Ko Daniel mo e Pine Haana he Fonoaga

NE FAKATONU e Iesu e tau takitaki lotu fia tututonu ne ita he kitia e tau tama he toloaga hane fakaheke ke he Atua. Ko e mena ia ati hūhū a Iesu ki a lautolu: “Nakai kia totou e mutolu, Ne taute e koe e fakahekeaga mai he tau gutu he tau tama mukemuke mo e tau tama kai huhu?”​—Mataio 21:​15, 16.

Ko Daniel ne ono e tau he moui, ne fano he fakapotopotoaga vagahau Rusia i Sihamani, ne fakakite e fakamooliaga na fakaheke agaia he tau tama a Iehova. Ko e matua fifine mo e mahakitaga haana, ne o atu a lautolu ke he fonoaga he Tau Fakamoli a Iehova i Duisburg. Ko e o atu fakapā laia anei ha lautolu ke he fonoaga lahi pihia. Ne foou e tau mena oti ki a lautolu: ko e hotela, ko e toloaga lahi, nofo fakatekiteki ke he tolu e aho, ko e papatisoaga, mo e taute tala. Ka e kua a Daniel? Ko e fakafifitakiaga mitaki e mahani haana.

He Aho Gofua he mole e fonoaga mo e kua liliu ki kaina, ne ala tuai a Daniel ke fano he aoga he tau tama ikiiki. Ka ko e heigoa ne tau agaia he peleue haana? Ko e pine ne fakamailoga aki na fano a ia ke he fonoaga! Ne fakamaama age he haana matua fifine: “Kua oti tuai e fono. Ti kua maeke a koe ke aaki e pine he aho nei.” Ka e pehē a Daniel: “Manako au ke kitia he tau tagata oti e matakavi ne fano au ki ai mo e iloa e lautolu e tau mena haaku ne ako.” Ke he aho katoa he aoga he tau tama ikiiki, ne matalahi a ia he tau haana pine. Magaaho ne hūhū e faiaoga ki a ia hagaao ke he pine, ne fakamaama e ia e fakaholoaga he fonoaga ke he faiaoga.

He taute pihia, ne kua muitua a Daniel ke he fakafifitakiaga he tau fanau taane mo e fifine toko afe ne kua totou senetenari he fakaheke a Iehova ke he toloaga.