ONOONO la ke he tau filifili ia Paulo, mo e ono la ke he kautau Roma kua leoleo a ia. Ko Paulo ko e pagotā i Roma. Ko e fakatali a ia ke he Kaisara Roma ke fifili e mena ke taute aki a ia. He magaaho ne pagotā a ia, ne fakaatā e tau tagata ke ahiahi a ia.

Hoko atu a Paulo ki Roma ti tolu e aho he mole, ne fakafano atu e ia e fekau ke he falu takitaki lotu Iutaia ke o mai ke kitia a ia. Ko e fua, ne tokologa e tau Iutaia i Roma ne o mai. Ne fakamatala a Paulo ki a lautolu hagaao ki a Iesu mo e kautu he Atua. Ne talitonu falu ti eke mo tau Kerisiano, ka e nakai talitonu e falu.

Ne fakamatala foki a Paulo ke he falu kautau ne kotofa ke leoleo a ia. Ke he ua e tau ne toka a Paulo i ai ko e pagotā, ne maeke a ia ke fakamatala ke he tau tagata oti. Ko e fua, ko e magafaoa ha Kaisara ne logona foki e tala mitaki hagaao ke he Kautu, ti eke falu ia lautolu mo tau Kerisiano.

Ko hai e tagata ahiahi nei he laulau ne tohitohi? Maeke nakai a koe ke tali manatu? E, ko Timoteo. Ne tuku foki a Timoteo he fale puipui ha ko e fakamatala hagaao ke he Kautu, ka kua liu fakatokanoa foki a ia. Ti kua hau a ia ki hinei ke lagomatai ia Paulo. Iloa nakai e koe ko e heigoa ha Timoteo ne tohi? O mai la ke kitia.

Manatu nakai e koe e tau maaga ko Filipi mo Efeso he Tala 110? Ne lagomatai e Paulo ke kamata e tau fakapotopotoaga Kerisiano he tau maaga ia. Mogonei he nofo a ia i loto he fale puipui, ne tohia e Paulo e tau tohi ke he tau Kerisiano nei. Haia i loto he Tohi Tapu e tau tohi ia ti fakahigoa ko Efeso mo Filipi. Kua tala age e Paulo ki a Timoteo e mena ke tohi ke he tau kapitiga Kerisiano ha laua i Filipi.

Ne totonu lahi e tau tagata Filipi ki a Paulo. Ne fakafano mai e lautolu e mena fakaalofa ki a ia he fale puipui, ti ko e fakaaue a Paulo ki a lautolu ma e mena ia. Ko Epaferoti ko e tagata ne tamai e mena fakaalofa. Ka kua gagao lahi a ia ti teitei ke mate. Kua liu a ia malolō he mogonei ti kua mautali ke fano ki kaina. To uta e ia e tohi nei mai ia Paulo mo Timoteo ka liu atu a ia ki Filipi.

He mogo ne nofo a ia he fale puipui ne tohia e Paulo ua foki e tohi ne ha ha mo tautolu i loto he Tohi Tapu. Taha ke he tau Kerisiano he maaga ko Kolose. Iloa nakai e koe e higoa? Ko Kolose. Ko e taha foki ko e tohi haana ke he kapitiga tata ne higoa ko Filemoni ne nofo foki i Kolose. Kua hagaao e tohi ki a Onesemo ko e fekafekau ha Filemoni.

Ne hola kehe a Onesemo mai ia Filemoni ti hau ki Roma. Ne iloa e Onesemo i hinei, kua nofo a Paulo he fale puipui. Kua hau a ia ke ahiahi ti fakamatala a Paulo ki a Onesemo. Nakai leva ti eke foki a Onesemo mo taha Kerisiano. He mogonei, kua tokihala a Onesemo he hola kehe a ia. Ti iloa nakai e koe e mena ne tohia e Paulo he tohi nei ki a Filemoni?

Ne ole a Paulo ki a Filemoni ke fakamagalo a Onesemo. ‘Kua liu au fakafano atu a ia ki a koe,’ he tohi e Paulo. ‘Ka ko ia mogonei, nakai ko e fekafekau hokoia ni haau. Ko ia foki ko e matakainaga taane Kerisiano mitaki lahi.’ He liu atu a Onesemo ki Kolose ne ta atu e ia e tau tohi ua nei, taha ke he tau tagata Kolose mo e taha ki a Filemoni. Ko e manamanatu noa ni a tautolu ke he fiafia ha Filemoni he mogo ne iloa e ia kua eke tuai e fekafekau haana mo taha Kerisiano.

Ko e magaaho ne tohi a Paulo ke he tau tagata Filipi mo e ki a Filemoni, ne fai tala mitaki mooli a ia. ‘Kua fakafano atu e au a Timoteo ki a mutolu,’ he tala age e Paulo ke he tau tagata Filipi. ‘Ka e to nakai leva ti fina atu foki au ki a mutolu.’ Mo e ki a Filemoni, ne tohia e ia: ‘Kia taute taha mena ke nofo ai au i ai.’

He magaaho ne fakatokanoa ai a Paulo ne ahiahi atu a ia ke he tau matakainaga Kerisiano he tau matakavi loga. Ka e he magaaho fakamui ne liu fakapagotā foki a Paulo i Roma. He magaaho nei kua iloa e ia to tamate a ia. Ti tohi a ia ki a Timoteo mo e ole ke hau fakaave. ‘Kua fakamooli au ke he Atua,’ he tohia e Paulo, ‘ti to palepale he Atua au.’ Gahoa e tau he mole e mate ha Paulo, ne liu foki moumou a Ierusalema, magaaho nei he tau Roma.

Ka e loga atu foki e tau mena i loto he Tohi Tapu. Ne omoomoi e Iehova ko e Atua e aposetolo ko Ioane ke tohia e tau tohi fakahiku, putoia e tohi a Fakakiteaga. Ne talahau e tohi nei he Tohi Tapu hagaao ke he vahā anoiha. O mai la he mogonei ke fakaako ko e heigoa kua fakatoka mai he vahā i mua.