Talahau he Tufugatia e Lilifu he Atua!
Talahau he Tufugatia e Lilifu he Atua!
“Kua talahau he lagi e lilifu he Atua; kua fakakite foki he pu lagi likoliko e gahua he hana tau lima.”—SALAMO 19:1.
1, 2. (a) Ko e ha ne nakai maeke he tau tagata ke kitia mata e lilifu he Atua? (e) Foaki fefe he tau motua 24 e lilifu ke he Atua?
“NAKAI maeke ia koe ke kitia hoku mata; ha kua nakai kitia he tagata au mo e moui.” (Esoto 33:20) Ti hataki e Iehova a Mose. Ha kua lolelole e tau tino he tau tagata, kua nakai maeke a lautolu ke kitia mata e lilifu he Atua. He fakakiteaga, mogoia, ne foaki ke he aposetolo ko Ioane e onoonoaga mua ue atu ha Iehova ke he Hana nofoaga patuiki homo ue atu.—Fakakiteaga 4:1-3.
2 Nakai tuga e tau tagata, ko e tau mena momoui agaga fakamoli kua maeke ke kitia e fofoga ha Iehova. Ha ha i ai mo lautolu e “tau patu ne tokouafulu ma fa” he fakakiteaga ha Ioane he lagi, ne kua hukui e 144,000. (Fakakiteaga 4:4; 14:1-3) Fefe e tali atu ha lautolu ke he ha lautolu a kitiaaga ke he lilifu he Atua? Hagaao ke he Fakakiteaga 4:11, kua fakapuloa e lautolu: ‘Iehova, ko e Atua ha mautolu, kua lata ni a koe ke tuku atu ki ai e fakahekeaga, mo e lilifu, mo e malolo; ha kua eke e koe e tau mena oti, ha ko e hau a finagalo foki ne ha ha i ai a lautolu; mo e eke ai a lautolu.’
Kakano ne ‘Nakai Fai Kalo Hola Ai’
3, 4. (a) Ko e ha e tua ke he Atua kua nakai fakasaiene? (e) Ke he falu tuaga, ko e heigoa i tua he fakagalo e taofiaga ke he Atua?
3 Kua omoomoi kia a koe ke foaki e lilifu ke he Atua? Ko e laulahi he tau tagata kua nakai, falu foki ne fakatikai ko e mena fai Atua. Tuga anei, taha e tagata kumikumi ke he aolagi ne tohi: “Ko e Atua kia ne lalaka mai ti mau e fua lalolagi he talaga ke lata mo e aoga ni ha tautolu? . . . Ko e amaamanakiaga iloilo lahi. Momoko ai ke pehe kua talitonu au ki ai ko e mena fakahehe. . . . Nakai fai fakamaamaaga pihia e Atua.”
4 Kua nakai lahi e kumikumiaga fakasaiene—ne fakakaupa ke he tau tagata ke maeke ke kumikumi po ke fakaako ai. Ka nakai pihia ko e lotomatala noa po ke fuafua manatu ai. Ha ko e “Atua ko e [A]gaga ni a ia,” nakai maeke ke takitaki e kumikumiaga fakasaiene hagaao ki a ia. (Ioane 4:24) Kua fakaikaluga, mogoia, ke fakagalo noa e tua ke he Atua ke nakai fakasaiene. Ko e saienetisi ko Vincent Wigglesworth he Cambridge University ne talahau ko e puhala fakasaiene hokoia “e falanakiaga fakalotu.” Pihia fefe? “Kua fakalago ai ki luga he tua mauokafua ko e manatu pauaki kua fakalautatai ke he ‘tau fakatufono he tufugatiaaga.’” Ti he magaaho ne tiaki he tagata e taofiaga ke he Atua, nakai kia ko e fehikitaki noa he taha vahega tua ke he taha? Ke he falu tuaga, kua kitia ai e nakai talitonu ke fakaheu pauaki e mena moli. Ne tohi he salamo: “Ko e fakatokoluga he mata he tagata mahani kelea kua nakai kumi ai e ia; ko e hana tau manatu oti, Kua nakai fai Atua.”—Salamo 10:4.
5. Ko e ha e nakai fai taofiaga ke he Atua kua nakai fai kalo hola ai?
5 Ko e taofiaga ke he Atua kua nakai ko e tua pouli, ka e, ha ha i ai e fakamoliaga ofoofogia he fai Atua. (Heperu 11:1) Ne pehe e tagata kumikumi ke he aolagi ko Allan Sandage: “Kua moua e au e tuaha lahi ko e maopoopo pihia [he lalolagi mo e lagi katoatoa] ko e mena puna mai noa. Liga ha ha i ai e matapatu fakatokatokaaga. Ko e Atua ki a au ko e mena galo, ka ko e fakamaamaaga ma e mana he tau mena tutupu, ati kitia ai ko e taute nakai ko e mena tupu mai noa.” Ne tala age e aposetolo ko Paulo ke he tau Kerisiano i Roma ko e ‘tau mena kua nakai kitia he Atua, tali mai he vaha ne eke e lalolagi, kua kitia ia he manamanatu e tau mena ne eke, ko e hana mana haia kua tukulagi, mo e hana Atua; ko e mena foki ia kua nakai fai kupu a lautolu ne nakai talitonu ke fai kalo hola ai.’ (Roma 1:20) Ha ko e “vaha ne eke e lalolagi”—mua atu tali mai he tufugatiaaga he tau mena momoui tagata lotomatala, kua maeke ke moua e moui he Atua—kua kitia moli ko e mena ha ha ai e Tufuga he malolo lahi mahaki, ko e Atua kua lata mo e mahani fakamoli. Ko lautolu kua kaumahala ke talahau e lilifu he Atua kua nakai fai kalo hola ai. Ko e heigoa, mogoia, ne foaki he tufugatiaaga?
Talahau he Lalolagi mo e Lagi Katoatoa e Lilifu he Atua
6, 7. (a) Fakapuloa fefe he lagi e lilifu he Atua? (e) Ko e heigoa e kakano ne fakafano mai he lagi ‘e afo’?
6 Ne tali he Salamo 19:1 he pehe: “Kua talahau he lagi e lilifu he Atua; kua fakakite foki he pu lagi likoliko e gahua he hana tau lima.” Ne kitia e Tavita ko e tau fetu mo e tau palaneta ne kikila mai “he pu lagi,” po ke takatakaiaga, ne foaki e fakamoliaga nakai fakauaua kua ha ha ai e Atua mua ue atu. Kua matutaki e ia: “Kua tala age he taha aho e kupu ke he taha aho, kua fakailoa foki he taha po e iloilo ke he taha po.” (Salamo 19:2) He taha aho ke he taha aho mo e taha po ke he taha po, kua fakatata he lagi e pulotu mo e malolo gahuahua he Atua. Kua tuga kua fakalilifu he tau mena nakai fai leo e Atua he “fakailoa” mai he lagi.
7 Pete ia, kua ha ha ai e manamanatuaga ke logona e fakamoliaga nei. “Nakai fai vagahau, nakai fai kupu, ti nakai logona ha lautolu a leo.” Ka e, ko e fakamoliaga nakai fai leo he lagi kua malolo lahi. “Kua hoko atu ha lautolu a afo ke he lalolagi oti, mo e tau kupu ha lautolu ke he fakahikuaga he tau motu.” (Salamo 19:3, 4) Kua tuga ko e lagi kua fakafano mai ‘e afo’ ke kitia mitaki kua fakapuke he fakamatala nakai fai leo e tau matapokopoko oti he lalolagi.
8, 9. Ko e heigoa falu mena moli kua kehe lahi hagaao ke he la?
8 Matutaki atu foki a Tavita ke fakamaama taha tufugatiaaga ofoofogia ha Iehova: “Kua tuku atu ai e ia e fale mo e la [he lagi ne kitia mata]; ko ia foki, tuga ne tagata kito fai hoana kua hu mai he hana poko; kua fiafia a ia tuga ne tagata malolo ke poitufi ke he puhala. Kua hu mai a ia he taha fahi he lagi, ti takai e ia e tau fahi ato kati; nakai galo ha mena ke he hana vevela.”—Salamo 19:4-6.
9 He fakatatai e tau fetu, ko e la kua vahaloto ni e lahi. Ka e ko e fetu homo ue atu, ne taute e tau palaneta mo mena itikuhila he mavilo viko i ai. He fakatatai mo e falu fetu, mogoia, kua vahaloto ni e lahi he la. Taha e punaaga ne pehe ko e katoatoa [he la] kua kavi ke he laga 330,000 e katoatoa he lalolagi. Kua hukui he la teitei ni ke katoatoa e fakatokatokaaga sola ha tautolu! Ko e malolo ne fakatoka mai he la kua fakaata e lalolagi ke mavilo viko ke he veha ko e 150 e miliona kilomita he nakai holo mamao po ke tata lahi ki ai. Ko e tama vala tote ni he malolo he la kua hokotia ke he palaneta ha tautolu, ka e lata ni ke fakatumau aki e moui.
10. (a) Maeke fefe e la ke hu ki loto mo e hau ki fafo he hana “fale”? (e) Gahua fefe ke tuga e “tagata malolo”?
10 Kua tutala e salamo hagaao ke he la ke he vagahau fakatai, he fakatino ai ko e “tagata malolo” kua poi mai he taha mapua lagi ke he taha he magahala he aho mo e nofo ‘he fale’ ke he po. Ka galo hifo fakahaga e fetu malolo ki lalo he mapualagi, mai he tuaga he lalolagi, kua tuga kua fano ke he “fale,” ke eke mo mena ke okioki ai. He magaaho pogipogi, kua tuga e mahafagi mai, ti kikila fulufuluola “tuga ne tagata kito fai hoana kua hu mai he hana poko.” Ha ko e leveki mamoe, ne iloa e Tavita e makalili lahi mahaki he po. (Kenese 31:40) Ne liu manatu e ia e puhala he tau hokohoko la ka fakamafana mafiti a ia mo e fonua i ai. Maama ai, kua nakai mategugu ha ko e “fenoga” mai he fahi uta ki lalo ka e tuga e “tagata malolo,” kua mautali ke liu fatiaki e fenoga.
Ko e Tau Fetu mo e Tau Fakatokaaga Fetu Ofoofogia
11, 12. (a) Ko e heigoa e mua ue atu he fakatataiaga he Tohi Tapu he tau fetu mo e tau oneone he mataafaga? (e) Liga ko e lahi fefe e lalolagi mo e lagi katoatoa?
11 Ka nakai fai hulu fakaata, to gahoa ni e afe he tau fetu ka kitia e Tavita. Pete ia, hagaao ke he taha fakaakoaga fou, ko e numera he tau fetu he lalolagi mo e lagi katoatoa kua kitia he tau puhala he tau hulu fakaata he vaha nei ko e 70,000,000,000,000,000,000,000! Ne fakakite e Iehova e numera lahi mahaki ne lauia ai he magaaho ne fakatatai e ia e numera he tau fetu mo e “oneone he mata[a]faga.”—Kenese 22:17.
12 Ma e tau tau loga, ko e tau tagata kumikumi ke he aolagi ne iloa e mena ne fakamaama ko e “tau takatakaiaga kikila ikiiki mo e ataata, ne nakai kehe e talagaaga.” Ne fakalata he tau saienetisi ko e tau “spiral nebulae” nei ko e tau vala he fakatokaaga fetu he Milky Way ha tautolu. He 1924, ne moua ai ko e nebula pihia ne tata lahi mahaki, ko e Andromeda, ko e fakatokaaga fetu a ia—kavi ke he ua e miliona he tau tau he mafiti he maama ne femamaoaki ai! Ne fuafua he tau saienetisi mogonei ko e totou piliona e tau fakatokaaga fetu, ne igatia ai mo e totou afe—falu magaaho piliona—he tau fetu. Ka e, “totou e [Iehova] e tau fetu poke ne fiha; kua ui e ia ha lautolu a tau higoa oti kana.”—Salamo 147:4.
13. (a) Ko e heigoa kua kehe ue atu hagaao ke he tau fetu mataputuputu? (e) Fakamoli fefe kua nakai iloa he tau saienetisi “e tau fakatufono he lagi”?
13 Ne huhu a Iehova ki a Iopu: ‘Kua maeke kia ia koe ke fakamau e tau liliaga he tau fetu mataputuputu a Kima? Po ke vevete kia e koe e tau pipi he tau fetu mataputuputu a Kisila?’ (Iopu 38:31) Ko e fetu mataputuputu ko e tau fetu kua kitia ke fakatu e puhala kehe lahi mahaki. Pete ni kua liga femamaoaki lahi moli e tau fetu mai he taha, ko e tau tutuaga ha lautolu kua tumauokafua mai he kitiaaga he lalolagi. Ha kua tonutika e tau tuaga ha lautolu, ko e tau fetu e “takitakiaga lagomatai lahi ke he tau tagata o hake ke he aolagi ne fakamahani he spacecraft, mo e kitiaaga he tau fetu.” (The Encyclopedia Americana) Ka e, nakai fai ne iloa katoatoa “e tau liliaga” kua fakamau auloa e tau fetu mataputuputu. E, kua nakai iloa agaia he tau saienetisi e tali ke he huhu ne fakatu ia Iopu 38:33: “Kua iloa nakai e koe e tau fakatufono he lagi?”
14. Ke he puhala fe ne ko e mena galo agaia e veheveheaga he maama?
14 Nakai maeke e tau saienetisi ke tali e taha huhu foki ne fakatu ki a Iopu: “Ko fe kia e puhala ke he mena ne vevehe ai e maama?” (Iopu 38:24) Taha e tagata tohia ne fakahigoa e huhu nei hagaao ke he maama “ko e huhu hokulo fakasaiene he vaha fou nei.” Kehekehe ai, ko e falu pulotu Heleni ne talitonu na moua mai e maama he mata he tagata. He vaha fou lahi nei, ne manatu e tau saienetisi kua ha ha he maama e tau etome itikuhila. Ne manamanatu e falu ki ai kua gahuahua ai he tau vai. He vaha nei, kua talitonu e tau saienetisi ko e maama kua tatai ke he vai mo e ke he etome. Pete ia, ko e maama pauaki mo e puhala ne “vehevehe ai e maama” kua uka ke maama katoatoa ai.
15. Tuga a Tavita, kua lata ia tautolu ke logona fefe ka manamanatu a tautolu ke he lagi?
15 He manamanatu ke he tau mena oti nei, kua fakalagalaga ai e taha ke logona tuga e salamo ko Tavita, ne pehe: “Ka kitekite atu au ke he lagi hāu, ko e gahua he hāu a tau mata lima, ko e mahina katoa mo e tau fetu ne eke e koe; ko e heigoa kia e tagata kia manatu mai ai a koe kia ia, mo e tama he tagata kia ahi mai ai e koe a ia?”—Salamo 8:3, 4.
Fakalilifu he Lalolagi mo e Hana Tau Mena Momoui a Iehova
16, 17. Fakaheke fefe he tau mena momoui he ‘tau vai hokulo oti’ a Iehova?
16 Kua tohi he Salamo 148 falu puhala kua fakapuloa he tufugatiaaga e lilifu he Atua. Kupu 7 ne totou: ‘Kia fakaheke atu kia Iehova mai he lalolagi, ko e tau tanimo mo e tau vai hokulo oti.’ E, ko e ‘tau vai hokulo oti’ kua puke he tau mena ofoofogia kua fakakite e pulotu mo e malolo he Atua. Ko e blue whale ne avelesi e mamafa ke he 120 e tone—mamafa ke tuga e 30 e elefane! Ko e atevili hana ko e mamafa ke 450 e kilokuleme ti maeke ke pamu kavi ke 6,400 kilokuleme e toto ke he hana tino! Kua fakatuai mo e fulufagu kia e tau tanimo lalahi mamahaki nei i loto he vai? Mamao ligo. Kua “o fano a lautolu he moana” ke he mafiti ofoofogia, he talahau he hokotaki mai he European Cetacean Bycatch Campaign. Ne fakakite he tapakiaga setalate ko e “taha he blue whale ne fano fenoga ke molea e 16,000 kilomita he 10 e mahina.”
17 Ko e bottle-nosed dolphin ne fa uku ke hokulo hifo ke 45 e mita, ka ko e uku ne hokulo lahi mahaki ne fakamau ma e tolofine ko e 547 e mita! Maeke fefe e tolofine nei ke hao he uku pihia? Kua fakatuai e fotufotu he atevili hana ka uku ai, ti hiki kehe mai e toto ke he atevili, tau mama, mo e uhoniu. Ko e tau tegatega kakano hana foki kua ha ha ai e kemikolo kua tanaki ai e okesitene. Ko e tau elephant seal mo e tau sperm whale kua maeke ke uku hifo taha ki lalo. “He nakai taufetului ke he malolo,” he talahau he mekasini Discover, “ne toka e lautolu e malolo ia ke kaumahala katoatoa e tau mama.” Ne tanaki e lautolu e lahi he okesitene ha lautolu nukua lata he tau tegatega kakano ha lautolu. Maaliali ai, ko e tau mena momoui nei ko e tau fakamoliaga kitia mata ke he pulotu he Atua malolo ue atu!
18. Maeke fefe he tahi ke fakakite e pulotu ha Iehova?
18 Maeke foki he tahi ke fakaata e pulotu ha Iehova. Pehe e Scientific American: “Ko e hihina takitaha he vai i luga he 100 mita he moana kua ha ha ai e tau afe he tau tama akau itikuhila ne hili noa ai kua fakahigoa phytoplankton.” Ko e “ulu akau tote” nei kua fakamea e matagi ha tautolu he utakehe e tau piliona tone he kapono tiokosite. Kua fakatoka mai he phytoplankton molea e hafa he okesitene ne fafagu e tautolu.
19. Fakamoli fefe he afi mo e kiona e finagalo a Iehova?
19 Pehe e Salamo 148:8: “Ko e afi mo e uha tuli, ko e kiona mo e hahau; ko e matagi afā, kua oma ke he hana kupu.” E, kua fakaaoga foki e Iehova e tau malolo nakai momoui he tufugatia ke fakamoli hana finagalo. Manamanatu ke he afi. He mole e tau hogofulu tau, ko e tau afi he vaouhi ne onoono ki ai ko e moumouaga hokoia. Kua talitonu e tau tagata kumikumi mogonei ko e mena aoga lahi e afi he utakehe e tau akau tuai po ke mamate, ti fakatolomaki e tuputupu he tau tega akau loga, liu fakafou e tau huhua, mo e pihia foki he fakatote hifo e vela he vaouhi. Kua aoga foki e kiona, he fuifui mo e fetalaisa e kelekele, he fakapuke e tau vaitafe, mo e puipui e tau akau mo e tau manu mai he matagi makalili.
20. Aoga fefe e tau tagata he tau mouga mo e tau akau?
20 “Ko e tau mouga mo e tau matiketike oti, ko e tau akau fua mo e tau arasi oti,” he talahau he Salamo 148:9. Ko e tau mouga homo ue atu ko e fakamoliaga ke he malolo lahi ha Iehova. (Salamo 65:6) Ka e eke foki a lautolu mo fai kakano aoga. Ko e hokotaki mai he Institute of Geography in Bern, i Suisalani, ne pehe: “Ko e tau vaitafe lalahi he lalolagi kua ha ha ai e punaaga he tau mouga. Molea e hafa he tau tagata kua falanaki ke he vai magalo ne moua mai he tau mouga . . . Ko e ‘tau tanakiaga vai’ nei kua aoga lahi ke he tau momoui he tau tagata.” Kua fakalilifu foki e tau akau tutupu noa ke he ha lautolu a Taute. Ko e hokotaki mai he United Nations Environment Programme ne pehe ko e tau akau “kua aoga ma e tau momoui he tau tagata he tau motu oti kana . . . Ko e tau vahega akau kehekehe kua aoga ke he tau puhala fakatupe ko e punaaga he tau koloa tuga e akau, tau fua lakau, tau fua paama, tau resin mo e tau gum. He lalolagi katoa, kua falanaki e ua piliona tagata ke he gaafi ma e tunu kai mo e oela.”
21. Fakamaama e puhala ne fakakite he lau akau mukamuka e fakamoliaga he talaga.
21 Ko e fakamoliaga he Tufuga pulotu kua kitia ke he talaga moli he akau. Manamanatu ke he lau akau. Ko e kili he fahi i luga kua momole ke puipui e lau akau neke magomago. He lalo kelekele he kili nei ko e putuputuaga ne toka ai e tau tegatega he tau chloroplast. Kua ha ha ai i loto e vala lanu lau kou nei, ne maeke ke mimiti e malolo he maama. He fakatokaaga ne fakahigoa fotosinifesisi, ne eke e tau lau akau mo “tau tanakiaga mena kai.” Kua mimiti hake he tau vaka he akau e vai mo e uta ke he tau lau akau ko e “fakatokaaga palama” halavihi. Ha ha i ai e afe he tau “pupu” itikuhila (ne fakahigoa ko e stomata) i lalo he lau akau ne mahafagi mo e pa, he mimiti e kapono tiokosite. Kua foaki he maama e malolo ma e vai mo e kapono tiokosite ke moua mai e tau kapohaitulete. Kua maeke e akau mogonei ke fagai ke he tau mena kai ne taute i ai. Ka e, ko e “tanakiaga” nei kua nakai fai leo mo e fulufuluola. He nakai takiva ai, kua fakatoka mai e okesitene ke maeke ke fafagu!
22, 23. (a) Ko e heigoa e lotomatala ue atu kua ha ha he tau manu lele mo e tau manu totolo? (e) Ko e heigoa falu huhu foki kua lata ia tautolu ke manamanatu ki ai?
22 “Ko e tau manu favale mo e tau manu huifa oti kana; ko e tau mena totolo mo e tau manu lele,” he talahau he Salamo 148:10. Loga e tau manu totolo mo e tau manu lele ne fakatata e tau lotomatala ofoofogia. Ko e Laysan albatross kua maeke ke lele ke he loa e matakavi (ke he taha magaaho ko e 40,000 kilomita he 90 ni e aho). Ko e blackpoll warbler ne fenoga mai he Fahi Tokelau ke he Fahi Toga i Amerika, lele ke molea e 80 e tula nakai fakamaoki. Kua tanaki he kamela e vai, nakai ke he tua tuga fa mahani, ka e ke he fakatokaaga taviliaga, he fakaata a ia ke leva e fano ka e nakai inu. Ko e mena ia, mogoia, kua kitekite fakamakuikui he tau tagata enesinia e tau manu ka talaga e tau masini mo e tau koloa fou. “Ka manako a koe ke talaga taha mena kua holo mitaki . . . mo e nakai fakamatematekelea e takatakaiaga,” he talahau he tagata tohia ko Gail Cleere, “maeke ke moua e koe e fakafifitakiaga mitaki he tufugatiaaga.”
23 E, ko e tufugatiaaga kua fakapuloa moli e lilifu he Atua! Mai he tau fetu he lagi ke he tau akau mo e tau manu, kua igatia ai mo e ha lautolu a puhala he fakalilifu ke he hana Tufuga. Ka e kua ki a tautolu e tau tagata? Maeke fefe a tautolu ke fakalataha mo e tufugatiaaga he lologo e tau fakahekeaga he Atua?
Manatu Nakai e Koe?
• Ko e ha a lautolu ne fakatikai mena fai Atua kua nakai fai kalo hola ai?
• Fakalilifu fefe he tau fetu mo e tau palaneta e Atua?
• Foaki fefe he tau manu he tahi mo e vao e fakamoliaga he Tufuga fakaalofa?
• Maeke fefe he tau mena nakai momoui ke taute e finagalo ha Iehova?
[Tau Huhu he Fakaakoaga]
[Fakatino he lau 24]
Ne fuafua he tau saienetisi ko e numera ne kitia he tau fetu ko e 70,000,000,000,000,000,000,000!
[Credit Line]
Frank Zullo
[Fakatino he lau 26]
Bottle-nosed dolphin