Mua atu kia e malolō he mate mai he Atua? Nakai pihia! Maeke fēfē e mate po ke ha “fi”​​—ke mua atu e malolō mai he “Atua mana”? (1 Korinito 15:26; Esoto 6:3) Ha ha he Atua e malolō ke utakehe e mate puhala he liu tu mai, ti mavehe a ia ke taute e mena tonu ia he lalolagi foou haana. a Mooli fēfē e maveheaga ia? Ko Iesu ko e Tama ni he Atua ne tala mai ki a tautolu e tau kupu ka fakapuke e tau loto ha tautolu aki e amaamanakiaga.​​—Totou Mataio 22:31, 32.

He tutala ke he tau Satukaio, ne nakai talitonu ke he liu tu mai, ne pehē a Iesu: “Ka e nakai kia totou e mutolu e kupu he Atua kia mutolu, ke he liliu tutu mai a lautolu kua mamate, kua pehe mai, Ko au nai ko e Atua a Aperahamo, ko e Atua foki a Isaako, ko e Atua foki a Iakopo; ko e Atua nakai ko e Atua a ia ha lautolu kua mamate, ka ko lautolu kua momoui.” Hagaao a Iesu ke he mena nei he fakatutala e Atua mo Mose ke he akau puhopuho kavi ke he 1514 F.V.N. (Esoto 3:1-6) Hagaao ki a Iesu, ko e tau kupu ha Iehova ki a Mose​​—“Ko au ko e Atua he hau a matua, ko e Atua a Aperahamo, ko e Atua a Isaako, mo e Atua a Iakopo”​​—ne fakakite ko e maveheaga he liu tu mai to fakamooli ai. Fakamooli fēfē?

Fakatutala fakamua ke he kakano. He magaaho ne tutala a Iehova ki a Mose, ko e tau tupuna ko Aperahamo, Isaako, mo Iakopo ne leva e mamate​​—ko Aperahamo ne 329 e tau, 224 ha Isaako, mo e 197 ha Iakopo. Ka e pehē a Iehova “Ko au hanai”​​—nakai “Na eke au fakamua”​​—​ko e Atua ha lautolu. Ne tutala a Iehova hagaao ke he tau tupuna tokotolu ia ne mamate ke tuga na momoui agaia a lautolu. Ko e ha?

Fakamaama e Iesu: “Ko e Atua [Iehova] nakai ko e Atua a ia ha lautolu kua mamate, ka ko lautolu kua momoui.” Manamanatu fakakū ke he fakaaogaaga he tau kupu ia. Ka nakai fai liu tu mai, to mamate tukulagi ni a Aperahamo, Isaako, mo Iakopo. Ka pihia, ko Iehova ko e Atua he tau tagata mamate. Fakahiku ai, to kakano ko e mate kua mua atu e malolō mai ia Iehova​​—ke tuga na lolelole lahi a ia ke fakatokanoa e tau fekafekau tua fakamooli haana mai he līlīaga he mate.

Ko e heigoa mogoia ka fakahiku e tautolu hagaao ki a Aperahamo, Isaako, Iakopo, mo e tau fekafekau tua fakamooli oti ha Iehova ne mamate? Ne taute e Iesu e talahauaga malolō nei: “Ko lautolu kua momoui; ha ko e mena kua momoui oti ia ia.” (Luka 20:38) Mooli, ko e finagalo ha Iehova ke fakaliu tutū mai e tau fekafekau tua fakamooli haana ne mamate kua mauokafua ai ko e fakamooliaga ne manamanatu a ia hagaao ki a lautolu kua tuga kua momoui. (Roma 4:16, 17) To tokaloto e Iehova a lautolu oti ia ke he manamanatuaga mitaki katoatoa haana ato hoko e magaaho ke fakaliu tu mai e ia a lautolu ke he moui.

Ko e amaamanakiaga kia he liu fakalataha mo e tau fakahele ne mamate kua omoomoi ki a koe? Ka pihia, manatu kua mua atu e malolō ha Iehova mai he mate. Nakai fai mena ke taofi a ia mai he fakamooli e maveheaga haana ke fakaliu tutū mai a lautolu ne mamate. Ko e ha he fakaako fakalahi hagaao ke he maveheaga he liu tu mai mo e Atua ka fakamooli ai? Ko e taute pihia to fakatata lahi atu mooli a koe ki a Iehova, ‘ko e Atua ki a lautolu kua momoui.’