Kaeke ko e matua a koe he tama fuata mui, to kamatamata he fetoko e tau lotomatala fakamatua oti haau​​​—mo e fakauka haau. “Ka totoko he tama fifine haaku e pule haaku, ne hake e toto haaku,” he ui e Maria, ko e matua fifine he tama ne 14 e tau i Parasili. “Ne hogohogomanava lahi a maua ti tui kaa e taha ke he taha.” Ko Carmela, i Italia, ne fehagai foki ke he paleko pihia. “Ko e tau taufetoko haaku mo e tama taane haaku ne fakahogohogomanava tumau,” he talahau e ia, “ti oti ka fano a ia ti pa e poko ti nofo i loto.”

Ko e ha kua fia totoko e falu fuata mui? Lata kia ke tukupau aki e tau atu taha ha lautolu? Liga fakalata. Pehē e Tohi Tapu na maeke e tau tagata kua lafi ki ai ke malolō e fakaohoohoaga, ke he mitaki po ke kelea. (Tau Fakatai 13:20; 1 Korinito 15:33) Ti pihia foki ni ko e tau fakafiafiaaga ma e tau fuata he vahā nei kua hihiga ai ke feaki e aga totoko mo e nakai fakalilifu.

Ka kua fai mena foki ke manamanatu ki ai​​​—tau mena ne nakai uka lahi ke fehagai ki ai ka maama ia koe e puhala kua lauia ai e tama fuata mui haau. Onoono la ke he falu fakataiaga.

Ne tohi he aposetolo ko Paulo: “Ko e vaha tote au ne vagahau au poke tama tote, ne manamanatu au poke tama tote, ne fakafili au poke tama tote; ka kua lahi au, ti toka ai e tau mahani he tama tote.” (1 Korinito 13:11) Ne fakakite he tau kupu ha Paulo, na kehekehe e puhala manamanatu he tau tama mai he tau tagata lalahi. He puhala fe?

 Ko e tau tama kua hihiga a lautolu ke taha ni e mena kua manamanatu ki ai, mena hako mo e hepe. Kehe ai, ko e tau tagata lalahi kua maeke ke manamanatu fakahokulo ke maama e manatu uka mo e iloa fakalahi ai ke moua e fakahikuaga po ke taute e tau fifiliaga. Ma e fakatai, ko e tau tagata lalahi kua fa manamanatu a lautolu ke he tau puhala kua latatonu ma e matakupu mo e manamanatu ke he tau puhala ka lauia e falu ha ko e tau gahua ha lautolu. Liga kua mahani a lautolu he manamanatu pihia. Ka e ka fakatatai ke he tau fuata mui, kua foou agaia a lautolu ke he puhala ia.

Kua fakamafana he Tohi Tapu e tau fuata mui ke feaki e “loto manamanatu.” (Tau Fakatai 1:4) Kua fakamalolō he Tohi Tapu e tau Kerisiano oti ke fakaaoga ha lautolu a loto manamanatu. (Roma 12:1, 2; Heperu 5:14) He falu magaaho, ko e puhala fakakakano he fuata mui haau kua omoi a ia ke taufetoko mo koe, pete ni ko e mena tote. * Po ke liga tala atu e ia e manatu kua fakakite e nakai manamanatu fakamitaki. (Tau Fakatai 14:12) He tuaga pihia, maeke fēfē a koe ke fakamaama ki a ia ka e nakai taufetoko?

Ka e fakaeneene: Ka fakamaama ke he fuata mui haau, ua manatu ko koe ka fakaoti e fakatutalaaga. Pete tuga nakai fanogonogo a ia ke he tau mena haau ne talahau, nakai noa to fai mena a ia ka tokaloto mai he fakatutalaaga ha mua ke he mena kua manatu a koe ki ai​​—po ke he talahau e ia. Ua ofo ka fai aho he mole ti kua talia he haau a fuata mui e manatu haau​​—liga talahau foki na manatu pihia a ia.

“He falu magaaho ne taufetoko au mo e tama taane haaku ke he tau mena ikiiki​​—ma e fakatai, ke ua fakaaoga fakahanoa e tau mena po ke vaiga e mahakitaga haana. Ka e laulahi ai kua tuga ko e manako a ia ke hūhū au ke he manatu haana mo e fakakite kua maama e au e tuaga mo e pehē, ‘E, pihia kia e mena ne tupu’ po ke ‘Ti pihia kia e manatu haau.’ He liu onoono ki tua, ne kitia e au ane mai ni talahau e au taha mena pihia, liga to nakai loga e tau taufetoko ha maua.”​​​—Kenji, Sapani.

Ko e vala lahi he feaki e fuata mui ko e tauteute a ia ke lata mo e magaaho ka toka e ia e kaina mo e moui ko e tagata lahi mo e mauokafua. (Kenese 2:24) Ko e vala he tauteaga ia kua putoia e feaki he fakamailoga fakatagata​​—tau aga, tau taofiaga, mo e tau mahani uho ne fakakite ko e tagata fēfē a ia. Ka fakafeleveia mo e fakaohooho ke taute e mena hepe, ko e fuata mui ne mauokafua, to lahi atu e mena haana ka taute mai he manamanatu ni ke he tau lauiaaga. To hūhū foki a ia ki a ia ni: ‘Ko e tagata fēfē au? Ko e heigoa e tau mena kua aoga ki a au? Ko e heigoa he tagata ne tokiofa e tau mena aoga pihia ka taute he tuaga nei?’​​​—2 Peteru 3:11.

Kua talahau he Tohi Tapu ki a tautolu hagaao ki a Iosefa, ko e fuata taane ne mauokafua e fakamailoga fakatagata haana. Ma e fakatai, he mogo ne fakaohooho he hoana ha Potifara a ia ke momohe mo ia, ne tali a Iosefa: “To maeke fefe ia au ke eke e, mena kelea lahi ia mo e hala au ke he Atua?” (Kenese 39:9) Pete kua nakaila fai fakatufono ia ne age ke he tau Isaraela ke aua neke feuaki, ne fitā he iloa e Iosefa e onoonoaga he Atua ke he tuaga ia. Mua atu ai, ko e tau kupu “to maeke fefe ia au” ne fakakite ai kua eke tuai e ia e tau manatu he Atua ma haana ni​​​—ko e vala he fakamailoga fakatagata haana.​​​—Efeso 5:1.

Ko e fuata mui haau hane lali foki ke moua e fakamailoga fakatagata haana. Ko e mena mitaki anei, ke lagomatai he tau mena kua mauokafua a ia ki ai ke fehagai mo e tau peehiaga mai he tau atu taha haana mo e ke fakafelau mo lautolu. (Tau Fakatai 1:10-15) He taha faahi, liga ko e iloa e ia e fakamailoga fakatagata haana ka fakaohooho a ia ke fakafelau mo koe. Ka pihia, ko e heigoa haau ka taute?

Ko e feaki e fakamailoga fakatagata​​​—mo e mauokafua ne moua ai​​—​kua latatonu ti aoga foki. Kua pehē e Tohi Tapu kua nakai lata e tau Kerisiano ke tuga e tau tama ikiiki “kua hikihikifano, mo e havilia he tau matagi oti he tau kupu fakaako.” (Efeso 4:14) Ti fakaatā mo e fakamafana foki e fuata mui haau ke feaki haana fakamailoga fakatagata mo e tau taofiaga mauokafua.

“He mogo ka fakakite e au ke he tau fanau fifine haaku e makai haaku ke fanogonogo ki ai, kua hihiga ai ke fanogonogo ke he manatu haaku pete ni he kehe mai he fanau. Kua fakaeneene au ke nakai peehi ke he fanau ke talia e manatu haaku ka e toka ke taute e tau fifiliaga mauokafua he fanau.”​​​—Ivana, Czech Republic.

Ke tuga e tau tama ikiiki, kua iloa he falu fuata mui e puhala ke fakafī he lali ke mahala e tau matua ha lautolu. Ka pihia tumau he fale haau, kia fakaeneene. Pete he fakatotoka fakakū he talia ai, kua fakaako ai ke he fuata mui haau na maeke a ia ke moua e mena haana he taufetoko. Taute fēfē? Muitua ke he fakatonuaga ha Iesu: “Ka kia pehe ha mutolu a kupu, E, e; nakai, nakai.” (Mataio 5:37) Liga nakai mafiti e tau fuata mui ke taufetoko ka iloa e lautolu kua fakatumau a koe.

He magaaho taha, kia mahani totonu. Fakaatā e fuata mui haau ke fakamaama, ma e fakatai, ke he kakano kua manatu a ia kua lata ke hiki e matahola fafati haana ke hau ki kaina ka oti e taha matagahua pauaki. He tuaga pihia, kua nakai talia e koe e peehiaga ka kua muitua a koe ke he tomatomaaga he Tohi Tapu: “Kia iloa ha mutolu a mahani totonu.”​​—Filipi 4:5.

Ka e mooli, nakai fai matua ne mitaki katoatoa. Pehē e Tohi Tapu: “Ko e tau mena loga kua hehe ai a tautolu oti.” (Iakopo 3:2) Ka iloa e koe kua fai vala a koe he taufetoko, kia nakai fakauaua ke fakamolemole ke he fuata mui haau. He talahau kua hepe a koe, kua fakatoka ai e fakafifitakiaga he fakatokolalo mo e foafoa e hala ke mahani pihia foki e fuata mui haau.

“He oti e taha taufetoko, ti mogo ne fakatotoka hifo au, ne fakamolemole au ke he tama taane haaku ha kua vale pihia. Ne lagomatai he mena ia a ia ke fakatotoka foki ti mukamuka a ia ke fanogonogo ki a au.”​​​—Kenji, Sapani.