Eric: Manako au ke tala atu ki a koe nakai ko e tagata fano tapu au. Ti ai loga e mena ke tutala a taua ki ai.

Brian: Fakaaue he tala mai ki a au. Ko e higoa haaku ko Brian. Ko hai e higoa haau?

Eric: Ko Eric.

Brian: Mitaki ke feleveia mo koe ma Eric.

Eric: E, pihia ni.

Brian: Fakamolemole ko e hūhū, tupu hake nakai a koe he magafaoa ō tapu?

Eric: E. Ka e he magaaho ne toka e au e kaina ke fano ke he aoga, ne nakai fano tapu au.

Brian: E. Ko e heigoa haau ne fakaako he aoga?

Eric: Ko e kumiaga he tau aga he tagata mo e tau fakamauaga tuai. Na fiafia tumau au ke he fakamauaga tuai​—ko e holoaga he tau tagata he lalolagi.

Brian: Na ofoofogia mooli e fakamauaga tuai. Liga iloa e koe, ko e Tohi Tapu ko e tohi he fakamauaga tuai. Fakaaoga nakai e koe e Tohi Tapu he kumikumiaga haau?

Eric: Nakai. Iloa e au ko e tohi mitaki, ka e nakai manatu au ko e Tohi Tapu ko e tohi he fakamauaga tuai.

Brian: Liga ko e tagata fiafia a koe ke manamanatu ke he falu mena foki. Ka fai magaaho a koe, fiafia au ke fakakite atu ki a koe kua hako e fakamauaga tuai i loto he Tohi Tapu.

Eric: E mitaki. Ka e ai fai Tohi Tapu au.

Brian: Ai tupetupe. Fakakite atu e au he Tohi Tapu haaku. Ko e manatu fakamua haia he 1 Nofoaga he Tau Patuiki veveheaga 29, kupu 26 mo e 27. Ne pehē e tau kupu ia: “Ne eke a Tavita ko e tama a Iese mo patuiki a Isaraela oti. Ko e tau aho ne eke a ia mo patuiki a Isaraela ko e fagofulu e tau tau; ko e fitu e tau ne eke a ia mo patuiki i Heperona, ti tolugofulu ma tolu e tau ne eke a ia mo patuiki i Ierusalema.”

Eric: Fakakite fēfē he tau kupu ia kua hako e fakamauaga tuai?

Brian: He taha magaaho, ko e tau tagata totoko ne talahau kua nakai mooli e Patuiki ko Tavita.

Eric: Mooli? Ko e ha ne hūhū e lautolu kua mooli nakai a Tavita?

Brian: Nakai loga e fakamooliaga hagaao ke he tagata ko Tavita. Ka e he 1993, ko e kau he tau tagata keli kelekele ne moua e patuō pauaki mai i tuai mo e kupu ne fakaliliu “Magafaoa a Tavita.”

Eric: Fuluola hā.

Brian: Ne hūhū foki he falu na mooli nakai e taha tagata mai he Tohi Tapu ko Ponotio Pilato, ko e iki ne pule he vahā ha Iesu. Ne totoku a ia he Luka veveheaga 3, kupu 1​—mo e tokologa atu foki he tau iki ne pule he magahala ia.

Eric: E, kitia e au. Ne pehē ai “ne pule a Ponotio Pilato ki Iutaia, ko Herota foki ko e patuiki a ia a Kalilaia.”

Brian: Hako. Ne leva e tuahā he falu tagata pulotu  ko e tagata mooli nakai a Ponotio Pilato. Ti he kavi ke he 50 e tau kua mole, ne taha e patuō ne moua he Loto Uho he Faahi Uta mo e higoa haana ne talai i ai.

Eric: Hmm. Mogo fakapā laia ne logona e au e tau vala tala ia.

Brian: Fiafia au ke fakakite atu e tau mena ia ki a koe.

Eric: Ke fakamooli atu, ne fakalilifu tumau e au ko e Tohi Tapu ko e tohi mitaki, ka e nakai logona hifo kua aoga ai ke he vahā ha taua. Liga kua hako e fakamauaga tuai i loto, ka e nakai aoga mooli he manatu e au.

Brian: Tokologa e tagata ka talia e talahauaga ia. Ka e nakai manatu pihia au. Ko e kakano anei: Nakai la hiki e tau matapatu manako he tagata tali mai he kamataaga. Ma e fakatai, ne manako agaia a tautolu ke he tau mena kai, tau mena tui, mo e tau mena ke nonofo ai. Logona agaia e tautolu e manako ke matutaki mo e falu mo e ke feaki e magafaoa fiafia. Mooli nakai kua uho lahi e tau mena ia ki a tautolu oti?

Eric: E mooli.

Brian: Maeke he Tohi Tapu ke lagomatai a tautolu mo e tau mena oti ia. Liga fakahigoa ai e tautolu ko e tohi tuai ma e vahā foou.

Eric: Kakano fēfē e tala ia haau?

Brian: Fakaatā au ke fakamaama: Ha hā i loto he Tohi Tapu e tau matapatu fakaakoaga kua aoga agaia he vahā nei tuga he magaaho ne tohi ai he tau senetenari kua mole.

Eric: E. He tau mena fe?

Brian: Maeke e tau matapatu fakaakoaga he Tohi Tapu ke takitaki a tautolu ke moua e onoonoaga lagotatai ke he tau mena tuga e tupe po ke fiafia e moui magafaoa po ke eke mo kapitiga mitaki. Ko e tohi nei kua tuga e mepe ke he kautūaga. Ma e fakatai, talia nakai a koe ko e paleko he vahā nei ke kautū ko e taane mo e ulu magafaoa?

Eric: E, pihia mooli. Kua kavi ke he taha e tau he mau a maua, ka e nakai mukamuka ke fetaliaaki tumau.

Brian: Mooli. Ka e ha hā he Tohi Tapu e tau matapatu fakaakoaga mukamuka mo e aoga. Ma e fakatai, kikite ke he Efeso veveheaga 5. Totou e taua e tau kupu 22, 23, mo e 28. Ka manako, maeke a koe ke totou e tau kupu ia.

Eric: E. Pehē ai: “Ko mutolu na, ko e tau fifine kia takitokotaha mo e omaoma ke he tau tane ha mutolu tuga e omaoma ke he Iki. Ha ko e tane, ko e ulu he hoana haia, tuga a Keriso, ko e ulu he ekalesia haia, ko ia foki ko e fakamoui he tino.” Ti kupu 28 ne pehē: “Kua lata pihia foki ke he tau tane ke fakaalofa age ke he tau hoana ha lautolu, tuga e tau tino ha lautolu. Ko ia kua fakaalofa ke he hana hoana, kua fakaalofa a ia kia ia ni.”

Brian: Mitaki. Fakaaue. Mooli nakai, ka lali e tau hoa mau ke fakagahua e fakatonuaga mukamuka nei, to mitaki e moui he magafaoa?

Eric: E, liga mooli. Ka e nakai mukamuka ke taute pihia.

Brian: Mooli; nakai fai tagata ne mitaki katoatoa. Ka e he veveheaga taha ia he Tohi Tapu ha i ai e kupu ne fakamafana a taua ke fakailoilo mo e totonu. a He tau fakafetuiaga oti, kua lata ke lagotatai mo e hikihiki. Mailoga e au mo e hoana haaku kua maeke e Tohi Tapu ke lagomatai a maua ke lagotatai mitaki.

Eric: Mooli e manatu ia.

Brian: Haia he faahi Kupega Hila he Tau Fakamoli a Iehova e tau vala tala mitaki ke he fakamauaga mo e moui magafaoa. Ka fai magaaho a koe, maeke au ke fakakite e taha mena i ai ki a koe.

Eric: E. Fai magaaho au.

Brian: Mitaki. Ko e faahi Kupega Hila ko e www.dan124.com. Ha ē e mena ia.

Eric: Fiafia au ke he tau ata.

Brian: Ko e tau fakatino a ia he gahua fakamatala kua taute e mautolu he lalolagi katoa. Oi, ha ē. Fakamua fano ke he vagahau Faka-Niue. Ko e vala ne mataulu “Tau Tohi.” I lalo ia, ko e vala “Tau Tohi & Tau Porosua.” I loto he mataulu nei kumi e porosua ne fakahigoa, “Tala Mitaki Mai he Atua!” kua loga e  tau vala tala kua tali e tau hūhū kehekehe. Fai mataulu nakai kua fiafia a koe ki ai?

Eric: E. “Maeke Fēfē e Magafaoa Haau ke Fiafia?” Liga maeke au ke fakaaoga e puhala ia!

Brian: Ko e vala tala nei kua fakamaama lima e mena ke lagomatai a koe ke fiafia e magafaoa. Mailoga ke he paratafa nei. Manako nakai a koe ke totou ma Eric?

Eric: E. Pehē ai: “Ko e tau taane mo e tau hoana kua lata ke fefakaalofaaki mo e fefakalilifuaki. Ha kua nakai mitaki katoatoa e tau taane mo e tau hoana oti, ko e fakaako ke fakamagalo ko e matapatu ke he fiafia he magafaoa.” Hmm, fiafia au ke he puhala ne fakamaama ai e lautolu.

Brian: Fakaaue he totou. Fai kupu Tohi Tapu ne tu i ai. Ha ē e Tohi Tapu, fakamolemole maeke nakai a koe ke totou mai e kupu ia.

Eric: E, kitia ai. Efeso 5:33. Pehē mai: “Ko mutolu, kia takitokotaha a mutolu gotoa mo e fakaalofa atu ke he hana hoana, tuga e fakaalofa a ia kia ia ni; ka ko e fifine kia fakalilifu a ia ke he hana tane.”

Brian: Mailoga nakai e koe kua fakamafana a tautolu ke igatia mo e foaki atu e mena kua amanaki e taha ke moua mai?

Eric: Ai maama e au e tala haau.

Brian: Manamanatu la, mooli nakai kua manako e taane ke fakalilifu he hoana haana a ia ti kua manako foki e hoana ke iloa kua fakaalofa mooli e taane haana ki a ia?

Eric: E. Talia e au.

Brian: Ka kumi puhala tumau e taane ke fakakite e fakaalofa haana ke he hoana, to mukamuka nakai ma e hoana ke fakalilifu ki a ia?

Eric: Liga maeke e puhala ia ke gahua.

Brian: Ti ko e kupu nei he Tohi Tapu, pete ne tohi hifo he teitei ke he 2,000 e tau kua mole, kua aoga ai ke he tau hoa he fakamauaga mo e foaki e lagomataiaga mitaki, ka fakagahua, to fakamalolō ai.

Eric: Tala atu e au, kua lahi atu e aoga he Tohi Tapu ke he mena ne manatu e au.

Brian: Fiafia au ke logona ai ma Eric. Manako au ke liu ke feleveia mo koe he matakavi nei mo e ke moua e tau manatu haau ke he hūhū ka mui mai “Lata kia a koe ke tiaki e fakamauaga nakai fiafia?” ne tu ke he vala tala nei he ha mautolu a faahi Kupega Hila. b

Eric: E. To kitekite au mo e hoana haaku ki ai.