Igatia a tautolu mo e tau mena tui mo e tauteuteaga ne fiafia ki ai. Ka muitua a tautolu ke he falu matapatu fakaakoaga he Tohi Tapu, to fifili e tautolu e tau mena tui ne manako ki ai mo e fakafiafia foki a Iehova. To fakatutala a tautolu ke he falu he tau matapatu fakaakoaga ia.

1. Ko e heigoa e tau matapatu fakaakoaga kua lata ke fakavē e tau fifiliaga ha tautolu ke he tau mena tui mo e tauteuteaga?

Lata a tautolu ke fifili e “tau tapulu kua gali, mo e maimaina mo e mahani fakalatalata,” ti fakatumau e meā kua fakakite e “mahani Atua” ha tautolu. (1 Timoteo 2:9, 10) Manamanatu ke he tau matapatu fakaakoaga nei ne fā: (1) Lata e tau mena tui ha tautolu ke “gali.” Tuga ne kitia e koe he tau feleveiaaga, kehekehe e tau tauteuteaga he tau tagata ha Iehova, ka ko e tau tapulu mo e tau sitaila ulu ha tautolu kua fakalilifu e Atua kua tapuaki a tautolu ki ai. (2) Ko e tauteute mo e “maimaina” kua nakai lata ke fakaohooho e mahani feuaki, po ke futiaki lahi e onoonoaga ki a tautolu ni. (3) Fakakite e tautolu e “mahani fakalatalata” he nakai muitua oti e tau fasone he tau tapulu mo e tauteuteaga talahaua he magahala. (4) Lata e tauteuteaga ha tautolu ke fakakite tumau e “mahani Atua,” ti kitia he falu kua tapuaki a tautolu ke he Atua mooli.​—1 Korinito 10:31.

2. Lauia fēfē e tau matakainaga ha tautolu ha ko e tauteuteaga ha tautolu?

He atāina a tautolu ke fifili e tau mena ke tui, lata a tautolu ke manamanatu ke he puhala ka lauia e falu ha ko e tauteuteaga ha tautolu. Eketaha a tautolu ke nakai fakatupetupe ha tagata ka e “fakafiafia a ia ne katofia mo [tautolu], kia mitaki ai a ia, to fakamafanatia ai.”​—Totou Roma 15:1, 2.

3. Futia fēfē he tauteuteaga ha tautolu e falu ke he tapuakiaga mooli?

Lali tumau a tautolu ke tauteute fakamitaki, ka e mua atu ka o atu he tau feleveiaaga mo e gahua he fonua. Ti nakai manako a tautolu ke fakatauhele e tala mitaki kua ta atu e tautolu ke he tau tagata. Ka e manako a tautolu ke he tauteuteaga ke futia mai e tau tagata ke he kupu mooli mo e “fakalilifu ai . . . e tau kupu he Atua, ha tautolu a Fakamoui.”​—Tito 2:10.

 KUMIKUMI FAKAHOKULO

4. Ko e tauteuteaga mitaki kua fakalilifu a Iehova

Ko e heigoa e kakano aoga lahi ma tautolu ke lilifu e tauteuteaga? Totou Salamo 47:2, ti tutala ke he tau hūhū nei:

• Ha kua hukui e tautolu a Iehova, lata ke lauia fēfē e puhala tauteute ha tautolu?

• Manatu nakai a koe kua lata pauaki ke manamanatu ke he tauteuteaga ha tautolu ka o atu ke he tau feleveiaaga mo e gahua he fonua? Ko e ha ne manatu pihia a koe, po ke ko e ha ne nakai manatu pihia a koe?

 5. Puhala ke fifili fakamitaki e tau tapulu mo e tauteuteaga

Tā e VITIŌ.

He tauuka po ke nakai tauuka e tau mena tui ha tautolu, kua lata ke meā mo e felauaki ke he tau tuaga ha tautolu. Totou 1 Korinito 10:24 mo e 1 Timoteo 2:9, 10. Ti tutala ke he kakano kua manako a tautolu ke kalo kehe he tui e tau tapulu kua . . .

• fulufagu po ke fakateaga lahi.

• mapita, fakaaliali, po ke fakataki.

Pete kua nakai muitua e tau Kerisiano ke he Fakatufono Faka-Mose, ka e fakakite ai e manatu ha Iehova. Totou Teutaronome 22:5, ti tutala ke he hūhū nei:

• Ko e ha kua lata ke kalo kehe he tau mena tui mo e tauteuteaga ne taute e tau tagata taane ke tuga e tau fifine po ke tau fifine ke tuga e tau tagata taane?

Totou 1 Korinito 10:32, 33 mo e 1 Ioane 2:15, 16, ti tutala ke he tau hūhū nei:

• Ko e ha kua lata ke manamanatu ke he tauteuteaga ha tautolu neke fakatupetupe e falu he matakavi po ke fakapotopotoaga?

• Ko e heigoa e tau sitaila he tau mena tui mo e tauteuteaga kua aga mau he matakavi haau?

• Manatu nakai a koe ko e falu sitaila ia kua liga nakai lata ma e Kerisiano? Ko e ha ne manatu pihia a koe, po ke ko e ha ne nakai manatu pihia a koe?

 MANATU KATOA

Ka fifili fakamitaki e tauteuteaga ha tautolu, kua fakakite e fakalilifu ha tautolu ki a Iehova mo e ke he falu.

Liu Fakamanatu

• Ko e ha e tau mena tui mo e tauteuteaga ha tautolu kua aoga ki a Iehova?

• Ko e heigoa e falu matapatu fakaakoaga kua lata ke fakavē e tau fifiliaga ha tautolu ke he tauteuteaga?

• Ha ko e tauteuteaga ha tautolu, lauia fēfē e onoonoaga he falu ke he tapuakiaga mooli?