FAKAALOFA nakai a koe ke he tagata gagao nei? Ko e higoa haana ko Iopu, ti ko e fifine ko e hoana haana. Iloa nakai e koe ko e heigoa haana ne tala age ki a Iopu? ‘Kia vagahau kelea a a koe ke he Atua, mo e mate ai a koe.’ O mai la ke kitia ko e ha ne vagahau pihia ai a ia mo e ko e ha ne matematekelea lahi ai pihia a Iopu.

Ko Iopu ko e tagata tua fakamooli ne omaoma ki a Iehova. Na nofo a ia he motu ko Usa, nakai mamao mo Kanana. To lahi e fakaalofa ha Iehova ki a Iopu, ka ko e mena ha i ai taha ne vihiatia lahi ki a ia. Iloa nakai e koe ko hai?

Ko Satani a ia ko e Tiapolo. Manatu, ko Satani ko e agelu kelea ne vihiatia lahi ki a Iehova. Kua maeke ia ia ke omoi a Atamu mo Eva ke liuliu ki a Iehova, ti piko na ia to maeke foki ia ia ke omoi e tau tagata oti ke liuliu ki a Iehova. Ka kua maeke nakai ia ia? Nakai. Manamanatu la ke he tokologa he tau taane mo e tau fifine ne tua fakamooli ne kua fakaako a tautolu ki ai. Toko fiha ne iloa e koe e tau higoa?

Mole e mamate ha Iakopo mo Iosefa i Aikupito, ko Iopu e tagata ne mua atu e tua ki a Iehova he lalolagi katoa. Manako a Iehova ke iloa e Satani, to nakai maeke ia ia ke omoi e tau tagata oti ke kelea, ti pehe a ia: ‘Onoono la ki a Iopu. Ko e tua fakamooli ha a ia haana ki a au.’

‘Tua fakamooli a ia,’ he totoko atu e Satani, ‘ha kua fakamonuina e koe a ia ke he tau mena loga. Ka e ka utakehe e koe e tau mena nei, to kaiaalu e ia a koe.’

Ti pehe a Iehova, ‘Utakehe e koe e tau mena ia. Taute e tau mena kelea oti ne manako a koe ke taute ki a Iopu. To kitia ko e kaiaalu nakai e ia au. Ko e mena ni ke iloa mooli e koe ke aua neke kelipopo a ia.’

Fakamua, fakaohooho e Satani e tau tagata ke kaiha e tau povi mo e tau kamela ha Iopu ti tamate foki haana tau mamoe. Ti kelipopo foki e ia e tau fanau taane mo e fifine toko 10 haana ha ko e matagi lahi. Ko e taha mena foki ne fakahoko atu e Satani e gagao kelea muitui ki a Iopu. To lahi e matematekelea ha Iopu. Ko e mena haia ne pehē ai e hoana ha Iopu ki a ia ‘Kia vagahau kelea a a koe ke he Atua, mo e mate ai a koe.’ Ka e nakai taute pihia e Iopu. Pihia foki e tau kapitiga pikopiko tokotolu ne o mai mo e pehē ki a ia kua kelea lahi e puhala moui haana. Ka e fakatumau ni e tua ha Iopu.

Kua maeke he mena nei ke fakafiafia aki a Iehova, ti hoko ke he magaaho fakamui kua fakamonuina e ia a Iopu tuga he kitia e koe i loto he fakatino. Ne fakamaulu e Ia a ia mai he haana gagao. Liu foki a Iopu moua toko 10 e fanau fulufuluola, fakalahi ua e loga he tau povi, tau mamoe mo e tau kamela haana tuga fakamua.

To tua fakamooli tumau nakai a koe ki a Iehova tuga a Iopu? Kaeke kua pihia, to fakamonuina pihia foki he Atua a koe. To maeke a koe ke moui tukulagi ka liu e lalolagi katoa ke fulufuluola tuga ni e katene i Etena.