KITIA la e mena kelea lahi kua tupu! Kua tamate a Iesu. Ne tuku hake e lautolu a ia he akau. Ne kua pao fao e tau lima mo e tau hui haana. Ko e ha kua manako e taha tagata ke taute e mena nei ki a Iesu?

Ha ko e falu tagata kua vihiatia ki a Iesu. Iloa nakai a koe ko hai a lautolu? Taha ia lautolu ko e agelu mahani kelea ko Satani ko e Tiapolo. Ko ia ne omoomoi a Atamu mo Eva ke ua omaoma ki a Iehova. Ti ko Satani ne omoomoi e tau fī ha Iesu ke taute e mena kelea nei.

Ato pao fao a Iesu ke he akau he fakatino nei, ne fitā e favale e tau fī haana ki a ia. Manatu nakai e puhala ne o mai a lautolu ke he katene ko Ketesemane ke uta a ia? Ko hai e tau fī ia? E, ko e tau takitaki lotu a lautolu. Ati o mai la ke kitia e mena ka tupu.

He magaaho ne uta he tau takitaki lotu a Iesu, ne fehola e tau aposetolo haana. Ne toka tokotaha e lautolu a Iesu mo e haana tau fī, ha kua matakutaku a lautolu. Ka e nakai o mamao e tau aposetolo ko Peteru mo Ioane. Ne mumui atu a laua ke kitia e mena ka tupu ki a Iesu.

Kua uta he tau ekepoa a Iesu ke he tagata taane motua ko Ana, ko e ekepoa ne mua he mogo fakamua. Ne nakai nonofo loa e moto tagata i ai. He mogonei, ne uta e lautolu a Iesu ke he fale ha Kaiafa, ko e ekepoa ne mua he magaaho nei. Tokologa e tau takitaki lotu ne fakapotopoto mai ke he fale haana.

He fale ha Kaiafa ne taute e lautolu e fakafiliaga. Ne tamai e tau tagata ke talahau e tau mena pikopiko hagaao ki a Iesu. Kua talahau oti he tau takitaki lotu: ‘Kua lata a Iesu ke tamate.’ Ti tauanu e lautolu e tau mata haana mo e tā moto a ia.

He tutupu e tau mena oti nei, ha ha i fafo a Peteru he lotopā. Ko e pō makalili a ia, ti taute he tau tagata e afi. He agaagai viko a lautolu ke mūmū he afi, ne onoono e tama fifine fekafekau ki a Peteru mo e pehē: ‘Ko e tagata nei foki ne fakalataha mo Iesu.’

‘Nakai, ai ko au a ia!’ he tali atu e Peteru.

Lagatolu ne tala age e tau tagata ki a Peteru na fakalataha a ia mo Iesu. Ka e he tau magaaho takitaha ia ne talahau e Peteru kua nakai mooli ai. Ko e magaaho ke toluaki ne talahau ai e Peteru, ne haga mai a Iesu mo e ono ki a ia. Ne tokihala lahi a Peteru ha ko e tau pikopiko nei ne talahau e ia, ti fano kehe a ia mo e tagi lahi.

He kamata e laā ke hake he pogipogi Faraile, ne uta he tau ekepoa a Iesu ke he ha lautolu a fale fono lahi, ko e fale Saneheturini. Ne fakatutala a lautolu i ai, ko e heigoa e mena ka taute aki a ia. Ti uta e lautolu a ia ki a Ponotio Pilato, ko e pule he faahi motu ha Iuta.

‘Ko e tagata kelea anei,’ he tala age he tau ekepoa ki a Pilato. ‘Kua lata ke tamate a ia.’ He mole e hūhū age ki a Iesu e tau hūhū, ne pehē a Pilato: ‘Nakai maeke ia au ke kitia kua fai mena hepe a ia ne taute.’ Ti fakafano e Pilato a Iesu ki a Herota Anetipa. Ko Herota ko e pule ha Kalilaia, ka kua nofo a ia i Ierusalema. Nakai maeke foki a Herota ke kitia ha mena hepe ne taute e Iesu, ti liu a ia fakafano a Iesu ki a Pilato.

Manako a Pilato ke fakatokanoa a Iesu. Ka e manako e tau fī ha Iesu ke fakatokanoa e taha pagotā foki. Ko e tagata nei ko e tagata kaihā ko Parapa. Ko e kavi ke he tupou laā anei ne tamai ai e Pilato a Iesu ki fafo. Ti pehē a ia ke he tau tagata: ‘Kitia la! Ko e patuiki ha mutolu!’ Ka e tauhea e tau ekepoa ne mua: ‘Uta kehe a ia! Tamate a ia! Tamate a ia!’ Ti fakatokanoa e Pilato a Parapa mo e uta e lautolu a Iesu ke tamate.

Ko e pale laā he Aho Faraile ne pao fao a Iesu ke he akau. Nakai maeke a koe ke kitia a laua ke he fakatino, ka e ha ha he tau faahi ha Iesu e tau tagata kolokolovao kua tamate foki ki luga he tau akau. Ato mate a Iesu, taha he tau tagata kolokolovao ne tala age ki a Iesu: ‘Manatu mai au ka hoko a koe ke he kautu haau.’ Ti tali age a Iesu: ‘Kua mavehe au ki a koe to fakalataha a koe mo au i Parataiso.’

Ko e maveheaga ofoofogia nakai anei? Iloa nakai e koe ko e heigoa e parataiso ne tutala a Iesu ki ai? Haia i fe e parataiso ne eke he Atua he kamataaga? E, he lalolagi. Ti ka pule a Iesu ko e patuiki i luga he lagi, to liu fakamoui e ia e tagata nei ke fiafia e Parataiso foou he lalolagi. Fiafia nakai a tautolu ke he mena ia?