e tau Kerisiano moli mo piu pauaki he iki Fi ha Iehova, ko Satani ko e Tiapolo. (2 Timoteo 3:1) Ko e fi iloilo kelea ia kua lali fakalahi “ke faiola” ki a tautolu. (1 Peteru 5:8) Kua favale, fakaohooho, mo e kamatamata e Satani a tautolu. Kua kumi foki a ia ke he tau aga he loto manamanatu mo e he loto ke maeke ia ia ke ekefakakelea. Ha ha ia ia e foliaga: ke fakalolelole e tua ha tautolu mo e ke moumou a tautolu fakaagaga. (Fakakiteaga 12:12, 17) Ha kua ha ha ia tautolu e fi malolo lahi pihia, kua nakai kia mafanatia ke iloa “kua leoleo e Iehova a lautolu oti kua fakaalofa kia ia”?

10. (a) Leoleo fefe e Iehova e tau tagata hana? (e) Ko e heigoa e vahega puipui ne mua e aoga, mo e ko e ha?

¹⁰ Ka e leoleo fefe e Iehova e tau tagata hana? Ko e maveheaga hana ke puipui mai, kua nakai pehe to ataina e tau momoui ha tautolu mai he tau lekua i loto he fakatokaaga nei; nakai pehe foki kua lata ia ia ke taute e tau mana ma tautolu. Moha ia, kua foaki e Iehova e puipui tino ma e tau tagata hana ko e matakau. Ha ko e mena to nakai fakaata e ia e Tiapolo ke tatafi kehe e tau tagata tapuaki moli mai he lalolagi! (2 Peteru 2:9) Ke he tau mena oti, kua puipui fakaagaga e Iehova a tautolu. Kua foaki mai e ia ki a tautolu e tau mena kua lata ke moua e tautolu ke fakauka ke he tau kamatamata mo e ke puipui e fakafetuiaga ha tautolu mo ia. Ka ke he fakahikuaga, ko e puipui fakaagaga ni e vahega ne mua atu e aoga he puipuiaga. Ko e ha? Ka fakatumau e fakafetuiaga ha tautolu mo Iehova, to nakai maeke he ha mena—nakai foki he mate—ke fakamatematekelea tukulagi a tautolu.—Mataio 10:28.

11. Ko e heigoa e tau foakiaga ne taute e Iehova ma e puipui fakaagaga he tau tagata hana?

¹¹ Kua taute e Iehova e tau foakiaga loga ma e puipui fakaagaga ha lautolu ne tata ki a ia. He puhala he hana Kupu, ko e Tohi Tapu, ne mai e ia ki a tautolu e pulotu ke fahia ke he tau kamatamata kehekehe. (Iakopo 1:2-5) He fakagahuahua e fakatonuaga mitaki ne moua i loto he tau Tohiaga Tapu, ko e puipuiaga moli ni a ia. Ke lafi ki ai, kua foaki e Iehova e ‘agaga tapu kia lautolu ka ole atu ai kia ia.’ (Luka 11:13) Ko e agaga ia ko e malolo ne mua ue atu he lalolagi mo e lagi katoatoa, ti kua maeke ke tauteute a tautolu ke fehagao mitaki atu ke he ha kamatamata ka liga fehagai mo tautolu. He puhala ia Keriso, ne foaki e Iehova e “tau mena fakaalofa ke he tau tagata.” (Efeso 4:8) Ko e tau tagata tane kotofa fakaagaga nei kua lali ke fakaata ni e fakaalofa hofihofi hokulo ha Iehova he lagomatai e tau katofia tapuaki.—Iakopo 5:14, 15.

12, 13. (a) Ko e heigoa e puhala ne foaki e Iehova ki a tautolu e tau mena kai fakaagaga he magaaho? (e) Fefe e logonaaga hau hagaao ke he tau foakiaga ha Iehova ma e levekiaga fakaagaga ha tautolu?

¹² Kua foaki e Iehova taha mena foki ke leoleo aki a tautolu: ko e tau mena kai fakaagaga he magaaho. (Mataio 24:45) He puhala he tau tohi lomi, fakalataha mo e tau senolo Ko e Kolo Toko mo e Awake!, pihia foki e tau feleveiaaga, tau toloaga, tau fonoaga, kua foaki mai e Iehova ki a  tautolu e tau mena ne lata mo tautolu he magaaho ka manako a tautolu ki ai. Maeke nakai ia koe ke manatu e magaaho ne logona e koe e falu mena he feleveiaaga Kerisiano, he toloaga, po ke he fonoaga, ne amotia hau a loto mo e fakamalolo po ke fakamafanatia ki a koe? Kua totou nakai e koe taha vala tala i loto he taha he tau senolo ne talahau na i luga mo e manatu kua tohia ni ma hau?

¹³ Taha he tau kanavaakau hufia mitaki ha Satani ko e fakaloleloleaga, ti kua nakai ataina mai a tautolu he lauiaaga hana. Iloa e ia kua maeke he aga fakaatukehe ka tokaholo ke kaiha e malolo ha tautolu, ti taute foki a tautolu ke mukamuka ke kaumahala. (Tau Fakatai 24:10) Ha kua lali a Satani ke fakaaoga e tau logonaaga nakai hako, kua lata ni a tautolu ke fai lagomatai. Kua lomi he tau mekasini Ko e Kolo Toko mo e Awake! he falu magaaho e tau vala tala ke lagomatai a tautolu ke totoko ke he fakaloleloleaga. Hagaao ke he taha vala tala pihia, ne tohia he taha fifine Kerisiano: “Kua teitei totou e au e vala tala ke he tau aho oti, mo e tafe agaia e tau hihina mata. Ti toka ai e au he tapa mohega haku ke moua e au he ha magaaho ka logona e au e fakalolelole. He puhala he tau vala tala pehenei, kua maeke ia au ke logona e tau lima puipui ha Iehova hane fakamalolo aki au.” * Kua nakai kia fakaaueina a tautolu ki a Iehova he foaki ki a tautolu e tau mena kai fakaagaga he magaaho? Kia manatu, ko e tau foakiaga hana ma e leveki fakaagaga ha tautolu ko e fakamoliaga nukua tata a ia ki a tautolu ti kua tuku a tautolu i lalo he leveki puipui hana.

Puhala ke he “Fanogonogo Liogi”

14, 15. (a) Ko e heigoa e fakamonuina fakatagata ne foaki e Iehova ki a lautolu ne tata ki a ia? (e) Ko e ha ne eke ai e foakiaga he puhala ataina ki a Iehova he liogi ko e monuina mitaki lahi?

¹⁴ Kua mailoga nakai e koe, ka moua he tau tagata e malolo mo e pule, kua mahani ni a lautolu ke fakamamao mai ia lautolu ne ha ha i lalo he pule ha lautolu? Ka e kua, mogoia, a Iehova ko e Atua? Kua mamao lahi kia a ia ke fanogonogo ke he tau mena ne talahau he tau tagata muikau ki a ia? Nakai pihia! Ko e mena fakaalofa he liogi ko e taha monuina ni a ia ne foaki e Iehova ki a lautolu ne tata ki a ia. Ti ke moua e puhala ataina ke he ‘Fanogonogo liogi’ ko e monuina kua moli lahi. (Salamo 65:2) Ko e ha?

¹⁵ Ke fakamaama: Ko e iki leveki gahua he fakatokatokaaga lahi kua ha ha ai e tau matagahua loga. Ne fifili e ia ko e tau mena fe ka taute ne ia mo e tau mena fe ka kotofa ke he falu. Tatai ai, ko e Pule Katoatoa he lalolagi mo e lagi katoatoa kua ha ha ai e fifiliaga ko e tau mena fe ka putoia a ia ki ai mo e tau mena fe hana ka kotofa. Kikite la ke he tau mena oti ne kotofa e Iehova ke he hana Tama fakahele, ko Iesu. Kua foaki ke he Tama e ‘pule ke eke e fakafiliaga.’ (Ioane 5:27) Kua “fakatokolalo foki kia ia” e tau agelu. (1 Peteru 3:22) Ko e agaga tapu malolo lahi ha Iehova kua foaki mautali ki a Iesu ke lagomatai a ia ke takitaki e tau tutaki hana he lalolagi. (Ioane 15:26; 16:7) Ati maeke ai ia Iesu ke talahau: “Kua tuku mai kia au e pule oti kana ke he lagi mo e lalolagi.” (Mataio 28:18) Ka e, ka hagaao ke he tau liogi ha tautolu, nukua fifili ne Iehova ke putoia fakaperesona ki ai. Ko e kakano haia ne  fakatonu he Tohi Tapu a tautolu ke foaki e tau liogi ha tautolu ki a Iehova hokoia, he puhala he higoa a Iesu.—Salamo 69:13; Ioane 14:6, 13.

16. Ko e ha kua maeke ia tautolu ke mauokafua na fanogonogo moli a Iehova ke he tau liogi ha tautolu?

¹⁶ Na fanogonogo moli kia a Iehova ke he tau liogi ha tautolu? Kaeke kua nakai tokaga mai a ia, to nakai fakamafana mai a ia ki a tautolu ke “fakamakamaka ke he liogi” po ke ke tuku e tau fakaatukehe mo e tau tupetupe ha tautolu ki a ia. (Roma 12:12; Salamo 55:22; 1 Peteru 5:7) Ko e tau fekafekau tua fakamoli he tau vaha Tohi Tapu kua mauokafua katoatoa na fanogonogo a Iehova ke he tau liogi. (1 Ioane 5:14) Ati, tohi he salamo ko Tavita: “Ti fanogonogo mai ai a [Iehova] ke he haku a leo.” (Salamo 55:17) Kua ha ha ai foki ia tautolu e tau kakano oti ke mauokafua na tata mai a Iehova, mo e mautali ke fanogonogo ke he tau manatu mo e tau kapaletu ha tautolu.

Palepale e Iehova e Tau Fekafekau Hana

17, 18. (a) Fefe e logonaaga ha Iehova hagaao ke he fekafekauaga tua fakamoli he tau mena momoui lotomatala hana? (e) Fakamaama e puhala ne fakakite he Tau Fakatai 19:17 ko e tau gahua fakaalofa noa ha tautolu kua nakai galo ki a Iehova.

¹⁷ Ko e tuaga ha Iehova ko e Pule Katoatoa he Lalolagi mo e Lagi Katoatoa kua nakai lauia he tau mena ka liga taute he tau tagata muikau po ke nakai. Moha ia, ko Iehova ko e Atua fakaaueina. Ne mailoga lahi—ko e moli, kua fakahele—e ia e tau fekafekauaga tua fakamoli he tau mena momoui lotomatala hana. (Salamo 147:11) Ko e mena nei, mogoia, ko e taha he tau mena aoga lahi ne olioli e lautolu ne tata ki a Iehova: Nukua palepale e ia e tau fekafekau hana.—Heperu 11:6.

¹⁸ Ne fakakite fakamaali he Tohi Tapu na mailoga lahi e Iehova e tau mena ne taute he tau tagata tapuaki hana. Ke fakatai ki ai, ne totou e tautolu: “Ko ia kua fakaalofa ke he tagata nofogati kua ta age e ia hana tau mena kia Iehova; to taui mai foki e ia e tau mena ne ta age kia ia.” (Tau Fakatai 19:17) Ko e manamanatu fakaalofa noa ha Iehova ma lautolu ne nonofogati kua kitia ai ke he Fakatufono faka-Mose. (Levitika 14:21; 19:15) Fefe e logonaaga ha Iehova he magaaho ka fifitaki e tautolu e fakaalofa noa hana he tau fakafehagaiaga ha tautolu mo lautolu ne nonofogati? Ka foaki e tautolu ki a ia ne nofogati, ti nakai amanaki ke  fai mena ke taui mai, nukua fioia e Iehova ko e kaitalofa taute ki a Ia. Ne mavehe mai a Iehova ke totogi e kaitalofa ia aki e taliaaga mo e tau fakamonuinaaga. (Tau Fakatai 10:22; Mataio 6:3, 4; Luka 14:12-14) Haia, he magaaho ka fakakite e tautolu e fakaalofa hofihofi noa ke he katofia tapuaki ne manako, nukua aamotia ai e loto ha Iehova. Ko e fakaaueina ha ia ha tautolu ke iloa ko e tau gahua fakaalofa hofihofi noa ha tautolu kua nakai galo he ha tautolu a Matua he lagi!—Mataio 5:7.

19. (a) Ko e ha kua mafanatia a tautolu kua fakaaue a Iehova ke he tau mena ne taute e tautolu ke he gahua fakamatala mo e taute tutaki? (e) Palepale fefe e Iehova e tau gahua he fekafekauaga ne taute ke lalago aki e Kautu hana?

¹⁹ Kua mahomo atu e fakaaue ha Iehova ke he tau mena ne taute e tautolu ma e Kautu hana. He magaaho ka fakatata atu a tautolu ki a Iehova, kua lata pauaki ni ke manako a tautolu ke fakaaoga e tau magaaho, tau malolo, mo e tau koloa ha tautolu, ke fakalataha katoatoa atu ke he mena kua fahia ke he fakamatala he Kautu mo e gahua taute tutaki. (Mataio 28:19, 20) He falu magaaho, liga manatu a tautolu kua temotemoai e tau mena ne taute e tautolu. Ko e loto nakai mitaki katoatoa ha tautolu ka liga fakatupu foki a tautolu ke tuaha ko e fiafia nakai a Iehova mo e tau laliaga ha tautolu. (1 Ioane 3:19, 20) Ka kua tokiofa e Iehova e tau mena fakaalofa oti—pete he tote—ne puna mai he loto ne omoi he fakaalofa. (Mareko 12:41-44) Kua fakamafana mai e Tohi Tapu ki a tautolu: “Ko e mena nakai hepehepe e Atua ke fakanimonimo ai e ia ha mutolu a tau gahua, mo e gahua fakamalolo he fakaalofa kua fakakite mai ai e mutolu ke he hana higoa.” (Heperu 6:10) Moli, na manatu mo e palepale foki e Iehova e gahua tote he fekafekauaga ne taute ke lalago aki e Kautu hana. Ke lafi atu ke he tau fakamonuinaaga fakaagaga loga he mogonei, kua maeke ia tautolu ke mamata atu ke he tau fiafia he moui he lalolagi fou hane hau, ka hafagi fakamokoi e Iehova hana lima mo e fakamakona e tau manako tututonu ha lautolu oti ne kua tata ki a ia!—Salamo 145:16; 2 Peteru 3:13.

20. He tau katoa he 2003, liga tokaloto fefe e tautolu e tau lauga he tau ha tautolu, mo e heigoa e fua?

²⁰ He tau katoa he 2003, kia huhu na tautolu ki a tautolu ni kua taute nakai e tautolu e tau laliaga tumau ke fakatata atu lahi ke he ha tautolu a Matua he lagi. Kaeke taute pihia e tautolu, kua maeke ia tautolu ke iloa moli to tali mai a ia tuga ne mavehe e ia. Ha ko e mena, ko e “Atua kua nakai maeke ke pikopiko.” (Tito 1:2) Kaeke fakatata atu a koe ki a ia, to fakatata mai a ia ki a koe. (Iakopo 4:8) Mo e heigoa e fua? Ko e tau fakamonuinaaga loga he mogonei mo e amaamanakiaga ke fakatata lahi atu ki a Iehova tukulagi tukumuitea!

[Matahui Tala]

Manatu Nakai e Koe?

• Ko e heigoa e mena fakaalofa ne foaki e Iehova ki a lautolu ne fakatata atu ki a ia?

• Ko e heigoa e tau foakiaga ne taute e Iehova ma e puipui fakaagaga he tau tagata hana?

• Ko e ha kua eke e foakiaga ke liogi ki a Iehova he puhala ataina ko e monuina mitaki lahi?

• Fakakite fefe he Tohi Tapu na fakaaue a Iehova ke he fekafekauaga tua fakamoli he tau mena momoui lotomatala hana?

[Tau Huhu he Fakaakoaga]

[Fakatino he lau 15]

Kua fakamonuina e Iehova a tautolu aki e lotomatala mo e tau kupu moli fakaagaga

[Tau Fakatino he lau 16, 17]

Foaki e Iehova e puipui fakaagaga

[Fakatino he lau 18]

Kua tata mai a Iehova, mo e mautali ke fanogonogo ke he tau liogi oti ha tautolu