Lata Kia a Koe ke Fai Lotu?

‘NAKAI lata ia au ke fai lotu po ke fano tumau he tapu ke talitonu ke he Atua!’ Pihia e logona hifo he tau tagata tokologa he eke mo taha tagata he lotu po ke fakalataha ke he ha fakatokatokaaga fakalotu. Moli, fai ne pehe kua logona e lautolu e tata lahi ke he Atua ka fiafia he takatakaiaga i fafo ka e nakai he o atu ke he tau fekafekauaga fakalotu ke he fale tapu. He vaha nei, ko e manatu mahani mau e fakalataha mo e matakau po ke fakatokatokaaga fakalotu ne nakai ko e mena aoga ma e taofiaga ke he Atua.

Ka ko e falu, pete ia, kua kehe moli e logonaaga. Kua mamakona a lautolu ke eke mo taha tagata he lotu mo e o atu ki ai kua lata, ti aoga foki, kaeke kua moua e ia e taliaaga he Atua. Ti ko e huhu na kua lata moli e fakalatahaaga fakalotu kua mahomo atu he iloa hokoia e matakupu ke he tau numera po ke vala tala. Ke he ha mena ni, ha ko e ha tautolu a fakafetuiaga mo e Atua ne kua putoia ai, nakai kia tonu ke kumi e manatu he Atua ki ai? Ti ko e heigoa mogoia, kua maeke ia tautolu ke ako mai he hana Kupu, ko e Tohi Tapu, ke he matakupu nei?

Puhala ne Fehagai e Atua mo e Tau Tagata i Tuai

Teitei ke 4,400 e tau tau kua mole, ko e fakapuke moumou ne lauia e lalolagi katoa. Ko e mena tupu pihia kua nakai mukamuka ke nimo vave, mo e tau tagata he lalolagi oti kua fai tala hagaao ke he fakamauaga tala tuai fakamua ha lautolu. Pete he kehekehe e tau fakamatafeiga, kua fai mena he tau tala nei ne tatai, putoia e moliaga ko e mena gahoa ne tagata mo e tau manu fihafiha ne hao.

Ko e tau tagata kia ne hao he Fakapuke kua hao fetamaki noa he moumouaga? Kua fakakite he fakamauaga he Tohi Tapu nakai pihia e mena ne tupu. Aoga lahi ai, ne nakai talahau he Atua ke he tau tagata takitokotaha hagaao ke he Fakapuke hane hau. Ka e, ne tala age a ia ki a Noa, ko ia ne hataki e tau tagata ke he hoko maiaga he Fakapuke.​—Kenese 6:13-16; 2 Peteru 2:5.

 Ko e fakahaoaga ke he fai vala he matakau gahua auloa nei mo e he makai ke talia e takitakiaga he Atua ne age ki a Noa. Ko e tau manu foki i loto he vaka ne hao he Fakapuke ne nakai kehe mai he matakau nei. Ko e tau fakaakoaga lautonu ne age ki a Noa ke taute e tau foakiaga kua latatonu ma e fakahaoaga he moui he tau manu.​—Kenese 6:17–7:8.

He tau senetenari fakamui, ko e tau ohi ha Noa mai he tama tane hana ko Semu ne fakatupa i Aikupito. Ka e, ko e finagalo he Atua ke fakahao a lautolu mo e tamai a lautolu ke he motu ne mavehe e ia ke he ha lautolu a matua tupuna ko Aperahamo. Nakai fakakite agaia foki e mena nei ke he tau tagata takitokotaha ka e fakakite fakamua ki a lautolu ne fifili ke eke mo tau takitaki ha lautolu​—ko Mose mo e hana taokete, ko Arona. (Esoto 3:7-10; 4:27-31) He mole e fakahao e tau tupa fakamua ko e matakau mai i Aikupito, ne age ki a lautolu e Fakatufono he Atua he Mouga ko Sinai mo e fakatu ai mo motu ha Isaraela.​—Esoto 19:1-6.

Ko e fakamouiaga kua maeke ai ma e tau Isaraela takitokotaha ha ko e kakano ni he fakalataha a lautolu mo e matakau fakatu faka-Atua mo e muitua ke he hatakiaga he matakau nei he tau takitaki ne fifili. Kua taute foki e tau foakiaga ma lautolu e tau Aikupito takitokotaha ke fakalataha mo e matakau nei ne maaliali ai kua talia faka-Atua. He magaaho ne toka he tau Isaraela a Aikupito, ko e tau tagata nei ne o mo lautolu, he tuku e lautolu a lautolu ke moua e monuina he Atua.​—Esoto 12:37, 38.

Ti, he senetenari fakamua, ne kamata e Iesu hana gahua fakamatala, he fakapotopoto fakalataha e tau tagata ko e hana tau tutaki. Ne fehagai a ia mo lautolu ko e matakau, ti hagaaki foki hana a onoonoaga fakaalofa ke he tau tagata takitaha hagaao ni ke he tau manako ha lautolu. Ke he tau aposetolo 11 tua fakamoli, ne pehe a Iesu: “Ne tumau a mutolu kia au ke he tau mena ne kamatamata ai au. Tuga ne kotofa mai he haku a Matua e kautu kia au, ke pihia foki he kotofa e au kia mutolu.” (Luka 22:28, 29) Fakamui, ne hokotia e agaga tapu he Atua ki luga he tau tutaki he magaaho ne fakalataha a lautolu ko e matakau.​—Gahua 2:1-4.

Ko e tau fakafifitakiaga maaliali pehenei kua fakakite ko e vaha i tuai ne fehagai tumau e Atua mo e hana tau tagata ko e matakau fakatokatoka. Ko e tau tagata tokogahoa ne fehagai fakatagata e Atua ki ai​—ko Noa, Mose, Iesu, mo e falu foki—​ne fakaaoga moli e Ia ke matutaki mo e matakau ne fakapotopoto auloa. Nakai fai kakano ke talitonu kua kehe e puhala ne fehagai e Atua mo e tau fekafekau hana he vaha nei. Moli, kua tamai foki he mena nei e taha huhu: Kua lahi kia ke fakalataha mo e ha matakau lotu hokoia? To manamanatu a lautolu ke he huhu aoga nei he vala tala ka hau.

[Fakatino he lau 4]

Ne leva tuai e fehagai he Atua mo e hana tau tagata ko e matakau fakatokatoka