NAKAI leva he mole e fakamalolō e tokoua e tagata kaiole matapouli, ne hoko atu a Iesu ke he maaga tote ne tata ki Ierusalema. Ne tala age a ia ke he tokoua e tutaki haana: ‘O ke he maaga, to moua e mua e punua asini. Vevete ai ti tamai ai ki a au.’

Magaaho ne tamai e asini ki a ia, ne nofo a Iesu i luga. Ti heke e ia he fina atu ki Ierusalema ne nakai mamao lahi. Mogo ne tata a ia ke he maaga, ne o mai e moto tagata ke feleveia mo ia. Laulahi ia lautolu ne utakehe ha lautolu a tau tapulu loloa ti faliki ai ke he puhalatū. Falu ne hele e tau lā mai he tau paama. Ne tuku foki e lautolu e tau mena nei he puhalatū, ti tauhea a lautolu: ‘Kia fakamonuina he Atua e patuiki kua hau ke he higoa ha Iehova!’

He vahā fakamua i Isaraela ko e tau patuiki foou kua heke he tau punua asini mo e o atu ki Ierusalema ke fakakitekite a lautolu ni ke he tau tagata. Kua pihia e mena kua taute e Iesu. Ti kua fakakite he tau tagata nei kua manako a lautolu ke eke a Iesu mo patuiki ha lautolu. Ka e nakai manako e tau tagata oti ki a ia. Kitia ai e tautolu he mena ka tupu he mogo ka fina atu a Iesu ke he faituga.

He faituga ne fakamalolō e Iesu e tau tagata matapouli mo e kulikuli. Magaaho ne kitia he tau fanau ikiiki e mena nei, ne tauhea a lautolu he fakaheke ki a Iesu. Ka kua fakaita he mena nei e tau ekepoa, ti tala age a lautolu ki a Iesu: ‘Logona nakai e koe e tau mena he tau fanau ne fa e talahau?’

‘E, logona e au,’ he tali e Iesu. ‘Mena nakai kia totou e mutolu i loto he Tohi Tapu ne pehē ai: “To tamai he Atua e fakahekeaga mai he tau gutu he tau fanau ikiiki?”’ Ti matutaki e tau fanau ke fakaheke e patuiki he Atua.

Manako a tautolu ke tuga e tau fanau ia, pihia nakai? Liga lali e falu tagata ke taofi a tautolu he tutala hagaao ke he kautu he Atua. Ka e to fakatumau ni a tautolu ke tala age ke he falu hagaao ke he tau mena ofoofogia ha Iesu ka taute ma e tau tagata.

Ne nakai la hoko e magaaho ke pule fakapatuiki a Iesu he mogo ne nofo agaia a ia he lalolagi. To hoko mai a fe e magaaho ia? Kua fia iloa e tau tutaki ha Iesu. To totou e tautolu e mena nei he vala i mua.