KITIALA ko e heigoa kua tupu he magaaho nei. Ko Atamu mo Eva kua tuku ki tua mai he katene fulufuluola ko Etena. Iloa nakai e koe ko e ha?

Ha kua taute e laua taha mena kelea muitui. Ti kua fakahala e Iehova a laua. Iloa nakai e koe e mena kelea ne taute e Atamu mo Eva?

Kua taute e laua e taha mena ne tala age e Atua ke ua taute e laua. Kua pehē e Atua kua maeke a laua ke kai e tau fua mai he tau akau he katene. Ka e mai he taha e akau ne pehē e Atua ke ua kai, neke mamate a laua. Kua toka e ia e akau ia ma haana ni. Ti iloa e tautolu kua hepe ke uta e mena he taha tagata, pihia nakai? Ko e heigoa la ne tupu?

Taha e aho ne nofo tokotaha a Eva he katene, ne vagahau e gata ki a ia. Manamanatu la ke he mena ia! Kua tala age ai ki a Eva ke kai e fua he akau ne pehē e Atua ke ua kai e laua. He magaaho ne tufuga e Iehova e tau gata ne nakai tufuga e ia a lautolu ke maeke ke tutala. Ko e kakano he mena nei kua fai tagata kehe ne fakaohooho e gata ke vagahau. Ko hai a ia?

Nakai ko Atamu. Ti ko e taha mai ni he tau mena ne tufuga he Atua fakamua atu, ato tufuga e ia e lalolagi. Ko lautolu ia ko e tau agelu ti nakai maeke ke kitia e tautolu. Ko e agelu nei kua to lahi haana fakatokoluga. Kua kamata a ia ke manamanatu kua lata ni a ia ke pule tuga e Atua. Ti manako a ia ke omaoma e tau tagata ki a ia ka e nakai omaoma ki a Iehova. Ko ia ko e agelu ne fakaohooho e gata ke tutala.

Kua maeke he agelu nei ke fakavaia a Eva. He magaaho ne tala age a ia ke he fifine, to faliu a ia ke tuga e Atua ka kai e fua he akau, ti talitonu e fifine. Ti kai ai e ia, ti pihia foki mo Atamu. Ne liuliu a Atamu mo Eva ke he Atua, ko e kakano haia ne galo ai e katene fulufuluola ko e kaina ha laua.

To eketaha e Atua he taha aho ke eke e lalolagi katoa mo katene fuluola tuga a ia i Etena. To iloa e tautolu he magaaho fakamui e vala haau ka liga maeke ia koe ke lagomatai ke taute pihia. Ka ko e magaaho nei, o mai la ke kitia ko e heigoa e mena ne tupu ki a Atamu mo Eva.