“NE HOKO e favale lahi ha ko e totoko he mole e viliaga, ti totou afe e Tau Fakamoli a Iehova ne fehola mai he tau kaina ha lautolu,” he talahau e François, ko ia ko e motua mai he motu ne nakai mautū lahi. “Ne uka ke moua e tau mena kai mo e tau vai ekekafo, ti ko e tau mena ne fai agaia ne tauuka lahi mahaki. Ne nakai hafagi e tau pege, ti gatigati e tau matini toloa tupe po ke nakai gahua ai.”

Ne fakamafiti e tau matakainaga he la ofisa ke ta atu e tau tupe mo e tau koloa lagomatai he tau mena tupu fakaofo ke he Tau Fakamoli ne o atu ke he tau Fale he Kautu he motu katoa. Ne papā he tau matakau fetoko e tau puhalatū, ka kua iloa he tau faahi ne ua e tūuho katoatoa he Tau Fakamoli, ne fa fakaatā e tau peleōafi he la ofisa ke ō.

“He o atu ke he taha Fale he Kautu, ne fana he tau tagata ne fakamumuli e vene ha mautolu,” he talahau e François. “Pete ia, ne mamole e tau matapulu ia mautolu. He kitia e kautau ne poi mai ki a mautolu, hane totō e fana, ne tuku fakamafiti e mautolu e vene ke liu halatua ti viviko mo e holo mafiti he liliu ke he la ofisa. Fakaaue na mautolu ki a Iehova he momoui. He aho hake, toko 130 e matakainaga he Fale he Kautu ia ne hohoko ke he matakavi haohao mitaki. Ne o mai falu ke he la ofisa, ti leveki e mautolu e tau manako fakaagaaga mo e tau manako fakatino ha lautolu ato mole e matematekelea.”

“He mogo fakamui, ne loga e tohi ne moua he la ofisa mai he tau matakainaga he motu ne tohi ke fakaaue lahi mahaki,” he talahau e François. “He kitia e tau matakainaga ha lautolu ne o mai he tau matakavi kehekehe ke kumi lagomatai, ne au atu e mauokafua ha lautolu ki a Iehova.”

He lauia he tau matematekelea tupu pauaki mo e fakatupu he tagata, ne nakai tala age a tautolu ke he tau matakainaga ne manako lagomatai “kia mafanatia, mo e makona.” (Iako. 2:15, 16) Ka e eketaha a tautolu ke leveki e tau manako fakatino ha lautolu. Pihia foki, he moua e tau hatakiaga ke he hoge he senetenari fakamua, “ati manatu ai takitokotaha e tau tutaki, ke fakalata ke he tau mena kua monuina ai, ke age ai e [lagomatai] fakaalofa ke he tau matakainaga kua nonofo i Iutaia.”​​—Gahua 11:28-30.

Ha ko e tau fekafekau ha Iehova, kua makai a tautolu ke lagomatai a lautolu kua manako lagomatai ke he tau mena fakatino. Ka kua manako foki e tau tagata ke he lagomatai fakaagaaga. (Mata. 5:3, NW) Ke lagomatai a lautolu ke mailoga e manako fakaagaaga ia mo e taute e tau lakaaga ke moua ai e lautolu, ne poaki a Iesu ke he tau tutaki haana ke taute tutaki. (Mata. 28:19, 20) Kua igatia a tautolu mo e foaki fakalahi e tau magaaho, malolō, mo e tau koloa ha tautolu ke taute e poakiaga ia. Ko e fakatokatokaaga, kua fakaaoga e tautolu falu tupe foaki ma e tau lagomatai fakatino, ka e laulahi he tau tupe foaki kua fakaaoga ke fakaholo ki mua e tau mena he Kautu mo e folafola e tala mitaki. Kua fakakite ai e tautolu e fakaalofa ha tautolu ke he Atua mo e tau katofia ha tautolu.​​—Mata. 22:37-39.

Ko lautolu ne lalago e gahua he Tau Fakamoli a Iehova he lalolagi katoa kua mauokafua ko e tau mena fakaalofa ha lautolu kua fakaaoga fakamitaki. Maeke nakai a koe ke lagomatai e tau matakainaga haau ne manako lagomatai? Manako nakai a koe ke lalago e gahua taute tutaki? Ka manako, “aua neke lamakai e koe e mena mitaki kia lautolu kua lata ki ai, ka kua maeke kia koe ke eke.”​​—Fakatai 3:27.