KO E heigoa kua tupu he mena nei? Kua kai galue lahi e tau tagata. Ne uiina he patuiki ha Papelonia taha e afe he tau tagata talahaua. Ti fakaaoga e lautolu e tau kapiniu auro mo e tau kapiniu ario mo e tau polu ne tamai he faituga ha Iehova i Ierusalema. Ka e amanaki ni ti hoko mai e tau matalima he tagata i luga ti kamata ke tohi ke he kaupā. Ne matakutaku e tau tagata oti.

Ko Pelesara ko e mokopuna ha Nepukanesa e patuiki he mogonei. Ne hea fakaleo lahi a ia ke tamai e tau tagata iloilo haana. ‘Ko e tagata ka totou e mena na kua tohi mo e fakailoa mai ki a au e kakano,’ he ui he patuiki ‘to moua loga e tau koloa mo e to eke mo pule ke toluaki he kautu.’ Ka e nakai fai he tau tagata iloilo ne maeke ke totou e tau matatohi he kaupā, po ke talahau e kakano.

Ne logona he matua fifine he patuiki e hohā ti hau a ia ke he poko kai lahi. ‘Fakamolemole ua matakutaku,’ he tala age e ia ke he patuiki. ‘Ha ha i ai e taha tagata he kautu haau kua iloa e tau atua tapu. Magaaho ne patuiki haau a matua tupuna ko Nepukanesa ne fakatū he patuiki a ia mo takitaki he haana a tau tagata iloilo oti. Ko e higoa haana ko Tanielu. Tamai a ia, to tala atu e ia ki a koe e kakano he tau mena oti nei.’

Ti tamai ai a Tanielu he mogoia ni. He mole e nakai talia ke uta ha mena fakaalofa, ne kamata a Tanielu ke talahau e kakano ne utakehe e Iehova a Nepukanesa ko e matua tupuna ha Pelesara he tuaga patuiki. ‘Ne fakatokoluga lahi a ia,’ he ui e Tanielu. ‘Ti fakahala e Iehova a ia.’

‘Ka ko koe,’ he tala age e Tanielu ki a Pelesara, ‘na iloa e koe e tau mena oti ne tutupu ki a ia, ka kua fakatokoluga ni a koe tuga a Nepukanesa. Kua ta mai e koe e tau kapiniu mo e tau polu mai he faituga ha Iehova ti inu mai i ai. Ne fakaheke a koe ke he tau atua akau mo e maka, mo e nakai fakalilifu a koe ke he haau a Tufuga Mua Ue Atu. Ko e kakano ia ati fakafano mai he Atua e lima ke tohi e tau kupu nei.

‘Hanai e tau mena kua tohi,’ he talahau e Tanielu: ‘MENE, MENE, TIKELE mo e UPERESI.’

‘Ko e kakano he MENE kua totou he Atua e kautu haau ti kua fakahiku ai e ia. Ko e kakano he TIKELE kua fafati a koe ke he fua tautau, ti nakai kitia ha mena mitaki ia koe. Ko e kakano he UPERESI kua foaki age haau a kautu ke he tau Metai mo e tau Peresia.’

He vagahau agaia a Tanielu, ne fitā e tau Metai mo e tau Peresia he kamata ke totoko atu ki Papelonia. Ne fofō e lautolu e maaga mo e tamate a Pelesara. Kua fakamooli e tohi lima he kaupā he pō ia ni! Ka ko e heigoa ka tupu ke he tau Isaraela mogonei? To nakai leva ti iloa e tautolu, ka e fakamua o mai ke kitia e mena ka hoko ki a Tanielu.