LOGA e maaga i Kanana he magaaho nei kua amaamanaki ke tau ki a Isaraela. Manatu a lautolu to kautū a lautolu. Ka e nakai manatu pihia e tau tagata he maaga tata mai ko Kipeona. Talitonu a lautolu ko e Atua ne lagomatai e tau Isaraela, ti nakai manako a lautolu ke tau ke he Atua. Ti iloa nakai e koe e mena ne taute he tau tagata Kipeona?

Ne fifili a lautolu ke tauteute tuga na nonofo a lautolu he taha matakavi mamao ligo. Ti ko e falu tagata taane mogoia ne tui e tau tapulu tuai mo e tau afialoalohui popo. Ne tuku e lautolu e tau taga popo ki luga he tau asini ha lautolu, ti uta foki falu areto magomago tuai. Ti o atu a lautolu ki a Iosua mo e pehē atu: ‘Kua o mai a mautolu nai he motu mamao, ha kua logona e mautolu hagaao ke he haau a Atua mua ue atu ko Iehova. Kua logona e mautolu e tau mena oti ne taute e ia ma mutolu i Aikupito. Ti pehē mai ha mautolu a tau patu ki a mautolu ke tauteute e tau kai ke lata mo e fenoga ti o mai mo e pehē ki a koe: “Ko mautolu ko e ha mutolu a tau fekafekau. Kia taute e maveheaga ke ua tau mai a mutolu ki a mautolu.” Kitia e mutolu ha mautolu a tau tapulu kua mahehe ha kua mamao e hala he fenoga mo e ha mautolu a tau areto kua tuai mo e magomago.’

Ne talitonu a Iosua mo e falu takitaki ke he tau Kipeona. Ti taute ai e lautolu e maveheaga ke nakai tau ki a lautolu. Ka e tolu e aho he mole ti iloa ai e lautolu ko e tau tagata Kipeona na nonofo tata mai.

‘Ko e ha ne pehē mai ai a mutolu ko e mena o mai a mutolu he motu mamao?’ he huhū e Iosua ki a lautolu.

Ne tali e tau Kipeona: ‘Kua taute pihia e mautolu ha kua talahau mai ki a mautolu ko e haau a Atua ko Iehova kua mavehe ke foaki atu oti e kelekele nei ha Kanana ki a mutolu. Ti matakutaku a mautolu neke kelipopo e mutolu a mautolu.’ Ka kua taofi mau ni e tau Isaraela ke he ha lautolu a maveheaga, ti nakai kelipopo e lautolu e tau Kipeona. Ka e eke a lautolu mo tau tupa ha lautolu.

Kua ita lahi e patuiki ha Ierusalema ha kua taute he tau Kipeona e mafola mo Isaraela. Ti pehē age a ia ke he tokofā e patuiki: ‘O mai a mo e lagomatai au ke tau mo Kipeona.’ Ti ko e mena ia ni ne taute he tau patuiki tokolima nei. Ko e iloilo nakai a ia he tau Kipeona ke taute e mafola mo Isaraela, ha ko e magaaho nei kua fakalagalaga e tau patuiki nei ke o mai ke tau ki a lautolu? To kitia e tautolu.