Ko e Tohi Tapu Ka Lagomatai a Koe ke Olioli

PETE nakai ko e tohi fakaekekafo, kua talahau he Tohi Tapu e lauiaaga ke he tau logonaaga—mitaki po ke kelea—kua maeke ke lauia e manamanatuaga mo e malolo tino he tagata. “Ko e loto fiafia kua eke mo vai lakau aoga haia,” he talahau he Tohi Tapu, “ka ko e loto malipilipi kua magomago ai e tau hui motua.” Matutaki atu, totou e tautolu: “Kaeke ke fakalolelole a koe ke he aho matematekelea, kua tote ni hāu a malolo.” (Tau Fakatai 17:22; 24:10) Ko e tau logonaaga he fakalolelole kua maeke ke fofo e malolo ha tautolu, he taute a tautolu ke lolelole mo e fakaalaia e logonaaga he nakai manako ke hiki po ke moua e lagomatai.

Maeke foki he fakalolelole ke lauia e tuaga fakaagaga he tagata. Ko e tau tagata ne fakateaga e tau logonaaga kua nakai olioli e lautolu e fakafetuiaga mitaki mo e Atua mo e fakamonuina mai ia ia. Ko Simone, ne talahau he vala tala fakamua, ne fakauaua ko ia “ko e vahega tagata ka talia he Atua.” Pete ia, ka ono a tautolu ke he Kupu he Atua, ko e Tohi Tapu, kua moua e tautolu kua ha ha he Atua e onoonoaga mitaki ki a lautolu ne lali ke fakafiafia a ia.

Leveki Moli he Atua

Kua talahau he Tohi Tapu ki a tautolu “kua tata mai a Iehova kia lautolu kua loto malipilipi; kua fakamoui foki e ia a lautolu kua loto pehia.” Nakai vihiatia he Atua e “loto malipilipi mo e pehia,” ka e mavehe e ia “ke fakamafana a lautolu ne loto holoilalo, mo e fakamafana ai e tau loto ha lautolu ne loto malipilipi.”—Salamo 34:18; 51:17; Isaia 57:15.

He taha magaaho, ko Iesu, ko e Tama he Atua, ne lata lahi ke fakamaama ke he tau tutaki hana ko e fakamoliaga kua kitia he Atua e mitaki he tau fekafekau Hana. He puhala he fakataiaga, ne talahau e ia kua mailoga he Atua kua nakai to e manu tote ki kelekele—ko e mena ne tokologa e tagata ne manamanatu ki ai kua nakai aoga lahi. Ne fakamaama  foki e ia kua iloa he Atua e tau mena ikiiki lalahi hagaao ke he tau tagata, ke hoko foki ke he numera he tau lauulu he tau ulu ha lautolu. Ne fakahiku e Iesu hana fakatai he talahau: “Ko e mena ia, ua matakutaku ai a mutolu; mena mua a mutolu ke he tau manu ikiiki loga.” (Mataio 10:29-31) * Ne fakakite e Iesu pete ne tau logonaaga he tau tagata hagaao ki a lautolu, ko e tau tagata ne ha ha ai e tua kua uho ke he fofoga he Atua. Mena ia, kua fakamanatu he aposetolo ko Peteru ki a tautolu kua “nakai fakamailoga tagata e Atua. Ka ko e tau tagata he tau motu oti kana ne matakutaku kia ia mo e mahani tututonu, kua talia ai e ia.”—Gahua 10:34, 35.

Fakatumau e Onoonoaga Lagotatai

Kua fakamalolo he Kupu he Atua a tautolu ke feaki e lagotatai ke he puhala ne onoono a tautolu ki a tautolu. Ne tohia he aposetolo ko Paulo i lalo he omoomoi: “Ha ko e mena tala atu e au kia mutolu oti, ha ko e fakaalofa noa kua foaki mai kia au, aua neke homo e manatu he taha ke he mena kua lata ke manatu ai, ka kia fakatekiteki e tau manatu, ke lata mo e tufaaga he tua ne tufatufa mai he Atua kia tautolu takitokotaha.”—Roma 12:3.

Moli, to nakai manako a tautolu ke manamanatu lahi mahaki ki a tautolu ke hokotia ke he matalahi; po ke manako a tautolu ke to molea atu mo e manamanatu fakateaga ki a tautolu. Ka e, ko e foliaga ha tautolu kua lata ke feaki e onoonoaga fakalatalata hagaao ki a tautolu ni, ko e manatu ke he tau malolo ha tautolu ti pihia mo e tau kuku ha tautolu. Kua talahau pehe he fifine Kerisiano: “Nakai ko e tagata kelea au; po ke tagata tokoluga atu ke he falu. Ha ha ia au e tau aga mitaki mo e tau aga kelea, ti pihia foki e falu tagata.”

Moli, ke moua e onoonoaga lagotatai pihia kua mukamuka lahi he talahau ke he taute. Liga lata ke lali fakamakamaka ke tiaki e onoonoaga kelea lahi ki a tautolu ne kua feaki e tautolu he tau tau loga. Moha ia, he lagomatai he Atua maeke ia tautolu ke hiki e aga ha tautolu ti pihia mo e onoonoaga ha tautolu ke he moui. Moli ai, ko e mena hanai ne fakamalolo he Kupu he Atua a tautolu ke taute. Totou e tautolu: “Kia tuku kehe e mutolu e tagata tuai ke he tau mena ne mahani ai a mutolu i tuai, ko ia ha ne kelea, ke lata mo e tau manako lahi ke fakahehe ai. Ka kia fakafou a mutolu ke he manako he tau loto ha mutolu. Mo e tapulu a mutolu ke he tagata fou kua eke ke lata mo e Atua, ke he tututonu mo e mahani mitaki ke fakamoli ai.”—Efeso 4:22-24.

He eketaha ke hiki e ‘manako he tau loto ha tautolu,’ ko e manako malolo lahi he tau manamanatuaga ha tautolu, kua maeke ia tautolu ke hiki e aga ne molea e kelea ke he mitaki. Ko Lena, ne talahau ke he vala tala fakamua, ne loto fakaaue he magaaho ne tuku kehe e ia e manatu kua nakai fai tagata ne fakaalofa ki a ia po ke lagomatai a ia, to nakai fai mena po ke hikiaga ke he tau logonaaga hana hagaao ki a ia. Ko e heigoa e fakatonuaga aoga ne moua he Tohi Tapu kua lagomatai a Lena, Simone, mo e falu ke taute e hikiaga pihia?

 Tau Matapatu Fakaakoaga he Tohi Tapu ne Fakatupu ki Mua e Olioli

“Kia tuku atu kia Iehova e tau mena ne fakaatukehe ai a koe; ko ia ni ke fakamalolo a koe.” (Salamo 55:22) Mua ue atu, maeke he liogi ke lagomatai a tautolu ke moua e olioli moli. Pehe a Simone: “Ka logona e au e fakalolelole, ne haga atu au ki a Iehova mo e ole lagomatai ki a ia. Nakai la ha ha ia au ke he tuaga ia ne logona hifo e au e malolo mo e takitakiaga hana.” He fakamalolo he salamo a tautolu ke tuku atu e tau kavega ha tautolu ki a Iehova, kua fakamanatu e ia ki a tautolu kua nakai ni leveki e Iehova a tautolu ka e onoono foki a ia ki a tautolu takitokotaha kua uho ke moua e lagomatai mo e lalago hana. He po he Paseka 33 V.N., ne momoko e tau tutaki ha Iesu ha ko e mena ne talahau e Iesu hagaao ke he fano kehe mafiti hana. Ne fakamalolo e Iesu a lautolu ke liogi ke he Matua, ti lafi e ia: “Ati ole atu a, ti moua ni e mutolu, kia katoatoa ai ha mutolu a fiafia.”—Ioane 16:23, 24.

“Kua mua e monuina hana ke foaki atu, ke he monuina hana ke talia mai.” (Gahua 20:35) He fakaako e Iesu, ko e foaki ko e kei ke moua e olioli moli he moui. Ko e fakagahua e kupu moli he Tohi Tapu kua fakamalolo a tautolu ke hagaaki ke he tau manako he falu nakai ke he tau kuku ni ha tautolu. Ka lagomatai e tautolu e falu mo e kitia e tali loto fakaaue ha lautolu, kua logona e tautolu e mitaki hagaao ki a tautolu. Ne omoomoi a Lena ko e fakalataha tumau ke he tala mitaki mai he Tohi Tapu mo e tau katofia hana kua lagomatai a ia ke he ua e puhala. “Fakamua, kua foaki ki a au e vahega fiafia mo e makona ne tutala ki ai a Iesu,” he talahau e ia. “Uaaki, ne moua e au e tali mitaki mai he falu, ne lagomatai aki au ke moua e olioli.” He foaki fakamokoi a tautolu, to moua e tautolu e moli he Tau Fakatai 11:25: “Ko ia foki kua fakamalū atu ke he falu, to fakamalū ai foki a ia.”

“Kua kelea e tau aho oti, ke he tau tagata matematekelea; ka koe loto fiafia, ko e galue nakai noa haia.” (Tau Fakatai 15:15) Igatia a tautolu mo e fifiliaga ke he puhala ne onoono a tautolu ki a tautolu ni mo e tau tutuaga ha tautolu. Maeke ia tautolu ke tuga a ia ne kitia e tau mena oti kua kelea mo e logona hifo e mamahi, po ke fifili a tautolu ke manamanatu mitaki, he logona hifo e “loto mitaki,” ti olioli ke tuga ko tautolu ke he galue. He talahau e Simone: “Kua lali au ke fakatumau e mitaki. Kua fakatumau au ke lavelave he fakaakoaga fakatagata mo e ke he fekafekauaga, ti fakauka au ke he liogi. Kua lali foki au ke takatakai he tau tagata mitaki, ti lali au ke ha ha i ai mo lautolu.” Ko e aga he loto pihia kua takitaki atu ke he olioli moli, tuga ni he tomatoma he Tohi Tapu ki a tautolu: “Kia fiafia kia Iehova, mo e olioli a mutolu kua tututonu; kia kalaga mo e fiafia a mutolu oti kua loto fakamoli.”—Salamo 32:11.

“Kua fakaalofa e kapitiga ke he tau aho oti kana; kua fanau foki e matakainaga ke lata ai mo e aho matematekelea.” (Tau Fakatai 17:17) He tutala ke he fakahele po ke he tagata tomatoma ne falanaki ki ai kua lagomatai a tautolu ke fehagai mo e  tau logonaaga kelea mo e utakehe ai neke fakapehia a tautolu. He tutala mo e falu kua lagomatai a tautolu ke kitia e tau mena mai he tuaga lagotatai mo e mitaki. “Ko e talahau e tau manatu kua lagomatai lahi,” he talahau e Simone. “Kua lata ia koe ke talahau ke he taha tagata e tau logonaaga hau. Ko e mena kua lata ni a ia ke fakatoka mai ki fafo.” Ko e taute pihia ka lagomatai a koe ke moua e moli he fakatai ne pehe: “Ko e fakaatukehe ke he loto he tagata kua tukutukuhifo ai a ia; ka ko e kupu mitaki ke olioli ai.”—Tau Fakatai 12:25.

Mena Hau ka Taute

Kua manamanatu a tautolu ka e gahoa ni mai he loga e tau matapatu fakaakoaga aoga mo e homo ue atu he Tohi Tapu kua maeke ke lagomatai a tautolu ke kautu ke he tau logonaaga kelea mo e moua e olioli moli. Kaeke ko koe mo lautolu ne lali ke kautu mai he tau logonaaga pihia, maeke ia mautolu ke fakamalolo a koe ke kumikumi fakalahi ke he Kupu he Atua, ko e Tohi Tapu. Ako ke feaki e logonaaga mo e lagotatai hagaao ki a koe mo e fakafetuiaga hau mo e Atua. Ko e amaamanakiaga moli ha tautolu ko e takitakiaga mai he Kupu he Atua, to maeke ia koe ke moua e olioli moli ke he tau mena oti ne taute e koe.

[Matahui Tala]

[Fakatino he lau 7]

He momoui ke he tau matapatu fakaakoaga he Tohi Tapu kua fakatolomaki e olioli