1 Tau Patuiki 5:1-18
5 TI fakafano mai e Hairamo ko e patuiki a Turo hana tau fekafekau kia Solomona; ha kua logona e ia kua fakauku e lautolu a ia ke eke mo patuiki ke hukui aki hana matua; ha kua fakaalofa a Hairamo kia Tavita ke he tau aho oti hana.
2 Ti fakafano atu e Solomona kia Hairamo, kua pehe atu,
3 Kua iloa e koe kua nakai maeke ke he matua haku ko Tavita ke ta e fale ke he higoa a Iehova hana Atua ha ko e tau tau ne agaagai ai a ia, ato tuku hifo ai e Iehova a lautolu ki lalo hana tau aloalohui.
4 Ka ko ainei kua foaki mai ai e Iehova haku Atua kia au e mafola ke he tau fahi oti, nakai ha i ai taha kua fai fi mai, ti nakai fai kelea kua tupu.
5 Kitiala, kua manatu e au ke ta e fale ke he higoa a Iehova haku Atua, tuga ne vagahau mai ai a Iehova ke he matua haku ko Tavita, kua pehe mai, Ko e tama hāu ke fakanofo ai e au ke he nofoaiki hāu he hukuiaki a koe, to ta ai e ia e fale ke he haku a higoa.
6 Ko e hanai, kia poaki atu e koe ke he hau a tau fekafekau ke tā mai e lautolu māku e tau arasi i Lepanona; to fakalataha foki haku a tau fekafekau mo e tau fekafekau hāu; to ta atu foki e au e taui kia koe ma e tau fekafekau hau ke lata mo e tau mena oti ke tala mai ai e koe; ha kua fioia ni e koe, kua nakai fai tagata kua iloa ke ta akau ke tuga ne tau tagata Saitonu.
7 Kua logona e Hairamo e tau kupu a Solomona, ti fiafia lahi ai a ia, ti pehe age a ia, Kia fakaaue atu kia Iehova ke he aho nai, kua foaki mai kia Tavita e tama iloilo ke pule ai ke he motu lahi na.
8 Ti fakafano mai e Hairamo kia Solomona kua pehe mai, Kua fanogonogo au ke he tau mena ne o mai ai hāu a tau fekafekau kia au; to eke e au e tau mena oti kua finagalo ai a koe ke he tau akau ko e tau arasi mo e tau perosi.
9 To ta hifo ai he tau fekafekau haku i Lepanona ki tahi; ti eke ai e au e tau akau mo tau vaka lakau, ke uta aki hala moana ke he mena ke poaki mai ai e koe kia au, to pehe age au ke vetevete ai e lautolu e tau akau ke he mena ia, ti uta ai e lautolu. Ti eke e koe e mena ne loto au ki ai ke ta mai ai e koe e tau mena kai mo e haku a magafaoa.
10 Ti ta mai ai e Hairamo kia Solomona e tau akau ko e tau arasi, mo e tau akau ko e tau perosi, ko e tau mena oti kua manako a ia ki ai.
11 Ti ta atu e Solomona kia Hairamo uafulu e afe kori saito ke eke mo tau mena kai ma e magafaoa hana; mo e uafulu e kori puke lolo kua tukituki; ne ta atu ai pihia e Solomona kia Hairamo ke he taha tau mo e taha tau.
12 Kua foaki mai foki e Iehova kia Solomona e pulotu, tuga ne vagahau mai a ia kia ia; kua nonofo mo e mafola a Hairamo mo Solomona, ti eke ai e laua e maveheaga.
13 Ti kotofa ai he patuiki ko Solomona e tau tagata mai Isaraela oti; ko e tau tagata foki ne kotofa ko e tolugofulu e afe tagata.
14 Ti fakafano atu e ia a lautolu ki Lepanona ke fetogiaki, ko e mahina mo e hogofulu e afe tagata; ko e taha e mahina ha ha i ai a lautolu i Lepanona, ka e ua e mahina ha ha i ai a lautolu mo e tau magafaoa ha lautolu; kua pule foki a Atoniramo kia lautolu ne kotofa.
15 Ha ha ia Solomona foki a lautolu ne uta e tau kavega ko e tokofitugofulu e afe, mo e tokovalugofulu e afe tagata ne talai maka ai ke he tau mouga;
16 Katoa foki mo e tau iki ne mua ne kotofa ai e Solomona ke pule, ko lautolu ne pule ke he gahua ne toko tolu e afe ti tolu e teau a lautolu; ne pule a lautolu ke he tau tagata ne eke ai e gahua.
17 Kua poaki atu he patuiki ti ta mai ai e lautolu e tau maka lalahi, ko e tau maka uho, ke eke mo fakaveaga he fale; ko e tau maka tātā.
18 Ti tātā ai he tau tufuga a Solomona, mo e tau tufuga a Hairamo, katoa mo e tau tagata Kevali, ne taute e lautolu e tau akau mo e tau maka ke eke aki e fale.