Ke he Fakahele ne Fakaalofa ki a Iehova:

“To iloa foki e mutolu e mena moli, ko e mena moli foki ke toka noa ai a mutolu,” he talahau e Iesu. (Ioane 8:32) Kua ati hake mooli e tau kupu ia! E, kua maeke ke iloa e kupu mooli, pete ko e “tau aho fakamui” nei ne loga lahi e tau mena fakavai. (2 Timoteo 3:1) Manatu nakai e koe e magaaho fakamua ne iloa e koe e kupu mooli ne fakamaama mai he Kupu he Atua? Ko e mena ofoofogia a ia ne tupu!

Ka e pete kua aoga lahi ke iloa e iloilo tonu he kupu mooli mo e fai vala tumau ke tala age ke he falu e mena nei, kua lata foki ia tautolu ke felauaki e tau mahani mo e kupu mooli. Ke taute e mena ia, kua lata ia tautolu ke fakatumau ke he fakaalofa he Atua. Ko e heigoa kua putoia ke he mena nei? Ko e tau kupu ha Iesu he pō ato mate a ia ne tali e hūhū nei. Tala age e ia ke he tau aposetolo tua fakamooli haana: “Kaeke ke omaoma e mutolu haku a tau poaki, ti tumau a mutolu ke he haku a fakaalofa; tuga au ne oma e tau poaki he haku a Matua, mo e tumau au ke he hana fakaalofa.”​​—Ioane 15:10.

Mailoga ai, kua fakatumau a Iesu ke he fakaalofa he Atua he omaoma ke he tau poakiaga he Matua haana. Ti pihia foki ma tautolu he vahā nei. Ke fakatumau ke he fakaalofa he Atua, kua lata ia tautolu ke fakagahua e kupu mooli ke he tau momoui he tau aho takitaha. He afiafi taha ia, ne pehē a Iesu: “Kaeke kua iloa e mutolu e tau mena nai, uhoaki a mutolu kaeke kua eke e mutolu.”​​—Ioane 13:17.

Kua amaamanaki mooli a mautolu to lagomatai he tohi nei a koe ke matutaki ke fakagahua e kupu mooli he moui haau, ti fakatumau a koe “ke he fakaalofa he Atua, . . . kia hoko atu ke he moui tukulagi.”​​—Iuta 21.