1. Ko e heigoa e manatu ne peehi e Iesu he pō fakahiku haana he nofo ko e tagata he lalolagi?

HE PŌ fakahiku ha Iesu he moui ko e tagata he lalolagi, ne fakakite e ia e tupetupe lahi mahaki ke he tuaga he tau tutaki haana he vahā i mua. Ne liogi foki a ia hagaao ke he matakupu nei, he pehē ke he Matua haana: “Nakai liogi au kia uta kehe e koe a lautolu he lalolagi, ka kia leveki atu e koe a lautolu mai ia ia ne mahani kelea. Nakai ko e tau tagata he lalolagi a lautolu, ke tuga foki au, nakai ko e tagata he lalolagi au.” (Ioane 17:15, 16) He olelalo mafanatia nei, ne fakakite e Iesu e fakaalofa hofihofi ma e tau tutaki haana, mo e aoga he tau kupu ne talahau e ia he kamataaga he pō ia ke he falu ia lautolu: “Nakai ko e tau tagata he lalolagi a mutolu.” (Ioane 15:19) Maaliali ai, ne aoga lahi ki a Iesu ke vevehe kehe mai e tau tutaki haana he lalolagi!

2. Ko e heigoa e “lalolagi” ne talahau e Iesu?

² Ko e “lalolagi” ne tutala a Iesu ki ai kua hagaao ke he tau tagata oti ne ō kehe mai he Atua, ti pule a Satani ki ai, mo e fakatupa ke he aga lotokai mo e fakatokoluga ne tupu mai ia Satani. (Ioane 14:30; Efeso 2:2; 1 Ioane 5:19) Mooli ai, “ko e kapitiga mo e lalolagi [ia] ko e faitaua haia ke he Atua.” (Iakopo 4:4) Ti maeke fēfē e tau tagata oti ne manako ke fakatumau ke he fakaalofa he Atua, ke nonofo he lalolagi ka e vevehe kehe mai foki i ai? To maeke ia lautolu ke taute pihia he: (1) fakatumau ke fakamooli ke he Kautu he Atua i lalo hifo he Keriso mo e tu uho he tau mena fakapolitika he  lalolagi, (2) totoko e agaaga he lalolagi, (3) gali e tau tapulu mo e tauteuteaga, (4) fakamukamuka e moui, mo e (5) fakatapulu ke he tau tapulu tau fakaagaaga ha tautolu. To fakatutala a tautolu ke he tau puhala nei ne lima.

3. (a) Fēfē e onoonoaga ha Iesu ke he tau mena fakapolitika he vahā haana? (e) Ko e ha ne talahau ai ko e tau tutaki fakauku ha Iesu ko e tau fekau? (Putoia e matahui tala.)

³ Ne nakai fakalataha a Iesu ke he tau mena fakapolitika he vahā haana, ka e hagaaki a ia ke fakamatala hagaao ke he Kautu he Atua, ko e fakatufono he lagi anoiha ne amanaki a ia ke eke mo Patuiki. (Tanielu 7:13, 14; Luka 4:43; 17:20, 21) He tū mogoia ki mua he Ikipule Roma ko Ponotio Pilato, ne talahau e Iesu: “Nakai ko e kautu he lalolagi nai haku a kautu.” (Ioane 18:36) Ko e tau tutaki tua fakamooli haana kua mumuitua ke he fakafifitakiaga haana he fakamooli ke he Keriso mo e haana Kautu, mo e fakapuloa e Kautu ia ke he lalolagi. (Mataio 24:14) “Ko e tau fekau a Keriso a mautolu nai,” he tohi he aposetolo ko Paulo. “Kua hukui aki e mautolu a Keriso mo e ole atu kia mutolu kia fakafeilo a mutolu mo e Atua.” *​​—2 Korinito 5:20.

4. Fakakite fēfē he tau Kerisiano mooli oti e mahani fakamooli ke he Kautu he Atua? (Kikite e puha “ Tu Uho he Tau Kerisiano Fakamua.”)

⁴ Ha ko e tau fekau po ke tau fekafekau kua hukui e motu kehe, ti nakai tauhele a lautolu ke he tau mena he fakatufono he tau motu ne gahua ai a lautolu; kua tu uho ni a lautolu. Ka kua lalago he tau fekau e fakatufono he motu ne hukui e lautolu. Kua pihia foki e tau tutaki fakauku he Keriso, ko e ha lautolu a “māga moli . . . ha ha he lagi ia.” (Filipi 3:20) Mooli ai, ha ko e gahua fakamakutu ha lautolu  ke fakamatala e Kautu, ne lagomatai e lautolu e tau miliona he tau “mamoe kehe” he Keriso ke ‘fakafeilo mo e Atua.’ (Ioane 10:16; Mataio 25:31-40) Ko e tau mamoe kehe nei kua gahua ko e tau fekau hukui pauaki ke lalago e tau matakainaga fakauku ha Iesu. Kua kaufakalataha a lautolu ko e  taha e fuifui ke fakapuloa e Kautu faka-Mesia, mo e fakatumau e tu uho katoatoa ha lautolu ke he tau mena fakapolitika he lalolagi.​​—Totou Isaia 2:2-4.

5. Kehe fēfē e fakapotopotoaga Kerisiano mai ia Isaraela i tuai, mo e kitia fēfē e kehe nei?

⁵ Ko e fakamooli ke he Keriso kua nakai ko e kakano hokoia ni ati tu uho ai e tau Kerisiano mooli. He nakai tuga e tau tagata Isaraela i tuai, ne foaki he Atua e motu ke nonofo ai, kua eke a tautolu mo vala he tau matakainaga he lalolagi katoa. (Mataio 28:19; 1 Peteru 2:9) Ti ka kau a tautolu mo e tau matakau politika, to fakahagahaga kelea lahi e atāina ha tautolu ke fakamatala hagaao ke he fekau he Kautu mo e kaufakalatahaaga he tau Kerisiano. (1 Korinito 1:10) Lafi foki, he magaaho ka felakutaki ai, to tau a tautolu ke he tau matakainaga talitonu, ne kua poaki a tautolu ke fakaalofa ki ai. (Ioane 13:34, 35; 1 Ioane 3:10-12) Ko e kakano ia, ati tala age a Iesu ke he tau tutaki haana ke liuaki e pelu ke he haana tokaaga. Ti tala age foki a ia ke fakaalofa ke he tau fī ha lautolu.​​—Mataio 5:44; 26:52; kikite e puha “ Fakatumau Nakai Au ke Tu Uho?”

6. Lauia fēfē e fakafetuiaga haau mo Kaisara ha ko e tukuleleaga ke he Atua?

⁶ Ha ko e tau Kerisiano mooli, kua tukulele e tautolu e tau momoui ha tautolu ke he Atua, nakai ke he ha tagata, fakatokatokaaga he tau tagata, po ke motu. Pehē ia 1 Korinito 6:19, 20: “Nakai pule a mutolu kia mutolu . . . Ha ko e mena kua fakafua a mutolu ke he totogi.” He uta e tau mena kua lata mo “Kaisara” ha ko e mahani fakalilifu, tau tukuhau, mo e omaoma kua lata, ne kakano mogoia ko e tau tutaki ha Iesu ne uta ke he “Atua e tau mena he Atua.” (Mareko 12:17; Roma 13:1-7) Putoia ke he mena nei e tapuakiaga ha lautolu, fakaalofa katoatoa, mo e omaoma fakamooli. Kaeke kua lata, ne mautali a lautolu ke foaki e tau momoui ke he Atua.​​—Luka 4:8; 10:27; totou Gahua 5:29; Roma 14:8.

7, 8. Ko e heigoa e “agaga he lalolagi,” ti “kua gahua ai” fēfē i loto he tau tagata ne liuliu?

⁷ Taha puhala ke tumau e tau Kerisiano ke vevehe kehe mai he lalolagi ko e totoko e tau puhala kelea i ai. “Kua moua e tautolu nakai ko e agaga he lalolagi nai, ka ko e Agaga mai he Atua,” he tohi e Paulo. (1 Korinito 2:12) Talahau e ia ke he tau matakainaga i Efeso: “Ne o fano ai a mutolu ke he vaha i tuai, ke lata mo e . . . lalolagi nai, ke lata mo e takitaki ha lautolu kua pule ha he pulagi, ko e agaga haia kua gahua ai ni ainei kia lautolu kua faliuliu.”​​—Efeso 2:2, 3.

⁸ Ko e “pulagi,” po ke agaaga he lalolagi, ko e omoomoiaga nakai kitia ne kua fakalagalaga e tagata ke liuliu ke he Atua mo e fakaohooho e “manako lahi he tino, mo e manako lahi he tau mata.” (1 Ioane 2:16; 1 Timoteo 6:9, 10) Ko e “pule” he agaaga nei kua fakaohooho ke he agahala he tino, ke he eke lagatau, ke he favale, kua tuga ai e matagi kelea muitui. Lafi ki ai, ko e mena nei “kua gahua ai” he tau tagata ne liuliu he feaki fakahaga i loto ia lautolu e tau aga ne nakai mai he Atua, tuga e lotokai, fakatokoluga, foli kelea, mo e aga tū tokotaha mo e totoko. * Ke fakamaama foki, ko e agaaga he lalolagi nei ne kua feaki fakahaga e tau aga kelea he Tiapolo ke he tau loto he tau tagata.​​—Ioane 8:44; Gahua 13:10; 1 Ioane 3:8, 10.

9. Maeke fēfē e agaaga he lalolagi ke hu ke he tau manamanatuaga mo e tau loto ha tautolu?

⁹ Maeke nakai e agaaga he lalolagi ke kamata ke tupu he manamanatuaga mo e loto haau? E maeke, ka fakaatā ni e koe ke pihia he nakai leveki e loto haau. (Totou Tau Fakatai 4:23.) Kua fa kamata halahū e fakaohoohoaga, liga he tau kapitiga ne tuga ko e tau tagata mitaki, ka kua nakai fakaalofa ki a Iehova. (Tau Fakatai 13:20; 1 Korinito 15:33) Maeke foki a koe ke lauia he agaaga kelea ia he totou e tau pepa kelea, tau fakatino telefua po ke tau tala tiaki taofiaga he Initanete, tau fakafiafiaaga  nakai mitaki, po ke tau feua sipote ne fakalagalaga e fetoko​​—ti kua puhala mai he ha tagata po ke ha mena kua fakakite e tau manatu ha Satani po ke fakatokaaga haana.

10. Totoko fēfē e tautolu e agaaga he lalolagi?

¹⁰ Maeke fēfē a tautolu ke totoko e agaaga kelea he lalolagi mo e fakatumau a tautolu ke he fakaalofa he Atua? He fakaaoga katoatoa ni e tau foakiaga fakaagaaga ha Iehova mo e he liogi tumau ma e agaaga tapu. Kua mua ue atu a Iehova ke he  Tiapolo po ke lalolagi kelea muitui i lalo hifo he takitakiaga ha Satani. (1 Ioane 4:4) Kua aoga mooli mogoia ke nonofo fakatata a tautolu ki a Iehova he liogi!

11. Fakaohooho fēfē he agaaga he lalolagi e tau tuaga ke he puhala tauteute?

¹¹ Kitia e agaaga ne takitaki e tagata ha ko e tau puhala ne fakaohooho a ia ke he tau tapulu, tauteuteaga, mo e mahani meā. He tau motu loga, kua tō hifo lahi e tuaga he tau tapulu ati talahau e taha tagata he televisoni to nakai leva ti ai fai tapulu ne toe ke tui e tau fifine fakataka. Pihia foki e tau tama fifine ne nakai la fuata mui ia, kua fakaohooho a lautolu he puhala nei​​—“lahi e kili ne tokanoa, ku e aga maimainā,” he talahau he taha tala nusipepa. Ko e taha puhala foki he fulufagu e tau tauteuteaga, ne fakakite e agaaga totoko mo e fakateaga ne kua nakai fakalilifu he tagata a ia ni.

12, 13. Ko e heigoa e tau matapatu fakaakoaga ka fakavē ki ai e tau tapulu mo e puhala tauteute ha tautolu?

¹² Ha ko tautolu ko e tau fekafekau ha Iehova, kua manako pauaki a tautolu ke gali e tau tapulu, ti kua kakano ke maopoopo, meā mo e lilifu e tau tauteuteaga ti felauaki foki mo e magaaho. He tau magaaho oti, kua lata e tau tauteuteaga ha tautolu ke fakakite e “maimaina mo e mahani fakalatalata,” ti lafi ki ai e “tau gahua mitaki” ne lata ma e tau tagata oti​​—tau taane po ke tau fifine​​—kua “talahaua e lautolu a lautolu kua mahani Atua.” Ka ko e mena kua aoga ma tautolu, ke nakai hagaaki ki a tautolu ni, ka e “fakatumau e [tautolu a tautolu] ke he fakaalofa he Atua.” (1 Timoteo 2:9, 10; Iuta 21) E, kua manako a tautolu ke mua atu e fulufuluola he “tagata galo he loto, . . . ko e koloa uho haia ki mua he Atua.”​​—1 Peteru 3:3, 4.

¹³ Tokaloto foki, ko e tau fasone he tau tapulu ha tautolu mo e tau tauteuteaga, kua lauia e puhala ne onoono e falu ke he tapuakiaga mooli. Ko e kupu Heleni ma e “fakalatalata,”  ka fakaaoga hagaao ke he mahani, kua fakakite ai e tuaga tokoluga, fakalilifu mo e manamanatu ke he tau logonaaga po ke tau manatu he falu. Ko e foliaga ha tautolu mogoia, kua lata ke toka kehe e tau tonuhia ha tautolu ke fakalilifu e tau loto manamanatu he falu. Ke he tau mena oti, kua manako a tautolu ke fakalilifu a Iehova mo e tau tagata haana ti fakakite ko tautolu ko e tau fekafekau he Atua, he taute e “tau mena oti kana ke fakaheke ai ke he Atua.”​​—1 Korinito 4:9; 10:31; 2 Korinito 6:3, 4; 7:1.

14. Hagaao ke he tau tauteuteaga mo e meā fakatino ha tautolu, ko e heigoa e tau hūhū kua lata a tautolu ke hūhū hifo ki a tautolu ni?

¹⁴ Ko e tau tapulu, puhala tauteute mo e mahani meā ha tautolu kua mua atu e aoga ka taute e gahua fakamatala he fonua po ke fakalataha ke he feleveiaaga Kerisiano. Hūhū hifo ki a koe ni: ‘Kua onoono fakateaga mai kia ha ko e tauteuteaga mo e meā fakatino haaku? Fakamā kia ke he falu? Manamanatu nakai au kua mua hake e tau tonuhia haaku he tau tuaga nei ke he hokotia haaku ke moua e tau kotofaaga i loto he fakapotopotoaga?’​​—Salamo 68:6; Filipi 4:5; 1 Peteru 5:6.

15. Ko e ha ne nakai tohi oti he Kupu he Atua e tau matafakatufono ma e tau tapulu, tauteuteaga, mo e meā fakatino?

¹⁵ Nakai tohi oti he Tohi Tapu e tau matafakatufono ma e tau tapulu, tauteuteaga, mo e meā fakatino ke lata mo e tau Kerisiano. Nakai manako a Iehova ke utakehe e atāina ha tautolu ke fifili po ke fakaaoga e manamanatuaga ha tautolu.  Ka kua manako a ia ki a tautolu ke motua fakaagaaga mo e manamanatu ke he tau matapatu fakaakoaga he Tohi Tapu, ne “kua mahani he ako mua ai ke mailoga e tau mena mitaki mo e tau mena kelea.” (Heperu 5:14) Ka e mua atu, kua manako a ia ki a tautolu ke fakavē ke he fakaalofa​​—ko e fakaalofa ke he Atua mo e katofia. (Totou Mareko 12:30, 31.) He tau fakavēaga ia, kua loga lahi agaia e tau tapulu mo e tau tauteuteaga kehekehe. Kitia maaliali e mena nei he tau tapulu lanu fulufuluola he tau tagata tokologa ha Iehova ne fakapotopoto auloa mo e fiafia, he ha matakavi ni he lalolagi.

16. Puhala fe ne totoko he agaaga he lalolagi e fakaakoaga ha Iesu, mo e ko e tau hūhū fe kua lata ia tautolu ke hūhū ki a tautolu ni?

¹⁶ Ko e agaaga he lalolagi kua fakavaia ti fakaohooho e tau miliona tagata ke hagaaki ke he tau tupe mo e tau koloa  ke moua e fiafia. Pete ia, ne talahau e Iesu: “Ha ko e mena nakai moui taha he loga hana tau mena ha i ai.” (Luka 12:15) He nakai talia ke fakatikai pauaki he tagata a ia ni ke he tau koloa, ne fakaako e Iesu kua moua e lautolu ne “fia kai mo e fia inu ke he mahani tututonu,” mo lautolu kua fakatumau ke fakamukamuka e moui he hagaaki ke he tau mena fakaagaaga mo e fiafia mooli. (Mataio 5:6; 6:22) Hūhū ki a koe ni: ‘Talitonu mooli nakai au ke he tau fakaakoaga ha Iesu, po kua fakaohooho au he “matua he pikopiko”? (Ioane 8:44) Ko e heigoa he tau kupu, tau foliaga, tau mena ne mua, mo e puhala moui haaku ne fakakite?’​​—Luka 6:45; 21:34-36; 2 Ioane 6.

17. Talahau e falu mena aoga ne moua e lautolu ne kua fakatumau e moui nakai muhu koloa.

¹⁷ “Kia eke a mutolu mo tau tagata omaoma ke he kupu.” (Iakopo 1:22) Manamanatu ke he falu mena aoga ne moua e lautolu ne moui nakai muhu koloa. Kua moua e lautolu e okiokiaga mooli ke he fekafekauaga he Kautu. (Mataio 11:29, 30) Nakai tupetupe a lautolu ke he tau mena noa ti ai lauia he fakaatukehe mo e mamahi e loto. (Totou 1 Timoteo 6:9, 10.) Kua fiafia a lautolu he moua e tau mena kua lata ke leveki aki e moui, ti lahi e magaaho ma e magafaoa mo e tau kapitiga Kerisiano. Ti momohe mitaki a lautolu. (Fakamatalaaga 5:12) Kua fiafia lahi a lautolu ke foaki atu, ke he ha puhala ne kua maeke ia lautolu. (Gahua 20:35) Ne moua e lautolu e “amaamanaki kua lahi ue atu” ti mafola mo e fiafia e tau loto. (Roma 15:13; Mataio 6:31, 32) Ko e tau monuina nei kua mua atu e mitaki!

18. Fakamaama fēfē he Tohi Tapu e fī ha tautolu, haana tau puhala mo e tuaga he ha tautolu a “tau”?

¹⁸ Ko lautolu ne fakatumau ke he fakaalofa he Atua kua puipui fakaagaaga foki mai he tau lagatau ha Satani, ne manako ke utakehe e fiafia mo e moui tukulagi he tau Kerisiano.  (1 Peteru 5:8) Ne pehē a Paulo: “Mena nakai tau a tautolu ke he tau tagata, ka ko e tau iki lalahi, mo e tau pule, mo e tau iki he pouli ha he lalolagi nai, katoa mo e tau agaga kelea ke he tau mena ha he lagi.” (Efeso 6:12) Ko e kupu “tau” kua nakai hagaao ke he latau mai he matakavi mamao​​—tuga e huaga malu he lalofonua​​—ka ko e tau latau ne fakafeao e tau fī. Lafi ki ai, ko e tau kupu “tau iki lalahi,” “tau pule,” mo e “tau iki he pouli ha he lalolagi nai” ne hagaao ke he latau mai he tau agaaga kelea ne fakatokatoka pauaki.

19. Fakamaama e tapulu tau fakaagaaga he Kerisiano.

¹⁹ Pete ni e tau lolelole mo e tau kaupaaga he tagata, ka e kautū agaia a tautolu. He puhala fe? He fakatapulu ke he “tau tapulu tau katoa he Atua.” (Efeso 6:13) He fakamaama e tapulu tau ia, talahau he Efeso 6:14-18: “Kia tutu a mutolu mo e tau tokupu ha mutolu kua pipi ke he kupu moli, kia tapulu foki ke he ufi kahokaho ko e tututonu haia; Kia afi foki ha mutolu a tau aloalohui ke he tauteaga he vagahau mitaki ke mafola ai; Ka e mua hanai ke he tau mena oti, kia toto e akau punuti, ko e tua haia, kia maeke ai ke tamate e tau fana kaka oti hana kua kelea; Kia eke foki e potiki tau [po ke amaamanakiaga] ko e fakamouiaga haia, mo e pelu he Agaga ko e kupu he Atua haia; Kia olelalo atu a mutolu ke he Agaga nakai noa ke he tau ole mo e tau liogi oti.”

20. Ke he fēfē e tuaga ha tautolu ka fakatatai ke he kautau?

²⁰ Ko e foakiaga mai he Atua ko e tapulu tau fakaagaaga, ti puipui tumau a tautolu ka tui he tau magaaho oti. Nakai tuga e tau kautau ne fa leva e okioki mai he tau, ka ko e tau Kerisiano, ne taufetului tumau ke he tau mena ke moui ai po ke nakai, ti ai oti ato moumou he Atua e lalolagi ha Satani mo e līlī e tau agaaga kelea oti ke he pahua. (Fakakiteaga 12:17; 20:1-3) Ti ka taufetului a koe mo e tau lolelole po ke tau manako hepe, lali fakamalolō ke totoko ai, ha kua “tatuki” e tautolu a tautolu ni ke fakatumau mo e fakamooli ki a Iehova. (1 Korinito 9:27) Ko e mena mooli, ka nakai taufetului a tautolu, kua lata a tautolu ke tupetupe!

21. Maeke fēfē ni a tautolu ke kautū he tauaga fakaagaaga ha tautolu?

 ²¹ Lafi ki ai, to nakai maeke a tautolu ke kautū ke he tauaga nei he ha tautolu a tau malolō ni. Ko e mena ia ne fakamanatu e Paulo a tautolu ke liogi ki a Iehova mo e “Agaga nakai noa.” He magaaho taha ia, kua lata a tautolu ke fanogonogo ki a Iehova he fakaako e haana Kupu mo e fakalataha ke he “kau” he tau matakainaga he ha magaaho, ha kua nakai ko tautolu ni he tauaga nei! (Filemoni 2; Heperu 10:24, 25) Ko lautolu ne mahani fakamooli ke he tau mena oti nei to kautū ai, mo e maeke ke tali atu fakamalolō ka totoko e tua ha lautolu.

22, 23. (a) Ko e ha kua lata ke mautali he tau magaaho oti ke lalago e tua ha tautolu, mo e ko e heigoa e tau hūhū kua lata ke hūhū ki a tautolu ni? (e) Ko e heigoa e matakupu ka fakatutala he veveheaga ka mui mai?

²² “Ka e nakai ko e tau tagata he lalolagi a mutolu,” he talahau e Iesu, “kua fakavihia ai he lalolagi a mutolu.” (Ioane 15:19) Ko e mena ia kua lata e tau Kerisiano ke mautali tumau ke lalago e tua ha lautolu he puhala fakalilifu mo e mahani molū. (Totou 1 Peteru 3:15.) Hūhū ki a koe ni: ‘Maama nakai e au ko e ha e Tau Fakamoli a Iehova he falu magaaho ne tutū mauokafua he nakai kau atu ke he tau talahauaga mahuiga? Ka fehagai mo e totoko ha ko e tutū mauokafua pihia, kua talitonu mooli nakai au ko e hako e talahauaga he Tohi Tapu mo e fekafekau fakamooli? (Mataio 24:45; Ioane 17:17) Ti ka taute e au e mena ne hako ki mua ha Iehova, kua mautali nakai au ke kehe mo e fiafia ha kua kehe?’​​—Salamo 34:2; Mataio 10:32, 33.

²³ Ka e fa halahū e tau puhala ne kamatamata e manako ha tautolu ke vevehe kehe mai he lalolagi. Ma e fakatai, tuga he talahau he vala fakamua, ko e Tiapolo kua lali ke futiaki e tau fekafekau ha Iehova ke he lalolagi, puhala he tau fakafiafiaaga. Fifili fēfē e tautolu e tau fakafiafiaaga mitaki ke atihake mo e moua e manamanatuaga meā? To fakatutala ke he matakupu ia he veveheaga ka mui mai.