Kua Moui e Kupu ha Iehova

Tau Fakamaamaaga Mai he Tohi a Tanielu

“KO E tohi a Tanielu ko e taha tohi kua mua atu e fulufuluola i loto he Tohi Tapu,” he talahau he Holman Illustrated Bible Dictionary. “Kua puke ai e tau lautohi he tau kupu mooli nakai fai fakaotiaga.” Ne kamata e tala ha Tanielu he 618 F.V.N. he magaaho ne hau e Patuiki ko Nepukanesa i Papelonia ki Ierusalema mo e pātakai e maaga, ti uta e ia “falu he fanau a Isaraela” ke he paeaaga i Papelonia. (Tanielu 1:1-3) Ko e fuata ko Tanielu taha ia lautolu ia, ne liga ko e fuata mui agaia. Ne oti e tohi he nofo agaia a Tanielu i Papelonia. Mogonei kua teitei 100 e tau he moui, ne moua e Tanielu e maveheaga he Atua: “To okioki a koe, to tu mai foki a koe ke he tufaaga hau ka hoko ke he tau aho ke fakahiku ai.”​—Tanielu 12:13.

Ko e vala fakamua he tohi a Tanielu kua tohi ke he puhala fakapapahi ke he tagata ke tolu aki, ka ko e vala fakahiku ne tohi ke he tagata fakamua. Kua ha ha he tohi ne tohia e Tanielu e tau perofetaaga ke he tutū hake mo e mokulu hifo he tau pule malolō he lalolagi, magaaho ka haele mai e Mesia, mo e tau mena ka tutupu he vahā ha tautolu. * Ko e perofeta motua ne liu onoono foki ki tua ke he moui loa haana mo e talahau e tau tala ne fakamalolō a tautolu ke eke mo tau tagata mahani Atua ne fakamooli. Ko e fekau ha Tanielu kua moui mo e gahua malolō.​—Heperu 4:12.

KO E HEIGOA NE FAKAAKO HE TALA NE TOHI FAKAPAPAHI KI A TAUTOLU?

(Tanielu 1:1–6:28)

Ko e tau 617 F.V.N. Ko Tanielu mo e tau kapitiga fuata tokotolu haana, ko Sataraka, Mesako, mo Apetiniko, kua ha ha he lotopā he patuiki i Papelonia. Ke he tolu e tau ne fakamahani ai a lautolu ke he moui he lotopā he patuiki, ne tumau e tau fuata ke he ha lautolu a mahani fakamooli ke he Atua. Kavi ke he valu e tau ki mui, ne halahū e miti he Patuiki ko Nepukanesa. Ne fakakite e Tanielu e miti ti fakakakano ai. Ne talia he patuiki, ko Iehova ko e “Atua he tau atua a ia, mo e Iki he tau patuiki, kua [F]akakite mai e ia e tau mena galo.” (Tanielu 2:47) Ka e nakai leva, ne tuga kua nimo ia Nepukanesa e fakaakoaga nei. He magaaho ne nakai talia he tau kapitiga tokotolu ha Tanielu ke tapuaki ke he tupua makimaki, ne tolo he patuiki a lautolu ke he gutuumu kakā. Ne fakahao he Atua mooli a lautolu tokotolu, ti kua omoi a Nepukanesa ke mailoga “kua nakai fai Atua foki kua maeke ke laveaki pehenā.”​—Tanielu 3:29.

Ne taha foki e miti aoga lahi ha Nepukanesa. Kua kitia e ia e akau makimaki, ne kua hio ki lalo mo e pipi neke tupu. Ne fakakite e Tanielu e kakano he miti. Kua fai vala e miti ne fakamooli he magaaho ne heketia a Nepukanesa ka mole ia ti kua malolō. Loga e hogofulu tau fakamui, ne taute he Patuiki ko Pelesara e galue makimaki ma e tau iki haana ti fakaaoga fakateaga e tau kapiniu ne tamai he  faituga ha Iehova. He pō ia ni, ne kelipopo a Pelesara mo e moua e Tariu ko e tagata Metai e kautu. (Tanielu 5:30, 31) He hoko ke he vahā ha Tariu, kua 90 tumā tuai e tau tau moui ha Tanielu, ne taute he tau iki mahekeheke e tau lagatau ke kelipopo aki e perofeta motua. Ka e laveaki e Iehova a ia “mai he tau lima he tau leona.”​—Tanielu 6:27.

Tali he Tau Hūhū Faka-Tohiaga Tapu:

1:11-15​—Ko e kai ke he tau laukou kia ati mata mitaki ai e tau fuata Iutaia tokofā? Nakai. Nakai fai fua kai ne maeke ke fakatupu e tau hikiaga pihia he hogofulu maka e aho. Kua uta e navaaga ma e mata mitaki he tau fuata Heperu ki a Iehova, ne fakamonuina e ia a lautolu ha kua falanaki a lautolu ki a ia.​—Tau Fakatai 10:22.

2:1​—Magaaho fe ne miti a Nepukanesa ke he tupua lahi? Ne talahau he tala ko e “tau ua ne patuiki ai a Nepukanesa.” Ne eke a ia mo patuiki he 624 F.V.N. Ti liga kamata e tau ke uaaki he patuiki he 623 F.V.N.​—loga e tau ato moumou e ia a Iuta. He kamataaga ia, ne liga nakai haia a Tanielu i Papelonia ke fakakakano e miti. Kua maaliali ai kua totou mai e “tau ua” he 607 F.V.N., magaaho ne moumou he patuiki Papelonia a Ierusalema ti tu hake ai mo pule malolō ke he lalolagi.

2:32, 39​—Puhala fe ne tokolalo e kautu he ario ke he ulu ne auro, mo e tokolalo fēfē e kautu he apa kula ke he ario? Ko e Kautu ha Metai mo Peresia, ne fakatino he vala ario he tupua, kua tokolalo ia Papelonia, ko e ulu ne auro, ti nakai ha ha e fakamailoga ke moumou a Iuta. Ko e pule malolō ne mui mai ko Heleni, ne fakatino he apa kula. Ka kua tokolalo agaia a Heleni, tuga he tokolalo e apa kula ke he ario. Pete kua lahi e matakavi ne pule e Kautu faka-Heleni ki ai, ne nakai moua e ia e lilifu ke fakatoka mai e tau tagata he Atua he paeaaga tuga ne taute e Metai mo Peresia.

4:8, 9​—Ne eke kia a Tanielu mo taulaatua? Nakai. Ko e talahauaga “ko e patu he tau taulaatua” kua hagaao ke he kotofaaga ha Tanielu ko e “pule ne mua he tau tagata pulotu oti i Papelonia.”​—Tanielu 2:48.

4:10, 11, 20-22​—Ko e heigoa ne hukui, po ke fakatino, he akau makimaki he miti a Nepukanesa? He kamataaga ne fakatino he akau a Nepukanesa ko e patuiki pule malolō he lalolagi. Pete kua laulahi e pule “ke he motuaga he lalolagi,” kua hagaao ai e akau ke he taha mena mua ue atu. Kua fakamatutaki he Tanielu 4:17 e miti ke he pule he ‘Mua Ue Atu’ ke he tau tagata. Ko e akau mogoia, kua fakatino foki ha Iehova a pule katoatoa ke he lagi mo e lalolagi, ka e hagaao lahi ke he lalolagi. Ko e mena ia, kua ua e fakamooliaga he miti​—ke he pule a Nepukanesa mo e ke he pule katoatoa a Iehova.

4:16, 23, 25, 32, 33​—Loa fēfē e “fitu e tau”? Ko e tau hikiaga oti ne tupu ke he foliga he Patuiki ko Nepukanesa ne lata ke “fitu e tau” nukua loa atu he fitu e aho. Ki a ia, ko e tau tau nei kua kakano ko e fitu e tau ne igatia mo e 360 e aho, po ke 2,520 e aho. Ke he fakamooliaga lahi, he “fitu e tau” ko e 2,520 e tau a ia. (Esekielu 4:6, 7) Ne kamata ai he moumouaga ha Ierusalema he 607 F.V.N. mo e fakaoti he magaaho ne patuiki ai a Iesu ko e Patuiki he lagi he 1914 V.N.​—Luka 21:24.

6:6-10​—Ha kua nakai matafeiga mai ko e nofo fēfē ka liogi ki a Iehova, ti nakai kia iloilo a Tanielu ke liogi fakagalo ke he 30 e aho? Na iloa he tau tagata a Tanielu ke liogi lagatolu he aho. Kakano haia ati moua mai he tau tagata eke  lagatau e manatu ke taute e matafakatufono ke fakakaupā e liogi. Ko e ha hikiaga ke he fakaholoaga liogi ha Tanielu to liga kitia he falu kua fakahui mo e liga fakakite e kaumahala haana ke tuku atu e fakamooli katoatoa ki a Iehova.

Tau Fakaakoaga ma Tautolu:

1:3-8. Ko e fakamakamaka ha Tanielu mo e tau kapitiga haana ke tumau e fakamooli ki a Iehova ne mailoga lahi e uho he tau fakaakoaga ne moua e lautolu mai he tau matua ha lautolu. He magaaho ka tuku mua he tau matua matakutaku Atua e tau mena fakaagaaga he tau momoui ha lautolu mo e fakaako e tau fanau ha lautolu ke taute pihia foki, kua mua atu e makai he tau fanau ha lautolu ke totoko e ha kamatamata mo e tau peehiaga ka tutupu he aoga po ke ha matakavi ni.

1:10-12. Ne maama e Tanielu e kakano ne matakutaku e “iki ne pule” ke he patuiki, ti oti e ole haana ki ai. Pete ia, ne fina atu fakamui a Tanielu ki a “ia ne kotofa he iki ne pule” nukua liga ha ha he tuaga ke fanogonogo. Ka fehagai mo e tau tuaga uka, kua lata ia tautolu ke gahua mo e lotomatala, maama, mo e pulotu pihia.

2:29, 30. Ke tuga a Tanielu, kua lata ia tautolu ke nava katoatoa ki a Iehova ma e lotomatala, tau aga, mo e tau makaka ne liga moua e tautolu ha ko e fakaaoga fakamitaki he tau foakiaga fakaagaaga haana.

3:16-18. To liga nakai tali mauokafua pihia e tau Heperu tokotolu ane mai fakahui a lautolu he magaaho fakamua he fehagai mo e tau mena kai. Kua lata foki ia tautolu ke fakamakamaka ke “fakamoli ke he tau mena oti.”​—1 Timoteo 3:11.

4:24-27. He fakapuloa e fekau he Kautu, ne putoia e fakafiliaga vevela he Atua, kua lata ke tua mo e malolō pihia tuga ne fakakite e Tanielu he fakailoa e mena ka tupu ki a Nepukanesa mo e mena ka taute he patuiki ‘ke maeke ke fakatuleva haana monuina.’

5:30, 31. Ne fakamooli ai e “[“talahauaga fakatai,” NW] nai ke he patuiki i Papelonia.” (Isaia 14:3, 4, 12-15) Ko Satani ko e Tiapolo, ne tatai e fakatokoluga haana mo e he patuiki Papelonia, to feleveia foki a ia mo e fakaotiaga fakamā.​—Tanielu 4:30; 5:2-4, 23.

KO E HEIGOA E KAKANO HE TAU FAKAKITEAGA HA TANIELU?

(Tanielu 7:1–12:13)

He magaaho ne moua e Tanielu e miti he fakakiteaga fakamua he 553 F.V.N., kua 70 tumā tuai e tau tau moui haana. Ne kitia e Tanielu fā e manu favale lalahi ne fakatino mai e tau pule malolō he lalolagi tali mai he vahā haana ke hoko mai ke he vahā ha tautolu. He fakakiteaga hagaao ke he tau mena he lagi, ne kitia e ia “[t]aha kua tuga e Tama he tagata” kua foaki age e “pule tukulagi.” (Tanielu 7:13, 14) Ua e tau he mole, ne kitia e Tanielu e fakakiteaga ne putoia a Metai-Peresia, Heleni, mo e taha ne eke mo “patuiki mata vale.”​—Tanielu 8:23.

Ko e tau he mogonei ko e 539 F.V.N. Kua veli a Papelonia, ti kua patuiki tuai a Tariu ko e tagata Metai ke he kautu he tau Kaletaia. Ne liogi a Tanielu ki a Iehova hagaao ke he fakafoouaga he kaina nofo mau haana. He liogi agaia a ia, ne fakafano mai e Iehova e agelu ko Kaperielu ke “fakaako atu kia [Tanielu] ke iloilo ai” hagaao ke he hauaga he Mesia. (Tanielu 9:20-25) Ne holo atu mogoia ke he 536/535 F.V.N. Kua liliu mai e matakau tote ki Ierusalema. Ka kua totoko ke he talagaaga he faituga. Kua eke e mena nei mo punaaga he tupetupe ha Tanielu. Ne liogi fakamakamaka a ia ke he mena nei, ti fakafano mai e Iehova e agelu he tuaga tokoluga ki a Tanielu. He oti e fakamalolō mo e fakamafana a Tanielu, ne tala age he agelu e perofetaaga hagaao ke he fetoko ke he pule he patuiki he faahi tokelau mo e patuiki he faahi toga. Ne toho loa atu e fetoko he tau patuiki tokoua nei he kamata mai he magahala ne vevehe e kautu ha Alesana ne Mua ke he tau iki tokofā haana ti hoko atu ke he magaaho ne “tu ki luga” e Iki ne Mua, ko Mekaeli.​—Tanielu 12:1.

Tali he Tau Hūhū Faka-Tohiaga Tapu:

8:9​—Ko e heigoa ne fakatino he “motu [F]ulufuluola”? He vala nei, ko e “motu [F]ulufuluola” kua fakatino e tuaga fakalalolagi he tau Kerisiano fakauku he magahala he Pule Malolō he Lalolagi ko Igilani-Amerika.

8:25​—Ko hai e “Iki he tau iki”? Ko e kupu Heperu sar, ne fakaliliu “iki,” matapatu kakano ko e “pule,” po ke “ko e ulu.” Ko e matahigoa  “Iki he tau iki” kua hagaao hokoia ni ki a Iehova ko e Atua​—ko e Pule ke he tau agelu oti, putoia a “Mekaeli ko e taha he tau iki ne mua.”​—Tanielu 10:13.

9:21​—Ko e ha ne hagaao a Tanielu ke he agelu ko Kaperielu ko e “tagata”? Kakano ne hau a Kaperielu ki a ia tuga e tagata, ti kua fakakite pihia a ia ki a Tanielu he fakakiteaga fakamua.​—Tanielu 8:15-17.

9:27​—Ko e heigoa e maveheaga ne ‘fakamau ma e tau tagata tokologa’ ato hoko ke he matahiku he faahi tapu ke 70 aki he tau tau, po ke 36 V.N.? Ne utakehe e maveheaga he Fakatufono he 33 V.N. he magaaho ne tamate a Iesu. Ka e ha kua fakamau agaia e maveheaga faka-Aperahamo ke he tau Isaraela he tino ato hoko ke he 36 V.N., kua fakaloaloa atu e Iehova e magaaho he taliaaga pauaki ke he tau Iutaia ha ko e tau ohi a Aperahamo a lautolu. Ko e maveheaga faka-Aperahamo kua matutaki agaia ke mau hagaao ki a “Isaraela he Atua.”​—Kalatia 3:7-9, 14-18, 29; 6:16.

Tau Fakaakoaga ma Tautolu:

9:1-23; 10:11. Ha ko e haana fakatokolalo, mahani Atua fakamooli, fakamakai, mo e fakamakamaka ke he liogi, ati “ofania lahi” ai a Tanielu. Ko e tau aga tonu nei ne lagomatai foki a ia ke tumau e tua fakamooli ke he Atua ke hoko ke he fakaotiaga he moui haana. Kia eketaha a tautolu ke mumuitua ke he fakafifitakiaga ha Tanielu.

9:17-19. Pete ni kua liogi a tautolu ke hoko mai e lalolagi foou he Atua, ka “nofo ai e tututonu,” nakai kia lata ke eke mo matapatu manatu ha tautolu ke fakatapu e higoa ha Iehova mo e fakatokoluga e pule katoatoa haana ka e nakai ke fakaoti e tau matematekelea mo e tau mena vihi fakatagata ha tautolu?​—2 Peteru 3:13.

10:9-11, 18, 19. He fifitaki ke he agelu ne hau ki a Tanielu, kua lata ia tautolu ke fakamalolō mo e atihake e taha mo e taha he foaki e lima lagomatai mo e he tau kupu fakamafana.

12:3. He vahā he fakaotiaga, “ko lautolu foki ne iloilo”​—ko e tau Kerisiano fakauku—​kua hane “kikila mai a lautolu tuga ne kikila he lagi likoliko” ti kua fakamafoki mai “e tau tagata tokologa ke mahani tututonu,” putoia e “moto tagata tokologa” he ‘tau mamoe kehe.’ (Filipi 2:15; Fakakiteaga 7:9; Ioane 10:16) Ko lautolu ne fakauku to ‘kikila tuga e tau fetu’ he tuaga katoatoa he magahala he Pule Meleniamu he Keriso, ka kauauloa a lautolu mo ia ke fakagahuahua e tau aoga katoatoa he poa lukutoto ke he tau tagata omaoma he lalolagi. Kua lata e ‘tau mamoe kehe’ ke fakapiki fakamooli ki a lautolu ne fakauku, he lalago loto katoatoa a lautolu he tau puhala oti.

‘Fakamonuina e Iehova a Lautolu kua Matakutaku ki a Ia’

Ko e heigoa ne fakaako mai he tohi a Tanielu ki a tautolu hagaao ke he Atua ne tapuaki a tautolu ki ai? Manamanatu la ke he tau perofetaaga ne toka i loto​—tau perofetaaga kua fitā he fakamooli mo e nakaila fakamooli. Kua maaliali ha e tau fakamaama ia ki a Iehova ko e Fakamooli he haana kupu!​—Isaia 55:11.

Ko e heigoa ne fakakite i loto he tohi a Tanielu hagaao ke he Atua ha tautolu? Ko e tau fuata Heperu tokofā ne nakai talia ke hufia he moui he tau tagata he lotopā he patuiki i Papelonia ne moua e ‘lotomatala, pulotu, mo e iloilo.’ (Tanielu 1:17) Ne fakafano mai he Atua mooli e agelu haana mo e laveaki a Sataraka, Mesako, mo Apetiniko mai he gutuumu kakā. Ne laveaki mai a Tanielu he ana leona. Kua ‘lagomatai mo e puipui e Iehova a lautolu ne tua ki a ia’ mo e ‘fakamonuina a lautolu ne matakutaku ki a ia.’​—Salamo 115:9, 13.

[Matahui Tala]

[Fakatino he lau 30]

Ko e ha ne “ofania lahi” a Tanielu?