MANAKO a Iosefa ke iloa kua hemu mo e favale agaia nakai e lafu taokete toko 10 haana. Ti pehē a ia: ‘Ko e tau tagata toko a mutolu. Kua o mai a mutolu ke toko e tau faahi toka noa he motu ha mautolu.’

‘Nakai, ai pihia a mautolu,’ he talahau e lautolu. ‘Ko e tau tagata mahani fakamooli a mautolu. Ko e lafu taha a mautolu. Na toko 12 a mautolu. Ka kua nakai ha i ai e taha, ti ko e tama fakamui kua ha ha i kaina mo e matua taane ha mautolu.’

Ne fakatupua a Iosefa ke nakai talitonu ki a lautolu. Ne tuku e ia he fale puipui e taha lafu ko Simeona, ka e fakatoka e faoa ne toe ke uta e tau mena kai ti ō ki kaina. Ka e tala age a ia ki a lautolu: ‘Ka liliu mai a mutolu, kia ta mai e mutolu ha mutolu a matakainaga fakamui mo mutolu.’

He liliu atu a lautolu ke he kaina i Kanana, ne tala age he lafu ke he matua taane ha lautolu e tau mena oti ne tutupu. Ne momoko lahi a Iakopo. ‘Kua ai tuai fai Iosefa,’ he ui e ia, ‘ti kua ai fai Simeona foki mogonei. To nakai fakatoka e au a mutolu ke uta haaku tama taane fakamui ko Peniamina.’ Ka ko e magaaho ne teitei oti e tau mena kai ha lautolu, ne fakatoka e Iakopo a Peniamina ke uta e lautolu ki Aikupito ke maeke a lautolu ke moua foki falu mena kai.

Magaaho nei ne kitia e Iosefa e lafu haana hane o mai. Kua fiafia lahi a ia ke kitia e tehina tote haana ko Peniamina. Mooli, nakai fai ia lautolu ne iloa ko e tagata he tuaga tokoluga nei ko Iosefa. Ne taute e Iosefa he magaaho nei taha mena ke kamatamata aki e tau lafu toko 10 haana.

Ne fekau e ia e tau fekafekau haana ke fakapuke oti e tau taga ha lautolu aki e tau mena kai. Ka e nakai fakailoa ki a lautolu, ne fekau foki e ia ke tuku e kapiniu pauaki haana ke he taga ha Peniamina. Nakaila mamao he tuku fenoga atu a lautolu oti, ne fakafano atu e Iosefa e tau fekafekau haana ke tutuli atu ki a lautolu. He moua a lautolu, ne pehē e tau fekafekau: ‘Ko e ha ne kaiha e mutolu e kapiniu he iki ha mautolu?’

‘Nakai kaiha e mautolu e kapiniu haana,’ he ui oti he lafu. ‘Ka moua e mutolu e kapiniu he taha ia mautolu, kia tamate e tagata ia.’

Ne veuveu he tau fekafekau e tau taga oti, ti moua e lautolu e kapiniu he taga ha Peniamina, tuga ne kitia e koe he mena ē. Pehē e tau fekafekau: ‘Maeke a mutolu ne toe ke ō, ka e liu mai a Peniamina mo mautolu.’ Ko e heigoa he lafu toko 10 ka taute mogonei?

Ne liliu a lautolu oti mo Peniamina ke he fale ha Iosefa. Ne tala age a Iosefa ke he lafu haana: ‘Kia ō a mutolu oti ki kaina, ka e nofo a Peniamina hinei mo fekafekau haaku.’

Ne vagahau hake a Iuta he magaaho nei mo e pehē: ‘Ka liu au ki kaina ka e nakai ha ha e tama taane, to mate e matua taane haaku ha kua ofania lahi mahaki e ia e tama. Ti fakamolemole la, toka au hinei mo fekafekau haau, ka e fakatoka e tama ke fano ki kaina.’

Ne kitia e Iosefa kua hiki tuai haana lafu. Kua nakai hemu mo e kua totonu tuai a lautolu. O mai la ke kumikumi ko e heigoa ha Iosefa ka taute he magaaho nei.