To Fakaata Nakai e Koe e Lilifu he Atua?
To Fakaata Nakai e Koe e Lilifu he Atua?
‘Kua fakaata e tautolu e lilifu a Iehova.’—2 KORINITO 3:18.
1. Ko e heigoa ne kitia e Mose, mo e heigoa ne tupu he magaaho fakamui?
KO E taha he tau fakakiteaga ofoofogia lahi ne nakai la kitia he tagata. He haia tokotaha i luga muatua he Mouga ko Sinai, ne foaki ki a Mose e poaki fakaliga kehe. Kua fakaata a ia ke kitia e mena ne nakai la kitia he taha tagata—ko e lilifu a Iehova. Pete ia kua nakai kitia mata e Mose a Iehova. Kua kikila lahi e foliga he Atua ti nakai moui ha tagata ka kitia a ia. Ka e ufi aki e Iehova e “lima” hana a Mose ke eke mo puipui ato mole atu a Ia, puhala he hukui fakaagelu. Ti fakaata e Iehova a Mose ke kitia e vala fakahiku he kikila he fakakiteaga he lilifu hana. Ne vagahau foki a Iehova ki a Mose puhala he agelu. Ne fakamaama he Tohi Tapu e mena ne tupu he magaaho fakamui: “Kua hifo mai a Mose he mouga ko Sinai, . . . kua kikila e kili he hana fofoga he vagahau a laua mo [Iehova].”—Esoto 33:18–34:7, 29.
2. Ko e heigoa ne tohia he aposetolo ko Paulo hagaao ke he lilifu ne fakaata he tau Kerisiano?
2 Fakatino la a koe i luga he mouga ia mo Mose. Ko e ofogia ha ia ke kitia e kikila fulufuluola he Malolo Ue Atu mo e ke fanogonogo ke he tau kupu hana! Ko e monuina lahi a ia ke o hifo mai tokoua mo Mose he Mouga ko Sinai, ko e hulalo he maveheaga he Fakatufono! Ka e, iloa nakai e koe ke he falu ni a puhala, kua fakaata he tau Kerisiano moli e lilifu he Atua ke mua atu foki ke he puhala ne fakaata ai e Mose? Ko e manatu fakalagalaga ia kua moua i loto he tohi ne tohia he aposetolo ko Paulo. Ne tohia e ia ko e tau Kerisiano fakauku ‘kua fakaata e lilifu a Iehova.’ (2 Korinito 3:7, 8, 18) Ke he taha kakano, kua fakaata foki he tau Kerisiano mo e amaamanakiaga ke he lagi e lilifu he Atua.
Puhala ne Fakaata he Tau Kerisiano e Lilifu he Atua
3. Iloa fefe e tautolu a Iehova ke he tau puhala ne nakai iloa e Mose?
3 Kua maeke fefe ia tautolu ke fakaata e lilifu he Atua? Kua nakai la kitia po ke logona e tautolu a Iehova ke tuga a Mose. Moha ia, kua iloa e tautolu a Iehova ke he tau puhala ne nakai iloa e Mose. Kua nakai hau a Iesu ko e Mesia ato teitei 1,500 e tau he mole e mate a Mose. Ha kua pihia, ne nakai iloa e Mose e puhala ka fakamoli ai e Fakatufono ia Iesu, ne mate ke fakamagalo e tau tagata mai he kavega matematekelea he hala mo e mate. (Roma 5:20, 21; Kalatia 3:19) Mua atu, kua kitia hokoia e Mose e homo ue atu he finagalo a Iehova ke he puhala tote, ne matapatu ke he Kautu faka-Mesia, mo e lalolagi Parataiso ka tamai. Kua kitia ai e tautolu e lilifu a Iehova, nakai mo e tau mata moli ha tautolu, ka e mo e tau mata he tua ne fakave ke he tau fakaakoaga he Tohi Tapu. Taha mena foki, kua logona e tautolu e leo ha Iehova, nakai puhala he agelu, ka e puhala he Tohi Tapu, mahomo atu ke he tau Evagelia, ne fakamaama fakafuluola e tau fakaakoaga mo e fekafekauaga ha Iesu.
4. (a) Fakaata fefe he tau Kerisiano fakauku e lilifu he Atua? (e) Ko e heigoa e tau puhala kua maeke ia lautolu ne ha ha ai e amaamanakiaga ke he lalolagi ke fakaata e lilifu he Atua?
4 Pete he nakai fakaata he tau Kerisiano e lilifu he Atua he kikila e tau fofoga ha lautolu, nukua kikila pauaki e tau fofoga ha lautolu he fakamatala atu a lautolu ke he falu hagaao ke he aga mo e tau finagalo ha Iehova. Hagaao ke he vaha ha tautolu, ne talahau tuai he perofeta ko Isaia ko e tau tagata he Atua ‘to talahau atu foki e lautolu e lilifu [a Iehova] ke he tau motu kehe.’ (Isaia 66:19) Pihia foki, he 2 Korinito 4:1, 2, ne totou e tautolu: ‘Kua ha ha ia mautolu e fekafekau nai, kua tiaki e mautolu e tau mena galo ke ma ai, nakai o fano a mautolu mo e mahani pikopiko, nakai fiofio e mautolu e kupu he Atua; ka kua fakailoa a mautolu ke he tau loto manamanatu he tau tagata oti ki mua he Atua he fakakite atu e mautolu e kupu moli.’ Kua hagaaki tonu a Paulo ke he tau Kerisiano fakauku, ko e “tau fekafekau ke he maveheaga fou.” (2 Korinito 3:6) Ti ko e fekafekauaga ha lautolu kua lauia ai e tau tagata tokologa ne moua e amaamanakiaga ke moui tukulagi he lalolagi. Putoia ai ke he fekafekauaga he tau matakau ne ua ke fakaata e lilifu a Iehova nakai ni ke he tau mena ne fakaako e lautolu ka e pihia foki ke he ha lautolu a puhala moui. Ko e kotofaaga mo e fifiliaga ha tautolu ke fakaata e lilifu he Atua Mua Ue Atu!
5. Ko e heigoa ne fakakite moli mai he monuina fakaagaga ha tautolu?
5 He vaha nei, ko e tala mitaki lilifu he Kautu he Atua hane fakamatala ke he lalolagi katoa, tuga ne talahau tuai e Iesu. (Mataio 24:14) Ko e tau tagata he tau motu oti, tau magafaoa, mo e tau vagahau oti kua talia fiafia e tala mitaki mo e hikihiki e tau momoui ke maeke ke taute e finagalo he Atua. (Roma 12:2; Fakakiteaga 7:9) Tuga e tau Kerisiano fakamua atu, kua nakai maeke ia lautolu ke taofi mai he fakamatala atu hagaao ke he tau mena ne kitia mo e logona e lautolu. (Gahua 4:20) Kua molea e ono miliona tagata, ke mua atu ke he ha magaaho he fakamauaga tuai, hane fakaata e lilifu he Atua he vaha nei. Fakalataha nakai a koe mo lautolu? Ko e monuina fakaagaga he tau tagata he Atua kua foaki e tau fakamoliaga mauokafua ke he fakamonuina mo e puipui ha Iehova. Kua kitia moli e agaga ha Iehova ia tautolu pete kua ha ha ai e tau kau malolo hane totoko ki a tautolu. Kia kikite a tautolu mogonei ke he kakano ne pihia ai.
To Nakai Fakanono e Tau Tagata he Atua
6. Ko e ha kua lata ke ha i ai e tua mo e loto malolo ke maeke ke taute e tuaga ma Iehova?
6 Liga kua hea ki a koe ke fakamoli e hopoaga hagaao ke he tagata holifono. Iloa e koe kua ha ha he tagata holifono e fakatokatokaaga malolo lahi mo e to fakaaoga e tau puhala kehekehe ke taofi a koe neke fakakite e koe e kelea hana. He talahau e koe e tau tala moli hagaao ke he tagata holifono ia kua lata ke loto malolo mo e mauokafua to puipui he fakatufono a koe mai ia ia. Kua ha ha a tautolu ke he tuaga pihia. He fakamoli ki a Iehova mo e tau finagalo hana, kua fakakite foki e tautolu e moli hagaao ki a Satani ko e Tiapolo, he fakakite a ia ko e kelipopo tagata mo e pikopiko ne fakahehe e lalolagi katoa. (Ioane 8:44; Fakakiteaga 12:9) Ke taute e tuaga hau ma Iehova mo e totoko ke he Tiapolo kua lata ke ha i ai e tua mo e loto malolo.
7. Fefe e fakaohoohoaga ha Satani, mo e ko e heigoa ne lali a ia ke taute?
7 Moli ni, ko Ia ne Mua Ue Atu, ko Iehova. Ko e malolo hana kua tokoluga ue atu ke he ha Satani. Kua maeke ia tautolu ke iloa moli kua nakai ni maeke ia Iehova ke puipui a tautolu ka kua manako lahi foki a ia ke puipui a tautolu he fekafekau fakamoli a tautolu ki a ia. (2 Nofoaga he Tau Patuiki 16:9) Pete he pihia, kua pule a Satani ke he tau temoni mo e lalolagi tagata ne mafoki kehe mai he Atua. (Mataio 12:24, 26; Ioane 14:30) Kua liti mai ke he lalolagi mo e puke he “ita lahi,” kua totoko vevela a Satani ke he tau fekafekau ha Iehova mo e fakaaoga e lalolagi ne pule a ia ki ai ke lali ke fakanono e tau gutu ha lautolu oti ne fakamatala e tala mitaki. (Fakakiteaga 12:7-9, 12, 17) Taute fefe e ia e mena nei? Tolu la e puhala.
8, 9. Fakaaoga fefe e Satani e fakaalofa fakahehe, mo e ko e ha kua lata ia tautolu ke fifili fakamitaki a lautolu ka feoaki mo tautolu?
8 Taha e puhala ne lali a Satani ke fakatauhele a tautolu ko e levekiaga he moui. Ko e tau tagata he tau aho fakamui nei kua velevele koloa, ofaofa ni e lautolu a lautolu, mo e manako lahi ke he tau mena ke fiafia ai. Nakai fakaalofa a lautolu ke he Atua. (2 Timoteo 3:1-4) He lavelave lahi ke he tau mena he tau aho takitaha he moui, kua tokologa e tagata ne “nakai omaoma,” (NW) ke he tala mitaki ne fakamatala age e tautolu. Kua nakai ni fiafia a lautolu ke fakaako e kupu moli he Tohi Tapu. (Mataio 24:37-39) Kua maeke e aga pihia ke pikitia, ti taute a tautolu ke fakateaga fakaagaga. Kaeke fakaata e tautolu a tautolu ke feaki e manako lahi ke he tau koloa he tino mo e fiafia he moui, to momoko fakahaga e fakaalofa ha tautolu ma e Atua.—Mataio 24:12.
9 Ko e kakano nei ati fifili fakamitaki he tau Kerisiano e tau tagata ne feoaki mo lautolu. “Ko ia kua feoaki mo e tau tagata iloilo, kua iloilo ni a ia,” he tohia he Patuiki ko Solomona, “ka ko ia kua kapitiga mo e tau tagata goagoa, to matematekelea ai a ia.” (Tau Fakatai 13:20) Kia “feoaki” ai a tautolu mo lautolu ne fakaata e lilifu he Atua. Ko e mena mitaki lahi a ia ke taute! He fakapotopoto auloa mo e tau matakainaga ha tautolu ke he tau feleveiaaga mo e he falu magaaho foki, kua moua e tautolu e malolo ha ko e fakaalofa, tua, fiafia, mo e pulotu ha lautolu. Ko e feoakiaga atihake pihia kua fakamalolo e fifiliaga ha tautolu ke fakauka ke he fekafekauaga ha tautolu.
10. Ko e heigoa e tau puhala ne fakaaoga e Satani e fakafiufiu ki a lautolu ne fakaata e lilifu he Atua?
10 Ko e puhala ke uaaki ne lali e lalolagi ke taofi e tau Kerisiano oti he fakaata e lilifu he Atua ko e fakafiufiu. Kua nakai lata ke fakaofo he lagatau nei a tautolu. He magahala he fekafekauaga ha Iesu Keriso he lalolagi, ne fakafiufiu, he feki, va, ekefakakelea, mo e tauanu foki ki a ia. (Mareko 5:40; Luka 16:14; 18:32) Kua va foki ke he tau Kerisiano fakamua atu. (Gahua 2:13; 17:32) Ko e tau fekafekau ha Iehova he vaha fou nei kua fakafehagai foki ke he tau ekefakakelea pihia. Hagaao ke he aposetolo ko Peteru, ne fakamailoga foki a lautolu ko e “tau perofeta pikopiko.” “To o mai ke he tau aho fakamui e tau tagata va,” he talahau tuai e Peteru, “kua mahani fakalata ke he tau manako lahi ha lautolu; kua pehe mai foki a lautolu, Ko fe e kupu talahaua ai ke haele mai a ia? ha ko e mena . . . kua tumau agaia e tau mena oti tali mai he fakatoka eke.” (2 Peteru 3:3, 4) Kua fakafiufiu foki e tau tagata he Atua ke nakai moli e tau mena taute. Ko e tau fakatufono he Tohi Tapu ke he tau mahani kua kitia mo mena tuai. Ke he tokologa, ko e fekau ne fakamatala e tautolu ko e mena goagoa. (1 Korinito 1:18, 19) Ko e tau Kerisiano, liga ke fehagai a tautolu mo e fakafiufiu ke he aoga, gahuaaga, pihia foki he falu magaaho ki loto he magafaoa. Nakai maueue, kua fakatumau a tautolu ke fakaata e lilifu he Atua puhala he fakamatalaaga ha tautolu, he iloa tuga a Iesu kua moli e Kupu he Atua.—Ioane 17:17.
11. Fakaaoga fefe e Satani e favaleaga ke lali ke fakanono e tau Kerisiano?
11 Ko e lagatau ke toluaki ne fakaaoga he Tiapolo he lali ke fakanono a tautolu ko e totokoaga po ke favaleaga. Ne pehe a Iesu ke he tau tutaki hana: “Ati tuku atu ai e lautolu a mutolu ke he matematekelea, mo e kelipopo a mutolu; to vihiatia foki a mutolu he tau motu oti ha ko e haku a higoa.” (Mataio 24:9) Moli lahi, ha ko e Tau Fakamoli a Iehova, kua fakafehagai a tautolu mo e tau favale muitui ke he tau fahi loga he lalolagi. Iloa e tautolu kua leva tigahau e talahau tuai e Iehova to tutupu e fakavihia, po ke faitaua, ki a lautolu ne fekafekau ke he Atua mo lautolu ne fekafekau ki a Satani ko e Tiapolo. (Kenese 3:15) Iloa foki e tautolu he fakatumau e mahani fakamoli i lalo he tau kamatamata, kua fakamoli a tautolu ke he tonuhia he pule katoatoa ha Iehova ke he lagi mo e lalolagi. He iloa e mena nei ka fakamalolo a tautolu pihia foki i lalo he tau tutuaga vevela lahi. To nakai maeke he ha favaleaga ke fakanono a tautolu kaeke fakatumau a tautolu ke fakamalolo ke fakaata e lilifu he Atua.
12. Ko e ha kua lata ia tautolu ke fiafia he fakatumau a tautolu ke tua fakamoli ki mua he totokoaga ha Satani?
12 Totoko nakai a koe ke he toho he lalolagi mo e fakakite e tua fakamoli pete ko e fakafiufiu mo e totokoaga? Ti kua ha ha ia koe e kakano ke fiafia. Ne fakamafana e Iesu a lautolu ka mumui ki a ia: “Uhoaki a mutolu ka faikupu kelea a lautolu, mo e favale kia mutolu, mo e tukumale pikopiko a lautolu kia mutolu ke he tau mena kelea oti ha ko au. Kia kolikoli a mutolu mo e fiafia ni; ha ko e ha ha he lagi ha mutolu a palepale kua lahi; ha ko e mena favale pihia a lautolu ke he tau perofeta ne mumua ia mutolu.” (Mataio 5:11, 12) Kua fakamoli ai he fakauka hau kua ha ha ia koe e agaga tapu malolo ha Iehova, hane fakamalolo a koe ke fakaata e lilifu hana.—2 Korinito 12:9.
Moua e Fakauka Mai ia Iehova
13. Ko e heigoa e alito kakano ne fakauka ai a tautolu ke he fekafekauaga faka-Kerisiano?
13 Ko e alito kakano ne fakauka a tautolu ke he fekafekauaga ha kua ofania e tautolu a Iehova mo e fiafia ke fakaata e lilifu hana. Kua hihiga e tau tagata ke fifitaki ki a lautolu ne ofania mo e fakalilifu e lautolu, ti kua nakai fai tagata ne kua mua atu e aoga ke fifitaki ki ai mai ia Iehova ko e Atua. Ha ko e fakaalofa lahi hana, ne fakafano e ia hana Tama ke he lalolagi ke talahau e kupu moli mo e ke fakamagalo e tau tagata ne omaoma. (Ioane 3:16; 18:37) Ke tuga e Atua, kua manako a tautolu ke tokihala e tau tagata oti kana mo e moua e fakamouiaga; kakano haia ne fakamatala a tautolu. (2 Peteru 3:9) Ko e manako nei, katoa mo e fakamaloloaga ha tautolu ke fifitaki e Atua, ne omoi a tautolu ke fakauka he fakaata e lilifu hana puhala he fekafekauaga ha tautolu.
14. Fakamalolo fefe e Iehova a tautolu ke fakauka ke he fekafekauaga?
14 Ka e, kua matapatu ni e malolo ha tautolu ke fakauka ke he fekafekauaga faka-Kerisiano mai ia Iehova. Kua fakatumau mo e fakamalolo e ia a tautolu kakano he agaga hana, hana fakatokatokaaga mo e hana Kupu, ko e Tohi Tapu. Kua ‘foaki e Iehova e fakauka’ ki a lautolu ne makai ke fakaata e lilifu hana. Ne tali e ia e tau liogi ha tautolu mo e foaki ki a tautolu e pulotu ke fehagai ke he tau kamatamata. (Roma 15:5; Iakopo 1:5) Taha mena foki, kua nakai toka e Iehova a tautolu ke hohokotia ke he tau favaleaga ne nakai fahia ki ai a tautolu. Kaeke falanaki a tautolu ki a Iehova, to puipui e ia a tautolu ke maeke ke fakatumau ke fakaata e lilifu hana.—1 Korinito 10:13.
15. Ko e heigoa ne lagomatai a tautolu ke fakauka?
15 He fakauka ke he fekafekauaga ha tautolu ka foaki e fakamoliaga kua ha ha ia tautolu e agaga he Atua. Ke fakataitai: Liga fekau he taha tagata a koe ke tufatufa e taha fua falaoa pauaki ke he taha fale mo e taha fale, nakai totogi. Ti talaatu ki a koe ke fakaaoga ni he tupe mo e magaaho hau ke taute aki e gahua nei. Nakai leva ne iloa e koe kua tokofiha ni e tagata ne manako moli ke he falaoa hau; ko e falu to totoko ke he laliaga hau ke tufatufa ai. Ti manatu nakai a koe ke fakatumau ke gahua he feua ia ke he tau mahina mo e tau tau takitaha? Liga nakai. Ka kua fakamakamaka foki a koe ke fakapuloa e tala mitaki he magaaho ni hau mo e fakaaoga ni e tupe hau ke he tau tau loga, liga ke he tau hogofulu tau foki. Ko e ha? Nakai kia ha ko e fakaalofa hau ki a Iehova mo e puhala he agaga hana kua fakamonuina e ia e tau laliaga hau he lagomatai a koe ke fakauka? E, kua pihia moli!
Ko e Gahua ke Manatu Tumau
16. Ko e heigoa e kakano ma tautolu mo e ma lautolu ne fanogonogo mai he fakauka a tautolu ke he fekafekauaga?
16 Ko e fekafekauaga he maveheaga fou ko e mena fakaalofa ne nakai fai fakatataiaga. (2 Korinito 4:7) Pihia foki, ko e fekafekauaga faka-Kerisiano ne taute he tau mamoe kehe he lalolagi katoa ko e koloa uho. He fakatumau a koe ke fakauka ke he fekafekauaga hau, maeke ia koe, ke tuga a Paulo mo Timoteo, ke “fakamoui ai e koe a koe, katoa mo lautolu kua fanogonogo kia koe.” (1 Timoteo 4:16) Manamanatu la ke he kakano he mena ia. Ko e tala mitaki ne fakamatala e koe kua foaki ke he falu e fifiliaga ke moui tukulagi. Maeke ia koe ke feaki e pipiaga malolo he fakakapitiga mo lautolu ne lagomatai fakaagaga e koe. Fakatino la e fiafia he moui tukulagi he Parataiso fakalataha mo lautolu ne lagomatai e koe ke ako hagaao ke he Atua! Moli to nakai nimo e lautolu e tau laliaga hau ke lagomatai a lautolu. Ko e mena ke olioli ki ai!
17. Ko e ha e magaaho ha tautolu ko e vaha kehe ue atu he fakamauaga tuai he tagata?
17 Kua moui a koe he vaha kehe ue atu he fakamauaga tuai he tagata. To nakai liu foki e tala mitaki ke fakamatala ke he lalolagi ne mafoki kehe mai he Atua. Ne moui a Noa he lalolagi pihia, mo e kitia ai e ia he fakaotioti. Kua liga fiafia lahi a ia ke iloa kua taute fakamoli e ia e finagalo he Atua he ta e vaka, ne takitaki atu ke he fakahaoaga hana mo e hana magafaoa! (Heperu 11:7) Maeke foki ia koe ke moua e fiafia pihia. Manamanatu la ke he puhala ka logona hifo e koe he lalolagi fou he manatu e koe e tau gahua hau he tau aho fakahiku nei, he iloa kua taute e koe e tau mena ne fahia ki ai ke fakatolomaki e fiafia he Kautu.
18. Ko e heigoa e fakamafanaaga mo e fakamaloloaga ne foaki e Iehova ke he tau fekafekau hana?
18 Kia fakatumau ai a tautolu ke fakaata e lilifu he Atua. He taute pihia e tautolu ka eke mo taha mena ka manatu tukulagi e tautolu. Kua manatu foki e Iehova e tau gahua ha tautolu. Ne foaki he Tohi Tapu e fakamaloloaga nei: “Ko e mena nakai hepehepe e Atua ke fakanimonimo ai e ia ha mutolu a tau gahua, mo e gahua fakamalolo he fakaalofa kua fakakite mai ai e mutolu ke he hana higoa, kua fekafekau tuai a mutolu ke he tau tagata tapu mo e fekafekau agaia ki ai. Ka kua manako lahi a mautolu kia takitokotaha a mutolu mo e fakakite mai e fakamakutu ia, kia mauokafua ai e amaamanaki ato hohoko ke he fakahikuaga. Kia nakai eke a mutolu mo tau tagata teva, ka kia fifitaki a mutolu kia lautolu kua moua tuai ke he tua mo e fakauka e tau mena kua talahaua mai.”—Heperu 6:10-12.
Maeke Nakai a Koe ke Fakamaama?
• Fakaata fefe he tau Kerisiano e lilifu he Atua?
• Ko e heigoa falu lagatau ne fakaaoga e Satani he lali ke fakanono e tau tagata he Atua?
• Ko e heigoa e fakamoliaga kua ha ha ia tautolu e agaga he Atua?
[Tau Huhu he Fakaakoaga]
[Fakatino he lau 9]
Ne fakaata he fofoga a Mose e lilifu
[Tau Fakatino he lau 10]
Kua fakaata e tautolu e lilifu he Atua ke he fekafekauaga ha tautolu