Ko e magaaho fe mo e ko e ha kua lata e fifine Kerisiano ke ufiufi e ulu ka taute e tapuakiaga haana? O mai la a tautolu ke manamanatu ke he talahauaga ne omoi he agaaga tapu e aposetolo ko Paulo ke tohi hagaao ke he matakupu nei. Ne foaki e ia e takitakiaga ke maeke ia tautolu ke taute e tau fifiliaga mitaki, ke fakaheke ke he Atua. (1 Korinito 11:3-16) Fakakite mai e Paulo tolu e kakano aoga ke manamanatu ki ai: (1) ko e tau matagahua kua taute he fifine ati lata a ia ke ufiufi e ulu, (2) ko e tau tuaga kua lata e fifine ke ufiufi e ulu, mo e (3) ko e tau kakano ati omoi e fifine ke fakagahua e poakiaga nei.

Ko e tau matagahua. Ne talahau e Paulo ua e matagahua: ko e liogi mo e perofeta atu. (Kupu 4, 5) Ko e liogi, ko e tutala ki a Iehova he tapuakiaga. He vahā nei, ko e perofeta atu kua hagaao ke he fakaako atu ne fakavē ke he Tohi Tapu ne taute he fekafekau Kerisiano. Kua pehē kia a Paulo kua lata e fifine ke ufiufi tumau e ulu ka liogi po ke fakaako atu e kupu mooli he Tohi Tapu? Nakai. Ko e tuaga ka taute he fifine e liogi po ke fakaako atu, to fifili e ia ke ufiufi e ulu po ke nakai.

Ko e tau tuaga. Ne talahau he tau kupu ha Paulo hagaao ke he ua e tuaga​—ko e magafaoa mo e fakapotopotoaga. Pehē a ia: “Ko e ulu he hoana ko e tane haia, . . . ka liogi po ke perofeta mai ha fifine ka e nakai ufiufi hana ulu kua fakakelea e ia hana ulu.” (Kupu 3, 5) I loto he magafaoa, kua kotofa e Iehova e taane ko e ulu he haana hoana. Ka nakai fakalilifu he hoana e pule he taane  haana, to fakakelea po ke fakamā e ia e taane haana ka taute e ia e tau gahua ne kotofa e Iehova ke he taane. Ma e fakatai, ka fakaako e ia e Tohi Tapu mo e taha tagata ka e ha ha i ai e taane haana, to ufiufi e ia e ulu haana he fakalilifu ke he pule he taane haana. Taute pihia e ia he papatiso e taane haana po ke nakai, ha ko e taane ko e ulu he magafaoa. * Ka liogi po ke fakaako atu a ia ka e nofo ai e tama taane fuata mui haana ne kua papatiso, to ufiufi foki e ulu haana, nakai ha ko e tama taane ia e ulu he magafaoa ka e ha ko e pule kua tuku age ke he tau matakainaga taane papatiso i loto he fakapotopotoaga Kerisiano.

Talahau e Paulo e tuaga i loto he fakapotopotoaga, he pehē: “Kaeke kua fia taufetoko taha, nakai mahani pihia a mautolu, ti nakai pihia foki e tau ekalesia he Atua.” (Kupu 16) I loto he fakapotopotoaga Kerisiano, kua tuku age e tuaga ulu pule ke he tau matakainaga taane papatiso. (1 Timoteo 2:11-14; Heperu 13:17) Ko e tau matakainaga taane hokoia ni kua fifili ke eke mo tau motua mo e tau fekafekau lagomatai, ne moua e kotofaaga he Atua ke leveki e fuifui mamoe he Atua. (1 Peteru 5:1, 2) He falu magaaho, kua ha ha e tau tuaga ne lata he matakainaga fifine Kerisiano ke taute e tau gahua ne fa mahani ke taute he matakainaga taane kua papatiso ne kua kotofa pauaki. Ma e fakatai, liga lata a ia ke taute e feleveiaaga ma e gahua he fonua, ha kua nakai fai matakainaga taane kua papatiso ne kua kotofa pauaki ne atā po ke ai hoko atu. Po ke liga taute e ia e fakaako Tohi Tapu he kaina ne fakatoka pauaki, ka e haia foki e matakainaga taane kua papatiso. * Ha ko e tau matagahua pihia ko e vala agaia he fakapotopotoaga Kerisiano, ti lata e fifine ke ufiufi e ulu haana ke fakakite kua mailoga e ia kua taute e ia e matagahua ne kotofa ke he tau tagata taane.

He taha faahi, loga foki e tau vala he tapuakiaga ne nakai lata e matakainaga fifine ke ufiufi e ulu haana. Ma e fakatai, nakai lata ke ufiufi e ulu ka tali he tau feleveiaaga Kerisiano, o atu ke he  gahua he fonua mo e haana a taane po ke taha matakainaga taane ne kua papatiso, po ke fakaako po ke liogi mo e tau fanau haana ne ai la papatiso. Mooli ai, to fai hūhū foki ka tupu mai, ti ka nakai maama he matakainaga fifine e tuaga, lata a ia ke kumikumi ki ai. * Ti ka ai la maama agaia e ia mo e ka omoi he loto manamanatu haana a ia ke taute pihia, to nakai hepe ke ufiufi e ulu tuga ne fakakite mai he fakatino.

Ko e tau kakano. He kupu 10, kua moua e tautolu ua e kakano ne kua manako e fifine Kerisiano ke muitua ke he poakiaga nei: “Kua lata ai ke he fifine ke ha he ulu hana e fakamailoga he pule, ha ko e tau agelu.” Fakamua, mailoga e talahauaga, “fakamailoga he pule.” Ko e ufiufi he ulu he fifine ka fakakite kua talia e ia e pule ne tuku age e Iehova ma e tau matakainaga taane kua papatiso he fakapotopotoaga. Ko e mena nei, kua fakakite e ia e haana a fakaalofa mo e tua fakamooli ki a Iehova ko e Atua. Ko e kakano ke uaaki ne kua ha ha he tau kupu “ha ko e tau agelu.” Lauia fēfē a lautolu ia ko e tau mena momoui fakaagaaga malolō lahi, he ufiufi e ulu he fifine?

Kua aoga ma e tau agelu he kitia kua fakalilifu e pule he Atua i loto he fakatokatokaaga katoa ha Iehova, i luga he lagi mo e lalolagi. Aoga foki ki a lautolu e tau fakafifitakiaga he tau tagata nakai mitaki katoatoa hagaao ke he mena nei. Ha ko e mena lata foki a lautolu ke mumuitua ke he fakaholoaga ha Iehova​—he kamatamata ne kaumahala e falu agelu he vahā fakamua. (Iuta 6) Kitia foki he tau agelu he falu magaaho kua mua atu e iloa mena, iloilo mo e lotomatala he fifine Kerisiano ke he matakainaga taane kua papatiso he fakapotopotoaga; ka e makai tumau a ia ke fakakite e omaoma ke he pule he Atua. He falu magaaho, ko e matakainaga fifine ko e Kerisiano fakauku, mo e to eke  he magaaho fakamui mo taha he tau hakega fakalataha mo Keriso. Ko e fifine pihia ka hoko mai e magaaho, to fekafekau a ia he kotofaaga ne mua hake ke he tau agelu mo e pule fakalataha mo Keriso he lagi. Ko e fakafifitakiaga mitaki lahi ke onoono e tau agelu ki ai he mogonei! Ko e magaaho lilifu pauaki anei ma e tau matakainaga fifine oti, ke fakakite e omaoma fakatokolalo he mahani fakamooli mo e muitua ai, he onoono mai e tau agelu fakamooli ne totou miliona!