Ne fakamaama he Encyclopædia Britannica e Isitā ko e “matapatu fakamanatuaga a ia he lotu Kerisiano ko e Liu Tu Mai ha Iesu Keriso.” Ka ko e fakamanatuaga Kerisiano nakai a ia?

Ke iloa tonu kua moolioli e taha koloa tuai, kua lata ni ke kumikumi fakahokulo ke he tupumaiaga. Pihia foki, ke iloa e tautolu ko e fakamanatuaga Kerisiano nakai e Isitā, kua lata tonu a tautolu ke kumikumi ke he tau vala tala hagaao ke he Isitā.

Fakamua, ne poaki e Iesu ke he tau tutaki haana ke fakamanatu e mate haana, ka e nakai ko e liu tu mai haana. Ko e aposetolo ko Paulo ne fakahigoa e mena nei ko e “kaiaga mena he Iki.”​—1 Korinito 11:20; Luka 22:19, 20.

Lafi ki ai, loga e tau aga tuai he Isitā ne “tote lahi e mena ne felauaki” mo e liu tu mai ha Iesu, he talahau he Britannica, “ka kua moua mai he tau aga tuai fakamotu.” Ma e fakatai, hagaao ke he tau fakamailoga talahaua he Isitā ko e fua moa mo e lapiti, ne pehē he The Encyclopedia of Religion: “Fakamailoga he fua moa e moui foou ne kua kautū ke he mate (mena maō) he kili he fua moa.” Lafi foki: “Ko e lapiti ko e manu ne fanafanau loga, ti ko e fakamailoga a ia kua tata mai e vahā tau tupu.”

Ko Philippe Walter, ko e porofesa he tau tohi tala tuai, ne fakamaama e tau aga tuai ia ne kua tamai mo vala he tau fakamanatuaga Isitā. Ne tohi e ia “he magaaho ne liliu faka-Kerisiano e tau lotu pouliuli,” ne mukamuka ke lafi e tau faiagahau pouliuli ne fakamanatu e “oti he vahā makalili mo e liu moua e moui he vahā tau tupu,” ke he liu tu mai ha Iesu. Pehē foki a Walter ko e lakaaga aoga lahi a ia ke lafi e “tau fakamanatuaga Kerisiano” ke he kalena pouliuli, ti mukamuka e tokologa ke liliuina.

Ko e “liliuaga faka-Kerisiano,” ne nakai fai mena pihia he magaaho ne momoui agaia e tau aposetolo, ha kua “fakalavelave” po ke taofi e lautolu e mahani pouliuli. (2 Tesalonia 2:7) Ne hataki he aposetolo ko Paulo ka mole haana “a fano . . . to tutupu foki ia mutolu ni e tau tagata ke vagahau mai ke he tau mena fakakeukeu, to futiaki ai e tau tutaki kia mumui atu kia lautolu.” (Gahua 20:29, 30) He matahiku he senetenari fakamua, ne tohi he aposetolo ko Ioane ko e falu tagata kua fitā e fakahehē e tau Kerisiano. (1 Ioane 2:18, 26) Ti kua hafagi e puhala ma e tau aga pouliuli ke holofa.

Ka e logona hifo he falu ko e fakaatā he tau aga tuai he Isitā kua nakai hepe​—ke maeke he “tau tagata pouliuli” ke moua e maamaaga mitaki ke he kakano he liu tu mai ha Iesu. Ka ko Paulo, ne nakai fakaai ke talia ki ai. Pete ni he kitia e Paulo e tau aga pouliuli he magaaho ne fenoga viko he Atu Motu Roma, ne nakai talia e Paulo e tau mena ia ke maeke he tau tagata ke iloa mitaki a Iesu. He taha faahi, ne hataki e ia e tau Kerisiano: “Aua neke hahamo a mutolu mo e nakai tatai fakalataha mo lautolu kua nakai tua; ha ko e mena fakalataha fefe e tututonu mo e mahani kelea? Ke fakafetui fefe e maama mo e pouli? Hanai, kia o mai a mutolu mai loto ia lautolu, mo e vevehe kehe a mutolu, kua pihia mai ai e Iki, aua foki neke piki atu a mutolu ke he mena kelea.”​—2 Korinito 6:14, 17.

Ko e heigoa e aoga he kumikumiaga fakaku ha tautolu ke he tau vala tala ia? Kitia maaliali ai ko e Isitā kua nakai ko e fakamanatuaga Kerisiano.