KUA 10 tuai e tau he mole he uta e Nepukanesa e tau tagata Isaraela ne mua atu e iloilo ki Papelonia. Ti onoono la mogonei ke he mena kua tupu! Kua huhunu hifo a Ierusalema. Ti ko e tau Isaraela ne nakai mamate kua uta ai mo tau pagotā ki Papelonia.

Manatu, ne tala age tuai he tau perofeta ha Iehova e mena ka tupu ka nakai hiki he tau tagata e tau puhala kelea ha lautolu. Ka e nakai fanogonogo e tau Isaraela ke he tau perofeta. Ne matutaki ni a lautolu ke tapuaki ke he tau atua fakavai ka e nakai ki a Iehova. Ti kua lata ni e tau tagata ke fakahala. Iloa e tautolu ha kua tala mai he perofeta he Atua ko Esekielu ki a tautolu e tau mena kelea he tau Isaraela ne taute.

Iloa nakai e koe ko hai a Esekielu? Ko ia taha he tau fuata taane ne uta he Patuiki ko Nepukanesa ki Papelonia he molea e 10 e tau ato hoko e moumouaga lahi nei ki Ierusalema. Ko Tanielu mo e tau kapitiga tokotolu haana ko Sataraka, Mesako, mo Apetiniko, ne uta foki ki Papelonia he magaaho ia.

He nofo agaia a Esekielu i Papelonia, ne fakakite age e Iehova e tau mena kelea kua tutupu he faituga i Ierusalema. Ne taute fakamana e Iehova e mena nei. Ne nofo agaia a Esekielu i Papelonia, ka e fakaatā e Iehova a ia ke kitia e tau mena oti kua tutupu he faituga. Ti kua fakalialia e tau mena ne kitia e Esekielu!

‘Onoono la ke he tau mena vihiatia he tau tagata ne fa e taute i loto he faituga,’ he tala age e Iehova ki a Esekielu. ‘Onoono ke he tau kaupā kua puke he tau fakatino he tau gata mo e falu manu. Ti onoono foki ke he tau Isaraela hane tapuaki ki ai!’ Ne maeke a Esekielu ke kitia e tau mena nei, ti tohi hifo e ia e tau mena kua tutupu.

‘Kitia nakai e koe e tau mena he tau takitaki ha Isaraela kua taute fufū?’ he hūhū e Iehova ki a Esekielu. E, maeke foki a ia ke kitia e mena nei. Ha ha i ai toko 70 e tagata taane kua tapuaki oti a lautolu ke he tau atua fakavai. Pehē a lautolu: ‘Nakai kitia e Iehova a tautolu. Kua toka e ia e motu.’

Ti fakakite age e Iehova ki a Esekielu e falu fifine he gutuhala he faituga he faahi tokelau. Kua nonofo a lautolu i ai mo e tapuaki ke he atua fakavai ko Tamusa. Ti onoono la ke he tau tagata taane he gutuhala he faituga ha Iehova! Kavi ke he 25 a lautolu. Ne kitia e Esekielu a lautolu. Kua fakaveveli fakafohifo a lautolu ke he faahi uta mo e tapuaki ke he laā!

‘Kua nakai fakalilifu e tau tagata nei ki a au,’ he talahau e Iehova. ‘Ne nakai ni taute e lautolu e tau mena kelea ka kua o mai foki ki loto he faituga haaku mo e taute ai!’ Ti mavehe a Iehova: ‘To logona e lautolu e malolō he ita haaku. Mo e to nakai fakaalofa au ki a lautolu ka moumou a lautolu.’

Kavi ke he tolu ni e tau he mole e fakakite age e Iehova e tau mena nei ki a Esekielu ti totoko atu e tau Isaraela ke he Patuiki ko Nepukanesa. Ti fina atu a ia ke tau ki a lautolu. Taha mo e hafa e tau he mole ne moumou he tau Papelonia e tau kaupā i Ierusalema ti huhunu katoatoa e maaga. Laulahi he tau tagata ne mamate po ke uta ko e tau pagotā ki Papelonia.

Ko e ha ne fakaatā e Iehova e moumouaga kelea lahi nei ke hoko ke he tau Isaraela? E, ha kua nakai fanogonogo a lautolu ki a Iehova mo e nakai omaoma a lautolu ke he tau fakatufono haana. Fakakite he mena nei e aoga ma tautolu ke taute tumau e tau mena ne talahau he Atua.

He magaaho fakamua ne gahoa ni e tagata ne fakaatā ke nonofo he motu ko Isaraela. Ne kotofa he patuiki ko Nepukanesa e tagata Iutaia ne higoa ko Ketalia ke leveki e tau tagata nei. Ka kua tamate he falu Isaraela a Ketalia. Ne matakutaku e tau tagata mogonei neke o mai e tau Papelonia ke moumou a lautolu oti ha ko e mena kelea nei ne tupu. Ti fakaohooho e lautolu a Ieremia ke ō mo lautolu, mo e fehola a lautolu ki Aikupito.

Ko e mena ia kua nakai fai tagata e motu ko Isaraela. Ke he 70 e tau tau ne nakai fai tagata ne nonofo he motu. Ne toka noa katoatoa ai. Ka kua mavehe e Iehova to liuaki mai e ia e tau tagata haana ke he motu ka mole e 70 e tau. Ka e he magaaho ia, ko e heigoa kua tupu ke he tau tagata he Atua he motu ko Papelonia ne ta atu a lautolu ki ai? O mai a tautolu ke kitia.