1, 2. Ko e ha ne fakatatai e Iehova a ia ke he leveki mamoe?

 KUA fakatatai e Iehova a ia ke he leveki mamoe. (Eseki. 34:11-14) Lagomatai he mena nei a tautolu ke maama na fēfē a Iehova. Kua fai fakalagoaga e leveki mamoe totonu ke he tau momoui he tau mamoe ne leveki e ia. Ne takitaki e ia a lautolu ke he mena ne ha ha i ai e tau mena kai mo e vai mo e lukuluku e tau punua fanau foou ha lautolu. (Sala. 23:1, 2; Isaia 40:11) Ne matakite a ia ke he tau mamoe he aho mo e pō mo e puipui a lautolu mai he tau manu favale. (1 Samu. 17:34, 35; Luka 2:8) Ne kumi e ia ha mamoe kua hakalo kehe mai he fuifui mo e leveki a lautolu kua pākia.​​—Eseki. 34:16.

² He tau vahā i tuai, laulahi he tau tagata he Atua ko e tau leveki mamoe mo e tau tagata gahua fonua. Ti maama e lautolu e kakano ne fakatatai e Iehova a ia ke he leveki mamoe. Iloa e lautolu kua lata e tau mamoe ke leveki mo e fagai ke malolō mo e ke momoui. He puhala taha, kua lata e tau tagata ke moua e levekiaga mo e takitakiaga mai ia Iehova. (Mare. 6:34) Kua matematekelea e tau tagata ka nakai fai levekiaga mo e takitakiaga mai ia Iehova. Nakai iloa e lautolu e mena kua hako mo e mena kua hepe, ti nakai fai tagata ke puipui a lautolu. Ko lautolu kua tuga e “tau mamoe kua nakai fai leveki.” (1 Patu. 22:17) Ka ko lautolu kua fakaatā a Iehova ke leveki a lautolu kua moua e tau mena oti kua manako a lautolu ki ai.

3. Ko e heigoa ka fakaako e tautolu he vala tala nei?

³ Kua maama foki e tautolu e puhala kua tatai a Iehova mo e leveki mamoe. Kitia e tautolu kua leveki fakamitaki lahi e ia e tau tagata haana he vahā nei. To fakaako e tautolu e puhala kua takitaki mo e leveki e ia e tau manako ha tautolu. Ti to fakatutala a tautolu ke he mena kua lata ia tautolu ke taute ke aoga mai he takitakiaga mo e levekiaga ha Iehova.

4. Leveki fēfē e Iesu e tau mamoe ha Iehova?

⁴ Ne kotofa e Iehova a Iesu ke eke mo Ulu he fakapotopotoaga Kerisiano. (Efeso 1:22, 23) Ko Iesu ko e  “leveki mamoe mitaki,” kua tuga ni haana Matua. Ne ofania e Iesu e tau mamoe mo e leveki a lautolu. Ti foaki foki e ia e moui haana ma e tau mamoe. (Ioane 10:11, 15) Ko e mena fakaalofa homo ue atu mooli e lukutoto ma e tau tagata oti! (Mata. 20:28) Ko e finagalo ha Iehova ke fakakite he tau tagata oti e tua ki a Iesu ke “nakai mate taha ne tua kia ia, ka kia moua e ia e moui tukulagi”!​​—Ioane 3:16.

5, 6. (a) Ko hai ne fifili e Iesu ke leveki e tau mamoe haana? Ko e heigoa kua lata he tau mamoe ke taute ke aoga mai he levekiaga ha Iesu? (e) Ko e heigoa e matapatu kakano kua manako a tautolu ke muitua e takitakiaga he tau motua?

⁵ Fakakite fēfē he tau mamoe ko Iesu Keriso e Leveki Mamoe ha lautolu? Pehē a Iesu: “Ko e haku a tau mamoe kua fanogonogo mai ke he haku a leo, kua iloa foki e au a lautolu; kua mumui mai foki a lautolu kia au.” (Ioane 10:27) Kua fanogonogo e tau mamoe ke he leo he Leveki Mamoe Mitaki he muitua tumau ke he takitakiaga haana. Putoia he mena nei e omaoma ki a lautolu ne kotofa e ia ke lagomatai a ia ke leveki e fuifui mamoe. He senetenari fakamua, ne fifili e Iesu e tau aposetolo mo e tau tutaki haana ke leveki e tau tagata ne mumui ki a ia. Ne tala age a ia ki a lautolu ke fakaako mo e fagai haana “tau mamoe.” (Totou Ioane 21:15-17; Mata. 28:20) He matutaki e tala mitaki ke fakamatala, kua tokologa atu e tau tagata ne eke mo tau tutaki ha Keriso. Ti eketaha a Iesu to ha ha i ai e tau leveki motua fakaagaaga ke leveki e tau fakapotopotoaga.​​—Efeso 4:11, 12.

⁶ Fakamui, ne tohi e Paulo ke he tau motua he fakapotopotoaga ha Efeso ti tala age ki a lautolu: “Kua kotofa a mutolu he Agaga Tapu ke eke ai mo leoleo, kia leveki e ekalesia he Atua.” (Gahua 20:28) Ne kotofa foki he agaaga tapu e tau motua he vahā nei. Ko e ha kua talahau pihia a tautolu? Ha ko e kotofa ha lautolu ne fakavē ke he tau puhala ne tohia he Kupu omoomoi he Atua. Ti ka omaoma a tautolu ke he tau motua, kua fakakite e tautolu e fakalilifu ki a Iehova mo Iesu, ko e tau Leveki tokoua ne mua ue atu. (Luka 10:16) Ko e matapatu kakano anei kua makai a tautolu ke omaoma ke he tau motua. Ka e fai kakano foki kua lata ia tautolu ke muitua e takitakiaga ha lautolu.

7. Lagomatai fēfē he tau motua a koe ke fakatumau e malolō he tuaga kapitiga haau mo Iehova?

⁷ Ko e fakamalolōaga mo e takitakiaga ne foaki he tau motua ke he tau matakainaga ha lautolu kua fakavē tumau ke he talahauaga he Tohi Tapu. Nakai manako e tau motua ke tala age ke he tau matakainaga e puhala ke momoui a lautolu. (2 Kori. 1:24) Ka e manako a lautolu ke lagomatai e tau matakainaga ke taute e tau fifiliaga ha lautolu ni ne fakavē ke he tau matapatu fakaakoaga he Tohi Tapu. He taute pihia, kua lagomatai he tau motua e fakapotopotoaga ke kaufakalataha mo e mafola. (1 Kori. 14:33, 40) Pehē e Tohi Tapu ko e tau motua “nukua leoleo a lautolu ke he tau agaga ha mutolu.” Kakano e mena nei kua manako e tau motua ke lagomatai e tau tagata takitokotaha he fakapotopotoaga ke pipiki tumau ki a Iehova. Ti mafiti a lautolu ke lagomatai e tau matakainaga kua teitei taute, po ke fitā he taute e fifiliaga kelea. (Kala. 6:1, 2; Iuta 22) Ha ha ia tautolu loga e tau kakano mitaki lahi ke ‘omaoma ke he tau takitaki.’​​—Totou  Heperu 13:17.

8. Puipui fēfē he tau motua e fakapotopotoaga?

⁸ Ko e aposetolo ko Paulo, ko e leveki manamanatu ne hataki e tau matakainaga haana i Kolose: “A mutolu, neke lautaki e taha a mutolu ke he pulotu nakai aoga ke fakahehe ai, ke lata mo e kupu toka tuai he tau tagata, ke lata foki mo e tau kupu fakamua he lalolagi, ka e nakai lata mo Keriso.” (Kolo. 2:8) Lagomatai he hatakiaga nei a tautolu ke kitia e taha kakano foki kua aoga ke omaoma ke he takitakiaga he tau motua. Puipui e lautolu e tau matakainaga ha lautolu mai he tau tagata ne manako ke tataki kehe a lautolu mai ia Iehova. Ne hataki he aposetolo ko Peteru to lali e “tau perofeta pikopiko” mo e “tau akoako pikopiko” ke taute e tau Kerisiano lolelole ke nakai omaoma ki a  Iehova. (2 Pete. 2:1, 14) Kua lata he tau motua he vahā nei ke foaki e tau hatakiaga pihia kaeke kua lata. Ko e tau motua ko e tau Kerisiano pulotu kua iloa e tau mena he moui. Ne kotofa a lautolu ko e tau motua ha kua fakakite e lautolu kua maama mahino e lautolu e tau Tohiaga Tapu ti kua lotomatala a lautolu ke fakaako e kupu mooli mai he Tohi Tapu. (1 Timo. 3:2; Tito 1:9) Ko e ha lautolu a motua fakaagaaga, lagotatai, mo e pulotu ne fakavē ke he Tohi Tapu kua lagomatai a lautolu ke foaki e takitakiaga mitaki ke he ha lautolu a tau matakainaga.

9. Fagai mo e takitaki fēfē e Iesu e fakapotopotoaga he vahā nei?

⁹ Fakaaoga e Iehova e fakatokatokaaga haana ke fakaako mo e takitaki e tau Kerisiano oti he lalolagi katoa. Moua e tautolu e lahi he fakatonuaga faka-Tohi Tapu he tau tohi ha tautolu. He falu mogo, kua foaki fakahako foki he fakatokatokaaga e takitakiaga ke he tau motua he fakapotopotoaga. Moua he tau motua e takitakiaga nei mai he tau tohi po ke mai he tau fakatonuaga ne foaki he tau leveki faifano. He tau puhala oti nei, kua moua he tau mamoe e takitakiaga mahino.

10. Ko e heigoa e matagahua kua ha ha he tau leveki totonu ka toka he matakainaga taane po ke fifine e fakapotopotoaga?

¹⁰ Ko e tau leveki totonu ne ha ha i ai e kotofaaga he puipui mo e leveki e tau mamoe. Ko e tau motua Kerisiano kua manamanatu pauaki hagaao ki a lautolu kua lolelole e tua po ko lautolu kua taute e tau hepehepe kelea lahi mahaki. (Totou Iakopo 5:14, 15.) Liga falu ne tafea kehe mai he fakapotopotoaga ti  oti e fekafekau ke he Atua. Ko e heigoa ka taute he leveki totonu ke lagomatai? To taute e ia e tau mena oti kua maeke a ia ke kumi a lautolu nei mo e fakamalolō a lautolu ke liliu mai ke he fakapotopotoaga. Pehē a Iesu: Ko e “Matua [haaku] ha ha he lagi, kua nakai finagalo a ia kia mate taha ia lautolu nai kua fakateaga.”​​—Mata. 18:12-14.

11. Ko e ha e falu ne uka ke omaoma ke he tau motua?

¹¹ Ko Iehova mo Iesu ko e tau Leveki mitaki katoatoa. Ko e tau leveki lagomatai ne fakaaoga e laua ke leveki e fakapotopotoaga kua nakai mitaki katoatoa. Liga taute he mena nei ke uka e falu ke omaoma ke he tau motua. Liga manatu a lautolu: ‘Ko e tau motua ko e tau tagata nakai mitaki katoatoa tuga ni a tautolu. Ko e ha kua lata ia tautolu ke fanogonogo ke he fakatonuaga ha lautolu?’ Mooli, kua nakai mitaki katoatoa e tau motua. Ka e nakai lata ia tautolu ke hagaaki ke he tau kūkū mo e tau hepehepe ha lautolu.

12, 13. (a) I tuai, ko e heigoa e tau hepehepe ne taute he tau fekafekau leveki he Atua? (e) Ko e ha ne manako a Iehova ke tohia e tau hepehepe he tau tagata taane leveki he Tohi Tapu?

¹² Kua mooli e tau Tohiaga Tapu ke he tau hehē he tau tagata taane ne fakaaoga e Iehova ke takitaki haana tau tagata i tuai. Ma e fakatai, ne fakauku a Tavita mo patuiki ha Isaraela, ka e fakamui ne agahala a ia ke he Atua. Ne mohe a ia mo e fifine fai taane ti kelipopo e taane haana. (2 Samu. 12:7-9) Manamanatu foki ke he aposetolo ko Peteru. Pete ne age ki a ia e matagahua lahi he fakapotopotoaga Kerisiano, ne taute foki e ia e tau hepehepe kelea muitui. (Mata. 16:18, 19; Ioane 13:38; 18:27; Kala. 2:11-14) Kehe mai ia Iesu, nakai fai tagata tali mai ia Atamu mo Eva ne mitaki katoatoa.

¹³ Ko e ha ne tohia ai e Iehova e tau hepehepe he falu fekafekau leveki haana he Tohi Tapu? Taha kakano ke fakakite kua maeke a ia ke fakaaoga e tau tagata taane nakai mitaki katoatoa ke takitaki haana tau tagata. Ti kua taute tumau e ia e mena nei. Nakai lata ia tautolu ke fakaaoga e tau nakai mitaki katoatoa he tau motua he vahā nei mo piu ke gugū ki a lautolu po ke fakaheu e pule ha lautolu. Kua amanaki a Iehova ki a tautolu ke fakalilifu mo e omaoma ki a lautolu.​​—Totou  Esoto 16:2, 8.

14, 15. Ko e heigoa ha tautolu kua fakaako mai he puhala ne tuku age e Iehova e tau fakatonuaga ke he tau tagata haana i tuai?

¹⁴ Kua aoga lahi mahaki ma tautolu ke omaoma ke he tau motua. Ko e ha? Manamanatu ke he puhala ne age e Iehova e tau fakatonuaga ke he tau tagata haana ke maeke a lautolu ke laveaki mai he tau magaaho uka i tuai. Ma e fakatai, he toka he tau tagata ha Isaraela a Aikupito, ne fakaaoga he Atua a Mose mo Arona ke tuku age e tau fakatonuaga aoga ke he tau tagata. Ke hao foki he malaia ke hogofuluaki, ne lata e tau Isaraela ke omaoma ke he tau fakatonuaga. Ne tala age ki a lautolu ke taute e kaiaga pauaki, tamate e mamoe, ti pīpī e vala toto he tau pou ha lautolu mo e i luga he tau gutuhala ha lautolu. Tutala fakahako kia e Atua ke he tau tagata? Nakai, lata e tau tagata ke fanogonogo ke he tau patu ne moua e tau fakatonuaga mai ia Mose. (Esoto 12:1-7, 21-23, 29) He puhala nei, ne fakaaoga e Iehova a Mose mo e falu he tau patu ke takitaki e tau tagata. He vahā nei, ne fakaaoga e Iehova e tau motua Kerisiano ke taute e mena nei.

¹⁵ Liga manamanatu a koe ke he tau magaaho loga foki he Tohi Tapu ne fakaaoga e Iehova e tau tagata po ke tau agelu ke tuku age e tau fakatonuaga ke he tau tagata haana. Laulahi he tau mena tutupu, ko e tau fakatonuaga nei ne fakahao e tau momoui ha lautolu. He tau tuaga oti nei, ne fifili e Atua ke age e pule ke he falu ke vagahau he puhala he higoa haana mo e ke tala age ke he tau tagata  haana e tau mena kua lata ke taute e lautolu he tau magaaho hagahaga kelea. Fai kakano a tautolu ke amanaki to taute e Iehova e mena taha ma e tau tagata haana i Amaketo. Mooli ko e tau motua ne ha ha i ai e matagahua he hukui a Iehova po ke haana a fakatokatokaaga he vahā nei kua lata ke fakaeneene fakalahi ke nakai molea mai he pule ne kua tuku age ki a lautolu.

16. Ko e heigoa e “kupu” kua lata ia tautolu ke fanogonogo ki ai?

¹⁶ Ko e tau tagata ha Iehova kua “taha ai e fuifui mamoe” i lalo he “leveki mamoe ne tokotaha,” ko Iesu Keriso. (Ioane 10:16) Ne pehē a Iesu to fakalataha a ia mo e tau tutaki haana he “tau aho oti, ato hoko ni ke he fakaotiaga he lalolagi.” (Mata. 28:20) Ha ko e Patuiki he lagi, ne pule katoatoa a ia ke he tau mena tutupu oti ka tutupu ato hau a ia ke moumou e lalolagi a Satani. Nonofo fakalataha mo e nakai haofia fēfē a tautolu he fakatokatokaaga he Atua? Tali he Tohi Tapu: “To logona foki he tau teliga ha mutolu e kupu ki tua ha mutolu, . . . Ko e puhala hanai ke o ai a mutolu.” Ko e “kupu” nei kua putoia e mena ne fakaako e Iehova ki a tautolu he Tohi Tapu mo e mena ne talahau e ia mo Iesu puhala he tau leveki ne kotofa e laua.​​—Totou  Isaia 30:21; Fakakiteaga 3:22.

17, 18. (a) Hagahaga kelea fēfē e tau tagata he Atua? Ko e heigoa ka talitonu a tautolu ki ai? (e) Ko e heigoa ka fakaako e tautolu he vala tala ka mui mai?

¹⁷ Pehē e Tohi Tapu ko Satani kua “tuga ne leona tagi, kua kumi kia falu ke faiola ai e ia.” (1 Pete. 5:8) Tuga e manu favale mo e hoge, ne tatao e ia e fuifui mamoe, he leo ke he magaaho tonu ke oho atu ke he mamoe kua lolelole po ke hakalo kehe mai he fuifui. Ko e taha anei he kakano mitaki kua lata tumau ia tautolu ke nonofo fakatata lahi ke he fakapotopotoaga mo e ke he ha tautolu a “leoleo mo e leveki.” (1 Pete. 2:25) Tutala e Fakakiteaga 7:17 hagaao ki a lautolu kua hao he matematekelea lahi. Pehē ai ko Iesu ka “takitaki a lautolu ke he tau vaipuna he moui; to holoholo kehe foki he Atua e tau hihinamata oti mai he tau mata ha lautolu.” Ko e maveheaga homo ue atu mooli anei!

¹⁸ Ko e matagahua he tau motua Kerisiano ke leveki e fakapotopotoaga kua aoga lahi. Maeke fēfē he tau tagata taane nei ne kotofa ke mailoga kua taute fakamitaki e lautolu e tau mamoe ha Iesu? To tali e tautolu e hūhū nei he vala tala ka mui mai.