KITIA nakai e koe e fetu kikila nā ne tuhi e taha he tau tagata nei ki ai? Magaaho ne toka e lautolu a Ierusalema, ne kitia e fetu. Na o mai e tau tagata nei he Faahi Uta, ti fakaako a lautolu ke he tau fetu. Ne talitonu a lautolu kua takitaki he fetu foou nei a lautolu ke he taha tagata talahaua.

He hohoko e tau tagata nei ki Ierusalema, ne hūhū a lautolu: ‘Ko fe e tama ka eke mo patuiki he tau Iutaia?’ Ko e ‘tau Iutaia’ ko e taha higoa ma e tau Isaraela. ‘Na kitia mua e mautolu e fetu he tama he haia a mautolu he Faahi Uta,’ he talahau e lautolu, ‘ti kua o mai a mautolu ke tapuaki ki a ia.’

Magaaho ne logona ai e Herota, ko e patuiki i Ierusalema, ne ita a ia. Ne nakai manako a ia ke fai patuiki foki ke hukui a ia. Ti ui atu a ia ke he tau takitaki ekepoa mo e hūhū: ‘To fanau i fe e patuiki ne mavehe mai?’ Ne tali e lautolu: ‘Pehē e Tohi Tapu i Petelehema.’

Ti ui a Herota ke he tau tagata taane mai he Faahi Uta, mo e pehē: ‘O atu ke kumi e tama tote. Ka moua e mutolu a ia, ti fakailoa mai ki a au. Fia fina atu au ke tapuaki foki ki a ia.’ Ka ko e mena mooli, kua manako a Herota ke kumi e tama tote ke tamate a ia!

Ne holo atu ai e fetu i mua ha lautolu ki Petelehema, mo e tū i luga he matakavi ne ha ha i ai e tama tote. Magaaho ne o atu e tau tagata taane ki loto he fale, ne kitia e lautolu a Maria mo e tama tote ko Iesu. Ne tamai e lautolu e tau mena fakaalofa mo e age ai ki a Iesu. Ka e fakamui ne hataki e Iehova e tau tagata ke he puhala he miti ke ua liliu ki a Herota. Ti liliu a lautolu ke he motu ha lautolu he taha hala foki.

Magaaho ne iloa e Herota kua liliu tuai e tau tagata mai he Faahi Uta ki kaina, ne ita lahi a ia. Ti poaki e ia ke tamate e tau tama taane oti i Petelehema ne kua ua mo e tatao hifo e tau tau moui. Ka kua fitā e hataki e Iehova a Iosefa he puhala he miti, ti fehola a Iosefa mo e magafaoa haana ki Aikupito. Fakamui, he mogo ne iloa e Iosefa kua mate a Herota, ne uta e ia a Maria mo Iesu ti liliu ke he kaina i Nasareta. Ko e matakavi nei ne tupu hake a Iesu.

Ko hai he manatu e koe ne fakakikila e fetu foou ia? Manatu, na o atu mua e tau tagata taane ki Ierusalema he mole e kitia e fetu. Ne manako a Satani ko e Tiapolo ke tamate e Tama he Atua, ti iloa e ia to lali e Patuiki ko Herota i Ierusalema ke tamate a ia. Ti mooli ai, ko Satani ne fakakikila e fetu ia.