Ko e Heigoa e Kakano he Kaiaga Afiafi he Iki ki a Koe?
Ko e Heigoa e Kakano he Kaiaga Afiafi he Iki ki a Koe?
“Ko ia kua kai e areto nai, po ke inu e kapiniu he Iki ka e nakai lata, kua lata kia ia e hala ha ko e tino mo e toto he Iki.”—1 KORINITO 11:27.
1. Ko e heigoa e mena aoga mua ue atu ne kua fakatoka ma e tau 2003, mo e puna mai i fe?
KO E mena aoga mua ue atu ne fakatoka ma e tau 2003 ka fakahoko he mole e toaga la ia Aperila 16. Mogoia ka feleveia e Tau Fakamoli a Iehova ke taute e Fakamanatuaga he mate ha Iesu Keriso. Tuga ne fakakite he vala tala fakamua, ne fakatu e Iesu e fakamanatuaga nei, ne ui foki ko e Kaiaga Afiafi he Iki, he mole e fakamanatu e ia mo e tau aposetolo hana e Paseka he Nisana 14, 33 V.N. Kua fakatino he tau fakamailoga he Fakamanatuaga ko e areto nakai fakaea mo e uaina kula e tino nakai hala he Keriso mo e toto fakamaligi hana—ko e poa hokoia ne maeke ke fakamoui e tau tagata mai he agahala mo e mate.—Roma 5:12; 6:23.
2. Ko e heigoa e hatakiaga ne fakamau ia 1 Korinito 11:27?
2 Ko lautolu ne kai mo e inu ke he tau fakamailoga he Fakamanatuaga kua lata ke taute fakahako ai. Ne fakamaaliali age he aposetolo ko Paulo e mena ia he magaaho ne tohia a ia ke he tau Kerisiano i Korinito i tuai, kavi ne nakai fakamanatu e Kaiaga Afiafi he Iki ke he puhala hako. (1 Korinito 11:20-22) Ne tohia e Paulo: “Ko ia kua kai e areto nai, po ke inu e kapiniu he Iki ka e nakai lata, kua lata kia ia e hala ha ko e tino mo e toto he Iki.” (1 Korinito 11:27) Ko e heigoa e aoga he tau kupu ia?
Fakamanatu Ai he Falu ka e Nakai Lata
3. Fefe e mahani he tokologa he tau Kerisiano Korinito he fakamanatuaga he Kaiaga Afiafi he Iki?
3 Tokologa e tau Kerisiano Korinito ne kai mo e inu he Fakamanatuaga ka e nakai lata. Kua ha ha ai e mavehevehe ia lautolu, mo e fai magaaho foki, ne tamai he falu e kai afiafi ha lautolu mo e kai ai fakamua po ke he magahala he feleveiaaga, ti fa mahani ke kai mo e inu lahi. Kua nakai mataala fakatino po ke fakaagaga a lautolu. Ati taute he mena nei a lautolu ke “hala ha ko e tino mo e toto he Iki.” Ka ko lautolu ne nakai fai kai afiafi kua hoge ti eke ai mo mena fakatauhele. E, tokologa ne kai mo e inu ka e nakai fakalilifu mo e nakai iloa e hokulo he aoga he magaaho ia. Ko e kakano haia ne fakahoko mai ne lautolu e fakafili ki a lautolu ni!—1 Korinito 11:27-34.
4, 5. Ko e ha kua lata ke kumikumi hifo a lautolu ne fa mahani ke kai mo e inu ke he tau fakamailoga he Fakamanatuaga?
4 Ha kua taute tumau e Fakamanatuaga he tau tau takitaha, kua latatonu ai ia lautolu ne fa mahani ke kai mo e inu ke he tau fakamailoga ke kumikumi hifo ki a lautolu ni. Ke fakalataha ke he kaiaga fakaaue nei ke he puhala hako, kua lata ia lautolu ke ha ha he tuaga malolo fakaagaga. Ko e ha tagata ne fakakite e nakai fakalilifu, po ke fakavihia foki, ma e poa ha Iesu to hagahagakelea ai neke ‘vevehe kehe a ia mo e motu he Atua,’ ke tuga e tau Isaraela ne kai mo e inu ke he kaiaga fakaaue ke he puhala nakai mea.—Levitika 7:20; Heperu 10:28-31.
5 Ne fakatai atu e Paulo e Fakamanatuaga ke he kaiaga fakaaue i Isaraela i tuai. Ne vagahau a ia hagaao ki a lautolu ne kai mo e inu auloa ke he Keriso ti talahau foki: “Mena nakai maeke ia mutolu ke inu ke he kapiniu he Iki katoa mo e kapiniu he tau temoni; ti nakai maeke ke fai tufaaga he laulau he Iki katoa mo e laulau he tau temoni.” (1 Korinito 10:16-21) Kaeke hokulo e agahala he tagata ne fa mahani ke kai mo e inu ke he tau fakamailoga he Fakamanatuaga, kua lata ia ia ke fakailoa e mena nei ki a Iehova mo e kumi foki e lagomatai fakaagaga ke he tau patu i loto he fakapotopotoaga. (Tau Fakatai 28:13; Iakopo 5:13-16) Kaeke ke tokihala moli a ia mo e fakatupu e tau fua ne lata he tokihala, to nakai kai mo e inu ka e nakai lata a ia.—Luka 3:8.
O Atu ko e Tau Tagata Fakalilifu
6. Ko hai ne toka he Atua e monuina ki ai ke kai mo e inu ke he Kaiaga Afiafi he Iki?
6 Kua lata kia a lautolu hane fakakite mogonei e mitaki ki a lautolu ne toe he tau matakainaga ne 144,000 he Keriso ke kai mo e inu he Kaiaga Afiafi he Iki? (Mataio 25:31-40; Fakakiteaga 14:1) Nakai. Kua toka he Atua e kotofaaga ia ma lautolu takitokotaha ne fakauku aki e ia e agaga tapu ke eke mo “tau hakeaga fakalataha mo Keriso.” (Roma 8:14-18; 1 Ioane 2:20) Ko e heigoa, mogoia, e tuaga ha lautolu ne amaamanaki ke moui tukulagi he parataiso he lalolagi katoa i lalo he pule faka-Kautu? (Luka 23:43; Fakakiteaga 21:3, 4) Ha kua nakai ko e tau hakeaga fakalataha ne ha ha ai e amaamanakiaga ke he lagi ha Iesu a lautolu, ne o atu a lautolu ke he Fakamanatuaga ko e tau tagata fakalilifu.—Roma 6:3-5.
7. Ko e ha ne iloa he tau Kerisiano he senetenari fakamua kua lata ia lautolu ke kai mo e inu ke he tau fakamailoga he Fakamanatuaga?
7 Ko e tau Kerisiano moli he senetenari fakamua kua fakauku ai he agaga tapu. Tokologa ia lautolu kua maeke ke fakaaoga taha po ke loga atu e tau mena fakaalofa mana mai he agaga, tuga e vagahau e tau vagahau kehekehe. Ko e mena ia, kua nakai uka ma lautolu takitokotaha pihia ke iloa kua fakauku he agaga a lautolu mo e kua lata ke kai mo e inu ke he tau fakamailoga he Fakamanatuaga. Ka e, he vaha ha tautolu, kua iloa ai e mena nei he fakave ke he tau kupu omoi he agaga pihia tuga anei: “Ko lautolu oti kua takitaki he [a]gaga he Atua, ko e tau tama he Atua a lautolu. Ha kua nakai moua e mutolu e [a]gaga ke fakatupa ai ke liu foki matakutaku ai a mutolu; ka kua moua e mutolu e [a]gaga ke hiki tama, ko ia kua tauui atu ai a tautolu, Ava, ko e Matua na e.”—Roma 8:14, 15.
8. Ko hai ne fakatino he “tau saito” mo e “tau titania” ne totoku ia Mataio veveheaga 13?
8 Mai he tau senetenari loga, ne tutupu a lautolu ne fakauku moli mo “tau saito” he fonua he “tau titania,” po ke tau Kerisiano fakavai. (Mataio 13:24-30, 36-43) Tali mai he atu tau 1870, ne kitia moli ai e tupu tolomaki he “tau saito,” ti he falu tau fakamui ne tala age ke he tau leveki Kerisiano fakauku: “Ko e tau motua . . . kua lata ke tuku i mua ha lautolu ne fakapotopoto [ke he Fakamanatuaga] e tau fakatokaaga mo e tau tutuaga nei,—(1) ko e tua ke he toto [he Keriso]; mo e (2) tukuleleaga ke he Iki mo e fekafekau hana, pihia foki ke he mate. Ti kua lata ia lautolu ke uiina a lautolu oti ne kua manako mo e tukulele pihia foki ke fakalataha auloa ke he fakamanatuaga he mate he Iki.”—Studies in the Scriptures, Fufuta VI, The New Creation, lau tohi 473. *
Kumi e ‘Tau Mamoe Kehe’
9. Kua kitia maali fefe a lautolu he “moto tagata tokologa” he 1935, mo e lauia fefe ai a lautolu ne kai mo e inu ke he tau fakamailoga he Fakamanatuaga?
9 Fai magaaho, ne kamata e fakatokatokaaga ha Iehova ke mamata ke he falu foki ke lafi atu ke he tau tutaki fakauku he Keriso. Ati kitia ai e tupu tolomaki he tau mena nei he lotouho he atu tau 1930. Ka e he fakamua atu, ne mailoga he tau tagata he Atua e “moto tagata tokologa” ia Fakakiteaga 7:9 ko e vahega ke uaaki fakaagaga ka kaufakalataha mo e 144,000 kua fakauku ne liu fakatutu hake ke he lagi—ke tuga e tau kitofaitane po ke tau fakahoa he hoana he Keriso. (Salamo 45:14, 15; Fakakiteaga 7:4; 21:2, 9) Ka e ia Me 31, 1935, he lauga he fonoaga he Tau Fakamoli a Iehova i Washington, D.C., U.S.A., ne fakamaama mai he Tohi Tapu ko e “moto tagata tokologa” kua hagaao ke he ‘tau mamoe kehe’ ne momoui he magahala he tau aho fakamui. (Ioane 10:16) He mole e fonoaga ia, ko e falu ne kai mo e inu fakamua ke he tau fakamailoga he Fakamanatuaga, ne fakagata e gahua ia ha kua mailoga e lautolu ko e ha ha he lalolagi e amaamanakiaga ha lautolu, nakai ke he lagi.
10. To fakamaama fefe e koe e amaamanakiaga mo e tau matagahua he ‘tau mamoe kehe’ he vaha fou nei?
10 Mua atu ke he 1935 ne kumi ai a lautolu ne kua eke mo ‘tau mamoe kehe,’ ne tua ke he lukutoto, tukulele ne lautolu a lautolu ke he Atua, mo e lagomatai e “fuifui mamoe gahoa” ke he gahua fakamatala he Kautu. (Luka 12:32) Ko e tau mamoe kehe nei kua amaamanaki ke moui tukulagi ke he lalolagi, ka e ke he tau puhala loga, ne fakatino e lautolu e tau hakeaga ne toe he Kautu he vaha nei. Ke tuga e tau tagata kehe i Isaraela i tuai ne tapuaki ki a Iehova mo e omaoma ke he Fakatufono, ko e tau mamoe kehe he vaha nei kua talia e tau matagahua faka-Kerisiano, tuga e fakamatala e tala mitaki fakalataha mo lautolu he Isaraela fakaagaga. (Kalatia 6:16) Kua tuga he nakai fakaai e tagata kehe ke eke mo patuiki po ke ekepoa i Isaraela, ti pihia foki, kua nakai fakaai e tau mamoe kehe nei ke pule i luga he Kautu he lagi po ke fekafekau ko e tau ekepoa.—Teutaronome 17:15.
11. Ko e ha kua eke e aho he tukuleleaga he tagata mo fifiliaga he amaamanakiaga nei?
11 He atu tau 1930, mogoia, kua maali fakahaga ai, ke he puhala lahi, kua fita he fifili e vahega i luga he lagi. Ke he tau hogofulu tau he mogonei, kua kumi ai e tau mamoe kehe, ne ha ha ai e amaamanakiaga ke he lalolagi. Ti, kaeke kitia maali a ia ne fakauku ke nakai tua fakamoli, kua liga lata ni ke tamai e tagata ne kua leva e fekafekau tua fakamoli ke he Atua ko e taha he tau mamoe kehe, ke fakapuke e veha ia ne tupu ke he 144,000.
Kakano ne Hehe e Tau Manamanatuaga
12. I lalo he tau tutuaga fe ne kua lata he tagata ke fakagata mai he kai mo e inu ke he tau fakamailoga he Fakamanatuaga, mo e ko e ha?
12 Kua mauokafua katoatoa e tau Kerisiano fakauku kua ha ha ia lautolu e uiaga ke he lagi. Ka e kua, kaeke kua kai mo e inu e falu tagata ne nakai moua e uiaga nei ke he tau fakamailoga he Fakamanatuaga? Ha kua mailoga ai e lautolu mogonei kua nakai ha ha ia lautolu e amaamanakiaga ke he lagi, nukua lata ni ke omoi he loto manamanatu ha lautolu a lautolu ke fakagata mai he kai mo e inu. To nakai fiafia e Atua ke he ha tagata ne fakakite ne ia a ia ko e tagata ne ui ke eke mo patuiki mo e ekepoa i luga he lagi, ka e iloa e ia kua nakai ha ha ia ia e uiaga pihia. (Roma 9:16; Fakakiteaga 20:6) Ne tamate e Iehova e Levi ko Koru he ohooho ke moua e gahua ekepoa faka-Arona. (Esoto 28:1; Numera 16:4-11, 31-35) Kaeke mailoga he ha Kerisiano ni kua hehe a ia he kai mo e inu ke he tau fakamailoga he Fakamanatuaga, kua lata ia ia ke fakagata mai he kai mo e inu mo e liogi fakatokolalo ma e fakamagaloaga ha Iehova.—Salamo 19:13.
13, 14. Ko e ha ne manamanatu hehe e falu kua ha ha ia lautolu e uiaga ke he lagi?
13 Ko e ha ne manatu hehe ai e falu nukua ha ha ia lautolu e uiaga ke he lagi? Liga kua fakatupu he mate he hoa po ke he falu a mena fakamatematekelea a lautolu ke nakai fiafia ke moui ke he lalolagi. Po kua manako foki a lautolu ke he amaamanakiaga ia he lagi ke tatai mo e kapitiga tata ha lautolu ne talahau ke eke mo Kerisiano fakauku. Moli, kua nakai kotofa he Atua ha tagata ke fakaohooho e falu ma e monuina nei. Ti nakai fakauku foki e ia e tau hakeaga he Kautu he taute a lautolu ke logona e tau leo ke fakamoli aki e matafekau ia.
14 Ko e taofiaga he tau lotu fakavai to o hake oti e tau tagata mitaki ki luga he lagi ne kua liga takitaki atu falu ke manatu kua ha ha ia lautolu e uiaga ke he lagi. Ko e mena ia, kua lata ia tautolu ke tu mauokafua neke fakaohooho he tau manatu fakamua po ke he falu a mena foki. Ke tuga anei, liga huhu hifo falu ki a lautolu ni: ‘Kua fakaaoga kia e au e tau vai fakaekekafo ne liga fakalauia e tau manamanatuaga haku? Kua hagahaga kia a au ke lahi e manamanatu ti nakai hako e fifiliaga haku?’
15, 16. Liga ko e ha ne talahau hehe falu ko e tau tagata fakauku a lautolu?
15 Liga huhu he tokogahoa ki a lautolu ni: ‘Manako nakai au ke talahaua lahi? Kua loto lahi kia au ke moua e pule he mogonei po ke ke eke mo hakeaga fakalataha mo Keriso anoiha?’ He magaaho ne ui atu ke he tau hakeaga he Kautu he senetenari fakamua, kua nakai ha ha ia lautolu oti e tau tutuaga leveki i loto he fakapotopotoaga. Ti ko lautolu takitokotaha ne ha ha ai e uiaga ke he lagi kua nakai kumi ke talahaua po ke palau ha kua fakauku ai. Kua fakakite e lautolu e mahani fakatokolalo ne kua amanaki ki a lautolu ne ha ha ai e “finagalo a Keriso.”—1 Korinito 2:16.
16 Liga talahau he falu kua ha ha ia lautolu e uiaga ke he lagi ha kua lahi mahaki e iloilo ha lautolu ke he Tohi Tapu. Ka kua nakai tamai he fakauku he agaga e iloilo mua ue atu, ha kua fakaako mo e fakatonu atu a Paulo ke he falu tagata ne fakauku. (1 Korinito 3:1-3; Heperu 5:11-14) Kua ha ha he Atua e fakaholoaga ke foaki e tau mena kai fakaagaga ma e tau tagata oti kana hana. (Mataio 24:45-47) Ti kua nakai lata ha tagata ke manatu ha ko e Kerisiano fakauku a ia kua mua atu e pulotu hana ki a lautolu ne ha ha ai e amaamanakiaga ke he lalolagi. Ko e fakauku he agaga kua nakai mailoga he makaka e tau tali ke he tau huhu faka-Tohiaga Tapu, fakamatalaaga, po ke he lauga e tau lauga faka-Tohi Tapu. Ko e tau Kerisiano ne ha ha ai e amaamanakiaga ke he lalolagi kua makaka foki ke he tau puhala nei.
17. Kua falanaki e fakauku he agaga ke he heigoa mo e ki a hai?
17 Kaeke huhu taha katofia talitonu hagaao ke he uiaga ke he lagi, kua lata he taha motua po ke he falu a Kerisiano matua ke tutala e mena nei mo ia. Pete ia, kua nakai maeke he tagata tokotaha ke taute e fifiliaga nei ma e taha foki. Ko e tagata ne ha ha ai moli e uiaga nei kua nakai lata ke huhu ke he falu kua moua ke ia e amaamanakiaga nei. Ko lautolu ne fakauku “kua fanau fakafou . . . nakai ko e fua ke popo, ka ko e fua nakai tuai popo, ko e kupu he Atua haia kua moui mo e tumau tukulagi.” (1 Peteru 1:23) Ha ko e agaga mo e Kupu hana, ne to he Atua e “fua” ne taute e tagata “ko e tagata fou,” fakalataha mo e amaamanakiaga ke he lagi. (2 Korinito 5:17) Mo e taute e Iehova e fifiliaga. Ko e fakaukuaga “nakai mai ia ia kua manako, ti nakai mai ia ia kua poi, ka e mai he Atua.” (Roma 9:16) Ti maeke fefe he tagata ke iloa moli kua ha ha ia ia e uiaga ke he lagi?
Kakano ne Iloa Moli ai e Lautolu
18. Foaki fefe he agaga he Atua e fakamoliaga ke he agaga ha lautolu ne fakauku?
18 Ko e fakamoliaga he agaga he Atua ne fakamauokafua aki e tau Kerisiano fakauku kua ha ha ia lautolu e amaamanakiaga ke he lagi. “Kua moua e mutolu e [a]gaga ke hiki tama,” he tohia e Paulo, “ko ia kua tauui atu ai a tautolu, Ava, ko e Matua na e. Kua fakamoli mai e [a]gaga ia ni ke he tau agaga ha tautolu, ko e fanau he Atua a tautolu. Kaeke ko e fanau a tautolu, ti ko e tau hakeaga foki, ko e tau hakeaga ni he Atua, ko e tau hakeaga fakalataha mo Keriso; kaeke kua mamahi a tautolu fakalataha mo ia kia fakamonuina foki a tautolu fakalataha mo ia.” (Roma 8:15-17) I lalo he omoiaga he agaga tapu, ko e agaga, po ke aga malolo, ha lautolu ne fakauku kua fakaohooho a lautolu ke fakagahuahua hifo ki a lautolu ni e tau mena ne talahau he tau Tohiaga Tapu hagaao ke he fanau fakaagaga ha Iehova. (1 Ioane 3:2) Kua taute he agaga he Atua a lautolu ke tuga e fanau hana mo e tuku ki a lautolu e amaamanakiaga pauaki. (Kalatia 4:6, 7) E, kua mitaki lahi ke moui tukulagi he lalolagi ko e tau tagata mitaki katoatoa ne agaagai he tau tagata he magafaoa mo e tau kapitiga, ka e nakai ko e amaamanakiaga ha lautolu a ia ne foaki he Atua. He puhala he agaga hana, ne feaki he Atua i loto ia lautolu e amaamanakiaga ke he lagi ati fakamakai ai a lautolu ke poa e tau matutakiaga mo e tau amaamanakiaga oti he lalolagi.—2 Korinito 5:1-5, 8; 2 Peteru 1:13, 14.
19. Ko e heigoa e vala ne taute he maveheaga fou ke he moui he Kerisiano fakauku?
19 Kua mauokafua e tau Kerisiano fakauku hagaao ke he amaamanakiaga ha lautolu ke he lagi, ke uta a lautolu ke he maveheaga fou. Ne talahau ai e Iesu he magaaho ne fakatu e ia e Fakamanatuaga mo e talahau: “Ko e kapiniu nai, ko e maveheaga fou ia ke he haku a toto, kua fakamaligi ma mutolu.” (Luka 22:20) Ko e matakau he maveheaga fou ko e Atua mo lautolu ne fakauku. (Ieremia 31:31-34; Heperu 12:22-24) Ko Iesu e hulalo. Ha kua fakamoli ai he toto fakamaligi he Keriso, ko e maveheaga fou kua nakai tamai ni he tau Iutaia ka e tamai foki he tau motu e tau tagata ma e higoa ha Iehova mo e taute a lautolu mo vala he “fanau” ha Aperahamo. (Kalatia 3:26-29; Gahua 15:14) Kua fakamaeke ai he “maveheaga tukulagi” nei e tau Isaraela fakaagaga oti ke liu tutu mai ke he moui nakai to mate i luga he lagi.—Heperu 13:20.
20. Ko e heigoa e mavehega ne uta a lautolu ne fakauku mo Keriso ki ai?
20 Kua mauokafua a lautolu ne fakauku ke he amaamanakiaga ha lautolu. Kua uta a lautolu ki loto he taha maveheaga lafi mai, ko e maveheaga he Kautu. Hagaao ke he fakalatahaaga ha lautolu mo Keriso, ne pehe a Iesu: “Ko mutolu nā, ne tumau a mutolu kia au ke he tau mena ne kamatamata ai au. Tuga ne kotofa mai he haku a Matua e kautu kia au, ke pihia foki he kotofa e au kia mutolu.” (Luka 22:28-30) Ko e maveheaga nei he vahaloto he Keriso mo e tau hoa patuiki hana kua gahuahua tukulagi.—Fakakiteaga 22:5.
Vaha he Fakamanatuaga—Ko e Magaaho Monuina
21. Maeke fefe ia tautolu ke moua mai e aoga lahi he vaha he Fakamanatuaga?
21 Kua loga e tau fakamonuinaaga he vaha he Fakamanatuaga. Kua maeke ia tautolu ke aoga mai he totouaga Tohi Tapu ne setulu ma e magahala nei. Kua eke foki mo magaaho mitaki lahi ke liogi, ke manamanatu fakahokulo ke he moui ha Iesu he lalolagi mo e mate, mo e ke fakalataha ke he gahua fakamatala he Kautu. (Salamo 77:12; Filipi 4:6, 7) Ko e mailogaaga ia kua fakamanatu mai ki a tautolu e fakaalofa ne fakakite he Atua mo Keriso he matutaki ke he poa lukutoto ha Iesu. (Mataio 20:28; Ioane 3:16) Kua foaki mai he foakiaga nei ki a tautolu e amaamanakiaga mo e mafanatia ti kua lata ai ke fakamalolo e fifiliaga ha tautolu ke tutuli e puhala tuga he Keriso. (Esoto 34:6; Heperu 12:3) Kua lata foki he Fakamanatuaga ke fakamalolo a tautolu ke fakamoli e tukuleleaga ha tautolu ko e tau fekafekau he Atua mo e eke mo tau tutaki loto fakamoli he Tama fakahele hana.
22. Ko e heigoa e mena fakaalofa ne mua ue atu he Atua ke he tau tagata, mo e heigoa taha puhala ke fakakite e loto fakaaue ma e fakaalofa ia?
22 Ko e mitaki ha ia e tau mena fakaalofa ne foaki e Iehova ma tautolu! (Iakopo 1:17) Kua ha ha ia tautolu e takitakiaga he Kupu hana, lagomatai he hana agaga, mo e amaamanakiaga ke moui tukulagi tukumuitea. Ko e mena fakaalofa ne mua ue atu he Atua ko e poa ha Iesu ma e tau hala ha lautolu ne fakauku mo e ma lautolu oti foki ne fakagahuahua e tua. (1 Ioane 2:1, 2) Ti hokulo fefe e kakano he mate ha Iesu ki a koe? To ha ha ai nakai a koe mo lautolu ne fakakite e oue tulou ki ai he fakapotopoto he mole e toaga la ia Aperila 16, 2003, ke fakamanatu e Kaiaga Afiafi he Iki?
[Matahui Tala]
^ para. 8 Lomi fakailoa he Tau Fakamoli a Iehova ka kua nakai lomi he magaaho nei.
Ko e Heigoa Hau a Tau Tali?
• Ko hai kua lata ke kai mo e inu ke he tau fakamailoga he Fakamanatuaga?
• Ko e ha ne o atu e ‘tau mamoe kehe’ ke he Kaiaga Afiafi he Iki mo tau tagata fakalilifu ni?
• Iloa fefe he tau Kerisiano fakauku kua lata ia lautolu ke kai mo e inu e areto mo e uaina he Fakamanatuaga he mate he Keriso?
• Ko e vaha he Fakamanatuaga ko e magaaho mitaki lahi ma e heigoa?
[Tau Huhu he Fakaakoaga]
[Graph/Tau Fakatino he lau 14]
(Ma e puhala katoa ne tohi aki, kikite e tohi)
Tau Tagata O Atu ke he Fakamanatuaga
HE TAU MILIONA
15,597,746
15
14
13,147,201
13
12
11
10
9
8
7
6
5
4,925,643
4
3
2
1
878,303
63,146
1935 1955 1975 1995 2002
[Fakatino he lau 14]
To fakalataha nakai a koe ke he Kaiaga Afiafi he Iki he tau nei?
[Tau Fakatino he lau 17]
Ko e vaha he Fakamanatuaga ko e magaaho mitaki lahi ke fakatolomaki ki mua e totouaga Tohi Tapu mo e fakalataha ke he gahua fakamatala he Kautu