“FANO A a koe ke he hau a fale, mo e hau a faoa, ti fakamatala e koe kia lautolu e tau mena loga kua eke he Iki [Iehova] kia koe, mo e hana fakaalofa kia koe,” he tala age e Iesu Keriso. Liga ko ia i Kerekese mogoia, he faahi toga ki uta he Tahi a Kalilaia, hane tutala ke he tagata taane ne manako ke eke mo tutaki haana. Ne fakakite he tau kupu ha Iesu kua maama e ia e aga he tagata​​—ko e manako ke tala age e tau mena mitaki mo e aoga ke he tau magafaoa.​​—Mare. 5:19.

Kitia agaia e tautolu e aga ia he vahā nei, ti malolō lahi ai he falu aga fakamotu. Ko e mena ia, ka eke e taha tagata mo tagata tapuaki he Atua mooli ko Iehova, ne fa mahani a ia ke manako ke tala age e tua foou haana ke he tau magafaoa haana. Ka e lata ke taute fēfē e ia? Puhala fe ka hokotia a ia ke he loto he tau magafaoa ne kehe e lotu​​—po ke nakai ha ha e tua? Kua foaki he Tohi Tapu e tau fakatonuaga atihake mo e gahuahua.

He senetenari fakamua, ko Aneterea e taha ia lautolu ne iloa mua a Iesu ko ia e Mesia. Ti ko hai ne tala age agataha e ia e mena ne moua e ia? “Kua moua fakamua e ia [Aneterea] hana ni a matakainaga, ko Simona; ti tala age kia ia, Kua moua tuai e mautolu e Mesia, (ko e hana fakamatala ko e Keriso).” Ne takitaki e Aneterea a Peteru ki a Iesu, ati maeke a Peteru ke eke mo taha he tau tutaki ha Iesu.​​—Ioane 1:35-42.

Kavi ke he ono e tau he mole he magaaho ne nofo a Peteru i Iopa, ne uiina a ia ke fina atu ke he faahi tokelau ki Kaisaria ke aahi e faoa ha Konelio, ko e takitaki kau. Ko hai ne feleveia mo Peteru kua fakapotopoto ke he fale? “Kua tatali foki a Konelio kia [Peteru mo lautolu ne fenoga fakalataha mo ia], kua fakapotopoto e ia hana faoa, mo e hana tau kapitiga fakahele.” Ne maeke ia Konelio ke foaki ke he tau faoa haana e magaaho ke fanogonogo ki a Peteru he tutala mo e  taute e fifiliaga ne fakavē ke he tau mena ne logona e lautolu.​​—Gahua 10:22-33.

Ko e heigoa ha tautolu kua fakaako mai he puhala ne fehagai atu a Aneterea mo Konelio mo e tau magafaoa ha laua?

Nakai tokanoa e Aneterea mo Konelio e mena nei ke tupu puleheu. Ne ta atu e Aneterea a Peteru ke feleveia mo Iesu, ka e fakatokatoka e Konelio ma e tau magafaoa haana ke fanogonogo ke he tau tala ha Peteru. Ko Aneterea mo Konelio ne nakai peehi e tau magafaoa ha laua po ke eke lagatau he fakaohooho a lautolu ke eke mo tau tutaki he Keriso. Kitia nakai e koe e fakaakoaga he mena ia? Kua lata foki ia tautolu ke taute pihia. Liga maeke ia tautolu ke talahau falu manatu ke he tau magafaoa ha tautolu mo e lali ke fakatoka e magaaho ma lautolu ke iloa e kupu mooli he Tohi Tapu mo e tau matakainaga talitonu. Ka kua lata agaia ia tautolu ke fakalilifu e atāina ha lautolu ke fifili mo e kalo mai he peehi malolō a lautolu. Ke fakamaama e puhala kua maeke ia tautolu ke lagomatai e tau magafaoa ha tautolu, manamanatu la ke he fakafifitakiaga ha Jürgen mo Petra, ko e hoa mau i Sihamani.

Ne fakaako Tohi Tapu a Petra mo e Tau Fakamoli a Iehova ti fai magaaho ti papatiso. Ko e taane haana ko Jürgen, ko e takitaki he kautau. He mogo fakamua ne nakai fiafia a Jürgen ke he fifiliaga he hoana haana. Ka e fai magaaho, ne mailoga e ia kua fakamatala he Tau Fakamoli e kupu mooli mai he Tohi Tapu. Ne tukulele foki e moui haana ki a Iehova, ti kua eke a ia mo motua he fakapotopotoaga ha lautolu mogonei. Ko e heigoa e tomatomaaga haana mogonei hagaao ke he hokotia ke he loto he tagata he magafaoa ne kehe e tua?

Ne pehē a Jürgen: “Nakai lata a tautolu ke lali ke omoi e matakupu mo e tanumia e tau magafaoa ha tautolu ke he tau mena fakaagaaga. Liga to fakaohooho ni he mena nei e nakai talia ha lautolu. He vahā loa, liga mitaki ka fakailoilo a tautolu he tala age fakakū ke he ha magaaho. Aoga foki ka fakatoka e tau magafaoa ha tautolu ke feleveia mo e tau matakainaga ne kehekehe e tau tau moui mo e tatai e tau mena ne fiafia ki ai. He taute e mena nei ka fakatata mai a lautolu.”

Ko e aposetolo ko Peteru mo e tau magafaoa ha Konelio ne talia mafiti e fekau he Tohi Tapu. Ko e falu ne iloa e kupu mooli he senetenari fakamua ne lata ke lahi foki e magaaho ke taute e fifiliaga.

Tokologa e magafaoa ha Iesu ne tua ki a ia he fekafekauaga haana. Ma e fakatai, liga ko e tau aposetolo ko Iakopo mo Ioane ko e tau kasini ha Iesu ti ko e matua fifine ha laua ko Salome, ko e anitī haana. Liga ko ia taha he “falu a fifine tokologa, ne fekafekau atu a lautolu kia [Iesu mo e tau aposetolo] he tau mena ha lautolu.”​​—Luka 8:1-3.

Ko e falu tagata he magafaoa ha Iesu ne nakai tua a lautolu he mogoia ni. Ma e fakatai, he taha mogo he kavi ke he taha e tau he mole e papatiso ha Iesu, ne fakapotopoto mai e moto tagata ke he fale ke fanogonogo ki a ia. “Kua logona ai hana magafaoa, ti o atu ai a lautolu ke tapaki a ia, ha kua pehe a lautolu, Kua vikoia a ia.” Fai magaaho he mole, ne hūhū e lafu po ke tau matakainaga ha Iesu hagaao ke he tau fano fenoga haana, ne nakai tali atu fakahako a Iesu. Ko e ha? “Ha ko e mena nakai tua hana tau matakainaga kia ia.”​​—Mare. 3:21; Ioane 7:5.

Ko e heigoa ha tautolu ka fakaako mai he puhala ne fehagai a Iesu mo e magafaoa haana? Ne nakai ita a ia he pehē falu kua vikoia a ia. He mole foki e tamate mo e fakaliu tu mai, ne foaki e Iesu e falu fakamafanaaga ke he tau magafaoa haana he fakakite atu  ke he matakainaga haana ko Iakopo. Ko e fakakite atu haana ne liga lagomatai a Iakopo mo e falu matakainaga ha Iesu ke mauokafua ko Iesu mooli ni ko e Mesia. Ti haia a lautolu mo e tau aposetolo mo e falu foki he poko tapa ki luga i Ierusalema ti maaliali kua moua ai e agaaga tapu. Fai magaaho, ko Iakopo mo Iuta ko e lafu foki ha Iesu, ne moua e tau kotofaaga mitaki lahi.​​—Gahua 1:12-14; 2:1-4; 1 Kori. 15:7.

Tuga he senetenari fakamua, falu magafaoa he vahā nei kua lahi e magaaho ato fakalataha atu a lautolu ke he hala ke he moui. Ma e fakataiaga, ko Roswitha ne malolō lahi ke he lotu Katolika Roma he magaaho ne papatiso e taane haana ko e taha he Tau Fakamoli a Iehova he 1978. Ha kua mauokafua a Roswitha ke he tau taofiaga haana, he mogo fakamua ne totoko e ia e taane haana. Ka e loga e tau he mole, ne matutū hifo e totoko haana ti kitia e ia kua fakaako he Tau Fakamoli e kupu mooli. He 2003 ne papatiso foki a ia. Ko e heigoa ne lafilafi ke he hikiaga? He nakai ita he totoko a Roswitha he mogo fakamua, ne age he taane haana e magaaho ke hiki e manatu haana. Ko e heigoa e tomatomaaga ne talahau e Roswitha? “Lahi e mena mitaki ka moua ka fakauka, fakauka, mo e fakauka atu foki.”

Ko Monika ne papatiso he 1974, ti eke foki e tau tama taane tokoua haana mo Tau Fakamoli he kavi ke he hogofulu e tau he mole. Ka e pete he nakai totoko he taane haana ko Hans e tua ha lautolu, ne nakai papatiso a ia ato hoko ke he 2006. He aoga mai he liu manamanatu ke he vahā kua mole, ko e heigoa e tomatomaaga he magafaoa? “Pipiki fakamooli ki a Iehova, mo e nakai fakahui ka hūhū toko ke he tua.” Ka e aoga ke tala age tumau ki a Hans e fakaalofa ha lautolu ma haana. Kua nakai galo e amaamanakiaga ha lautolu to hoko e magaaho ti talia e ia e tua ha lautolu.

Ne fakamaama e Iesu e fekau he kupu mooli ke tuga e vai ne puna mai e moui tukulagi. (Ioane 4:13, 14) Manako a tautolu ke he tau magafaoa ha tautolu ke hauhau he inu he vai momoko mo e tavana he kupu mooli. Ti nakai manako a tautolu ke fakahakea a lautolu he lahi mahaki e vai ne puō hifo fakamafiti ki a lautolu. He fakahauhau po ke hakea a lautolu kua fakavē ni ke he puhala ka fakamaama e tautolu e tua ha tautolu ki a lautolu. Pehē e Tohi Tapu “kua manamanatu e loto he tagata tututonu, kia tali atu a ia,” mo e “ko e loto he tagata iloilo, kua iloilo ai hana gutu; kua lafilafi ai foki e iloilo ke he hana tau laugutu.” Fakagahua fēfē e tautolu e fakatonuaga nei?​​—Fakatai 15:28; 16:23.

Liga manako e hoana ke fakamaama e tua haana ke he taane haana. Kaeke ke ‘manamanatu e loto to tali atu,’ to fifili fakamitaki he hoana e tau kupu haana mo e nakai vagahau fakatepetepe. Nakai lata a ia ke fakakite ko ia ne tututonu po ke mua hake. Ko e puhala tutala haana ne manamanatu fakamitaki to fakahauhau mo e fakatupu e mafola. Magaaho fe ka fakatotoka mo e mukamuka e taane haana ke tutala ki ai? Ko e heigoa e tau matakupu kua fiafia a ia ke tutala po ke totou ki ai? Fiafia nakai a ia ke he tau mena fakasaiene, fakapolitika, po ke tau sipote? Maeke fēfē a ia ke fakalagalaga e fia iloa he taane haana ke he Tohi Tapu ka e he magaaho taha fakalilifu e tau logonaaga mo e tau manatu haana? Ko e manamanatu pihia ka lagomatai e hoana ke tutala mo e gahua fakailoilo.

Ke hokotia ke he loto he tau tagata he magafaoa ne nakaila ko e Tau Fakamoli, kua nakai ko e fakamaama ni he tua ha tautolu he tau magaaho ne kotofa. Ko e tau mena ne talahau e tautolu kua lata ke lalago aki e tau mahani mitaki.

“Kia fakatumau he fakagahua e tau matapatu fakaakoaga Tohi Tapu he moui he tau aho takitaha. Ko e puhala lauia mitaki lahi a ia ke maeke e tau magafaoa ke nofo hake mo e mailoga, pete kua nakai talia lahi e ia,” he fakamaama e Jürgen, ne totou i luga. Ne talia foki e Hans ne papatiso he teitei 30 e tau he mole e papatiso e hoana haana. “Ko e fakafifitakiaga faka-Kerisiano kua aoga ai ke maeke he magafaoa ke kitia e lauia mitaki he kupu mooli he moui ha tautolu.” Kua lata e tau magafaoa ha tautolu ke kitia kua taute he tua ha tautolu a tautolu ke kehe mai he falu ke he puhala mitaki, nakai he puhala kelea po ke fakavihiatia.

Ne foaki e Peteru e fakatonuaga uho ke he tau hoana ne nakaila fakalataha ia e tau taane ke he tau taofiaga ha lautolu: “Kia omaoma ke he tau tane ha mutolu ni, kaeke foki kua faliuliu falu ke he kupu, kia moua a lautolu he mahani mitaki he tau hoana ha lautolu, ka e nakai vagahau, Ka kitekite age a lautolu kia mutolu kua nonofo fakatekiteki mo e matakutaku. Aua neke eke ha lautolu a tauteaga ke he tino, ko e fili  he lauulu ia, mo e taute ke he auro, mo e fakatapulu ke he tau tapulu; Ka ko e tagata galo he loto, kia taute a ia ke he mena nakai tuai popo, ko e loto mahani molu mo e mafola, ko e koloa uho haia ki mua he Atua.”​​—1 Pete. 3:1-4.

Ne tohi e Peteru kua maeke e taane ke talia ai ha ko e mahani mitaki he hoana haana. He tokaloto e fakaakoaga faka-Tohi Tapu ia, ko e matakainaga fifine ko Christa hane lali ke hokotia ke he loto he taane haana ha ko e mahani mitaki haana tali mai he papatiso a ia he 1972. Pete he fakaako Tohi Tapu e taane haana mo e Tau Fakamoli he taha mogo, ne nakaila eke e ia e kupu mooli ma haana ni. Ne fina atu a ia ke he falu feleveiaaga Kerisiano mo e mahani lahi mo lautolu he fakapotopotoaga. Ne fakalilifu e lautolu e atāina haana ke fifili. Lali fēfē a Christa ke hokotia ke he loto he taane haana?

“Kua eketaha au ke pipiki mau ke he puhala kua manako a Iehova ke fano ai au. He magaaho taha, ne lali au ke moua mai e taane haaku ka e ‘nakai vagahau’ ha ko e mahani mitaki haaku. Ka nakai lauia e tau matapatu fakaakoaga he Tohi Tapu, kua eketaha au ke taute e tau mena ne manako a ia ki ai. Ti fakalilifu e au e atāina haana mo e toka ai mo Iehova.”

Ne fakakite he puhala ha Christa e aoga he maeke ke hikihiki. Ne fakatumau a ia ke taute e tau matagahua ne atihake fakaagaaga, putoia e fina atu tumau he tau feleveiaaga mo e eketaha ke he fekafekauaga faka-Kerisiano. Ka e fakakite e ia e maamaaga, he mailoga kua tonuhia e taane haana ke he fakaalofa, magaaho, mo e mamata atu haana ki a ia. Kua pulotu ke maeke ke hikihiki mo e maama a tautolu oti kua fehagai mo e tau magafaoa nakai talitonu. “Ko e mena mo e hana ni a tau ke he tau mena oti,” he fakamaama he Tohi Tapu. Putoia he mena nei e magaaho ke fakalataha mo e tau tagata he magafaoa, mua atu e hoa mau, ne nakai tatai e tua mo e ha tautolu. Ko e magaaho auloa kua omoomoi e fetutalaaki. Fakakite mai he tau mena tutupu, ka mitaki e fetutalaaki ti tote hifo e tau logonaaga matimati, tiaki, po ke mahekeheke ha lautolu.​​—Fakama. 3:1.

“Kua aoga ke fakakite ke he tagata he magafaoa na fakaalofa mo e liogi a mautolu ma haana,” he talahau e Holger, ne papatiso e matua taane he mole e 20 e tau he papatiso falu he magafaoa. Ne talahau e Christa ‘to nakai galo e amaamanakiaga haana to kaufakalataha e taane haana mo Iehova mo e talia e kupu mooli.’ Ko e aga ha tautolu ke he tau magafaoa ne nakaila fakalataha ke he tua ha tautolu, kua lata ke atihake tumau mo e fakavē ke he amaamanaki.

Ko e foliaga ha tautolu ke tumau e tau fakafetuiaga, ke foaki ke he tau magafaoa ha tautolu e magaaho ke kitia e kupu mooli, mo e ke aamotia e tau loto ha lautolu he fekau he Tohi Tapu. Ke he tau mena oti, kua lata ia tautolu ke “mahani molu” mo e fakalilifu.​​—1 Pete. 3:15.