Tau Kerisiano​—Kia Matalahi a Mutolu!

“Ko ia kua hula kia hula a ia [ki a Iehova].”—1 KORINITO 1:31.

1. Ko e heigoa e onoonoaga kua kitia moli he mahani he tau tagata ke he lotu ha lautolu?

“AGA FAKATEAGA.” Ne fakaaoga fou he taha tagata fakahokohoko he lotu e kupu ia ke fakamaama e tuaga ne ha ha he tau tagata tokologa ke he tua ha lautolu. Ne fakamahino e ia: “Ko e onoonoaga lahi ke he lotu he vaha fou nei nakai ko e lotu—ka e ko e mahani ne kua lata ke fakamaama ko e ‘aga fakateaga.’” Ne fakalaulahi atu e ia e kakano he aga fakateaga, ko e “nakai mahalohalo ke he lotu ni he tagata.” Tokologa e tau tagata, he talahau e ia, ne “talitonu ke he Atua . . . ; ka e nakai manamanatu lahi ki a ia.”

2. (a) Ko e ha kua nakai ofo ke he fakateaga fakaagaga he tau tagata? (e) Ko e heigoa e hagahagakelea ne foaki he aga fekehekeheaki ke he tau Kerisiano moli?

² Ko e onoonoaga nei ke he fakateaga, kua nakai ofo e tau tagata fakaako Tohi Tapu ki ai. (Luka 18:8) Ti he hagaaki ke he tau lotu oti, kua amanaki tuai ni ke ha ha i ai e fakateaga. Kua leva tigahau he fakahehe mo e fakatokelea he lotu fakavai e tau tagata. (Fakakiteaga 17:15, 16) Ka e, ma e tau Kerisiano moli, kua foaki he agaga kelea he loto fakauaua mo e nakai fakamakutu e hagahagakelea. Kua nakai lata ia tautolu ke fakateaga ke he tua ha tautolu mo e fakagalo ha tautolu a makutu he fekafekau ke he Atua mo e ma e kupu moli he Tohi Tapu. Ne hataki a Iesu ke he tuaga mafanafana pihia he magaaho ne fakatonu e ia e tau Kerisiano he senetenari fakamua ne nonofo i Laotikaia: “Kua nakai momoko a koe, ti nakai vevela foki; na loto au kia momoko a koe po ke vevela. . . . Kua mafana a koe.”—Fakakiteaga 3:15-18.

Mailoga ko Hai a Tautolu

3. Ko e heigoa e tau puhala he fakamailoga ha lautolu ke matalahi ki ai e tau Kerisiano?

³ Ke totoko ke he fakateaga fakaagaga, kua lata he tau Kerisiano ke mahino ko hai a lautolu, mo e lata ia lautolu ke matalahi ke he ha lautolu a fakamailoga pauaki. Ko e tau fekafekau ha Iehova mo e tau tutaki he Keriso, maeke ia tautolu ke moua i loto he Tohi Tapu e tau fakamauaga ne fakakite ko hai a tautolu. Ko tautolu ko e “tau fakamoli” ha Iehova, ‘tau ekegahua fakalataha mo e Atua,’ he fakamatala fakamakutu e tautolu e “tala mitaki” ke he falu. (Isaia 43:10; 1 Korinito 3:9; Mataio 24:14) Ko tautolu ko e tau tagata ne “feofanaki” mo e falu. (Ioane 13:34) Ko e tau Kerisiano moli ko e tau tagata takitokotaha ne ‘fakaako e tau manamanatuaga ha lautolu ke mailoga e tau mena mitaki mo e tau mena kelea.’ (Heperu 5:14) Ko tautolu ‘kua fakamaama e lalolagi.’ (Filipi 2:15) Kua eketaha a tautolu ke “mitaki ha [tautolu] a mahani ki mua he tau motu kehe.”—1 Peteru 2:12; 2 Peteru 3:11, 14.

4. Maeke fefe e tagata tapuaki ha Iehova ke iloa e mena ne nakai ko ia?

⁴ Iloa foki he tau tagata tapuaki moli ha Iehova e mena ne nakai ko lautolu. “Nakai ko e  tau tagata he lalolagi a lautolu,” ke tuga ha lautolu a Takitaki, ko Iesu Keriso, ne nakai ko e tagata he lalolagi. (Ioane 17:16) Kua vevehe kehe mai a lautolu he ‘tau motu,’ ne ‘pouligia e tau loto manamanatu mo e mafoki kehe mai he moui ha he Atua.’ (Efeso 4:17, 18) Ti ko e fua, ne ‘tiaki he tau tutaki ha Iesu e tau mahani hepehepe, katoa mo e tau manako lahi he lalolagi ka e nonofo fakalatalata a lautolu mo e tututonu katoa mo e mahani Atua ke he mouiaga nai.’—Tito 2:12.

5. Ko e heigoa e kakano he fakamaloloaga ke ‘hula ki a Iehova’?

⁵ Ko e mahino mitaki he ha tautolu a fakamailoga mo e ha tautolu a fakafetuiaga mo e Pule Katoatoa he lagi mo e lalolagi, ka fakaohooho a tautolu ke ‘hula ki a Iehova.’ (1 Korinito 1:31) Ko e hula fefe a ia? Ko e tau Kerisiano moli, kua matalahi a tautolu ke eke a Iehova mo Atua ha tautolu. Kua muitua a tautolu ke he fakamaloloaga: “Ko ia kua hula kia hula a ia he mena nai, kua lotomatala a ia, mo e iloa e ia au, ko au ni ko Iehova, kua eke e tau mena fakaalofa, mo e fakafiliaga, mo e mahani tututonu ke he lalolagi.” (Ieremia 9:24) Kua “hula” a tautolu ke he lilifu he iloa e Atua mo e he fakaaoga e ia a tautolu ke lagomatai e falu.

Ko e Paleko

6. Ko e ha kua paleko ke he falu ke fakatumau e manamanatuaga hako ke he ha lautolu a fakamailoga ko e tau Kerisiano?

⁶ Moli, kua nakai mukamuka ke fakatumau e manamanatuaga makutu ke he ha tautolu a fakamailoga pauaki ko e tau Kerisiano. Ne manatu he taha fuata tane ne feaki ko e Kerisiano e magaaho ne logona hifo e ia e lolelole fakaagaga: “Falu magaaho, ne manatu hifo au ko e ha ne eke au mo taha he Tau Fakamoli a Iehova. Ne tupu hake au ke he kupu moli tali mai he tama tote. Ti he falu magaaho ne manatu au ko e taha ni he tau lotu mahuiga mo e fa mahani anei.” Liga fakaata he falu e fakamailoga ha lautolu ke oofe he lalolagi kumi fiafia, puhala uta tala, mo e he puhala moui ne nakai felauaki mo e Atua. (Efeso 2:2, 3) He falu magaaho ne liga hokotia e falu Kerisiano ke he fakauaua fakatagata mo e liliu faala e kakano uho mo e tau foliaga ha lautolu.

7. (a) Ko e heigoa e kumikumi fakatagata ne kua lata ma e tau fekafekau he Atua? (e) Kua fakatali mai i fe e hagahagakelea?

⁷ Kua hepe katoatoa kia ke taute fakamitaki e kumikumi fakatagata he falu magaaho? Nakai. Liga manatu e koe ne fakamalolo he aposetolo ko Paulo e tau Kerisiano ke fakatumau ke kumikumi hifo ki a lautolu ni: “Kia kamatamata e mutolu a mutolu, po kua ha ha i ai a mutolu ke he tua; kia kumikumi hifo a mutolu kia mutolu.” (2 Korinito 13:5) Nukua fakamalolo mai e aposetolo ke taute e tau laliaga atihake ke kitia aki ha lolelole fakaagaga ka liga tupu, fakalataha mo e foliaga ke taute e tau lakaaga ke fakahako aki. Ko e Kerisiano, he kamatamata po ke ha ha nakai a ia he tua, kua lata ke iloa moli kua felauaki nakai hana tau kupu mo e tau gahua ke he mena ne  taofi a ia ki ai. Pete ni ia, kaeke omoi he kumikumi fakatagata ne fakahehe a tautolu ke kumi e “fakamailoga” ha tautolu, po ke kumi e tau tali i fafo he fakafetuiaga ha tautolu mo Iehova po ke fakapotopotoaga Kerisiano, to hiku ni ke nakai fai kakano mo e maeke ke fakahagahagakelea fakaagaga. * Kia nakai manako a tautolu ke ‘tukia moumou a tautolu ke he tua’!—1 Timoteo 1:19.

Kua Nakai Puipui a Tautolu ke he Tau Paleko

8, 9. (a) Fakakite fefe e Mose e tau manatu hana he fakauaua fakatagata? (e) Tali fefe e Iehova e fakauaua ha Mose? (i) Lauia fefe a koe he tau fakamaloloaga a Iehova?

⁸ Kua lata kia he tau Kerisiano ne putoia he falu magaaho ke he fakauaua fakatagata ke logona kua kaumahala tuai a lautolu? Nakai pihia! Moli, maeke ia lautolu ke moua e mafanatia he iloa nakai ko e tau logonaaga fou anei. Na putoia e tau tagata fakamatala he Atua he tau vaha kua mole ki ai. Ke fakatai ki ai, onoono atu ki a Mose ne lahi e tua, mahani fakamoli, mo e tukulele. He kotofa age e matagahua ne tuga kua makimaki, ne huhu mo e maimaina a Mose: “Ko hai kia au nai?” (Esoto 3:11) Ti tuga kua pehe e tali hana, ‘Nakai aoga au!’ po ke ‘Nakai maeke ia au!’ Loga e vala he moui ha Mose ne liga taute a ia ke logona e nakai mauokafua: Mai a ia he motu he tau tupa. Fakaheu he tau Isaraela a ia. Nakai iloa a ia ke fakamatala. (Esoto 1:13, 14; 2:11-14; 4:10) Ko e tagata leveki mamoe a ia, ko e feua vihiatia he tau Aikupito. (Kenese 46:34) Kakano haia ne nakai manako a Mose ke fakatokanoa e tau tagata fakatupa he Atua!

⁹ Ne fakamalolo e Iehova a Mose he tala age ua e maveheaga mauokafua ki a ia: “To fakalataha au mo koe; ko e fakamailoga foki hanai kia koe he fakafano e au ni a koe, ka uta e koe e motu mai Aikupito, ti fekafekau a mutolu ke he Atua ke he mouga nai.” (Esoto 3:12) Kua tala age e Atua ke he fekafekau loto fakauaua hana to fakalataha tumau a Ia mo ia. Lafi ki ai, kua fakakite age e Iehova to nakai mahala a ia ke laveaki e tau tagata hana. Tali mai he tau senetenari, ne foaki foki he Atua e tau maveheaga lagomatai pihia. Ke tuga anei, he puhala ia Mose, ne tala age a ia ke he motu ha Isaraela he amanaki hane fai a lautolu ke huhu atu ke he Motu he Maveheaga: “Kia fakamalolo a mutolu mo e fakamanavalahi; . . . ha ko Iehova hau a Atua kua o fakalataha mo koe; nakai toka e ia a koe, to nakai tiaki foki e ia a koe.” (Teutaronome 31:6) Ne fakamalolo foki e Iehova a Iosua: ‘Nakai tu mai ha tagata ke totoko atu kia koe ke he tau aho ti he hau a moui; to fakalataha au mo koe; nakai tiaki e au a koe, to nakai toka e au a koe.’ (Iosua 1:5) Mo e mavehe a ia ke he tau Kerisiano: “Nakai tuai toka ni e au a koe, nakai tuai tiaki ni e au a koe.” (Heperu 13:5) He moua e lalago malolo pihia, kua lata ke taute a tautolu ke matalahi ke eke ko e tau Kerisiano!

10, 11. Kua lagomatai fefe e Levi ko Asafo ke taofi mau e aga hako ke he kakano uho he fekafekau hana ki a Iehova?

¹⁰ Kavi ke lima e senetenari he mole a Mose, ne tohia fakamoli he Levi ko Asafo e tau fakauaua hana hagaao ke he kakano uho he tutuli e puhala hako. He taufetului a ia he fekafekau ke he Atua pete ko e tau matematekelea mo e tau kamatamata, ne kitia e Asafo falu ne fakafiufiu ke he Atua kua hane tupu ki mua e malolo mo e monuina. Ti ko e puhala fe ne lauia ai a Asafo? “Ka ko au nai, fetamakina kua tupetupe haku tau hui,” he talahau e ia. “Toe tote ni ti heke haku tau hui; ha kua mahekeheke na au kia lautolu ne goagoa; ne kitekite au ke he monuina he tau tagata mahani kelea.” Ne kamata a ia ke fakauaua ke he kakano uho he eke mo tagata tapuaki ha Iehova. “Ko e moli ni kua fakameā teao e au haku loto; ti  kua holoholo e au haku tau lima neke hala au, ka e teao ni,” he manatu hifo e Asafo. “Kua fahi ni au ke he aho oti.”—Salamo 73:2, 3, 13, 14.

¹¹ Fehagai fefe a Asafo mo e tau manamanatu fakatupetupe nei? Kua fakatikai kia e ia? Nakai. Ne talahau e ia he liogi ke he Atua, tuga he kitia e tautolu he Salamo 73. Ko e hikiaga he aga ha Asafo ha ko e aahi atu hana ke he faituga. He ha ha i ai, ne mailoga e ia kua eke agaia e tukulele ke he Atua mo puhala mitaki lahi. Ha kua fakafou e loto fakaaue fakaagaga hana, ne maama e ia kua vihiatia e Iehova e kelea mo e he taha magaaho ni to fakahala e tau tagata mahani kelea. (Salamo 73:17-19) Mo e aga fakafou ia, ne fakamalolo e Asafo e kakano he hana fakamailoga ko e fekafekau lilifu ha Iehova. Ne pehe a ia ke he Atua: “Kua fakalataha agaia a taua mo koe; ne toto e koe haku lima matau. To takitaki e koe au he hāu a pule; ka mole ia, ti talia ni e koe au ke he monuina.” (Salamo 73:23, 24) Ne liu a Asafo matalahi ke he Atua hana.—Salamo 34:2.

Iloa Lahi e Lautolu ha Lautolu a Fakamailoga

12, 13. Talahau e tau fakafifitakiaga he tau tagata he Tohi Tapu ne matalahi ke he fakafetuiaga ha lautolu mo e Atua.

¹² Taha puhala ke fakamalolo e kakano he fakamailoga faka-Kerisiano ha tautolu ko e kumikumi mo e fifitaki e tua he tau tagata tapuaki fakamoli, pete ko e tau matematekelea, kua matalahi moli ke he ha lautolu a fakafetuiaga mo e Atua. Kikite ki a Iosefa, ko e tama ha Iakopo. He vaha tama tote, ne fakafua fakakelea a ia mo tupa ti uta ki Aikupito, kua teau e tau kilomita ne mamao mai he matua tane matakutaku Atua hana mo e takaiaga leveki mafanatia he hana kaina. He nofo i Aikupito, ne nakai fai tagata a Iosefa ke fano ki ai ma e fakatonuaga faka-Atua, mo e fehagai a ia mo e tau tutuaga paleko ne kamatamata e tau mahani mitaki mo e falanakiaga hana ke he Atua. Pete ia, ne lali fakamakamaka a ia ke fakatumau e kakano malolo he fakamailoga hana ko e fekafekau he Atua, mo e fakatumau a ia ke tua fakamoli ke he tau mena ne iloa e ia kua hako. Kua matalahi a ia ke eke mo tagata tapuaki ha Iehova pihia foki he takaiaga hagahagakelea, mo e nakai maimaina a ia he fakakite e tau manatu hana.—Kenese 39:7-10.

¹³ Valu e senetenari he magaaho fakamui, ko e tamafine uta fakapaea a Isaraela ne eke mo tupa he takitaki kau Suria ko Naamanu, ne nakai nimo e fakamailoga hana ko e tagata tapuaki ha Iehova. Ka e mafuta mai e magaaho, ne fakamatala fakamalolo a ia hagaao ki a Iehova he magaaho ne fakakite e ia a Elisaio ko e perofeta he Atua moli. (2 Tau Patuiki 5:1-19) Loga e tau he mole, pete he kelea e takaiaga, ne liu taute he Patuiki ko Iosia ko e fuata tote e tau puhala fakalotu, fakafou e faituga he Atua, mo e liuaki e tau Isaraela ki a Iehova. Ne matalahi a ia ke he tua mo e tapuakiaga hana. (2 Nofoaga he Tau Patuiki, veveheaga 34, 35) Ko Tanielu mo e tau kapitiga Heperu tokotolu hana i Papelonia ne nakai nimo e fakamailoga ha lautolu ko e tau fekafekau ha Iehova, ti pihia foki i lalo he peehiaga mo e kamatamata, ne kuku mau e lautolu ha lautolu a fakamoli. Maali ai, kua matalahi a lautolu ke eke mo tau fekafekau ha Iehova.—Tanielu 1:8-20.

Kia Matalahi ha ko e Hau a Fakamailoga

14, 15. Ko e heigoa kua putoia ke he hula he fakamailoga faka-Kerisiano ha tautolu?

¹⁴ Ko e tau fekafekau nei he Atua kua kautu ha kua feaki e lautolu e kakano mitaki he matalahi ke he tuaga ha lautolu mo e Atua. Ka e kua a tautolu he vaha nei? Kua putoia ke he heigoa e hula ke he fakamailoga faka-Kerisiano ha tautolu?

¹⁵ Fakamuaaki, kua putoia ai e loto fakaaue hokulo he eke mo taha he tau tagata ne fua e higoa ha Iehova, ti moua e fakamonuina mo e taliaaga hana. Kua nakai fakauaua e Atua ko hai e tau tagata hana. Ko e aposetolo  ko Paulo, ne moui he vaha ne lahi e fakagoagoa he tau lotu, ne tohia: ‘Kua fioia e Iehova hana tau tagata.’ (2 Timoteo 2:19; Numera 16:5) Kua matalahi a Iehova ki a lautolu ne ‘fioia e ia.’ Ne fakapuloa e ia: “Ko ia kua piki atu kia mutolu, kua piki atu ai a ia ke he alito mata he hana fofoga.” (Sakaria 2:8) Maali ai, kua ofania e Iehova a tautolu. Ti kua lata ke fakave e fakafetuiaga ha tautolu mo ia ke he fakaalofa hokulo ki a ia. Ne mailoga e Paulo: “Kaeke ke fakaalofa taha ke he Atua, kua iloa e ia e tagata ia ni.”—1 Korinito 8:3.

16, 17. Ko e ha e tau Kerisiano, fuata mo e momotua, kua matalahi ke he tufaaga fakaagaga ha lautolu?

¹⁶ Ko e tau fuata ne feaki ko e Tau Fakamoli a Iehova kua lata ke kumikumi kua malolo fakahaga nakai e fakamailoga faka-Kerisiano ha lautolu, he fakave ke he fakafetuiaga fakatagata mo e Atua. Nakai lata ia lautolu ke falanaki noa ke he tua he tau matua ha lautolu. Hagaao ke he tau fekafekau takitaha he Atua, ne tohia e Paulo: “Kua tumau a ia po ke veli ke he hana ni a iki.” Ne fakaholo atu a Paulo: “To takitokotaha a tautolu mo e talatala atu hana mahani ke he Atua.” (Roma 14:4, 12) Mahino ai, ko e loto fakauaua he aga fakamagafaoa kua nakai maeke ke fakamalolo aki e fakafetuiaga tata mo e leva mo Iehova.

¹⁷ Tali mai he fakamauaga tuai, kua ha ha ai e loga he tau tagata fakamoli ha Iehova. Kua kamata mai he tagata tua fakamoli ko Apelu—kavi ke 60 e senetenari he mole—ke he “moto tagata tokologa” he Tau Fakamoli he vaha fou nei mo e tau tagata tapuaki loga atu ha Iehova ka olioli tukulagi e vaha anoiha. (Fakakiteaga 7:9; Heperu 11:4) Ko e matakau fou a tautolu mai he tau tagata tapuaki tua fakamoli. Ko e mitaki lahi ha ia e tufaaga fakaagaga ne moua e tautolu!

18. Tuku kehe fefe he tau kakano uho mo e tau tutuaga ha tautolu a tautolu mai he lalolagi?

¹⁸ Ko e fakamailoga faka-Kerisiano ha tautolu kua putoia ki ai e tau kakano uho, tau tutuaga, mo e tau fakamailoga ne fakakite a tautolu ko e tau Kerisiano. Ko e ‘Mahani Na,’ ko e mahani ni ke moua aki e moui monuina mo e fakafiafia e Atua. (Gahua 9:2; Efeso 4:22-24) Ko e tau Kerisiano “kia kamatamata e tau mena oti” mo e “taofi e tau mena mitaki ke mau”! (1 Tesalonia 5:21) Maama lahi ia tautolu e kehekehe lahi he vahaloto he faka-Kerisiano mo e lalolagi ne fakamamao mai he Atua. Kua nakai fakaata e Iehova ha fakauaua he vahaloto he tapuaki moli mo e fakavai. Puhala he perofeta ko Malaki, ne fakapuloa e ia: “Ti liliu kitia ai e mutolu kua kehe e tagata mahani tututonu, kehe e tagata mahani kelea; kua kehe a ia kua fekafekau ke he Atua, mo ia kua nakai fekafekau kia ia.”—Malaki 3:18.

19. Ko e heigoa ka nakai hokotia e tau Kerisiano moli ki ai?

¹⁹ Ha kua aoga lahi ke hula ki a Iehova i loto he lalolagi fehikitaki mo e fakagoagoa nei, ko e heigoa ka lagomatai a tautolu ke taofi mau e matalahi malolo ke he Atua ha tautolu mo e mataala lahi ke he fakamailoga faka-Kerisiano? Haia e tau lagomataiaga he vala tala ka mui mai. He manamanatu ke he tau mena nei, lata ia koe ke iloa moli: To nakai hokotia e tau Kerisiano moli ke matematekelea he “aga fakateaga.”

[Matahui Tala]

Manatu Nakai e Koe?

• Maeke fefe e tau Kerisiano ke ‘hula ki a Iehova’?

• Ko e heigoa ne ako e koe mai he tau fakafifitakiaga ha Mose mo Asafo?

• Ko e tau tagata fe he Tohi Tapu ne matalahi ke he fekafekauaga ha lautolu mo e Atua?

• Kua putoia ke he heigoa e hula ke he fakamailoga faka-Kerisiano ha tautolu?

[Tau Huhu he Fakaakoaga]

[Fakatino he lau 8]

Fai magaaho, ne ha ha ia Mose e tau logonaaga he fakauaua fakatagata