Numera 35:1-34
35 KUA vagahau mai foki a Iehova kia Mose ke he kelekele tatai a Moapi, ne tata age ki Ioritana, ne fehagai mo Ieriko, kua pehe mai,
2 Kia poaki atu e koe ke he fanau a Isaraela ke ta atu e lautolu ke he tau tagata Levi, mai he fonua kua moua ai e lautolu ma lautolu, e tau māga ke nonofo ai a lautolu; ti ta atu ai foki e mutolu ke he tau tagata Levi e vao ne takai ai e tau maga ia.
3 Kia eke foki e tau maga ia ma lautolu, ke nonofo ai a lautolu; ko e ha lautolu a tau vao foki kia eke ia mo e ha lautolu a tau povi, mo e ha lautolu a tau mena, katoa mo e ha lautolu a tau manu oti.
4 Ko e vao foki ne takai ai e tau maga kua ta atu ai ke he tau tagata Levi, ke kamata ke he pa he maga, ti hoko atu ke he mena ne liu mai ai ko e taha ia e afe e kupita.
5 Ti fafati e mutolu ke kamata ai ki tua he maga ke he fahi uta ua e afe e kupita, mo e fahi toga ua e afe e kupita, ko e fahi lalo foki ua e afe e kupita, mo e fahi tokelau ua e afe e kupita; ka e tuloto ai e māga; ko e vao haia he tau maga ma lautolu.
6 Kia ha i ai foki ke he tau maga kua ta atu ke he tau tagata Levi ono e maga ke eke mo tau huaga to tuku atu e mutolu ke hola ki ai a ia kua keli tagata ti lafilafi foki e mutolu ki ai fagofulu ma ua e maga.
7 Ko e katoatoa he tau maga ke ta atu ai e mutolu ke he tau tagata Levi, ko e fagofulu ma valu ia; ko lautolu mo e ha lautolu a tau vao.
8 Ko e tau maga foki ke ta atu ai e mutolu mai he tau maga he fanau a Isaraela; ko lautolu ne fai maga loga to ta mai fakaloga ai e tau maga ia lautolu ka ko lautolu ne gahoa ha lautolu a tau maga to ta mai fakagahoa ai e mutolu e tau maga ia lautolu; kia takitokotaha mo e uta ai he hana tau maga ke he tau tagata Levi, fakalata ke he mena kua moua ai e ia māna.
9 Kua vagahau mai foki a Iehova kia Mose, kua pehe mai,
10 Kia vagahau atu a koe ke he fanau a Isaraela ti pehe atu a koe kia lautolu, Kia o atu a lautolu ke he fahi atu a Ioritana, ke he motu ko Kakana,
11 Ti kotofa ai e mutolu e tau maga ke eke mo tau huaga ma mutolu; kia hola ki ai a ia kua keli tagata, ko ia kua keli totamaki ai taha tagata.
12 To eke foki ia mo tau maga ke fehola ki ai a mutolu ia ia kua eke ke taui, kia aua neke mate a ia kua keli tagata; ato tu a ia ki mua e fakapotopotoaga ke fakafili ai a ia.
13 Ko e tau māga foki ke tuku atu ai e mutolu, ko e ono ni ke eke mo tau huaga ma mutolu.
14 Tolu ni e māga ke tuku atu e mutolu ke he fahi nai a Ioritana, ti tolu foki e māga ke tuku atu ai e mutolu ke he motu ko Kanana, ko e tau māga ke eke mo tau huaga.
15 Ko e tau māga ia ne ono ke eke mo tau huaga ma e fanau a Isaraela, ma e tagata kehe foki katoa mo ia kua nofo ia lautolu, kia takitaha mo e fehola ki ai a lautolu kua keli totamaki ha tagata.
16 Kaeke ke ta aki e taha ke he taha ke he lapatoa ti mate ai a ia, ko e keli tagata ni a ia; kia kelipopo ni a ia kua keli tagata.
17 Kaeke foki ke lauia taha ke he maka ne liti ai e taha ke mate, ti mate ai a ia, ko e keli tagata ni a ia; kia kelipopo ai ni e keli tagata.
18 Po ke ta aki he taha a taha ke he akau ke he hana lima, ke mate ai a ia, ti mate ni a ia, ko e keli tagata haia; to kelipopo ni e keli tagata.
19 Ko e tagata kua eke ke lukutoto, to kelipopo ni e ia a ia ne keli tagata; ka feleveia a laua mo ia ti kelipopo ni e ia a ia.
20 Kaeke ke tulei atu he taha ke he taha ka kua vihiatia e ia a ia; po ke takahao ki ai, mo e liti atu ki ai taha mena, ti mate ai a ia;
21 Po ke ta e ia a ia ke he hana lima ke he hana fai fi kia ia, ti mate ai a ia, to kelipopo ni a ia kua ta e tagata, ko e keli tagata ni a ia; to kelipopo he tagata kua eke ke lukutoto e keli tagata ka feleveia ai a laua mo ia.
22 Kaeke ke tulei atu totamaki e ia a ia, ka e nakai ita a ia; po ke liti atu e ia taha mena kia ia, ka e nakai takahao ki ai;
23 Po ke maka kua maeke ke mate ai ha tagata, ka kua nakai kitia a ia; kua fakato hifo he tagata kia ia, ti mate a ia, ka e nakai ko e fi hana a ia, ti nakai kumi foki e ia ke eke fakakelea kia ia.
24 Ti fakafili ai he fakapotopotoaga a ia ne keli tagata, mo ia ne eke ke lukutoto, ke tuga ne tau fakafiliaga na.
25 Ti laveaki he fakapotopotoaga a ia ne keli tagata mai he lima he tagata kua eke ke lukutoto; ti liuaki he fakapotopotoaga a ia ke he maga kua eke mo huaga hana ne hola a ia ki ai; ti nofo ai a ia ato mate e ekepoa ne mua ne fakauku ai ke he Iolo tapu.
26 Kaeke ke fina atu e keli tagata ki tua he tau katofia he māga kua eke mo huaga hana ne hola a ia ki ai;
27 Ka moua foki a ia he tagata kua eke ke lukutoto ki tua he tau katofia he māga kua eke mo huaga hana; ti kelipopo ai he tagata kua eke ke lukutoto a ia ne keli tagata, nakai fakamaligi toto ha ko ia;
28 Ha ko e mena lata ke nofo a ia ke he māga kua eke mo huaga hana, ato mate e ekepoa ne mua ka kua mate e ekepoa ne mua, ti liu atu ai a ia kua keli tagata ke he hana ni a fonua.
29 Ti eke ni e tau mena ia mo tau fakatufono ke fakafili ai a mutolu ke he tau hau ha mutolu a mui, ke he tau mena oti ke nonofo ai a mutolu.
30 Kaeke ke keli tagata e taha, ti mate ni a ia kua keli tagata ke he tau kupu he tau tagata kua fakamoli; ka e nakai mate ha tagata ke he talahau he tagata kua fakamoli ne tokotaha.
31 Aua neke talia e mutolu e totogi ke moui ai a ia kua keli tagata, ko ia ke fakahala ai ke mate; ka e kelipopo ni e mutolu a ia.
32 Ti aua neke talia e mutolu e totogi ma e tagata kua hola ke he maga kua eke mo huaga hana, kia liu mai a ia ke nofo ke he motu, ka kua nakaila mate e ekepoa ne mua.
33 Aua neke fakakelea e mutolu e motu ha ha i ai a mutolu; ha ko e toto ko e mena ia ni ke kelea ai e motu; to nakai maeke foki e motu ke totogi aki e toto ne fakamaligi ai, ka ko e toto ni hana ne fakamaligi ai e toto.
34 Aua neke fakakelea e mutolu e motu kua nonofo ai a mutolu, kua nofo ai au; ha ko au ko Iehova kua nofo fakalataha mo e fanau a Isaraela.