Tau Fekafekau Fiafia ha Iehova
Tau Fekafekau Fiafia ha Iehova
“Fiafia a lautolu ne manamanatu ke he tau mena fakaagaga kua lata ma lautolu.”—MATAIO 5:3, NW.
1. Ko e heigoa e fiafia moli, ti ko e heigoa kua fakaata ai?
KO E fiafia ko e koloa uho he tau tagata a Iehova. Ne fakapuloa e salamo ha Tavita: ‘Fiafia e motu kua eke a Iehova mo Atua ha lautolu.’ (Salamo 144:15) Ko e fiafia ko e logonaaga he tuaga mitaki. Ko e fiafia hokulo—kua hokotia ke he fatuakiloto ha tautolu—kua hau he mataala kua fakamonuina e Iehova a tautolu. (Tau Fakatai 10:22) Kua fakakite he fiafia pihia e fakafetuiaga tata mo e ha tautolu a Matua he lagi mo e iloilo kua taute e tautolu hana finagalo. (Salamo 112:1; 119:1, 2) Fuluola ai, ne tohi e Iesu hiva e kakano kua maeke ia tautolu ke fiafia. Ko e kumikumiaga ke he tau mena nei ne fakahigoa ko e tau fiafia he vala nei mo e vala tala ka mui mai to lagomatai a tautolu ke mailoga e kakano kua maeke a tautolu ke fiafia kaeke ke fekafekau fakamoli e tautolu ‘e Atua fiafia,’ ko Iehova.—1 Timoteo 1:11.
Mataala ke he Tau Mena Fakaagaga ha Tautolu
2. Ko e heigoa e magaaho ne vagahau a Iesu hagaao ke he fiafia, ti ko e heigoa hana tau kupu hafagi?
2 He 31 V.N., ne talahau e Iesu taha he tau lauga talahaua ke he fakamauaga tala tuai. Ne fakahigoa ko e Lauga he Mouga ha kua lauga e Iesu he kaukau mouga ne haga atu ke he Tahi ko Kalilaia. Ko e Evagelia ha Mataio ne talahau: ‘Kua kitekite atu a [Iesu] ke he lanu tagata, ti haele hake a ia ke he mouga, kua nofo ai ki lalo, ati o mai ai hana tau tutaki kia ia: Kua vagahau atu a ia, mo e fakaako kia lautolu, kua pehe age, Fiafia a lautolu ne manamanatu ke he tau mena fakaagaga kua lata ma lautolu, ha ko e ha lautolu e kautu he lagi.’ He fakaliliu fakamahino, ko e tau kupu hafagi ha Iesu ne totou: “Fiafia a lautolu ne nonofogati (tuga) ke he agaga,” po ke “Fiafia a lautolu kua kaiole ma e agaga.” (Mataio 5:1-3; Kingdom Interlinear; matahui tala.) Kua totou e Today’s English Version: “Fiafia a lautolu kua iloa na kua nonofogati fakaagaga a lautolu.”
3. Maeke fefe e aga mahani molu ke lafi ke he fiafia ha tautolu?
3 He lauga hana he kaukau mouga, ne fakakite e Iesu kua fiafia lahi e tagata kaeke ke mailoga kua lata a ia ke lagomatai fakaagaga. Ko e tau Kerisiano mahani molu, kua mataala katoatoa e tuaga agahala ha lautolu, ati olelalo ki a Iehova ma e fakamagalo hana he fakave ke he poa lukutoto he Keriso. (1 Ioane 1:9) Kua moua mogoia e lautolu e mafola he manamanatuaga mo e fiafia moli. ‘Fiafia e tagata kua fakamagalo hana tau holifono, kua tanumia hana tau hala.’—Salamo 32:1; 119:165.
4. (a) Ko e heigoa e tau puhala kua maeke ia tautolu ke fakakite e mataala ke he tau mena fakaagaga ha tautolu mo e he falu? (e) Ko e heigoa ne lafi ke he fiafia ha tautolu ka manamanatu a tautolu ke he tau mena fakaagaga ha tautolu?
4 Ko e mataala ke he tau mena fakaagaga ha tautolu kua omoi a tautolu ke totou e Tohi Tapu he tau aho takitaha, ke hufia he tau mena kai fakaagaga ‘ke he tau magaaho tonu’ mai he “fekafekau fakamoli mo e loto matala,” mo e o atu tumau he tau feleveiaaga Kerisiano. (Mataio 24:45; Salamo 1:1, 2; 119:111; Heperu 10:25) Ko e fakaalofa ma e katofia kua taute a tautolu ke mataala ke he tau mena fakaagaga he falu mo e fakamafiti a tautolu ke makai he fakamatala mo e fakaako e tala mitaki he Kautu. (Mareko 13:10; Roma 1:14-16) Ko e talahau he tau kupu moli he Tohi Tapu ke he falu kua tamai e fiafia ki a tautolu. (Gahua 20:20, 35) Ko e fiafia ha tautolu kua hokulo atu ka manamanatu fakalahi a tautolu ke he amaamanakiaga homo ue atu he Kautu mo e tau monuina ka tamai he Kautu ia. Ma e “fuifui mamoe gahoa” he tau Kerisiano fakauku, ko e amaamanakiaga he Kautu kua kakano ko e moui tukulagi he lagi ko e vala he fakatufono he Kautu he Keriso. (Luka 12:32; 1 Korinito 15:50, 54) Ma e ‘tau mamoe kehe,’ kua kakano ko e moui tukulagi he lalolagi parataiso i lalo he fakatufono he Kautu ia.—Ioane 10:16; Salamo 37:11; Mataio 25:34, 46.
Puhala kua Maeke ia Lautolu ne Fakatutuku ke Fiafia
5. (a) Ko e heigoa e kakano he talahauaga “lautolu ne fakatutuku”? (e) Mafanatia fefe a lautolu ne fakatutuku?
5 Ko e tau kupu he taha fiafia foki ne talahau e Iesu kua tuga e fakaliga kehe. Ne pehe a ia: ‘Fiafia a lautolu ne fakatutuku; ha ko e mena ke fakamafanatia a lautolu.’ (Mataio 5:4) Maeke fefe e tagata ke fakatutuku ti fiafia he magaaho taha? Ke maama e kakano he talahauaga ha Iesu, kua lata a tautolu ke manamanatu ke he faga fakatutuku ne tutala a ia ki ai. Kua fakamaama he tutaki ko Iakopo ko e tuaga agahala ni ha tautolu e tupuaga he fakatutuku. Ne tohi e ia: “Kia holoholo a ha mutolu a tau lima, ko mutolu, ko e tau tagata lotolotoua kia fakamea ha mutolu a tau loto. Kia fakaatukehe, mo e fakatutuku, mo e tagi a mutolu; kia liliu ha mutolu a kata ke he fakatutuku, mo e fiafia ha mutolu ke he fakaatukehe. Kia fakatokolalo a mutolu ki mua he Iki, to fakamatalahi e ia a mutolu.” (Iakopo 4:8-10) Ko lautolu kua momoko moli ke he tuaga agahala ha lautolu kua mafanatia he magaaho ne ako e lautolu ko e tau agahala ha lautolu kua maeke ke fakamagalo kaeke ke fakagahua e lautolu e tua ke he poa lukutoto he Keriso mo e fakakite e fakatokihala moli he taute e finagalo ha Iehova. (Ioane 3:16; 2 Korinito 7:9, 10) Maeke ia lautolu ke moua e fakafetuiaga uho mo Iehova mo e moua e amaamanakiaga he moui tukulagi ke fekafekau mo e fakaheke a ia. Kua tamai he mena nei ki a lautolu e fiafia hokulo he loto.—Roma 4:7, 8.
6. Ko e heigoa e kakano ne fakatutuku e falu, ti kua mafanatia fefe a lautolu?
6 Kua putoia foki e talahauaga ha Iesu ki a lautolu kua fakatutuku ha ko e tau tutuaga fakalialia ne hoko ke he lalolagi. Ne hagaao ni a Iesu ki ai he perofetaaga ha Isaia 61:1, 2, ne pehe: ‘Ha ha i luga ia au e agaga he Iki ko Iehova; ha kua fakauku e Iehova au ke fakamatala e vagahau mitaki kia lautolu kua matematekelea; kua fakafano mai e ia au ke pipi e tau loto ne malipilipi, ke fakamafana ai a lautolu oti kua fakatutuku.’ Ko e poakiaga ia kua hagaao foki ke he tau Kerisiano fakauku ne ha ha agaia he lalolagi, ne taute ai ha ko e lagomatai he tau hoa ha lautolu, ko e ‘tau mamoe kehe.’ He fakalataha oti ke he gahua fakatai ke fakamailoga e tau matale ha “lautolu e tau tagata kua tauoi mo e mānu ha ko e tau mena vihiatia kua eke e lautolu i ai [ko Ierusalema tiaki taofiaga, ne fakatino ko Kerisitenitome].” (Esekielu 9:4) Ko lautolu ia ne fakatutuku kua mafanatia ha ko e “tala mitaki nai he kautu.” (Mataio 24:14) Kua fiafia a lautolu ke ako to nakai leva ti hukui e fakatokaaga kelea ha Satani aki e lalolagi fou tututonu ha Iehova.
Fiafia a Lautolu ne Loto Molu
7. Ko e heigoa ne nakai kakano he kupu ‘loto molu’?
7 Ne matutaki e Iesu hana Lauga he Mouga he pehe: ‘Fiafia a lautolu ne loto molu; ha ko e mena to eke ma lautolu e motu.’ (Mataio 5:5) Ko e mahani molu kua manamanatu ki ai he falu magaaho ko e lolelole e mahani. Ka e, nakai pihia e mena ia. He fakamaama e kakano he kupu ne fakaliliu ‘loto molu,’ taha e pulotu he Tohi Tapu ne tohi: “Ko e mahani mua ue atu he tagata kua [loto molu] ko ia ko e tagata kua maeke ke mahani fakalatalata mitaki katoatoa. Nakai ko e tuaga milino nakai fai malolo, ko e fiafia goagoa, ko e nonoiki mateafu. Ko e malolo kua tautaofi.” Ne talahau a Iesu hagaao ki a ia: ‘Ko au ni ko e loto molu mo e loto holoilalo.’ (Mataio 11:29) Ka e, ne malolo a Iesu he taofi mau ke he tau matapatu fakaakoaga tututonu.—Mataio 21:12, 13; 23:13-33.
8. Fetataaki e loto molu ke he heigoa, ti ko e ha kua lata e mahani nei mo e tau fakafetuiaga ha tautolu mo e falu?
8 Ko e loto molu, mogoia, kua fetataaki lahi ke he mahani fakalatalata. Moli, ko e mahani molu mo e mahani fakalatalata ne tohi fakalataha he aposetolo ko Paulo he magaaho ne fakakite ‘e tau fua he agaga.’ (Kalatia 5:22, 23) Kua lata e loto molu ke feaki he lagomatai he agaga tapu. Ko e aga Kerisiano kua maeke ke mafola mo e tau tagata i tua mo lautolu he fakapotopotoaga. Ne tohi e Paulo: ‘Kia fakatapulu a mutolu ke he fakaalofa hofihofi noa, mo e mahani totonu, mo e loto holoilalo, mo e mahani molu, mo e fakauka, ke lata mo lautolu kua fifili he Atua, ko e tau tagata tapu mo e ofania. Kia fefakaukaaki a mutolu, mo e fefakamagaloaki.’—Kolose 3:12, 13.
9. (a) Ko e ha ke nakai fakakaupa ni e loto molu ke he fakafetuiaga ha tautolu mo e falu tagata? (e) Maeke fefe a lautolu ne loto molu ke “moua e lautolu e tufaaga ke he lalolagi”?
9 Ko e loto molu, mogoia, kua nakai fakakaupa ni ke he fakafetuiaga ha tautolu mo e falu tagata. He mumuitua fiafia a tautolu ke he pule katoatoa ha Iehova, kua fakatata e tautolu kua loto molu a tautolu. Ko e fakafifitakiaga mua ue atu he mena nei ko Iesu Keriso, he magaaho ne ha ha he lalolagi ne fakakite e ia e loto molu mo e omaoma katoatoa ke he finagalo he Matua hana. (Ioane 5:19, 30) Kua moua fakamua e Iesu e lalolagi, ha kua kotofa a ia mo Pule i ai. (Salamo 2:6-8; Tanielu 7:13, 14) Ne fakafetui e ia e tufaaga nei mo e 144,000 ko e “tau hakeaga fakalataha,” ne fifili “mai he tau tagata” ke ‘eke foki mo tau patuiki ke he lalolagi.’ (Roma 8:17; Fakakiteaga 5:9, 10; 14:1, 3, 4; Tanielu 7:27) Ko Keriso mo lautolu ka pule to takitaki e miliona he tau tagata tane mo e fifine ne tuga e tau mamoe nukua hagaao ki ai e salamo fakaperofeta ke moua e fakamoliaga fiafia: “Ko e tau tagata mahani molu, to eke ma lautolu e motu; ti fakafiafia foki e lautolu a lautolu ha ko e monuina kua lahi.”—Salamo 37:11; Mataio 25:33, 34, 46.
Fiafia a Lautolu ne Hoge ma e Tututonu
10. Ko e heigoa taha puhala ne maeke ke fakapuke a lautolu ne “fia kai mo e fia inu ma e tututonu”?
10 Ko e taha fiafia foki ne talahau e Iesu he magaaho ne vagahau a ia he kaukau mouga i Kalilaia ko e: “Fiafia a lautolu ne fia kai mo e fia inu ma e tututonu, ha ko e mena to puke a lautolu.” (Mataio 5:6, NW) Ma e tau Kerisiano, ne fakatoka e Iehova e tuaga ma e tututonu. Ti, ko lautolu ne hoge mo e fia inu ma e tututonu ne kua fia kai mo e fia inu ma e takitakiaga faka-Atua. Ko lautolu ne mataala lahi ke he tau agahala mo e tau nakai mitaki katoatoa ha lautolu mo e manako lahi ma e tuaga kua talia ki mua ha Iehova. Ko e fiafia ha ia ha lautolu ka ako e lautolu mai he Kupu he Atua ka maeke a lautolu ke tokihala mo e tutuli e fakamagaloaga he fakave ke he poa lukutoto he Keriso, to ha ha a lautolu ke he fakatokaaga ke moua e tuaga tututonu ki mua he Atua!—Gahua 2:38; 10:43; 13:38, 39; Roma 5:19.
11, 12. (a) Moua fefe he tau Kerisiano fakauku e tututonu? (e) Maeke fefe e tau hoa ha lautolu ne fakauku ke fakapuke e ha lautolu a fia inu ma e tututonu?
11 Ne pehe a Iesu ko lautolu to fiafia, ha ko e mena “to makona a lautolu.” (Mataio 5:6) Kua fakailoa atu ki a lautolu e tau Kerisiano fakauku ke ‘pule ko e tau patuiki’ mo Keriso he lagi kua talahaua “tututonu ha i ai e moui.” (Roma 5:1, 9, 16-18) Ne taute e Iehova a lautolu, ti hiki a lautolu ko e tau tama fakaagaga. Kua eke a lautolu mo tau hakega fakalataha mo Keriso, ne fakailoa ke eke mo tau patuiki mo e tau ekepoa he hana fakatufono he Kautu he lagi.—Ioane 3:3; 1 Peteru 2:9.
12 Ko e tau hoa ha lautolu ne fakauku kua nakai la talahaua tututonu ma e moui. Pete ia, ha ha ia lautolu e fai vala tututonu ne foaki e Iehova ki a lautolu he puhala he tua ha lautolu ke he toto ne liligi he Keriso. (Iakopo 2:22-25; Fakakiteaga 7:9, 10) Ne fakalago tututonu a lautolu ko e tau kapitiga a Iehova he felauaki mo e fakahaoaga ke he magaaho he “matematekelea lahi.” (Fakakiteaga 7:14) Ko e fia inu ha lautolu ma e tututonu to makona lahi atu he magaaho i lalo he “lagi fou,” to eke a lautolu mo vala he lalolagi fou ke “nofo ai e tututonu.”—2 Peteru 3:13; Salamo 37:29.
Fiafia a Lautolu ne Fakaalofa Noa
13, 14. Ko e heigoa e tau puhala aoga kua lata ke fakakite e tautolu e fakaalofa noa, mo e ko e heigoa e fua ki a tautolu?
13 He matutaki atu hana Lauga he Mouga, ne pehe a Iesu: ‘Fiafia a lautolu ne fakaalofa noa, ha ko e mena to fakakite atu e fakaalofa noa ki a lautolu.’ (Mataio 5:7) He fakamau matafakatufono, kua maama ai e fakaalofa noa ke hagaao ke he fakaalofa hohofi he vala he ikifakafili kua mataofi mai he fakatupu e tagata taute kelea ke fakahala katoatoa ne fakagofua he matafakatufono. He fakaaoga he Tohi Tapu, mogoia, ko e tau kupu fakamua ne fakaliliu ‘fakaalofa noa’ ne hagaao lahi ke he talahauaga he manamanatu totonu po ke fakaalofa kua tamai e totokaaga ki a lautolu ne nonofogati. Ti, ko lautolu nukua fakaalofa noa kua fakaalofa hofihofi noa lahi. Ko e fakataiaga ha Iesu he Samaria ne katofia ne foaki e fakafifitakiaga mitaki he tagata ne ‘fakaalofa noa atu’ ke he tagata kua lata lagomatai.—Luka 10:29-37.
14 Ke moua e fiafia ne fua mai he fakaalofa noa, kua lata ia tautolu ke fakalataha ke he tau gahua mitaki he totonu ki a lautolu kua lata lagomatai. (Kalatia 6:10) Ne logona e Iesu e fakaalofa hofihofi noa ma e tau tagata ne kitia e ia. ‘Ti hohofi hana fakaalofa kia lautolu, ha ko e mena tuga ne tau mamoe nakai fai leveki a lautolu; ti kamata ai a ia ke fakaako a lautolu ke he tau mena loga.’ (Mareko 6:34) Ne mailoga e Iesu e lata lagomatai mua ue atu he tau tagata ke he tuaga fakaagaga. Maeke foki ia tautolu ke fakakite ne tautolu e fakaalofa hofihofi noa mo e fakaalofa noa he folafola ke he falu mena kua mua atu e lata mo lautolu—ko e “tala mitaki nai he kautu.” (Mataio 24:14) Maeke foki ia tautolu ke foaki e lagomatai aoga ke he tau Kerisiano momotua, tau takape, mo e tau tama nakai fai matua mo e “fakamafana a lautolu kua manava tote.” (1 Tesalonia 5:14; Tau Fakatai 12:25; Iakopo 1:27) Nakai ni tamai he mena nei ki a tautolu e fiafia ka e to taute foki a tautolu mo tau tagata he fakaalofa noa a Iehova.—Gahua 20:35; Iakopo 2:13.
Loto Mea mo e Mafola
15. Maeke fefe a tautolu ke loto mea mo e loto mafola?
15 Ne talahau e Iesu e fiafia ke ono aki mo e fitu aki pehenei: “Fiafia a lautolu ne loto mea, ha ko e mena to kitia atu e lautolu e Atua. Fiafia a lautolu ne loto mafola, ha kua to ui a lautolu ko e tau ‘tama he Atua.’ ” (Mataio 5:8, 9, NW) Ko e loto mea mena nakai ni mea ke he mahani ka e pihia mo e mea fakaagaga mo e fakalautatai ke he fakamoli katoatoa ki a Iehova. (1 Nofoaga he Tau Patuiki 28:9; Salamo 86:11) Ko e kupu he vagahau fakamua “loto mafola” ne kakano ai ko e “tau tagata taute mafola.” Kua nonofo mafola a lautolu ne loto mafola mo e tau matakainaga Kerisiano ha lautolu ti, ka maeke ia lautolu, pihia mo e tau katofia ha lautolu. (Roma 12:17-21) Kua “kumi e [lautolu e] mafola mo e tutuli ki ai.”—1 Peteru 3:11.
16, 17. (a) Ko e ha a lautolu ne fakauku ne ui ko e ‘tau tama he Atua,’ ti maeke fefe a lautolu ke ‘kitia e Atua’? (e) Maeke fefe he ‘tau mamoe kehe’ ke ‘kitia e Atua’? (i) Fefe mo e magaaho fe, ke he puhala katoatoa ka eke e ‘tau mamoe kehe’ mo ‘tau tama he Atua’?
16 Ki a lautolu ne loto mafola kua loto mea, ko e maveheaga kua taute ko lautolu ‘to ui a lautolu ko e tau ‘tama he Atua’ mo e ‘to kitia e Atua.’ Ko e tau Kerisiano ne fakauku fakaagaga mo e ne hiki e Iehova ko e “tau tama” he nonofo agaia he lalolagi. (Roma 8:14-17) He magaaho ne fakaliu tutu mai ke fakalataha mo Keriso he lagi, ne fekafekau a lautolu ki mua ha Iehova mo e kitia moli a Ia.—1 Ioane 3:1, 2; Fakakiteaga 4:9-11.
17 Ko e ‘tau mamoe kehe’ loto mafola ne fekafekau ki a Iehova i lalo he Leveki Mamoe Mitaki, ko Keriso Iesu, ne eke mo “Matua [T]ukulagi.” (Ioane 10:14, 16; Isaia 9:6) Ko lautolu ne kautu katoatoa ke he kamatamata fakahiku he mole e Pule Meleniamu he Keriso ka hiki e Iehova mo tau tama he lalolagi mo e “hoko atu ai ke he tokanoaaga ha ha he monuina he fanau he Atua.” (Roma 8:21; Fakakiteaga 20:7, 9) He mamata atu ke he mena nei, ne talahau e lautolu a Iehova ko e Matua ha lautolu, ha kua tukulele e lautolu e tau momoui ha lautolu ki a ia, he mailoga a ia ko e Foaki Moui. (Isaia 64:8) Tuga a Iopu mo Mose i tuai, maeke ia lautolu ke ‘kitia e Atua’ aki e tau mata he tua. (Iopu 42:5; Heperu 11:27) He ‘tau mata he loto ha lautolu’ mo e he puhala he iloilo moli he Atua, ne tutuli e lautolu e tau mahani homo ue atu ha Iehova mo e lali ke fifitaki a ia he taute hana finagalo.—Efeso 1:18; Roma 1:19, 20; 3 Ioane 11.
18. He fakatatau mo e tau fiafia fitu fakamua ne talahau e Iesu, ko hai ne moua e fiafia moli he vaha nei?
18 Kua kitia e tautolu ko lautolu ne manamanatu ke he tau mena fakaagaga ha lautolu, lautolu ne fakatutuku, lautolu ne loto molu, lautolu ne hoge mo e fia inu ke he tututonu, lautolu ne fakaalofa noa, lautolu ne loto mea, mo lautolu ne loto mafola kua moua e fiafia moli he fekafekau ki a Iehova. Ka e, ko lautolu ia ne felauaki tumau mo e totokoaga, mo e favaleaga foki. Fakatauhele kia he mena nei e fiafia ha lautolu? To manamanatu ke he huhu ia he vala tala ka mui mai.
Ko e Puhala he Fakamanatu
• Ko e heigoa e fiafia kua moua e lautolu kua manamanatu ke he tau mena fakaagaga ha lautolu?
• Ko e heigoa e tau puhala ha lautolu kua fakatutuku ne mafanatia ai?
• Fakakite fefe e tautolu e loto molu?
• Ko e ha kua lata ia tautolu ke fakaalofa noa, loto mea, mo e loto mafola?
[Tau Huhu he Fakaakoaga]
[Fakatino he lau 22]
“Fiafia a lautolu ne manamanatu ke he tau mena fakaagaga kua lata ma lautolu”
[Tau Fakatino he lau 22]
“Fiafia a lautolu ne fia kai mo e fia inu ma e tututonu”
[Fakatino he lau 22]
‘Fiafia a lautolu ne fakaalofa noa’