VALA LIMA

Liu Mai “ke he Leoleo mo e Leveki he Tau Agaga ha Mutolu”

TĀ

Kua fehagai nakai a koe mo e taha po ke falu paleko ne ha hā he porosua nei? Kaeke kua pihia, ha i ai e tau tagata mitaki ne fakalataha mo koe. Tokologa e tau fekafekau fakamooli he Atua—he vahā he Tohi Tapu mo e vahā ha tautolu—ne kua fehagai mo e tau paleko pihia. Tuga ni he moua e lautolu e lagomatai mai ia Iehova ke kautū ke he tau paleko ia, to pihia foki a koe.

To lagomatai e Iehova a koe ka liu mai a koe ki a ia

KIA mauokafua to lagomatai e Iehova a koe ka liu mai a koe ki a ia. To lagomatai e ia a koe ke fehagai mo e tau fakaatukehe, ke fakamafola e tau logonaaga fakahukia, mo e ke mafola e manamanatuaga mo e loto ha ko e loto meā. Ti liga liu manako a koe ke fekafekau ki a Iehova fakalataha mo e haau a tau matakainaga. Tatai e tuaga haau mo e tau Kerisiano he senetenari fakamua, ne tohi e aposetolo ko Peteru ki ai: “Ha ko e mena ne hehe a mutolu po ke tau mamoe, ka ko e ainei kua liliu mai tuai a mutolu ke he leoleo mo e leveki he tau agaga ha mutolu.”—1 Peteru 2:25.

Ko e liu mai ki a Iehova ko e mena ne mua atu e mitaki kua maeke ia koe ke taute. Ko e ha? To fakafiafia e koe e loto ha Iehova. (Tau Fakatai 27:11) He iloa e koe, fai logonaaga a Iehova, ti lauia a ia he tau gahua ha tautolu. Ka e nakai peehi e Iehova a tautolu ke fakaalofa mo e fekafekau ki a ia. (Teutaronome 30:19, 20) Taha e tagata pulotu ke he Tohi Tapu ne talahau: “Nakai maeke ke hafagi atu i fafo e loto he tagata. Kua lata ni ke hafagi mai i loto.” He tapuaki ki a Iehova mai he loto fakaalofa hofihofi, ko tautolu ni ka fifili ai ke hafagi e loto. Ka taute pihia e tautolu, kua foaki age e tautolu ki a ia e mena fakaalofa uho—ko e mahani fakamooli ha tautolu—ti fiafia lahi e loto haana. Mooli ai, nakai fai mena ke fakatatai aki e fiafia po ke monuina ha tautolu he foaki e tapuakiaga kua lata ki a Iehova.—Gahua 20:35; Fakakiteaga 4:11.

Mua atu ai, ka liu a koe ke taute e tapuakiaga faka-Kerisiano haau, to fakamakona e manako haau ke he tau mena fakaagaaga. (Mataio 5:6) He puhala fe? Kua manamanatu e tau tagata he lalolagi katoa, ‘Ko e ha ne ha hā hinei a tautolu?’ Kua manako lahi a lautolu ke iloa e tau tali ke he tau hūhū hagaao ke he kakano he moui. Ha hā he tau tagata e manako ia ha kua tufuga pihia he Atua a lautolu. Ne tufuga e ia a tautolu ke moua e fiafia he fekafekau ki a ia. Kua mua atu e fiafia ne moua e tautolu he iloa kua tapuaki a tautolu ki a Iehova mai he loto fakaalofa.—Salamo 63:1-5.

Fakamolemole, manatu kua manako a Iehova ke liu mai a koe ki a ia. Maeke fēfē ia koe ke iloa mooli? Manamanatu: Ne tauteute fakamitaki e porosua nei, mo e loga e tau liogi. Ne fakakite atu he taha motua Kerisiano po ke taha matakainaga e tohi nei ki a koe. Ti omoomoi a koe ke totou ai mo e talia e fekau ne tohi i loto. Ko e tau fakamooliaga oti anei kua nakai nimo e Iehova a koe. Ka kua futia fakatekiteki e ia a koe ke liu mai ki a ia.—Ioane 6:44.

Ti mafanatia a tautolu he iloa kua nakai nimo e Iehova e haana a tau fekafekau ne galo. Ko e mena ia ne loto fakaaue ki ai e matakainaga fifine ko Donna. Pehē a ia: “Ne tafea kehe fakatekiteki au mai he kupu mooli, ka e fa manamanatu au ke he Salamo 139:23, 24, ne talahau: ‘Ko e Atua na e, kia kumi e koe kia au mo e kitekite ke he hoku loto; kia kamatamata e koe au mo e kitekite ke he haku a manamanatu [fakaatukehe]. Mo e kitekite kia au po ke ne ha ia au ha mahani ke mamahi ai; kia takitaki foki e koe au ke he puhala tukulagi.’ Iloa e au ne nakai ko e tagata he lalolagi nei au—ne nakai lata mooli au mo e lalolagi—mo e iloa e au kua latatonu au ke liu atu ke he fakatokatokaaga ha Iehova. Kamata au ke kitia ne nakai toka e Iehova au; kua lata ni au ke kumi e puhala ke liu atu ki a ia. Ti fiafia lahi au he taute pihia e au!”

“Kamata au ke kitia ne nakai toka e Iehova au; kua lata ni au ke kumi e puhala ke liu atu ki a ia”

Ko e liogi pauaki ha mautolu to liu foki a koe ke logona e “fiafia kia Iehova.” (Nehemia 8:10) To nakai tokihala a koe he liu ki a Iehova.

Tau Tali ke he Tau Hūhū ke Liu Mai ki a Iehova

KAMATA FĒFĒ AU?

Kua lata e tagata ne gagao ke liu kamata fakaeneene ke he tau gahua fa mahani haana. Pihia foki, maeke ia koe ke atihake e malolō haau ko e Kerisiano he manamanatu fakahaga ke he tau mena kai fakaagaaga he tau aho takitaha. Ua manatu kua lata ia koe ke taute e tau mena oti he taha e magaaho. Liga fakaaoga e koe e taha magaaho ke totou po ke fanogonogo ke he tapakiaga he Tohi Tapu, kumikumi ke he taha tohi ha tautolu, onoono ke he ha tautolu a faahi kupega hila jw.org, po ke kitekite e taha he tau fakaholoaga ne fakapuloa he jw.org. Taha mena foki, kia eketaha ke fano ke he feleveiaaga he fakapotopotoaga. Mua atu, liogi ki a Iehova mo e ole ki a ia ke lagomatai. “Kia tuku atu kia ia e tau mena oti kua fakaatukehe ai a mutolu, ha ko e mena kua manatu e ia a mutolu.”—1 Peteru 5:7.

“Ne mā foki au ke liogi ha kua nakai gahuahua fakaagaaga he tapuakiaga haaku. He magaaho ne fakamalolō e loto haaku ke liogi, ne ahiahi mai e motua he fakapotopotoaga ki a au. Ne lagomatai e ia au ke iloa kua nakai tiaki e Iehova au. Ne fakamafana he motua ia ki a au he totou e Tohi Tapu he tau aho takitaha. He magaaho ne taute pihia e au, ne moua e au e malolō ke liu ke he tau feleveiaaga. Fai magaaho, ne kamata au ke liu fakalataha ke he fekafekauaga. Fiafia lahi au ha kua nakai tiaki e Iehova au.”—Eeva.

TO FĒFĒ E FAKAPOTOPOTOAGA KI A AU?

Kia mauokafua a koe to fakafeleveia mafanatia he tau matakainaga he fakapotopotoaga a koe. To nakai tuhituhi po ke fakafili a koe, ka e fakakite e fakaalofa mooli ha lautolu ki a koe mo e taute ha mena kua maeke ia lautolu ke fakamalolō a koe.—Heperu 10:24, 25.

“Ne fuafuakelea au ke liu ke he Fale he Kautu. Manamanatu au ke he puhala ka fehagai mai e tau kapitiga ki a au. Taha he tau matakainaga fifine motua ne haia i ai he 30 e tau kua mole ne pehē ki a au, ‘Fiafia ha ma mea he hau ki kaina!’ Ne hokotia mooli ai ke he loto haaku. Haia mooli au i kaina.”—Javier.

“Ne fano au ke he Fale he Kautu ti nofo he atu nofoa i tua ke ua kitia he tau matakainaga au. Ka e tokologa ne kamata ke manatu au mai he tau magaaho ne fano au he vahā tote. Ne fakafeleveia e lautolu au mo e kuku fakaalofa hofihofi mai ki a au ti logona hifo e au e mafola mooli. Tuga ni kua hau au ki kaina.”—Marco.

TO LAGOMATAI FĒFĒ HE TAU MOTUA AU?

To mahani totonu e tau motua ki a koe. To nava a lautolu ki a koe ke he manako haau ke liu fakamalolō “hau a fakaalofa fakamua.” (Fakakiteaga 2:4) To lagomatai e lautolu a koe mai he fakaalofa hofihofi “mo e loto he mahani molu” ke fakahako e tau mena hehē haau ne taute. (Kalatia 6:1; Tau Fakatai 28:13) To fakatokatoka he tau motua e taha matakainaga ke fakaako mo koe, liga he taha tohi tuga e Fakatata Atu ki a Iehova po ke “Keep Yourselves in God’s Love.” Kia mauokafua to fakamafana mo e lalago katoatoa he tau motua a koe.—Isaia 32:1, 2.

“Magahala he valu e tau ne nakai gahuahua fakaagaaga au, ne fakatumau e tau motua ke matutaki mai ki a au. Taha e aho, ne fakakite mai he motua ki a au e tau ata ha maua ne poki e ia. Ne liu au ke manatu e loga he tau mena mitaki ti kamata au ke manako lahi ke he fiafia ne logona hifo e au he magaaho ne fekafekau au ki a Iehova. Ko e tau motua ne lagomatai fakaalofa au ke liu fakatoka e fakaholoaga fakaagaaga.”—Victor.

“To Fakamalolō e Ia a Koe”

Ko e tohi lologo ha tautolu, Lologo ki a Iehova, kua ha hā i ai loga e lologo omoomoi ne kua fakamafana mo e fakamalolō a koe he liu a koe ke kamata e gahua fakaagaaga haau. Ma e fakatai, manamanatu ke he tau kupu he lologo numera 60. Fakavē ai ke he tau kupu he 1 Peteru 5:10, ko e mataulu he lologo ia “To Fakamalolō e Ia a Koe.”

Ha ko e kupu mōli mai he Atua

Ti ui mai a koe he pouligia.

Mailoga he Atua hāu a loto makai

Ke kumi a Ia ti omaoma.

Mavehe ai e koe he liogi,

Ke taute e finagalo hāna.
Foaki he Atua e Tama hāna ni;

Manako a Ia ke kautū a koe.

Ai taofi hāna mena fakalofa,

Ti fakamalolō tumau a koe.

To nakai nimo e Ia hāu a tua;

Leveki mau a tautolu oti.

(TALI)

He toto ha Keriso ne fakatau a koe.

Pule he Atua a koe he mogonei.

To takitaki mo e puipui ai ki a koe.

To fakamalolō tumau e Ia a koe.