“KO E HA NE PIHIA AU? Ko e ha ne fakaatā he Atua e mena nei ke tupu ki a au?” Ko e tau hūhū ia kua fakalavelave ki a Sidnei ne 24 e tau he moui, mai i Brazil. He mole e pakia haana he fakahololī ne tafe e vai, ti kua nofo tumau a ia he peleō fakataveli mogonei.

Ko e mamahi he pakia, gagao, mate e fakahele, matematekelea tupu pauaki, po ke felakutaki, kua mukamuka e tau tagata ke nakai fiafia ke he Atua. Nakai foou e mena nei. Ko e tupuna ko Iopu he vahā i tuai ne lauia he tau matematekelea loga. Ne hehē a ia he tukupau e Atua he talahau: “Kua tagi atu au kia koe, ka e nakai tali mai ai a koe kia au; kua tu atu au, ka e nakai fofoga mai a koe kia au. Kua liliu kehe a koe kua favale mai a koe kia au; kua tutuli e koe au mo e hau a lima, malolo.”​—Iopu 30:20, 21.

Nakai iloa e Iopu e punaaga he tau lekua haana mo e ko e ha ne fakaatā ke lauia ai a ia. Ka e fiafia he fakamaama mai he Tohi Tapu e kakano ne tutupu e tau mena ia mo e puhala kua lata ia tautolu ke fehagai ki ai.

Hagaao ke he Atua, ne talahau mai he Tohi Tapu: “Kua katoatoa ni e mitaki hana gahua; ha kua tonu hana tau puhala oti ni? ko e Atua kua fakamoli, nakai ha ha ia ia ha mahani kelea, ko e mahani tututonu mo e mahani hakohako ni a ia.” (Teutaronome 32:4) Ka pihia, kua felauaki nakai po ke maeke ke maama na fioia tuai he Atua ne “mahani tututonu mo e mahani hakohako” e tau tagata ke matematekelea po ke fakaaoga e ia e tau matematekelea ke fakahala po ke fakameā aki a lautolu?

Kehe mai ai, ne talahau he Tohi Tapu ki a tautolu: “Aua neke pehe mai taha ka kamatamata a ia; Kua kamatamata au mai he Atua; ha ko e mena nakai kamatamata ai e Atua ke he mena kelea, nakai kamatamata foki e ia ke he taha.” (Iakopo 1:13) Ka kua iloa e tautolu mai he Tohi Tapu na mitaki katoatoa e kamataaga he tagata ne foaki age he Atua. Ne age e Ia ke he tau tagata fakamua ko Atamu mo Eva e kaina fulufuluola, tau foakiaga oti ma e moui, mo e gahua aoga lahi ke taute. Tala age e Atua ki a laua: “Kia fanau a mo e fakatokologa, kia fakapuke foki e lalolagi, mo e kautu ki ai.” Ti nakai lata a Atamu mo Eva ke hogohogo manava ke he Atua.​—Kenese 1:28.

He vahā nei, nakai hagahaga mitaki e tau tutūaga he moui. Tali mai he vahā fakamua, kua matematekelea lahi e tau tagata. Mooli ai e fakamaamaaga nei: “Kua oi fakalataha mo e mamahi fanau fakalataha e tau mena oti ne eke kua hoko ni ke he vaha nai.” (Roma 8:22) Ko e heigoa ne tupu?

Ke maama e kakano ati matematekelea ai, kua lata ia tautolu ke liliu ke he magaaho ne kamata ai. Ha ko e fakavai he agelu totoko ne fakahigoa he magaaho fakamui ko Satani ko e Tiapolo, ne tiaki e Atamu mo Eva e tau tuaga he Atua ke he hako mo e hepe, ne poaki ki a laua ke ua kai e “akau ke iloa ai e mitaki mo e kelea.” Tala age e Tiapolo ki a Eva to nakai mamate a laua ka nakai omaoma ke he Atua, mo e tukupau ai ko e pikopiko e Atua. Ne tukupau foki a Satani ke he Atua he pehē kua taofi he Atua e tau tagata haana he ataina ke fifili e mena mitaki mo e kelea. (Kenese 2:17; 3:1-6) Ne hihiga a Satani ke pehē kua mua e mitaki he tau tagata ka nakai pule e Atua ki a lautolu. Ti fakalagā he mena nei e matakupu aoga lahi mahaki​—Kua lata nakai e Atua ke pule?

Ne fakatū foki he Tiapolo e taha matakupu. Tukupau e ia e tau tagata he fekafekau ke he Atua mo e lotokai. Hagaao ke he tagata fakamooli ko Iopu, ne pehē e Tiapolo ke he Atua: “Nakai kia pa takai ai e koe a ia, mo e hana fale, katoa mo e hana tau mena oti ke he tau faahi oti? . . . Ka kia fakaolo atu a e koe e lima hau mo e pipiki atu ke he hana tau mena oti, ti vagahau kelea ai a ia kia koe ki mua hau ni.” (Iopu 1:10, 11) Pete kua hagaao e tau kupu ha Satani ki a Iopu, ne tukupau ai ko e tau tagata oti kua fekafekau ke he Atua ha ko e tau manako lotokai.

Ko e heigoa e puhala mitaki lahi mahaki ke fakatotoka katoatoa e tau matakupu uho ia? Ko e Atua ne  mua ue atu e pulotu ne ha hā e tali mitaki katoatoa​—ko e tali kua nakai toka a tautolu mo e logonaaga nakai fiafia. (Roma 11:33) Ne fifili a ia ke fakaatā e tau tagata ke fai magaaho ke pule ki a lautolu ni ti kitia mai he tau fua ko e ha hai e pule kua mua ue atu.

Ko e tau tutūaga kelea muitui he lalolagi he vahā nei ko e fakakiteaga maaliali kua kaumahala mooli e pule he tagata. Nakai ni kaumahala e tau fakatufono he lalolagi ke tamai e mafola, haohao mitaki, mo e fiafia ka kua teitei moumou katoatoa foki e lautolu e fua lalolagi. Fakamooli he mena nei e matapatu manatu ne talahau he Tohi Tapu: “Nakai ha ha he tagata kua fano ke fakatonu e mena ke fano a ia ki ai.” (Ieremia 10:23) Ko e pule ni he Atua ka tamai e mafola, fiafia, mo e monuina tukulagi ke he tau tagata, ha kua pihia e finagalo he Atua.​—Isaia 45:18.

To fakamooli fēfē he Atua e finagalo haana ma e tau tagata? Manatu na fakaako e Iesu e tau tutaki haana ke liogi: “Kia hoko mai hau a kautu. Kia eke hau a finagalo ke he lalolagi, tuga ne eke ke he lagi.” (Mataio 6:10) E, to hoko mai ni e magaaho he Atua ka fakaaoga e ia e Kautu haana ke utakehe e tau mena oti ne fakatupu e matematekelea. (Tanielu 2:44) Ko e nofogati, gagao, mo e mate to eke mo tau mena kua mole atu. Hagaao ke he tau tagata nofogati ne talahau he Tohi Tapu ko e finagalo he Atua to “laveaki e ia a ia ne nofogati he hana kalaga mai.” (Salamo 72:12-14) Ma lautolu kua gagao, mavehe mai e Tohi Tapu: “To nakai pehe mai foki taha kua nofo ai, Kua gagao au.” (Isaia 33:24) Pihia foki a lautolu ne mamate ti ha hā he manamanatuaga he Atua, ne pehē a Iesu: “Ko e mena hoko ke he aho ke logona ai ke he hana leo a lautolu katoa ha he tau tukuaga [“tuagamau fakamanatu,” NW], mo e o mai ai.” (Ioane 5:28, 29) Ko e mafanatia ha ia he tau maveheaga ia!

Kavi ke he 17 e tau he mole e pakia a Sidnei, ne totoku he kamataaga he vala tala nei, pehē a ia: “Nakai tukupau e au a Iehova ko e Atua ha ko e pakia, ka e tala atu e au ne nakai fiafia au ke he Atua he mogo fakamua. Fai aho ne fa logona hifo e au e momoko lahi, ti tagi au ka manamanatu ke he fakakaupāaga haaku ha ko e pakia. Ka e mai he Tohi Tapu kua maama ia au ko e pakia ne nakai ko e fakahala mai he Atua. Tuga he talahau he Tohi Tapu ‘ko e vaha mo e tau mena ke tutupu ai kua hoko ia kia tautolu oti.’ He liogi ki a Iehova mo e totou e tau kupu tohi pauaki kua fakamalolō fakaagaaga au mo e lagomatai au ke fiafia.”​—Fakamatalaaga 9:11; Salamo 145:18; 2 Korinito 4:8, 9, 16.

He mailoga e tau kakano ati fakaatā he Atua e matematekelea mo e iloa foki to utakehe katoatoa e tau matematekelea oti kana, ka lagomatai a tautolu ke fehagai mo e tau logonaaga ne liga ha hā ia tautolu ati nakai fiafia ke he Atua. Mauokafua a tautolu kua mautali e Atua ke “taui mai a lautolu kua kumi fakamakutu kia ia.” Nakai fai tagata ne tua ki a Ia mo e haana Tama ka nakai fiafia.​—Heperu 11:6; Roma 10:11.