Laveaki Mai he Tau Hele he Tagata Takafaga

“Ko [Iehova] ni ke laveaki a koe mai he hele he tagata takafaga.”​—SALAMO 91:3.

1. Ko hai e “tagata takafaga,” ti ko e ha kua hagahaga kelea a ia?

KUA fehagai e tau Kerisiano mooli oti kana mo e tagata kelipopo, ko ia ne fakaliga kehe e makaka mo e taute lagatau. Ne hagaao e Salamo 91:3 ki a ia ko e “tagata takafaga.” Ko hai e fī nei? Tali mai he fufuta ia Iuni 1, 1883, ne fakakite he mekasini nei a ia ko Satani ko e Tiapolo. Ko e fī malolō lahi nei ne taute lagatau kua eketaha ke fakahehē mo e hele e tau tagata ha Iehova tuga ne lali e tagata takafaga ke hele e manu lele.

2. Ko e ha ne fakatai a Satani ke he tagata takafaga?

² He tau vahā i tuai, ne tapaki e tau manu lele ha ko e ha lautolu a tau leo fulufuluola, tau fulu lanu kehekehe, mo e ke kai mo e taute mo poa. Pete ia, ko e tau manu lele ko e tau manu matakutaku mo e hehegi pauaki, ti uka ke hele. Ko e mena ia, ko e tagata takafaga he tau vahā Tohi Tapu ne kumikumi fakamua ke he tau puhala mo e tau aga he tau manu lele ne manako pauaki a ia ke hele. Ti, taute e ia e tau lagatau ke hele aki a lautolu. He fakatai a Satani ke he tagata takafaga, ne lagomatai he Tohi Tapu a tautolu ke maama e tau puhala haana. Ne kumikumi he Tiapolo a tautolu takitokotaha. Ne mailoga e ia e tau aga mo e tau puhala ha tautolu ti fakatoka fufū e tau matahele he lali ke tapaki moui a tautolu. (2 Timoteo 2:26) Ti ka moua e ia a tautolu to hagahaga kelea fakaagaaga a tautolu ti maeke ke takitaki atu ke he ha tautolu a fakamahaikava tukulagi. Ti, ke moua e puipuiaga ma tautolu, kua lata ke iloa e tautolu e tau puhala kehekehe he “tagata takafaga.”

3, 4. Magaaho fe ne fakatatai e tau lagatau ha Satani ke he leona? ke he asipi?

³ He onoono atu ke he tau fakataiaga mooli, ne fakatai he salamo e tau lagatau ha Satani ke he punua leona po ke he asipi. (Salamo 91:13) Ke tuga e leona, ne totoko fakahako mai a Satani he falu magaaho ke he puhala he favaleaga po ke fakaaoga e fakatufono ke fakamamahi e tau tagata ha Iehova. (Salamo 94:20) Ti liga taute he tau totoko tuga e leona e falu ke veveli. Ka kua fa mahani e tau totoko nei ke kaumahala ti fua mai e kaufakalataha he tau tagata he Atua. Ka e kua mogoia e tau totoko ha Satani ne tuga he asipi?

⁴ Ne fakaaoga he Tiapolo e makaka fakaliga kehe ke fakahoko e tau totoko fakavaia mo e fakamamahi ke tuga e asipi kona ne fakamumuli he mena galo. Ke he puhala nei, nukua kautū a ia he fakakona e manamanatuaga he falu tagata he Atua, he fakahehē a lautolu ke taute e manako haana ka e nakai ha Iehova, ti fua mai e matematekelea muitui. Fiafia ai, kua nakai pouli a tautolu ke he tau lagatau ha Satani. (2 Korinito 2:11) Kia fakatutala a tautolu mogonei ke he fā e matahele tamate ne fakaaoga “he tagata takafaga.”

Matakutaku Tagata

5. Ko e ha e matahele he “matakutaku ke he tau tagata” nukua lauia lahi ai?

⁵ Kua maama he “tagata takafaga” e manako pauaki he tagata ke moua e taliaaga mo e fiafia he falu. Kua nakai fakamaō kikiha e tau Kerisiano ke he tau manatu mo e tau logonaaga he tau tagata ne agaagai ia lautolu. He iloa e mena nei, ne manako e Tiapolo ke moumou e kapaletū ha lautolu ke he puhala ne manamanatu e tau tagata ki a lautolu. Ke fakatai ki ai, ne fakavaia e ia e falu tagata he Atua he fakaaoga e hele ke “matakutaku ke he tau tagata.” (Tau Fakatai 29:25) Kaeke kua matakutaku tagata, ti fakalataha e tau fekafekau he Atua mo e falu ke taute e tau mena ne fakatapu e Iehova po ke kalo mai he taute e tau mena ne poaki he Kupu he Atua ki a lautolu, kua koto tuai a lautolu he matahele he “tagata takafaga.”​—Esekielu 33:8; Iakopo 4:17.

6. Ko e heigoa e fakataiaga ne fakakite e puhala ne liga hele he “tagata takafaga” e fuata?

⁶ Ke fakatai ki ai, ne liga mahala e fuata ke he peehiaga mai he tau kapitiga aoga mo e ula tapaka. Ke ula tapaka liga ko e mena kua mamao ke he manamanatuaga haana he magaaho ne fano he  aoga he aho ia. Ka e nakai leva, ne taute e ia e tau mena ne hagahaga kelea ke he malolō tino haana mo e nakai fiafia ke he Atua. (2 Korinito 7:1) Kua kamatamata fēfē a ia? Liga lafi a ia mo e tau tama ne nakai lata ti matakutaku neke nakai talia e lautolu a ia. Tau fuata, kia nakai toka e “tagata takafaga” ke kamatamata mo e hele a koe! Ke kalo kehe neke tapaki moui, kia puipui mai he tau fakahui ikiiki. Omaoma ke he hatakiaga he Tohi Tapu ke tiaki e tau feoaki kelea.​—1 Korinito 15:33.

7. Liga taute fēfē e Satani e falu matua ke nakai lagotatai fakaagaaga?

⁷ Ko e tau matua Kerisiano loto manamanatu kua lata ke uta fakahokulo e matagahua faka-Tohiaga Tapu ha lautolu ke leveki fakatino e tau magafaoa ha lautolu. (1 Timoteo 5:8) Pete ia, ko e foliaga ha Satani ke taute e tau Kerisiano ke nakai lagotatai hagaao ke he mena nei. Liga lagaloga e fakatō e lautolu e tau feleveiaaga ha kua mahala ke he peehiaga mai he tau takitaki gahua ke taute falu gahua lafi ki luga. Liga matakutaku a lautolu ke ole ke fai magaaho ke ō ke he tau fakaholoaga oti he fonoaga he faahimotu ke tapuaki ki a Iehova, fakalataha mo e tau matakainaga ha lautolu. Ko e puipuiaga ke he matahele nei ko e ‘falanaki kia Iehova.’ (Tau Fakatai 3:5, 6) Lafi ki ai, he manatu ko tautolu ko e tau tagata oti he fale ha Iehova ti kua mavehe mai a ia ke leveki a tautolu mo e lagomatai ke fakatumau a tautolu ke lagotatai. Tau matua, kua tua nakai a mutolu to leveki mai e Iehova a mutolu mo e magafaoa ha mutolu ke he taha puhala ni he magaaho ka taute e mutolu e finagalo haana? Po ke to tapaki moui kia he Tiapolo a koe ti fekau a koe ke taute e manako haana ha ko e matakutaku tagata? Kua ole atu a mautolu ke manamanatu mo e liogi ke he tau hūhū nei.

Ko e Matahele he Velevelekoloa

8. Puhala fe ne fakaaoga e Satani e kamatamata ke velevelekoloa?

⁸ Ne fakaaoga foki e Satani e kamatamata ke velevelekoloa ke hele aki a tautolu. Kua fa fakamalolō foki he fakatokaaga fakafua koloa he lalolagi nei e tau puhala ke mautū mafiti ti liga fakavaia e falu tagata he Atua. Falu magaaho, liga peehi ke he falu: “Gahua fakalahi. He magaaho ka moua e koe e tuaga tokotoko mitaki, maeke a koe ke okioki ti olioli e moui. Maeke foki ia koe ke paionia.” Ko e tau talahauaga pihia liga ko e tau tala nakai lagotatai he falu ne fakaaoga e tau matakainaga ha lautolu i loto he fakapotopotoaga Kerisiano. Manamanatu fakamitaki ke he manatu ia. Kua nakai kia fakaata e manamanatuaga he tagata maukoloa “goagoa” he fakatai ha Iesu?​—Luka 12:16-21.

9. Ko e ha falu Kerisiano kua liga hele he manako lahi ke he tau mena?

⁹ Kua taute e Satani e fakatokaaga kelea haana ke he puhala ka fakatupu he tau tagata e manako lahi ke he tau mena. Ko e manako ia ka fakahagahaga kelea e moui he Kerisiano, apitia ai e kupu “ti nakai fua.” (Mareko 4:19) Kua fakamalolō he Tohi Tapu a tautolu ke makona ke he tau mena kai ne moua mo e tau mena ne fakatapulu ai. (1 Timoteo 6:8) Pete ia, kua tokologa ne hele he “tagata takafaga” ha kua nakai fakagahua e lautolu e fakatonuaga ia ki a lautolu ni. Liga kia ha kua fakaikaluga ati manako a lautolu ke taofi mau e puhala moui pauaki? Ka e kua a tautolu takitokotaha? Kua taute kia he manako ha tautolu a tautolu ke moua e tau mena loga ti tuku e tau mena he tapuakiaga mooli mo tau mena ke uaaki? (Hakai 1:2-8) Momoko ai, he tau vahā uka fakatupe, ne tiaki he falu e tuaga fakaagaaga ha lautolu ke maeke ia lautolu ke matutaki e puhala moui ne kua mahani lahi a lautolu ki ai. Ko e aga velevelekoloa pihia kua fakafiafia lahi e “tagata takafaga”!

Ko e Hele he Fakafiafiaaga Nakai Mitaki

10. Ko e heigoa e kamatamata kua lata he tau Kerisiano takitokotaha ke taute?

¹⁰ Ko e taha lagatau he “tagata takafaga” ke fakalolelole e tau manatu pauaki he tau tagata ke he mena kua mitaki mo e kelea. Ko e manamanatuaga pihia tuga i Sotoma mo Komora kua hoko mai foki ke pule malolō ke he tau gahua fakafiafia. Kua pihia foki ke he tau hokotaki he nusi he televisoni mo e he tau mekasini kua fakahakehake e favale mo e takitaki atu ke manako fakalialia ke he mahani fakataane mo e fifine. Ko e laulahi he tau mena ne kitia ke eke mo tau mena fakafiafia he puhala uta tala, kua fakapulefu e lotomatala he tau tagata ke maeke “ke mailoga e tau mena mitaki mo e tau mena kelea.” (Heperu 5:14) Ka kia manatu e tau kupu a Iehova puhala he perofeta ko Isaia: “Oi te fakaalofa kia lautolu kua pehe mai, ko e mitaki e mena kelea, ka e kelea e mena mitaki!” (Isaia 5:20) Kua fakahehē kia he “tagata takafaga” e manamanatuaga haau aki e tau fakafiafiaaga  nakai mitaki pihia? Kua latatonu ke kamatamata ni he tagata a ia.​—2 Korinito 13:5.

11. Ko e heigoa e hatakiaga hagaao ke he tau ata soap opera he televisoni ne talahau he mekasini nei?

¹¹ Teitei ke kuata e senetenari kua mole, ne hataki fakaalofa mai The Watchtower ke he tau tagata ne tua hagaao ke he tau ata televisoni. * Kua taute e talahauaga nei hagaao ke he fakaohoohoaga fakagalogalo he tau ata soap opera: “Ko e kumi ke moua e fakaalofa kua fakaaoga ke piu aki e tau mahani kehekehe. Ke tuga anei, ko e taha fuata ne fatu ka e nakai la mau ne tala age ke he kapitiga: ‘Ka e ofania e au a Victor. Ai tupetupe au. . . . Ke fanau e tama haana kua mua atu e uho ki a au!’ Ko e kofe ne tagi fakaeneene mai i tua ati uka ai ke mailoga e kelea lahi he mahani haana. Kua loto foki a koe ki a Victor. Kua logona e koe e fakaalofa ke he tama fifine. Kua ‘maama’ e koe. ‘Ko e ofo ha ia he hokotia a koe ke manatu pihia,’ he talahau he taha tagata kitekite ne matala e loto he magaaho fakamui. ‘Iloa e tautolu na kelea e mahani feuaki. . . . Ka e mailoga e au kua fai vala au ne putoia ki ai puhala he manamanatuaga.’”

12. Ko e heigoa ne fakakite kua latatonu he mogonei e hatakiaga hagaao ke he falu polokalama he televisoni?

¹² Tali mai he lolomi e tau vala tala ia, ko e tau vahega polokalama fakahehē loto nei kua malikiti hake ki luga. He tau motu loga, kua fakakite e tau polokalama pihia ke 24 e tulā he aho. Ko e tau tagata taane, fifine, mo e loga e fuata mui ne fa fagai e tau manamanatuaga mo e tau loto ha lautolu aki e tau fakafiafiaaga pihia. Ka ko tautolu mogoia, kua nakai lata ke fakahehē e tautolu a tautolu ke he tau talahauaga fakavai pihia. Ti kua hehē ke talahau ko e tau fakafiafiaaga kelea muitui ia kua tatai ni mo e tau mena ne kitia he lalolagi. Kua tonu mooli kia ma e Kerisiano ke fifili ke fakafiafia he tau vahega tagata ne nakai manatu a ia ke uiina ke he kaina haana?

13, 14. Talahau fēfē he falu e puhala ne lagomatai a lautolu he tau hatakiaga hagaao ke he televisoni?

¹³ Tokologa ne lagomatai he magaaho ne omaoma a lautolu ke he hatakiaga ne foaki he “fekafekau fakamoli mo e loto matala.” (Mataio 24:45-47) He mole e totou e fakatonuaga maama ne fakavē ke he Tohi Tapu, ne tohi e falu ke talahau e tau puhala ne lauia fakatagata ai a lautolu he tau vala tala ia. * Ne talahau he taha: “Ke he 13 e tau ne hufia lahi au ke he tau ata soap opera. Manatu ni au kua nakai hagahaga kelea au ha kua fano ke he tau feleveiaaga Kerisiano mo e fano falu magaaho ke he gahua he fonua. Ka e fifili e au e aga fakalalolagi he ata soap opera kaeke ke ekefakakelea he taane haau a koe po ke logona e koe e nakai fakaalofa ki a koe, kua tonuhia ke taute e mahani faivao​—na kumi ni e ia. Ti, he magaaho ne logona e au e ‘tonuhia’ haaku ne taute e au e mena kelea nei mo e agahala ki a Iehova mo e hoa haaku.” Kua tuku ki tua e fifine nei. Fakahiku, ne matala e loto haana, tokihala, ti liu talia mai. Ko e hatakiaga he tau vala tala ke he tau ata soap opera ne fakamalolō a ia ke tiaki e tau fakafiafiaaga ne vihiatia e Iehova.​—Amosa 5:14, 15.

¹⁴ Ne talahau he taha tagata totou ne lauia foki e moui: “Ne tagi au he magaaho ne totou e tau vala tala, he mailoga e au kua nakai tuai katoatoa e loto haaku ki a Iehova. Ne mavehe au ke he Atua haaku to nakai liu au ke fakatupa ke he tau ata nei.” He mole e talahau e loto fakaaue ma e tau vala tala nei, ne talahau he taha fifine Kerisiano e hufia lahi haana ki ai: “Ne manamanatu au . . . neke lauia e fakafetuiaga haaku mo Iehova. Maeke fēfē ia au ke kapitiga mo ‘lautolu’ mo e kapitiga foki mo Iehova?” Kaeke ke fakakeukeu he tau ata televisoni pihia e tau loto he tau tagata he 25 e tau kua mole, kua fēfē la mogoia e malolō he vahā nei? (2 Timoteo 3:13) Lata ia tautolu ke mataala ke he hele ha Satani ke he tau fakafiafiaaga oti kana ne nakai mitaki, pete ko e tau ata soap opera he televisoni, tau pelē vitio vale, po ke tau vitiō leo kofe kelea muitui.

Ko e Matahele he Tau Kehekehe Fakatagata

15. Kua tapaki moui fēfē he Tiapolo e falu?

¹⁵ Ne fakaaoga e Satani e tau kehekehe fakatagata mo hele ke vehevehe aki e tau tagata ha Iehova. Maeke foki ia tautolu ke hele he puhala nei pete ko e tau matagahua lilifu ha tautolu. Ko e falu kua tapaki moui he Tiapolo kakano he fakaatā e lautolu e tau kehekehe fakatagata ke faguna e mafola mo e kaufakalataha mo e monuina fakaagaaga fulufuluola ne tamai e Iehova.​—Salamo 133:1-3.

16. Kua taute lagatau fēfē a Satani he lali ke faguna e kaufakalataha ha tautolu?

 ¹⁶ He magahala he Felakutaki I he Lalolagi, ne lali a Satani ke moumou e vala he fakatokatokaaga ha Iehova he lalolagi he totoko fakahakotika atu ki a lautolu, pete ia ne kaumahala a ia. (Fakakiteaga 11:7-13) Tali mai ai, ne taute lagatau agaia a Satani ke faguna e kaufakalataha ha tautolu. He magaaho ka fakaatā e tautolu e tau kehekehe fakatagata ke vehevehe aki e kaufakalataha ha tautolu, kua foaki e tautolu e fakavēaga ke he “tagata takafaga.” Kua maeke foki ia tautolu ke fakaalaia e hauaga he agaaga tapu ke he tau momoui fakatagata ha tautolu ti pihia foki ke he fakapotopotoaga. Kaeke ke tupu pihia, kua fiafia a Satani ha ko e tau faguna pihia ke he mafola mo e kaufakalataha he fakapotopotoaga ka faguna e gahua fakamatala.​—Efeso 4:27, 30-32.

17. Ko e heigoa ka lagomatai a lautolu ke mafola ne ha ha ai e tau kehekehe fakatagata?

¹⁷ Ko e heigoa haau ka taute kaeke kua ha ha ia koe mo e matakainaga Kerisiano e tau kehekehe fakatagata? Mooli, kua nakai tatai e tau tutūaga takitaha. Ti, pete kua ha ha ai e tau kakano loga ne fakatutupu aki e tau lekua, nukua nakai fai kakano ke toka noa e tau kehekehe fakatagata ka e nakai taute e mafola. (Mataio 5:23, 24; 18:15-17) Ko e fakatonuaga he Kupu he Atua kua omoomoi mo e mitaki katoatoa. He magaaho ka fakagahuahua e tau matapatu fakaakoaga he Tohi Tapu kua nakai fakaai ke kaumahala. Kua gahua mitaki tumau!

18. Ko e ha kua maeke he fifitaki ki a Iehova ke lagomatai a tautolu ke fakamafola e tau kehekehe fakatagata?

¹⁸ Ko Iehova kua ‘mautali ke fakamagalo,’ ti foaki e ia e ‘fakamagalo mooli.’ (Salamo 86:5; 130:4) Kua fakakite e tautolu ko e fanau fakahelehele ha Iehova a tautolu he magaaho ka fifitaki e tautolu a ia. (Efeso 5:1) Kua agahala oti a tautolu mo e manako lahi ke fakamagalo e Iehova. Ko e mena ia, kua lata ia tautolu ke fakaeneene kaeke ke hihiga a tautolu ke nakai fakamagalo e taha tagata. Liga eke mogoia a tautolu ke tuga e fekafekau he fakatai ha Iesu ne nakai fakamagalo e kaitalofa he taha fekafekau ne tote lahi e kaitalofa ke he kaitalofa haana ne kua fitā he fakamagalo he iki. He magaaho ne iloa he iki, ne poaki e ia ke liti e fekafekau nakai fakamagalo ke he fale puipui. Ne fakahiku e Iesu e fakatai he talahau: “To eke pihia foki haku a Matua ha he lagi kia mutolu, kaeke kua nakai takitaha a mutolu mo e fakamagalo mo e tau loto katoa ha mutolu e tau matakainaga ha mutolu ka mahani kelea mai a lautolu.” (Mataio 18:21-35) He manamanatu hokulo ke he fakatai ia mo e fakaata e tau magaaho loga ne fakamagalo noa e Iehova a tautolu, ka lagomatai a tautolu he magaaho ka lali ke fakamafola e kehekehe fakatagata mo e matakainaga ha tautolu!​—Salamo 19:14.

Puipui he ‘Mena Galo he Mua Ue Atu’

19, 20. Lata ke fēfē e onoonoaga ha tautolu ke he “mena galo” mo e “malu” ha Iehova he tau vahā hagahaga kelea nei?

¹⁹ Kua momoui a tautolu he tau vahā hagahaga kelea. To tamate oti e Satani a tautolu kaeke kua nakai fai puipuiaga fakaalofa a Iehova. Ke kalo mai mogoia he “tagata takafaga,” kua lata a tautolu ke nonofo he mena puipui fakatai, he ‘nonofo ke he mena galo he Mua Ue Atu,’ i lalo he ‘malu hana ha i ai e Malolo Oti Kana.’​—Salamo 91:1.

²⁰ Kia mailoga tumau e tautolu kua puipui he tau fakamanatu mo e tau takitakiaga ha Iehova a tautolu, nakai ke fakataputapu. Kua fehagai auloa a tautolu ke he tagata kelipopo ne makaka ne fakaliga kehe e malolō. Ka nakai ha ha i ai e lagomatai fakaalofa ha Iehova, to nakai fai tagata ka hao mai he hele. (Salamo 124:7, 8) Kia liogi ā a tautolu to laveaki e Iehova a tautolu mai he tau hele he “tagata takafaga”!​—Mataio 6:13.

[Tau Matahui Tala]

Manatu Nakai e Koe?

• Ko e ha e “matakutaku ke he tau tagata” ko e hele ke tamate a tautolu?

• Fakaaoga fēfē he Tiapolo e kamatamata ke velevelekoloa?

• Kua tapaki fēfē e Satani e falu tagata aki e hele he tau fakafiafiaaga nakai mitaki?

• Ko e heigoa e hele ne fakaaoga he Tiapolo ke faguna aki e kaufakalataha ha tautolu?

[Tau Hūhū he Fakaakoaga]