Ne taute e Iehova * ko e Atua e fakamauaga fakamua. Ne talahau he Tohi Tapu ne eke e ia e fifine fakamua “ti ta mai ai e ia kia Atamu.” Ne fiafia lahi a Atamu mo e pehē: “Ko e hui ni hanai he haku hui, mo e kakano he haku kakano.” (Kenese 2:22, 23) Manako agaia a Iehova ke fiafia e tau hoa mau.

Ka mau a koe, liga manatu a koe to mitaki katoatoa e tau mena oti. Ka e mooli, ko e taane mo e hoana kua fefakaalofaaki lahi to fai lekua foki a laua. (1 Korinito 7:28) He porosua nei, to moua e koe e tau matapatu fakaakoaga Tohi Tapu, ti ka fakagahua ai, to maeke ke fiafia e fakamauaga mo e magafaoa haau.—Salamo 19:8-11.

PEHĒ E TOHI TAPU: Ko e taane ko e ulu he magafaoa.—Efeso 5:23.

Kaeke ko koe ko e taane, amanaki a Iehova ki a koe ke leveki e hoana haau mo e fakaalofa hofihofi. (1 Peteru 3:7) Ne eke e Ia e hoana haau mo lagomatai ki a koe ti manako a Ia ke fakalilifu mo e fakaalofa a koe ki a ia. (Kenese 2:18) Kua lata ia koe ke fakaalofa lahi ke he hoana haau ti makai a koe ke tuku fakamua e tau manako haana ke he haau.—Efeso 5:25-29.

Kaeke ko koe ko e hoana, amanaki a Iehova ki a koe ke fakalilifu hokulo ke he taane haau mo e lagomatai e taane ke taute e matagahua haana. (1 Korinito 11:3; Efeso 5:33) Lalago e tau fifiliaga haana ti gahua fakalataha mo ia. (Kolose 3:18) Ka taute pihia, to fulufuluola a koe ke he taane haau mo Iehova.—1 Peteru 3:1-6.

KO E MENA HAAU KA TAUTE:

• Hūhū ke he hoa haau ko e puhala fe kua maeke ia koe ke eke mo taane po ke hoana mitaki. Fanogonogo fakamitaki, mo e taute e mena kua maeke ia koe ke holo ki mua

• Kia fakauka. To fai magaaho ke iloa e mua tokoua e puhala ke fakafiafia he taha e taha

PEHĒ E TOHI TAPU: Lata ia koe ke manamanatu ke he tau manako he hoa mau haau. (Filipi 2:3, 4) Leveki e hoa haau ko e koloa uho, he manatu kua poaki e Iehova ke he tau fekafekau haana ke “mahani molu . . . ke he tau tagata oti.” (2 Timoteo 2:24) “Ha ha i ai e tagata kua vagahau, ti tuga ne tuina ai e tau tagata he pelu; ka ko e alelo he tagata iloilo ke malolo ai.” Ti fifili fakamitaki e tau kupu haau. (Tau Fakatai 12:18) To lagomatai he agaaga ha Iehova a koe ke vagahau mo e mahani totonu mo e fakaalofa.—Kalatia 5:22, 23; Kolose 4:6.

KO E MENA HAAU KA TAUTE:

• Liogi ma e lagomatai ke fakatotoka e loto mo e manamanatuaga ato fakatutala ke he tau mena aoga lahi mo e hoa haau

• Manamanatu fakamitaki ke he tau mena haau ka talahau mo e puhala ka talahau ai

PEHĒ E TOHI TAPU: Ka mau a koe, kua eke a koe mo “tino taha” mo e hoa mau haau. (Mataio 19:5) Ka ko e tau tagata takitokotaha agaia ni a mua mo e kehekehe e tau manatu. Ti lata a mua ke fakaako ke loto fakalataha he tau manatu mo e tau logonaaga. (Filipi 2:2) Kua latatonu ke kaufakalataha ka taute e tau fifiliaga. Pehē e Tohi Tapu: “Kua fakamau e tau mena kua manamanatu ki ai ke he fifiliaga.” (Tau Fakatai 20:18) Fakaatā e tau matapatu fakaakoaga he Tohi Tapu ke takitaki a mua he taute tokoua e tau fifiliaga aoga.—Tau Fakatai 8:32, 33.

KO E MENA HAAU KA TAUTE:

• Talahau e tau logonaaga haau ke he hoa mau haau, nakai ko e tau vala tala ni po ke tau manatu

• Fakatutala mo e hoa mau haau ato fakatoka e tau matagahua aoga