Fakamomoui e Iesu e tau tagata tua fakamooli he foaki e ia e moui haana mo poa lukutoto. (Mataio 20:28) Ti fakahigoa he Tohi Tapu a Iesu “ko e Fakamoui he lalolagi.” (1 Ioane 4:14) Talahau i ai foki: “Nakai tokai foki e fakamouiaga ke he taha; nakai fakai taha higoa i lalo he lagi kua foaki mai ke he tau tagata, ke maeke ai ke fakamomoui a tautolu.”​—Gahua 4:12.

 Hoko ki a Iesu e mate ma e tau tagata oti kana ne fakagahuahua e tua ki a ia. (Heperu 2:9; Ioane 3:16) He magaaho fakamui “ko ia kua fakatu mai he Atua ia lautolu kua mamate,” ti liu atu a Iesu ke he lagi kua moui fakaagaaga. (Gahua 3:15) Kua maeke a Iesu i ai “ke fakamomoui fakaoti a lautolu kua fakatata atu ke he Atua ha ko ia, ha kua moui fakaoti ni a ia ke ole ma lautolu.”​—Heperu 7:25.

Ko e ha kua manako a tautolu ki a Iesu ke ole ma tautolu?

 Ko e tau tagata agahala oti a tautolu. (Roma 3:23) Vevehe he agahala a tautolu mo e Atua ti takitaki ai ke he mate. (Roma 6:23) Ka e eke a Iesu mo “lagomatai” ma lautolu kua fakagahuahua e tua ke he poa lukutoto haana. (1 Ioane 2:1) Ne olelalo a ia ma lautolu, he ole ke he Atua ke logona e tau liogi ha lautolu mo e fakamagalo e tau agahala ha lautolu he fakavē ke he poa lukutoto ne foaki e Iesu he mate. (Mataio 1:21; Roma 8:34) Talia he Atua e tau ole pihia ne taute e Iesu ha kua lagotatai ai mo e finagalo Haana. Fakafano mai he Atua a Iesu ke he lalolagi ke “fakamomoui e lalolagi kia ia.”​—Ioane 3:17.

Ko e taofiaga ni kia ia Iesu kua maeke a tautolu ke fakamomoui?

 Nakai. Pete kua lata a tautolu ke talitonu ki a Iesu ke moua e fakamouiaga, fai mena agaia kua lata a tautolu ke taute. (Gahua 16:30, 31) Pehē e Tohi Tapu: “Tuga e tino kua mate ia ka noa mo e agaga, ti pihia foki e tua kua mate ia kaeke kua noa mo e tau gahua.” (Iakopo 2:26) Ke fakamomoui kua lata a tautolu ke:

•   Fakaako ki a Iesu mo e haana a Matua ko Iehova.​—Ioane 17:3.

•   Atihake e tua ia laua.​—Ioane 12:44; 14:1.

•   Fakakite e tua ha tautolu he omaoma ke he tau poakiaga ha laua. (Luka 6:46; 1 Ioane 2:17) Fakaako e Iesu kua nakai fakamomoui a lautolu oti ne ui a ia ko e “Iki” ka ko lautolu ni “kua eke e finagalo he [haana] a Matua ha ha he lagi.”​—Mataio 7:21.

•   Fakatumau ke fakakite e tua pete e tau tuaga uka. Talahau fakamahino e Iesu e mena ia he pehē: “Ko ia ke tumau ato hoko ke he fakaotiaga, to fakamoui na ia.”​—Mataio 24:13.