“MENA KE NAKAI NIMO!” Pihia e fakamaamaaga he tokologa ke he “Creation Drama.” Ne hako tonu e magaaho ne hoko mai ti nakai nimo e lautolu ne kitia ai. Mooli ni, ko e “Creation Drama” ne lahi e fakamatala atu ke fakaheke ki a Iehova ti nakai leva ne fakahoko e pule ha Hitler ne favale lahi ke he tau tagata Haana i Europa. Ka ko e heigoa e “Creation Drama”?

He 1914 ko e matapatu ofisa he tau tagata ha Iehova i Brooklyn, New York i U.S.A., ne fakatoka mai e “Photo-Drama of Creation.” Ko e tau ata holo mo e kifaga ne valu e tulā, ne katoatoa mo e tau lanu kehekehe mo e fai leo. Ne totou miliona e tau tagata he lalolagi katoa ne kitekite e “Photo-Drama.” Ko e vala kū​​—ko e “Eureka Drama”​​—​ne fakatoka mai foki he 1914. Ka e hoko ke he tau atu tau 1920, ko e tau lapa ata, tau kifaga, mo e matini hulu ne kua otioti lahi. Ka kua tokologa e tagata ne manako ke liu kitia e “Photo-Drama.” Ma e fakatai, ko e tau tagata ne nonofo i Ludwigsburg, Sihamani ne hūhū, “Liu e ‘Photo-Drama’ ke fakakite a fe?” Ko e heigoa kua lata ke taute?

Ke felauaki mo e manako ke liu fakakite e Taute Tala (Drama), he tau atu tau 1920 ko e tau hukui he magafaoa Peteli ko Magdeburg i Sihamani, ne fakatau mai e tau kifaga he matakau fakapuloa tala ki Paris i Falani, mo e tau ata fakatino mai he tau kamupanī taute ata i Leipzig mo Dresden. Ne tuku fakalataha e tau mena nei mo e falu ata fakatino tuai he “Photo-Drama” ne mau agaia ke fakaaoga.

Ko e matakainaga ko Erich Frost, ne taleni a ia he tā leo kofe, kua taute e tau leo kofe ke fakatagi aki e tau kifaga mo e tau ata fakatino. Ko e tau tala ma e kifaga ne tamai he tau vala he ha tautolu a tohi Creation. Ko e kakano a ia he “Photo-Drama” kua hikihiki ne fakafoou e higoa​​—“Creation Drama.”

Ko e Taute Tala foou ne tatai ni e loa tuga e “Photo-Drama”​​—ne valu e tulā​​—​ti fakakite valavala he tau afiafi. Ne fakamaama mai e tau vala tala ofoofogia ke he tau aho he tufugatiaaga, liu onoono ke he tau fakamauaga tuai faka-Tohi Tapu mo e he lalolagi, ti fakakite kua kaumahala e lotu fakavai ke leveki e tau tagata. Ne fakakite e “Creation Drama” i Auseturia, Sihamani, Luxemburg, mo Suisalani, mo e he tau toloaga kehekehe he tau tagata vagahau Sihamani.

Ne fakamaama e Erich Frost: “He fakakite e Taute Tala, ne fakamafana e au e kau gahua haaku, mua atu ki a lautolu ne tā kofe, ke fakaaoga e magaaho fakamaoki fakakū ke o atu ke he tau atu nofoa takitaha mo e foaki ke he tau tagata fanogonogo e tau tohi  mo e tau tohi ikiiki fulufuluola ha tautolu. Loga atu e tohi ne foaki e mautolu he puhala nei ka fakatatai ke he magaaho ka ō he taha fale ke he taha fale.” Ko Johannes Rauthe, ne fakatokatoka ke fakakite ai i Polani mo e Repapiliki a Sekolovakia he vahā nei, ne manatu na tokologa e tagata ne age e matahigoa he tau kaina ha lautolu ke fai tagata ka aahi atu ki ai. Ko e tau matahigoa ia ko e fakavēaga ma e tau liu aahi atu ne fua mitaki.

He tau atu tau 1930, ne fakakite e “Creation Drama” he tau fale tolo ne puke namo he tau tagata, ti ko e matapatu tala e Tau Fakamoli a Iehova he taone. He hoko ke he 1933, ne teitei taha e miliona tagata ne o atu ke kitekite ki ai ne fakatokatoka he la ofisa i Sihamani. “Ke kitia e Taute Tala,” he talahau e Käthe Krauss, “ke he tau aho lima ia, ne o atu hui a mautolu ke 10 e kilomita he taha e hala, o atu he tau ulu akau mo e o hake mo e o hifo he tau palia mo e tau pahua.” “Ko e ‘Creation Drama’ e fakavēaga he fiafia haaku ke he kupu mooli,” he talahau e Else Billharz.

Ne talahau e Alfred Almendinger ke he magaaho ne o atu a ia mo e matua fifine haana ke he Taute Tala, “ne fiafia lahi a ia ti fakatau e Tohi Tapu mo e kumi e kupu ‘pulekatolia.’” Ha kua nakai moua he matua fifine e kupu ia i loto he Tohi Tapu, ne fakaoti e fano haana he tapu, ti papatiso ai. “Ne tokologa lahi e tau tagata ne o mai ke he kupu mooli ha ko e ‘Creation Drama,’” he manatu e Erich Frost.​​—3 Ioa. 1-3.

Nakai leva lahi e hokotia ke he tapunu e fakakite he “Creation Drama,” ne lauia lahi a Europa he matematekelea he pule Nasi. Kamata he 1933, ne pā e gahua he Tau Fakamoli i Sihamani. Tali mai he magaaho ia ato oti e felakutaki ke uaaki he lalolagi he 1945, ko e tau fekafekau ha Iehova i Europa ne matematekelea he favale lahi. Valu e tau ne nofo puipui a Erich Frost. Ka kua hao a ia ti fekafekau he Peteli Wiesbaden i Sihamani. Ko e mitaki ha ia he hoko mai e mena ke nakai nimo ko e “Creation Drama” he mogo tonu ke fakamalolō e tokologa he tau Kerisiano ha kua teitei fehagai mo e tau kamatamata ke he tua he Felakutaki II he Lalolagi!​​—Mai he tau tokaaga tuai ha tautolu i Sihamani.