KITIALA! kua lekua lahi e toga! Kua malona valavala ai! Kitia nakai e koe e tau tagata kua hohopo ki tahi? Kua fitā e falu he hohoko ke he mataafaga. Ko Paulo nakai a nā? O mai la ke kumikumi ko e heigoa e mena kua tupu ki a ia.

Manatu na ua e tau ne nofo pagotā a Paulo i Kaisaria. Ti kua tuku a ia mo e falu pagotā ki loto he toga, ti kamata a lautolu ke ō ki Roma. He mole fakatote a lautolu he aelani ko Kereta, ne lauia a lautolu he afā lahi. Kua havili lahi e matagi ti nakai maeke e tau tagata ke fakahakohako e toga. Ti nakai maeke a lautolu ke kitia e laā he aho po ke tau fetu he pō. Fakahiku ai, he loga e aho ne mole, ne galo katoatoa e amaamanakiaga ha lautolu he toga ke fakahao.

Ne tū hake a Paulo ti pehē: ‘Nakai taha ia mutolu ka mole e moui; ko e toga ni ka malona. Ha kua fakakite mai he agelu ki a au ne pō mo e pehē, “Paulo na e, ua matakutaku! To tū ni a koe ki mua he pule ha Roma ko Kaisara. Mo e to fakahao he Atua a lautolu oti kua fakatauō mo koe he fenoga.”’

Kavi ke he tuloto pō he aho ke 14 aki he afā lahi, ne mailoga he kau gahua he toga kua potake fakahaga e tahi! Ha kua matakutaku neke pē ke he tau patuō he pō, ne tuku hifo e lautolu e tau taula ha lautolu. He pogipogi hake ne kitia e lautolu e loto ava. Ne fifili a lautolu ke lali ke ta hake e toga ke hoko ke he mataafaga ia.

Ka e he tata atu a lautolu ke he mataafaga, ne lau e toga he tumutumu oneone ti tū. Ti kamata e tau peau ke moumou ai ti kamata e toga ke malona valavala. Ne pehē e takitaki kautau ne leveki: ‘Ko mutolu oti ne iloa ke kakau, hohopo mua ki tahi mo e kakau ki uta. Ka oti a lautolu, ti hohopo a mutolu ne toe, ti gega atu ke he tau vala lapa he toga.’ Ti ko e mena ia ni he taute e lautolu. Ke he puhala nei ne hohoko atu oti mo e hao e toko 276 e tagata i loto he toga ke he mataafaga, tuga ni ne mavehe he agelu.

Ko e higoa he aelani ia ko Melita. Ne totonu lahi e tau tagata, ti leveki e lautolu e tau tagata mai he toga. Magaaho ne matutū hifo e matagi, ne tuku a Paulo ke he taha toga ti ta atu ki Roma.