“Kua Hoko ha Lautolu a Tau Leo ke he Tau Motu Oti”

‘Ke eke e tau motu oti kana mo tutaki, ti papatiso atu a lautolu ke he higoa he Matua, mo e Tama, mo e agaga tapu.’​—MATAIO 28:19.

1, 2. (a) Ko e heigoa e poakiaga ne foaki age e Iesu ke he tau tutaki hana? (e) Ko e ha ne maeke he tau Kerisiano he senetenari fakamua ke lahi e mena ne fakamoli?

NAKAI leva ato liu hake a Iesu ke he lagi, ne age e ia e poakiaga ke he tau tutaki hana. Ne tala age a ia ki a lautolu: ‘Ke eke e tau motu oti kana mo tutaki, ti papatiso atu a lautolu ke he higoa he Matua, mo e Tama, mo e agaga tapu.’ (Mataio 28:19) Ko e gahua ofoofogia ha ia!

² Manamanatu la! He Penetekoso 33 V.N., kavi ke he 120 e tutaki ne moua e liligiaga he agaga tapu mo e kamata ke fakamoli e poakiaga he talahau atu ke he falu na ko Iesu nukua leva e mavehe ke eke mo Mesia, ke puhala mai e fakamouiaga kua maeke ke moua. (Gahua 2:1-36) Maeke fefe he matakau tote pihia ke hokotia ke he “tau motu oti kana”? Kua nakai maeke ke he tau tagata, ka e “maeke e tau mena oti ke he Atua.” (Mataio 19:26) Ko e tau Kerisiano fakamua atu ne ha ha ai e lalagoaga he agaga tapu ha Iehova, ti ha ha ia lautolu e maama he fakamafiti. (Sakaria 4:6; 2 Timoteo 4:2) Ti, ke he tau hogofulu tau gahoa ni, kua maeke he aposetolo ko Paulo ke talahau nukua fakapuloa e tala mitaki “ke he tau tagata oti ke he lalolagi.”​—Kolose 1:23.

3. Ko e heigoa ne fakatauhele he “tau saito” Kerisiano mea mai he kitiaaga?

³ Ke he laulahi he senetenari fakamua, ne fakatumau e tapuakiaga mea ke holofa. Pete ia, ne perofeta e Iesu na to hoko mai e magaaho ka gana e Satani e “tau titania” mo e ko e “tau saito” Kerisiano moli ka maluia ai ke he tau senetenari loga ato hoko e vaha helehele. He mole e mamate he tau aposetolo, ne tupu moli e mena ia.​—Mataio 13:24-39.

Malikiti Mafiti he Vaha Nei

4, 5. Kamata he 1919, ko e heigoa e gahua he tau Kerisiano fakauku ne kamata ke taute, ti ko e ha ne fakakite he mena ia e paleko lahi?

⁴ He 1919, ko e magaaho ma e tau saito Kerisiano mea ke vehe mai he tau titania. Ko e tau Kerisiano fakauku ne iloa na fai aoga agaia e poakiaga lahi ha Iesu. Ne talitonu mauokafua a lautolu kua nonofo a lautolu he “tau aho fakamui” ti mailoga ai foki e perofetaaga ha Iesu: “To fakamatala atu foki e tala mitaki nai he kautu ke he lalolagi oti, ke eke mo talahau ke he tau atu motu oti; ti hoko mai ai e fakaotiaga.” (2 Timoteo 3:1; Mataio 24:14) E, ne iloa e lautolu kua lahi mahaki e mena ke taute.

⁵ Pete ia, tuga e tau tutaki he 33 V.N., ko lautolu e tau Kerisiano fakauku ne fehagai mo e paleko makimaki. Ha ha i ai e tokoafe noa ia lautolu ne nonofo ke he falu a motu gahoa. Maeke fefe ia lautolu ke fakamatala e tala mitaki “ke he tau atu motu oti”? Manatu, ko e  puke tagata he lalolagi ne malikiti liga mai he 300 e miliona he magahala ha Kaisara ke teitei ua e piliona he mole e felakutaki fakamua he lalolagi. Mai he senetenari 20 aki, to matutaki ni ke malikiti mafiti.

6. Ko e heigoa e tupu ki mua ne fakaholofa he tala mitaki he atu tau 1930?

⁶ Moha ia, ko e tau fekafekau fakauku ha Iehova, tuga e tau matakainaga he senetenari fakamua ha lautolu, ne kamata e gahua i mua ha lautolu fakalataha mo e tua katoatoa ki a Iehova, mo e hana agaga kua ha ha mo lautolu. He vahaloto he atu tau 1930, kau ko e 56,000 e tagata fakamatala ne fakapuloa e kupu moli he Tohi Tapu ke he 115 e motu. Fita ai e lahi he gahua ne taute, ka e lahi atu agaia ne toe.

7. (a) Ko e heigoa e paleko fou ne fehagai mo e tau Kerisiano fakauku? (e) Fakalataha mo e lalagoaga he ‘tau mamoe kehe,’ kua fakalahi fefe e gahua fakapotopoto ke hoko mai mogonei?

⁷ Ti, ko e maama hokulo lahi he kitiaaga he “moto tagata tokologa” ne talahau he Fakakiteaga 7:9 kua fakakite e paleko fou ti mavehe mai foki ki a lautolu e tau Kerisiano gahua malolo e lagomataiaga. Ko e moto tagata tokologa he ‘tau mamoe kehe,’ ko lautolu ne talitonu fakalataha mo e amaamanakiaga he lalolagi, ne fakapotopoto “mai he tau motu oti, mo e tau faoa, mo e tau tagata kehekehe, mo e tau vagahau kehekehe.” (Ioane 10:16) Ko lautolu nei ka ‘fekafekau ki a Iehova ke he aho mo e po.’ (Fakakiteaga 7:15) Kakano he mena ia to lagomatai a lautolu ke he gahua fakamatala mo e fakaako atu. (Isaia 61:5) Ti ko e fua, ne fiafia e tau Kerisiano fakauku ke kitia e numera he tau tagata fakamatala kua fakalahi ke he tau hogofulu afe ati hoko atu ke he tau miliona. He tau 2003, ko e tapunuaga fou he 6,429,351 ne fakalataha ke he gahua fakamatala​—ko e laulahi ia lautolu he moto tagata tokologa. Kua fakaaue lahi e tau Kerisiano fakauku ma e lagomatai nei, mo e fakaaue e tau mamoe kehe ke he kotofaaga he lalago e tau matakainaga fakauku ha lautolu.​—Mataio 25:34-40.

8. Tali atu fefe e Tau Fakamoli a Iehova ke he tau pehiaaga malolo ne hohoko he magahala he felakutaki ke uaaki he lalolagi?

⁸ He liu agataha ke kitia e vahega saito, ne tau fakamalolo atu a Satani he totoko ki ai. (Fakakiteaga 12:17) Tali atu fefe a ia ke he moto tagata ne kamata ke kitia? Aki e favaleaga vevela! Fakauaua nakai a tautolu ko ia i tua he favaleaga he lalolagi katoa ke he tapuakiaga mea ne tupu he magahala he felakutaki ke uaaki he lalolagi? He taufetoko he tau fahi ne ua, ne pehia lahi ai e tau Kerisiano. Tokologa e tau matakainaga ne matematekelea he tau kamatamata kelea, falu ne mamate ha ko e ha lautolu a tua. Ne fakataogo agaia e lautolu e tau kupu he salamo: “Kua fiafia au ke he Atua ha ko e hana kupu; kua tua au ke he Atua; nakai matakutaku au ke he taha mena ka eke he tau tagata kia au.” (Salamo 56:4; Mataio 10:28) Ko e tau Kerisiano fakauku mo e tau mamoe kehe, ne fakamalolo he agaga ha Iehova kua tutu mauokafua auloa. (2 Korinito 4:7) Ti ko e fua, “kua tupu foki e kupu he Atua.” (Gahua 6:7) He 1939, he magaaho ne hoko e felakutaki, kua 72,475 he tau Kerisiano tua fakamoli ne hokotaki kua taute e gahua fakamatala. Pete ia, ko e hokotaki nakai katoatoa ma e 1945, ko e tau ne fakaoti e felakutaki, ne fakakite kua 156,299 he Tau Fakamoli makaukau ne fakaholofa e tala mitaki. Ko e kaumahala ha ia ma Satani!

9. Ko e heigoa e tau aoga fou ne fakailoa he magahala he Felakutaki II he Lalolagi?

⁹ Maaliali, ko e taufetului he felakutaki ke uaaki he lalolagi ne nakai taute e tau fekafekau ha Iehova ke fakauaua to fakamoli e gahua fakamatala. Moli, he 1943, he hokotia e felakutaki ke he tapunu, ua e aoga fou ne fakailoa. Taha, ne fakahigoa mogonei ko e Aoga Fekafekau Fakateokarasi, ne talaga ke fakaako e Tau Fakamoli takitaha he tau fakapotopotoaga oti ke fakamatala mo e taute tutaki. Ka ko e taha, ko e Aoga Tohi Tapu he Kolo Toko i Kiliata, lata mo e fakaako he tau misionare kua maeke ke feaki e gahua fakamatala he tau motu kehe. E, he oti e felakutaki,  ne mautali e tau Kerisiano ke malikiti atu e gahua.

10. Kitia fefe e makutu he tau tagata ha Iehova he magahala 2003?

¹⁰ Ti ko e heigoa e gahua mua ue atu ne taute e lautolu! Ko e fakaako ke he Aoga Fekafekau Fakateokarasi, ko e tau tagata oti​—ikiiki mo e fuakau, tau mamatua mo e tau fanau, pihia mo lautolu kua lolelole e tau tino—​ne fakalataha mo e fakatumau ke fakamoli e poakiaga lahi ha Iesu. (Salamo 148:12, 13; Ioelu 2:28, 29) He tau 2003, he avelesi he tau mahina takitaha, ko e 825,185 ne fakatata e lautolu e maama he fakamafiti ke taute, fakaku po ke fakatumau, ke he fekafekauaga paionia. He tau taha ia, ne fakaaoga he Tau Fakamoli a Iehova 1,234,796,477 e tula he tutala ke he falu hagaao ke he tala mitaki he Kautu. Kua fiafia moli a Iehova ke he makutu he tau tagata hana!

He Tau Fonua Kehe

11, 12. Ko e heigoa e tau fakafifitakiaga kua fakatata e fakamauaga mitaki he tau misionare?

¹¹ Ke he tau tau kua mole, ko lautolu kua kautu mai i Kiliata, mo e fou nei, ko lautolu kua kautu mai he Aoga Fakaako Fekafekau ne fakatu e fakamauaga kehe ue atu. I Parasili, ma e fakatai, ne tokogahoa ki lalo he 400 e tau tagata fakailoa he magaaho ato hohoko atu e tau misionare he 1945. Ko e tau misionare ne muitua ki a lautolu ne gahua malolo fakalataha mo e ha lautolu a tau matakainaga Parasili makutu, ti fakamonuina fakalahi e Iehova e tau laliaga ha lautolu. Ko e fiafia ha ia ki a lautolu kua manatu e tau vaha fakamua atu ia ke kitia nukua hokotaki e Parasili e tapunu fou he 607,362 he 2003!

¹² Manamanatu ki Sapani. Ato hoko e felakutaki ke uaaki he lalolagi, ha ha i ai kau ko e taha e teau he tau tagata fakamatala he Kautu he motu ia. He felakutaki, ne tamate he favaleaga mamahi e numera ha lautolu, ti ko e fakahikuaga he felakutaki, tokogahoa ni e Tau Fakamoli ne momoui fakaagaga mo e fakatino agaia. (Tau Fakatai 14:32) Ko lautolu e tau tagata taofi fakamoli tokogahoa mua atu ia ne fiafia moli he 1949 ke fakafeleveia e tau misionare toko 13 fakamua ne fakaako mai i Kiliata, ti mafiti e tau misionare ke mafanatia ke he hakahakau ha lautolu, mo e lima foaki he tau matakainaga Sapani. Molea e 50 e tau he mole, he tau 2003, ne hokotaki e Sapani e tapunu he 217,508 he tau tagata fakailoa! Ne fakamonuina lahi moli e Iehova hana tau tagata he motu ia. Ha ha i ai e tau hokotaki pihia mai he falu motu loga. Ko lautolu ne maeke ke fakamatala he tau magamotu kehe ne fai foakiaga moli ke he fakaholofa he tala mitaki, ti ko e mena ia he 2003 ne logona ai ke he 235 he tau motu, tau aelani, mo e tau magamotu he lalolagi katoa. E, ko e moto tagata tokologa hane o mai he “tau motu oti kana.”

‘Mai he Tau Faoa, Tau Tagata, mo e Tau Vagahau Kehekehe Oti’

13, 14. Ko e heigoa e puhala ne fakakite e Iehova e aoga he fakamatala e tala mitaki ke he ‘tau vagahau kehekehe oti’?

¹³ Ko e fakamauaga fakamana mua he mole e fakauku he tau tutaki aki e agaga tapu he Penetekoso 33 V.N. ko e vagahau ha lautolu ke he tau vagahau kehekehe ke he moto tagata ne tolo mai. Ko lautolu oti ne logona a lautolu ne vagahau ke he vagahau he motu katoa, liga he faka-Heleni. Ha ko e ‘tau tagata matakutaku ke he Atua,’ kua tuga foki kua maeke ia lautolu ke maama e tau gahua Heperu ke he faituga. Ka e mailoga moli e onoonoaga ha  lautolu he magaaho ne logona e lautolu e tala mitaki ke he vagahau ne ako e lautolu mai he ikiiki.​—Gahua 2:5, 7-12.

¹⁴ He vaha nei foki, loga e tau vagahau ne fakaaoga he gahua fakamatala. Ne perofeta e moto tagata tokologa ke nakai o mai ni hokoia he tau motu ka e pihia foki he ‘tau faoa, tau tagata, mo e tau vagahau kehekehe.’ He talia mo e mena nei, ne perofeta e Iehova mai ia Sakaria: “To toto atu ai he tau tagata tokohogofulu he tau vagahau oti he tau motu kehe; to toto atu ai e lautolu e kala tapulu he tagata Iuta mo e pehe atu, To o a tautolu mo mutolu; ha kua logona e mautolu ha ha ia mutolu e Atua.” (Sakaria 8:23) Pete ni he nakai ha ha he Tau Fakamoli a Iehova e mena fakaalofa he tau vagahau kehekehe, kua iloa e lautolu e aoga he fakaako atu ke he tau vagahau he tau tagata.

15, 16. Kua maeke fefe he tau misionare mo e falu ke talia e paleko he fakamatala ke he tau vagahau he matakavi?

¹⁵ Moli, ha ha he vaha nei e tau vagahau gahoa ne fakaaoga lahi, tuga e faka-Peritania, faka-Falani mo e faka-Sepania. Pete ia, ko lautolu ne toka e tau motu moli ha lautolu ke gahua he falu motu kua lali ke ako e tau vagahau he matakavi ia ke maeke ke fakahoko atu e tala mitaki ki a lautolu “ne kotofa ke he moui tukulagi.” (Gahua 13:48) Maeke e mena ia ke uka. He manako e tau matakainaga he motu ha Tuvalu he Pasifika Toga ke he tau tohi ke he vagahau ni ha lautolu, taha mai he tau misionare ne talia e paleko ia. Pete he nakai fai tohi fakamaama kupu i ai, ne kamata a ia ke tukutuku auloa e tau kupu faka-Tuvalu. Fai magaaho, ne lomi fakailoa ai e tohi You Can Live Forever in Paradise on Earth * ke he vagahau Tuvalu. He hohoko atu e tau misionare ki Curaçao, nakai fai tohi faka-Tohi Tapu ti nakai fai tohi fakamaama kupu ke he vagahau Papiamento. Ti lahi foki e fekehekeheaki ke he puhala kua lata ke tohi aki e vagahau. Pete ia, he ua e tau he hohoko atu e tau misionare fakamua, ko e tuleke faka-Tohi Tapu Kerisiano fakamua ne lomi fakailoa ai ke he vagahau ia. He vaha nei, ko Papiamento taha he tau vagahau 133 ne lomi fakailoa ai Ko e Kolo Toko fakatatai mo e faka-Peritania.

¹⁶ I Namipia, ko e tau misionare fakamua ne nakai maeke ke moua e Fakamoli he matakavi ia ke lagomatai a lautolu ke fakaliliu. Lafi ki ai, taha e vagahau he matakavi, ko e vagahau Nama, ne nakai fai kupu mahani mau kua fakaaoga, tuga e “mitaki katoatoa.” Ko e misionare ne hokotaki: “Ma e fakaliliuaga kua lahi ni au ke fakaaoga e tau faiaoga he aoga ne kua fakaako e Tohi Tapu. Ha kua tote e iloilo ha lautolu ke he kupu moli, ne nofo au mo  lautolu ke kitia moli kua hakotika e tau fahi kupu takitaha.” Ka e, ne fakahiku ai e Ko e Moui he Lalolagi Foou ke fakaliliu ke he fa e vagahau Namipia. He vaha nei, Ko e Kolo Toko kua lomi fakailoa tumau ke he tau vagahau Kwanyama mo e Ndonga.

17, 18. Ko e heigoa e tau paleko ne taute i Mesiko mo e falu motu?

¹⁷ I Mesiko, ko e matapatu vagahau ko e faka-Sepania. Pete ia, ato hohoko atu e tau tagata Sepania, loga e vagahau ne vagahau i ai, ti fakaaoga agaia falu. Ti, ko e tau tohi he Tau Fakamoli a Iehova nukua taute mogonei ke he fitu e vagahau faka-Mesiko mo e pihia foki e Vagahau Matalima Faka-Mesiko. Ko e Fekafekauaga he Kautu Maya e tohi fakamua ne fakamau he vagahau American Indian. Moli, loga e tau afe Maya, Aztecs, mo e falu ne moua ke he 572,530 he tau tagata fakailoa he Kautu i Mesiko.

¹⁸ He tau tau fou nei, totou miliona ne fehola ke he falu motu kehe, po ke o kehe a lautolu ha ko e tau tutuaga fakatupe. Ti ko e fua, loga e tau motu mogonei ke he magaaho fakamua laia ne lahi e fonua he vagahau kehe. Ne talia he Tau Fakamoli a Iehova e paleko nei. I Italia, ma e fakatai, ha ha i ai e tau fakapotopotoaga mo e tau matakau ke he 22 e vagahau nakai faka-Italia. Ke lagomatai e tau matakainaga ke fakamatala ke he tau tagata vagahau kehe, ne fakatokatoka fou ai e tau vahega ke fakaako 16 e vagahau, putoia e Vagahau Matalima Faka-Italia. He falu motu loga, kua taute he Tau Fakamoli a Iehova e tau laliaga pihia ke hokotia ke he tau tagata o mai he falu motu nukua tokologa lahi mahaki. E, fakalataha mo e lagomatai ha Iehova, ko e moto tagata tokologa kua moli ke o mai he tau matakau vagahau kua loga lahi mahaki.

“Ke he Tau Motu Oti”

19, 20. Ko e heigoa e tau kupu ha Paulo ne kua fakamoli ke he puhala kehe ue atu he vaha nei? Fakamaama.

¹⁹ He senetenari fakamua, ne tohi he aposetolo ko Paulo: “Nakai kia fanogonogo a lautolu? Ko e moli, Kua hoko ha lautolu a tau leo ke he tau motu oti, mo e tau kupu foki ha lautolu ke he tau kala he lalolagi.” (Roma 10:18) Kaeke kua moli e mena ia he senetenari fakamua, kua lahi atu ha ia e moli he vaha nei ha tautolu! Totou miliona​—liga molea lahi atu ke he fakamauaga tala fakamua atu—​hane pehe: “To fakaaue au kia Iehova ke he tau aho oti kana; nakai noa e fakaheke he haku gutu kia ia.”​—Salamo 34:1.

²⁰ Lafi ki ai, kua nakai fakamanou hifo e gahua. Ko e numera he tau tagata fakailoa he Kautu kua fakatumau ke malikiti. Kua lahi mahaki e magaaho ne fakaaoga ke he gahua fakamatala. Totou miliona e tau liu ahi atu mo e totou teau afe e tau fakaako Tohi Tapu ne taute. Kua tumau e fiafia ke kitia ai. He tau kua mole, ko e tapunu fou he 16,097,622 ne o atu ke fakamanatu e Fakamanatuaga he mate ha Iesu. Maaliali ai, lahi atu agaia e mena ke taute. Kia fakatumau a tautolu ke fifitaki e mahani fakamoli mauokafua he tau matakainaga ha tautolu ne fakauka ke he favaleaga vevela. Ti kia fakatata e tautolu e makutu he tau matakainaga oti ha tautolu ne tali mai he 1919 nukua fekafekau a lautolu ki a Iehova. Kia fakatumau e tau mena oti ke fakataogo e tali lologo he salamo: “Kia fakaheke atu kia Ioha e tau mena oti kana kua fafagu.”​—Salamo 150:6.

[Matahui Tala]

Maeke Nakai a Koe ke Fakamaama?

• Ko e heigoa e gahua ne kamata e tau matakainaga ke taute he 1919, ti ko e ha ne paleko ai?

• Ko hai ne fakapotopoto mai ke lalago e gahua fakamatala?

• Ko e heigoa e fakamauaga he tau misionare mo e falu ne gahua ke he tau motu kehe ne tukutuku auloa?

• Ko e heigoa e fakamoliaga kua maeke ia koe ke fatiaki ke fakakite ko Iehova hane fakamonuina e gahua he hana tau tagata he vaha nei?

[Tau Huhu he Fakaakoaga]

[Tau Fakatino he lau 26, 27]

To o mai e moto tagata tokologa mai he tau faoa mo e tau vagahau kehekehe oti