1, 2. Ko e heigoa e puipuiaga ne lata ke moua he tama he fifine, ti ko e ha?

 KO E perofetaaga fakamua he Tohi Tapu kua aoga ke maama e puhala ka kautū e finagalo he Atua. He fakatū he Atua e maveheaga faka-Etena, ne pehē a ia: “To fakatupu e au e faitaua kia mua [Satani] mo e fifine, ko e hau a fanau foki mo e hana fanau.” Kelea lahi fēfē e faitaua nei? Pehē a Iehova: “To tatuki e ia [fanau he fifine] hau [Satani] a ulu, ka e tatuki ni e koe hana muihui.” (Kene. 3:15) Ko e faitaua he vahāloto ha Satani mo e fifine to vale lahi ti fakaaoga he Tiapolo e malolō oti kana haana ke tamate e tama nei.

² Ko e mena ia ne liogi e salamo hagaao ke he tau tagata he Atua: “Kitiala, kua fegui a lautolu kua fai fi kia koe; kua fakatokoluga tuai a lautolu ne fakavihia a koe. Kua eke lagatau galo e lautolu ke he hāu a tau tagata, mo e pulepulega a lautolu kia lautolu ne fufu e koe. Kua pehe a lautolu, O mai a, kia fakaotioti e tautolu a lautolu kia nakai tuai eke a lautolu mo motu.” (Sala. 83:2-4) Ko e foliaga ha Satani ke moumou mo e fakakelea e laini he magafaoa he tama. Ke puipui e tama mo e fakamau to kautū e Kautu faka-Mesia, ne fakatū e Iehova e falu maveheaga foki.

3, 4. (a) Gahuahua he magaaho fe e maveheaga he Fakatufono, ti ko e heigoa ne talia he motu ha Isaraela ke taute? (e) Ko e heigoa he maveheaga he Fakatufono ne talaga ke puipui?

³ Mole e tupu lahi he tau magafaoa ha Aperahamo, Isaako, mo Iakopo, ne taute e Iehova a lautolu mo motu ha Isaraela i tuai. Ha kua eke a Mose mo hulalo, ne taute he Atua e maveheaga homo ue atu mo e motu nei. Tuku age e Iehova ki a lautolu e Fakatufono, ti talia e Isaraela ke omaoma ki ai. Pehē e Tohi Tapu ko Mose ne “uta foki e ia e tohi he maveheaga mo e totou ki mua he motu; ti pehe mai a lautolu, Ko e tau mena oti kua talahau mai e Iehova, to eke e mautolu, mo e fanogonogo a mautolu ki ai. Ti uta e Mose e toto [he tau povi ne poa] mo e pīpī atu ke he motu, kua pehe, Kitiala, ko e toto hanai he maveheaga kua eke e Iehova mo mutolu ke he tau mena oti nai.”​—Esoto 24:3-8.

⁴ Ne gahuahua e maveheaga he Fakatufono he tau 1513 ato fai Keriso. Puhala he maveheaga ia, ne fifili e Iehova e motu ha Isaraela i tuai ma e kakano pauaki. To eke e Atua mo Fakafili, Pule, mo e Patuiki ha lautolu. (Isaia 33:22) Fakakite he fakamauaga tuai ha Isaraela e mena ne tupu he omaoma po ke nakai omaoma e tau tagata ke he tau tuaga tututonu he Atua. Ko e omaoma ke he Fakatufono he Atua kua kakano ne nakai fakaatā e tau Isaraela ke mau ke he tau tagata pouliuli po ke tapuaki falu atua. Ne talaga e Fakatufono ke puipui e tama ha Aperahamo mai he fakakelea.​—Esoto 20:4-6; 34:12-16.

5. (a) Ko e heigoa e magaaho ne tuku age he maveheaga he Fakatufono ke he motu ha Isaraela? (e) Ko e ha ne tiaki he Atua a Isaraela?

⁵ I lalo he maveheaga he Fakatufono, ko e tau ekepoa ne kotofa ke fekafekau i Isaraela. Ko e tau ekepoa ia ko e fakamailoga he taha matakau he tau ekepoa ka fekafekau ke he tau tagata anoiha he puhala mitaki atu. (Hepe. 7:11; 10:1) Ti foaki he maveheaga he Fakatufono ke he motu ha Isaraela e magaaho ke eke mo “kautu he tau ekepoa.” Ke moua e lilifu nei, kua lata he tau Isaraela ke omaoma ke he tau fakatufono ha Iehova. (Totou Esoto 19:5, 6.) Ka e kaumahala a lautolu ke omaoma. Ne nakai talia e Isaraela e Mesia, ko e vala pauaki he fanau ha Aperahamo. Ka e tiaki e lautolu a Iesu, ti tiaki he Atua a lautolu.

6. Ko e heigoa e kakano he Fakatufono?

⁶ Ha kua nakai fakatumau e mahani fakamooli ha lautolu ke he Atua, ne nakai eke e motu ha Isaraela mo kautu he tau ekepoa. Ka e nakai kakano e mena nei kua kaumahala e Fakatufono. Puipui he Fakatufono e fanau ti lagomatai e tau tagata ke kitia e Mesia. He hau a Keriso ke he lalolagi ti kitia ai, ne kautū e Fakatufono.  Pehē e Tohi Tapu: “Ko Keriso, ko e fakahikuaga he fakatufono haia.” (Roma 10:4) Ti ko e matakau fe ka moua e magaaho ke eke mo kautu he tau ekepoa? Ne taute foki e Iehova taha fakamauaga fakavē ke fakatū e motu foou.

7. Ko e heigoa ne talahau tuai e Iehova puhala ia Ieremia?

⁷ Leva ato utakehe e maveheaga he Fakatufono, ne talahau tuai e Iehova puhala he perofeta ko Ieremia to fakatū e Ia e “maveheaga fou” mo e motu ha Isaraela. (Totou Ieremia 31:31-33.) Kehe e maveheaga ia mai he maveheaga he Fakatufono ha kua nakai lata e tau poa manu ma e fakamagalo he tau agahala. Maeke fēfē e mena ia?

8, 9. (a) Ko e heigoa kua maeke puhala he toto ha Iesu? (e) Ko e heigoa e magaaho ne kua fakaatā ki a lautolu he maveheaga foou? (Kikite fakatino he kamataaga.)

⁸ Totou teau tau he mole, ia Nisana 14 he tau 33, ne kamata e Iesu e fakamanatuaga foou, ko e Kaiaga Afiafi he Iki. Tutala hagaao ke he kapiniu uaina, ne tala age a Iesu ke he haana a tau aposetolo 11 mahani fakamooli: “Ko e kapiniu nai, ko e maveheaga fou ia ke he haku a toto, kua fakamaligi ma mutolu.” (Luka 22:20) Hagaao ke he tala ha Mataio, ne pehē a Iesu: “Ha ko e haku a toto a enei, ko e toto he maveheaga fou, kua fakamaligi mo e tau tagata tokologa ke fakamagalo aki e tau hala.”​—Mata. 26:27, 28.

⁹ Taute he toto he poa ha Iesu e maveheaga foou ke gahuahua. Lagataha e foaki he toto ia, ti maeke ai ke moua he tau tagata tokologa e fakamagaloaga tukulagi he tau agahala ha lautolu. Nakai putoia a Iesu he maveheaga foou. Nakai agahala a ia, ti nakai lata a ia ke fakamagalo. Ka e fakaaoga he Atua e uho he poa ha Iesu ke aoga e tau tagata. Maeke foki a ia ke fakaaoga e agaaga tapu haana ke fakauku e falu tagata fakamooli mo e hiki a lautolu mo ‘tau tama.’ (Totou Roma 8:14-17.) Maeke a Iehova ke onoono ki a lautolu ke tuga ne taute e ia ke he haana Tama ko Iesu ne nakai fai agahala. Ko lautolu nei ne fakauku to eke mo “tau hakeaga fakalataha mo Keriso.” Ha ha ia lautolu foki e magaaho mo e lilifu ne galo he motu ha Isaraela, ke eke mo “kautu he tau ekepoa.” Pehē e aposetolo ko Peteru hagaao ki a lautolu: “Ko mutolu, ko e hau fifili a mutolu, ko e tau patuiki mo e tau ekepoa, ko e motu tapu, mo e motu kua moua māna, kia fakakite atu e mutolu e mitaki hana ne ui a mutolu ke o mai he pouli ke he hana maama ke ofo lahi ai.” (1 Pete. 2:9) Maaliali ai, kua latatonu e maveheaga foou! Kua fakaatā ai e tau tutaki ha Iesu ke eke foki mo vala he fanau ha Aperahamo.

10. Magaaho fe ne gahuahua e maveheaga foou, ti ko e ha ne nakai gahuahua ai ato hoko e magaaho ia?

¹⁰ Ko e maveheaga foou ne nakai gahuahua he Kaiaga Afiafi he Iki. Ko e ha? Ke maeke e maveheaga ia ke gahuahua, lata a Iesu ke liu ke he lagi mo e foaki ke he Atua e uho he poa haana. Ko lautolu foki ka eke mo “tau hakeaga fakalataha mo Keriso” kua lata ke fakauku ke he agaaga tapu. Ti gahuahua e maveheaga foou he Penetekoso he tau 33 he mogo ne moua he tau tutaki ha Iesu e agaaga he Atua.

11. Maeke fēfē he maveheaga foou ke fakaatā e tau Iutaia mo e tau Tagata Motu Kehe ke eke mo vala ha Isaraela fakaagaaga, ti tokofiha a lautolu he maveheaga foou?

¹¹ He fakapuloa e Iehova puhala ia Ieremia to fakatū e maveheaga foou mo Isaraela, ne fakakite he mena nei to fakahiku ke nakai aoga e maveheaga he Fakatufono. Ne fakahiku e Fakatufono he  mogo ne gahuahua e maveheaga foou. (Hepe. 8:13) Puhala he maveheaga foou, ko e tau Iutaia mo e tau Tagata Motu Kehe ne nakai peritome to tatai e magaaho ke eke mo tau hakeaga he Kautu he Atua, “ko e peritome foki, ko e mena he loto ia ha ha he agaga haia, nakai ha he tohi.” (Roma 2:29) To tuku he Atua e tau fakatufono haana he tau manamanatuaga mo e tau loto ha lautolu. (Hepe. 8:10) Putoia he maveheaga foou a lautolu ne fakauku ne 144,000. Ne fakakatoatoa e lautolu e motu foou ne fakahigoa ko “Isaraela he Atua,” po ke Isaraela fakaagaaga.​—Kala. 6:16; Fakakite. 14:1, 4.

12. Fakatatai fēfē e maveheaga he Fakatufono mo e maveheaga foou?

¹² Fakatatai fēfē e maveheaga he Fakatufono mo e maveheaga foou? Ko e maveheaga he Fakatufono he vahāloto ha Iehova mo e motu ha Isaraela, mo e maveheaga foou he vahāloto ha Iehova mo Isaraela fakaagaaga. Ko Mose e hulalo he maveheaga he Fakatufono, mo e ko Iesu e Hulalo he maveheaga foou. Kua gahuahua e maveheaga he Fakatufono puhala he toto he tau manu, mo e gahuahua e maveheaga foou puhala he toto he poa ha Iesu. I lalo he maveheaga he Fakatufono, ko Mose e takitaki he motu ha Isaraela. Ko Iesu e Ulu he fakapotopotoaga, ko e Takitaki ha lautolu i lalo he maveheaga foou.​—Efeso 1:22.

13, 14. (a) Matutaki fēfē e maveheaga foou ke he Kautu? (e) Ko e heigoa kua lata ma Isaraela fakaagaaga ke maeke ke pule mo Keriso he lagi?

¹³ Matutaki fēfē e maveheaga foou ke he Kautu? Fakatū he maveheaga nei e motu tapu ne ha ha i ai e magaaho ke eke mo tau patuiki mo e tau ekepoa he Kautu he lagi. Ko e motu ia kua fakakatoatoa e vala lafi ki luga he tama ha Aperahamo. (Kala. 3:29) Ti fakamau he maveheaga foou to fakamooli e maveheaga faka-Aperahamo.

¹⁴ Ko e maveheaga foou kua fakatū e motu ha Isaraela fakaagaaga ti ko e fakamauaga fakavē ma lautolu kua fakauku ke eke mo “tau hakeaga fakalataha mo Keriso.” Ka e maeke fēfē ia lautolu kua fakauku ke pule mo Iesu ko e tau patuiki mo e tau ekepoa he lagi? Fai maveheaga fakavē foki ne fakaatā ma e mena ia.

15. Ko e heigoa e maveheaga ne taute e Iesu ni mo e tau aposetolo fakamooli haana?

¹⁵ He mole e fakatū he Kai Afiafi he Iki, ne taute e Iesu e maveheaga mo e tau tutaki fakamooli haana ne fakahigoa ko e maveheaga he Kautu. (Totou Luka 22:28-30.) Kehe mai he falu maveheaga, nakai putoia a Iehova he maveheaga nei. Ka ko e maveheaga anei he vahāloto ha Iesu ni mo lautolu ne fakauku. He mogo ne pehē a Iesu “tuga ne kotofa mai he haku a Matua e kautu kia au,” kua liga hagaao a ia ke he maveheaga ne taute e Iehova mo ia ke eke mo ekepoa tukulagi tuga a Mekisateko.​—Hepe. 5:5, 6.

16. Ko e heigoa he maveheaga he Kautu kua maeke ke taute ma e tau Kerisiano fakauku?

¹⁶ Ne pipiki mau e tau aposetolo fakamooli toko 11 ki a Iesu he tau kamatamata oti haana. Ko e maveheaga he Kautu ne fakamooli to nonofo e tau aposetolo ke he tau nofoaiki mo e pule ko e tau patuiki mo e tau ekepoa mo Iesu he lagi. Ka e nakai ko lautolu toko 11 ia ni ka moua e lilifu ia. Ne tū atu a Iesu ke he aposetolo ko Ioane he fakakiteaga ti pehē: “Ko ia kua kautu, to foaki e au kia ia ke nonofo mo au ke he haku a nofoaiki, tuga na au foki kua kautu au mo e nonofo foki mo e Matua haku ke he hana nofoaiki.” (Fakakite. 3:21) Ti ko e maveheaga he Kautu ne  eke mai he tau Kerisiano fakauku ne 144,000. (Fakakite. 5:9, 10; 7:4) Ko e maveheaga nei ko e fakamauaga fakavē ma lautolu ne fakauku ke pule mo Iesu ke he lagi. Tatai e mena nei ke he kitofaitane kua fifili ke mau e patuiki. Ka mau a laua, to maeke he kitofaitane ke pule fakalataha mo e patuiki. Kua hagaao e Tohi Tapu ki a lautolu ne fakauku ko e “kitofaitane” he Keriso, “ko e tamafine tote fakamoli” ne mavehe ke mau ki a Keriso.​—Fakakite. 19:7, 8; 21:9; 2 Kori. 11:2.

17, 18. (a) Liu fakamanatu e tau maveheaga ono ne fakatutala a tautolu ki ai mo e kua matutaki ke he Kautu. (e) Ko e ha kua ha ha ia tautolu e tua mauokafua ke he Kautu?

¹⁷ Ko e tau maveheaga kua fakatutala a tautolu ki ai he tau vala tala ua nei, ne matutaki ke he taha po ke loga e vala uho he Kautu. (Kikite e manatu “Puhala ke Fakakatoatoa he Atua e Finagalo Haana” he vala tala kua mole.) Maaliali ai he fakamatapatu ke he tau fakamauaga fakavē nei, kua mooli ai ke tumau tukulagi e Kautu. Talitonu katoatoa a tautolu to fakaaoga he Atua e Kautu faka-Mesia ke fakamooli e finagalo haana ma e tau tagata mo e lalolagi.​—Fakakite. 11:15.

¹⁸ Ko e Kautu hokoia ni e tali ke he tau lekua he tagata. Kua mauokafua katoatoa a tautolu to tamai he mena ia e tau aoga tukulagi ke he tau tagata oti kana. Kia tala age fakamakutu e tautolu ke he falu e kupu mooli homo ue atu nei!​—Mata. 24:14.