Fakamahani e Iehova e Tau Leveki ma e Fuifui Mamoe Haana
Fakamahani e Iehova e Tau Leveki ma e Fuifui Mamoe Haana
‘Ha ko Iehova kua foaki mai e pulotu; mai he fofoga hana e iloilo mo e loto manamanatu.’—TAU FAKATAI 2:6.
1, 2. Ko e ha e tau tagata taane ne papatiso kua fakaloa atu ke fakamalikiti e matagahua he fakapotopotoaga?
“KUA fiafia lahi au he magaaho ne kotofa au ko e motua,” he talahau e Nick, ne eke a ia mo leveki ke fitu e tau. “Ne kitia e au e kotofaaga nei ko e magaaho ke fakalaulahi e gahua haaku ki a Iehova. Ne logona e au kua kaitalofa e loto fakaaue haaku ke he tau mena oti ne taute e ia ma haaku. Ne manako foki au ke lagomatai e tau tagata he fakapotopotoaga ka maeke katoa ia au, ke lalago a lautolu ke he puhala taha ne maeke he falu motua ke lagomatai au.” Pete ia, he logona hifo e olioli haana ko e falu ni he tau kapaletu a ia. “Ha kua nakai la tu e 30 e tau he moui haaku he kotofa ai au,” ne matutaki e Nick, “kua tupetupe au neke temotemoai e tau puhala haaku—ke he lotomatala mo e pulotu—ke leveki fakamitaki e fakapotopotoaga.”
2 Ko lautolu ne kotofa e Iehova ke leveki e fuifui mamoe haana ne ha ha ai e tau kakano ke fiafia. Ne fakamanatu he aposetolo ko Paulo ke he tau motua i Efeso e taha kakano he fatiaki a Iesu, he pehē a ia: “Kua mua e monuina hana ke foaki atu, ke he monuina hana ke talia mai.” (Gahua 20:35) He eke mo fekafekau lagomatai po ke motua kua foaki ke he tau tagata taane ne papatiso e tau puhala lafi ki luga ke foaki ki a Iehova mo e ke he fakapotopotoaga. Ko e tau fekafekau lagomatai, ma e fakatai, kua gahua auloa mo e tau motua. Kua leveki foki he tau fekafekau nei e loga atu foki he tau matagahua kua lata. Ko e tau matakainaga taane pihia ne fakalagalaga he fakaalofa ma e Atua mo e katofia ke foaki e matagahua aoga lahi.—Mareko 12:30, 31.
3. Ko e ha e falu ne tehatehaua ke fakaloa atu ke he tau kotofaaga he fakapotopotoaga?
3 Ka e kua e tagata taane Kerisiano ne liga tehatehaua ke fakaloa atu ke he kotofaaga he eke mo fekafekau ti fakahiku ko e motua ha ko e logonaaga temotemoai haana? Tuga a Nick, ne liga tupetupe a ia kua nakai moua e ia e tau puhala makaka ke eke mo leveki lauia mitaki. Ko e matakainaga taane, ko koe nakai ia lautolu ne pihia e logonaaga? Kua fai fakavēaga e tau tupetupe pihia. Kua fai fakalagoaga e tau leveki ne kotofa ki a Iehova ma e puhala ne taute e lautolu e fuifui mamoe. Ne pehē a Iesu: “Ko ia kua foaki atu ki ai e tau mena loga, to kumi atu foki kia ia e tau mena loga; ko ia foki ne tuku atu ki ai he tau tagata e tau mena loga, to tala atu e lautolu kia ia ke fakalahi mai e tau mena.”—Luka 12:48.
4. Kua lagomatai fēfē e Iehova a lautolu ne kotofa e ia ke leveki haana tau mamoe?
4 Kua amanaki kia a Iehova ki a lautolu ne kotofa e ia ko e tau fekafekau mo e tau motua ke hahamo ne lautolu e kavega lafi ki luga? Nakai pihia, ne foaki e ia e lagomataiaga aoga kua maeke ia lautolu ke nakai ni fahia ka e pihia foki ke tupuola ai. He fakatutala ke he vala tala fakamua, kua foaki e Iehova e agaaga tapu haana, ko e fua nukua maeke ke lagomatai a lautolu ke leveki fakamitaki e tau mamoe. (Gahua 20:28; Kalatia 5:22, 23) Lafi atu, ne foaki e Iehova e pulotu, iloilo, mo e lotomatala. (Tau Fakatai 2:6) Taute fēfē e ia e mena nei? O mai la tautolu ke fakatutala ke he tolu e puhala kua fakamahani e Iehova e tau tagata takitaha ne kotofa e ia ke leveki haana tau mamoe.
Fakamahani he Tau Leveki Mamoe ne Iloa Mena
5. Ko e ha a Peteru mo Ioane ko e tau leveki lauia mitaki?
5 He magaaho ne tūtū e aposetolo ko Peteru mo Ioane ki mua he Saneheturini, ko e tau fakafili pulotu he lalolagi he hopoaga ia ne manamanatu ke he tau tagata taane nei kua ‘nakai ako mo e goagoa.’ Na maeke ia laua ke totou mo e tohi, ka e nakai moua e laua e fakamahaniaga ke he tau aoga fakaako he tau Tohiaga Tapu. Pete he pihia, ko Peteru mo Ioane fakalataha mo e falu tutaki ne fakamooli ke eke mo tau faiaoga lauia mitaki, he omoi e tokologa ha lautolu ke fanogonogo ki a lautolu ke eke mo tau tagata talitonu. Maeke fēfē e tau tagata taane goagoa nei ke eke mo tau faiaoga mua atu? He mole e fanogonogo ki a Peteru mo Ioane, ko e hopoaga ne “ofo ai a lautolu; kua iloa mitaki ai e lautolu, ko laua ne fakalataha mo Iesu.” (Gahua 4:1-4, 13) Mooli, ne moua e laua e agaaga tapu. (Gahua 1:8) Ka kua maaliali foki—ke he tau fakafili pouli fakaagaaga ia—nukua fakamahani e Iesu e tau tagata taane ia. He fakalataha a ia mo lautolu he lalolagi, ne fakamahani e Iesu e tau aposetolo haana ke nakai ni fakapotopoto a lautolu ne tuga e tau mamoe ka e iloa foki ke leveki a lautolu ka eke ke fakalataha mai a lautolu ke he lotopā.—Mataio 11:29; 20:24-28; 1 Peteru 5:4.
6. Ko e heigoa e fakafifitakiaga he fakamahani e falu ne fakatoka e Iesu mo Paulo?
6 He mole e fakaliu tu mai ha Iesu, ne matutaki a ia ke fakamahani a lautolu ne kotofa ko e tau leveki. (Fakakiteaga 1:1; 2:1–3:22) Ma e fakatai, ne fifili ni e ia a Paulo mo e takitaki ke he haana a fakamahani. (Gahua 22:6-10) Ne loto fakaaue a Paulo ke he fakamahaniaga ne moua e ia ti fakahoko age e ia e tau mena ne ako e ia ke he falu motua. (Gahua 20:17-35) Tuga anei, ne fakaaoga e ia lahi e magaaho mo e malolō he fakamahani a Timoteo ke eke mo “ekegahua” he fekafekauaga he Atua, “nakai fai mena ke mā ai.” (2 Timoteo 2:15) Ne fakatu ai e fekapitigaaki tata he tau tagata taane nei. Fakamua ai, ne tohi e Paulo hagaao ki a Timoteo: “Ne fekafekau a ia fakalataha mo au ha ko e tala mitaki, tuga ne tama ke he matua tane hana.” (Filipi 2:22) Ne nakai tutuli e Paulo ke taute a Timoteo po ke ha tagata foki mo tutaki haana ni. Ka e, ne fakamalolō e ia e tau matakainaga talitonu ke eke mo ‘fifitaki ki a ia, tuga na ia kia Keriso.’—1 Korinito 11:1.
7, 8. (a) Ko e heigoa e mena ne tupu nukua fakakite e mitaki kua fua mai ka fifitaki he tau motua a Iesu mo Paulo? (e) Magaaho fe kua lata he tau motua ke kamata fakamahani e tau fekafekau lagomatai mo e tau motua kua latatonu?
7 He fifitaki ki a Iesu mo Paulo, ko e tau leveki iloa mena ne fakailoilo ke fakamahani e tau matakainaga taane ne papatiso, ti fua mitaki foki. Mailoga e mena ne tupu ki a Chad. Ne tupu hake a ia he kaina ne mavehevehe fakalotu ka e nakai la leva ne kotofa a ia ko e motua. Pehē a ia: “He tau tau loga kua mole, loga e motua iloa mena ne lagomatai au ke tupu ki mua fakaagaaga. Ha ko e matua taane haaku ne nakai talitonu, ne fakakite he tau motua ia e fiafia pauaki ki a au ti eke ai mo tau matua taane fakaagaaga ki a au. Ne fakatoka magaaho a lautolu ke fakamahani au ke he fekafekauaga, ti fakahiku, taha e motua ne fakamahani au ke leveki ma e tau matagahua fakapotopotoaga ne moua e au.”
8 He fakakite he mena ne tupu ki a Chad, ko e tau leveki lotomatala ne kamata ke fakamahani tuai fakamua e tau fekafekau lagomatai mo e tau motua kua latatonu ato tolomaki atu a lautolu ke lata mo e tau kotofaaga pihia. Ko e ha ne pihia ai? Ha kua poaki he Tohi Tapu ko e tau fekafekau lagomatai mo e tau motua kua lata ke moua e tau mahani mo e tuaga fakaagaaga kua mua atu e mitaki ato kotofa a lautolu ke fekafekau. Kua lata a lautolu ke “kamatamata fakamua.”—1 Timoteo 3:1-10.
9. Ko e heigoa e matagahua ne ha ha he tau leveki momotua, ti ko e ha?
9 Ka lata e tau matakainaga taane ne papatiso ke kamatamata, kua tonu ni ke fakamahani fakamua a lautolu. Ke fakataitai: Ka tala age ke he tama aoga ke taute e kamatamata uka ne nakai fakakite he tau faiaoga ha fakamahaniaga pauaki, to paase nakai e kamatamata he tama aoga? Liga to kaumahala a ia. Ko e mena ia, kua lata lahi e fakamahaniaga. Pete ia, ko e tau faiaoga makutu ne nakai ni fakamahani e tau tama aoga ke paase e kamatamata ka e pihia foki ke fakaaoga e iloilo ne moua e lautolu. Pihia foki, ko e tau motua kua eketaha ke lagomatai e tau matakainaga taane ne papatiso ke feaki e tau mahani kua lata ke he tagata taane ne kotofa he foaki ki a lautolu e fakamahani pauaki. Ne nakai ni taute e lautolu ke lagomatai aki e tau matakainaga taane nei ke kotofa ke fekafekau ka e ke lagomatai foki a lautolu ke maeke ke leveki fakamitaki e fuifui mamoe. (2 Timoteo 2:2) Mooli, ko e tau matakainaga taane ne papatiso kua lata ke taute e vala ha lautolu mo e gahua fakalahi ke moua e lotomatala kua lata he fekafekau lagomatai po ke motua. (Tito 1:5-9) Mohā ia, he fakamakai ke fakamahani a lautolu ia ke hokotia atu ke he tau matagahua he fakapotopotoaga, kua maeke he tau leveki iloa mena ke lagomatai a lautolu ke tupu mafiti ki mua.
10, 11. Maeke fēfē he tau leveki ke fakamahani e falu ma e tau kotofa lafi ki luga?
10 Maeke fēfē pauaki he tau leveki iloa mena ke fakamahani e falu ke leveki e tau kotofaaga he fakapotopotoaga? Ke kamata aki, he fiafia ke he tau matakainaga taane he fakapotopotoaga—he gahua tumau mo lautolu he fekafekauaga he fonua mo e lagomatai a lautolu ke fakaholo ki mua e maama ke maeke ke “fakatokatoka fakahako e kupu moli.” (2 Timoteo 2:15) Kua fakatutala e tau leveki momotua mo lautolu e tau matakainaga taane ia ke he tau olioli ka moua mai he fekafekau ke he falu mo e makona kua moua e lautolu mai he fakatoka mo e moua e tau foliaga fakaagaaga. Kua foaki totonu foki e lautolu e tau manatu pauaki ke he puhala ke fakatolomaki e matakainaga taane ke eke mo “fakafifitaki ke he fuifui mamoe.”—1 Peteru 5:3, 5.
11 Ka kotofa e matakainaga ke eke mo fekafekau lagomatai, kua matutaki e tau leveki pulotu ke fakamahani a ia. Ko Bruce, ne eke mo motua ke teitei 50 e tau, ne pehē: “Manako au ke nofo mo e fekafekau ne kotofa foou mo e liu fakaako e tau hatakiaga ne tohia he fekafekau fakamoli mo e loto matala. Ne totou foki e maua ha takitakiaga hagaao ke he matagahua pauaki haana, ti manako au ke gahua mo ia ato mahani a ia mo e tau matagahua haana.” He iloa mogoia he fekafekau, kua maeke foki a ia ke fakamahani ke he gahua ahiahi he leveki. “Ka uta e au e fekafekau lagomatai mo au ke he ahiahi ne leveki,” ne matutaki atu e Bruce, “ne lagomatai e au a ia ke fifili e tau kupu tohi ka fakamalolō mo e atihake e tagata po ke magafaoa kua aahi atu a maua ki ai. He ako e puhala ke fakaaoga e tau Tohiaga Tapu ke he puhala kua hokotia ke he loto kua latatonu kaeke ke eke e fekafekau mo leveki lauia mitaki.”—Heperu 4:12; 5:14.
12. Maeke fēfē e tau leveki iloa mena ke fakamahani e tau motua kotofa foou?
12 Ko e tau leveki kotofa foou ne aoga lahi foki he fakamahani. He fitā he talahau e Nick, pehē: “Ko e fakamahani haaku ne moua mai he tau leveki momotua tokoua kua mahomo atu e lagomatai. Kua fa maama he tau matakainaga taane nei e puhala ke taute aki e tau matakupu pauaki. Ne fanogonogo fakatekiteki tumau a laua ki a au mo e manamanatu fakahokulo ke he manatu haaku—pete ne nakai talia a laua ki ai. Ne lahi e mena ne ako e au mai he kitekite ke he puhala molū mo e fakalilifu ne fehagai a laua mo e tau matakainaga he fakapotopotoaga. Ko e tau motua nei ne peehi ki a au e lata ke fakaaoga fakapulotu e Tohi Tapu ka fakamafola e tau lekua po ke foaki e fakamalolōaga.”
Fakamahani he Kupu he Atua
13. (a) Ko e heigoa kua lata ke moua he matakainaga taane ke eke mo leveki lauia mitaki? (e) Ko e ha ne pehē a Iesu: “Ko e haku a tau kupu, nakai ko e haku”?
13 Mooli, ko e Kupu he Atua, e Tohi Tapu, ne toka ai e tau fakatufono, tau matapatu fakaakoaga, mo e tau fakataiaga ke moua he leveki ke maeke ke “katoatoa ai e mitaki he tagata he Atua, kia taute ni a ia ke he tau gahua mitaki oti kana.” (2 Timoteo 3:16, 17) Liga ha ha he matakainaga taane e fakaakoaga mitaki he lalolagi, ka ko e iloilo haana ke he tau Tohiaga Tapu mo e puhala ka fakagahua aki e ia kua lagomatai a ia ke eke mo leveki lauia mitaki. Mailoga e fakafifitakiaga ha Iesu. Ko ia ko e leveki mua atu e iloilo, lahi e manamanatu, mo e pulotu lahi mahaki fakaagaaga he leva e moui ke he lalolagi; ka e, he nakai falanaki a ia ke he haana ni a pulotu ka fakaako e ia e tau mamoe a Iehova. Pehē a ia: “Ko e haku a tau kupu, nakai ko e haku, ka ko e hana ne fakafano mai au.” Ko e ha ne tuku e Iesu e fakahekeaga ke he haana Matua he lagi? Ne fakamaama e ia: “Ko ia ke talahau e ia a ia, kua kumi e ia e fakahekeaga māna ni.”—Ioane 7:16, 18.
14. Kalo kehe fēfē e tau leveki he tutuli ni ha lautolu a lilifu?
14 Kalo kehe e tau leveki fakamooli he tutuli ni ha lautolu a fakahekeaga. Kua fakavē e hatakiaga mo e fakamalolōaga ha lautolu, nakai ke he pulotu ni ha lautolu, ka ke he Kupu he Atua. Ne loto fakaaue a lautolu ke he matagahua he leveki ke lagomatai e tau mamoe ke moua e “finagalo a Keriso,” nakai ko e finagalo ni he tau motua. (1 Korinito 2:14-16) Ma e fakatai, ka e kua ko e motua ne lagomatai e hoa ne fehagai mo e tau tuaga uka ke he fakamauaga ne fakavē haana tomatomaaga ke he mena ne iloa e ia ka e nakai ke he tau matapatu fakaakoaga he Tohi Tapu mo e vala tala ne taute fakailoa he “fekafekau fakamoli mo e loto matala”? (Mataio 24:45) Ko e tomatoma haana kua liga molea e fakaohooho he tau aga fakamotu mo e fakakaupa ni ke he iloa temotemoai haana. Mooli, nakai kelea oti e tau aga fakamotu, ti liga lauia ai e moui he motua. Ka kua aoga lahi e tau mamoe he magaaho ka fakamalolō he tau leveki a lautolu ke fanogonogo ke he leo a Iesu mo e tau kupu ha Iehova ka e nakai ke he tau manatu he tau tagata po ke pule he aga fakamotu.—Salamo 12:6; Tau Fakatai 3:5, 6.
Fakamahani he “Fekafekau Fakamoli mo e Loto Matala”
15. Ko e heigoa e poakiaga ne foaki e Iesu ke he “fekafekau fakamoli mo e loto matala,” ti ko e heigoa taha kakano ma e kautuaga he vahega fekafekau?
15 Ko e tau leveki tuga e tau aposetolo ko Peteru, Ioane, mo Paulo ko e tau tagata oti he matakau ne fakamaama e Iesu ko e “fekafekau fakamoli mo e loto matala.” Ko e vahega fekafekau nei ne fakatū he tau matakainaga fakauku he agaaga ha Iesu he lalolagi, ne amaamanaki ke pule mo e Keriso ke he lagi. (Fakakiteaga 5:9, 10) He tau aho fakamui nei he lalolagi, ko e numera ne toe he tau matakainaga he Keriso ne toe he lalolagi kua teitei katoa ai. Ka e, ko e gahua ne poaki e Iesu ki a lautolu ke fakakatoatoa—ko e fakamatala e tala mitaki he Kautu ato hoko e fakaotiaga—kua fakalaulahi atu. Pihia foki, ko e vahega fekafekau nukua kautu mooli! Ko e ha? Taha vala, ha kua fakamahani e lautolu e tau tagata he ‘tau mamoe kehe’ ke lalago a lautolu ke he fakamatala mo e gahua fakaako. (Ioane 10:16; Mataio 24:14; 25:40) He vahā nei, ko e laulahi he gahua kua fakakatoatoa he matakau fakamooli nei.
16. Fakamahani fēfē he vahega fekafekau e tau tagata taane ne kotofa?
16 Foaki fēfē he vahega fekafekau e fakamahaniaga nei? He senetenari fakamua, ko e tau hukui he vahega fekafekau ne foaki e pule ke fakamahani mo e kotofa e tau leveki he tau fakapotopotoaga, ti maeke ia lautolu ke fakamahani e tau mamoe. (1 Korinito 4:17) Ko e mena taha ia ni he vahā nei. Ko e Kau Fakatufono—ko e matakau tote he tau motua ne fakauku nukua hukui e vahega fekafekau—ne foaki e pule ke he tau hukui i ai ke fakamahani mo e kotofa e tau fekafekau mo e tau motua ne hogofulu e tau afe he tau fakapotopotoaga he lalolagi katoa. Lafi ki ai, kua fakatoka he Kau Fakatufono e tau aoga ke fakamahani e tau tagata he La Komiti, tau leveki faifano, tau motua, mo e tau fekafekau lagomatai ke he puhala mitaki lahi mahaki ke leveki e tau mamoe. Ko e takitakiaga lafi ki ai ne foaki ke he tau tohi, he tau vala tala ne lomi fakailoa he Ko e Kolo Toko, mo e he puhala he falu tohi, tuga e Organized to Do Jehovah’s Will. *
17. (a) Fakakite fēfē e Iesu haana mauokafua ke he vahega fekafekau? (e) Maeke fēfē he tau leveki fakaagaaga ke fakakite e mauokafua ke he vahega fekafekau?
17 Ha ha ia Iesu e mauokafua lahi ke he vahega fekafekau ti kua kotofa age e ia ki ai haana “tau mena oti”—ko e haana tau koloa fakaagaaga oti kana he lalolagi. (Mataio 24:47) Kua fakamooli e tau leveki ne kotofa kua ha ha foki ia lautolu e mauokafua he vahega fekafekau he fakagahua e tau takitakiaga ne moua mai e lautolu he Kau Fakatufono. E, ka fakamahani he tau leveki e falu, ka fakaatā e lautolu a lautolu ke fakamahani ke he Kupu he Atua, ti ka fakagahua e fakamahaniaga ne foaki he vahega fekafekau, kua fakatolomaki e lautolu e kaufakalataha he fuifui mamoe. Ko e fakaaue ha ia ha tautolu kua fakamahani e Iehova e tau tagata taane nukua leveki fakalahi ke he tau tagata takitaha he fakapotopotoaga Kerisiano!
[Matahui Tala]
^ para. 16 Ne taute fakailoa he Tau Fakamoli a Iehova
To Tali Fefe e Koe?
• Maeke fēfē e tau leveki fakaagaaga momotua ke fakamahani e falu?
• Ko e ha e tau leveki ne nakai fakamahani ke fakavē ni ke he tau manatu ha lautolu?
• Fēfē mo e ko e ha ne fakakite he tau leveki e mauokafua ke he vahega fekafekau?
[Tau Hūhū he Fakaakoaga]
[Tau Fakatino he lau 24, 25]
Fakamahani he tau leveki Kerisiano e tau tagata taane fuata he fakapotopotoaga
[Tau Fakatino he lau 26]
Kua foaki he “fekafekau fakamoli mo e loto matala” e fakamahani lahi ma e tau motua