Fanau au i Ciudad Obregón he faahi tokelau i Mesikō, ko e tama ke limaaki he fanau tokohiva. Nonofo a mautolu he taha maaga i tua he taone, mo e leveki he matua taane haaku e faama tote. Ko e kaina mitaki mo e fiafia he nonofo auloa a mautolu. Momoko ai, he lima e tau haaku ne to e afā ti moumou e faama mo e hiki a mautolu ke he taha taone foki.

Ko e matua taane haaku kua kamata ke moua loga e tau tupe. Ka e he magaaho taha ia, ne inu kava tumau a ia. Kua lauia e fakamauaga haana mo mautolu. Kamata a mautolu ke ula tapaka, ne kaiha mai he matua taane. Konahia fakamua au he ono laia e tau. Nakai leva, ti mavehevehe e tau matua haaku mo e holo ki mua e kelea he mahani haaku.

Ne uta he matua fifine haaku a mautolu ke nonofo mo ia he liu fai taane. Nakai age e ia ha tupe ke he matua fifine, mo e nakai lahi e totogi he matua fifine ke leveki aki a mautolu. Ti ko e tau lafu haaku mo au ne gahua ka e nakai lahi e tupe ne moua ke fakatau e tau mena kua lata mo e moui. Fano viko au he taone ke kumi mena kai ki loto he tau tini veve he tau tagata muhu koloa.

He magaaho ne hogofulu e tau haaku, ne ole he taha tagata taane a au ke gahua mo ia he toloaga veve. Talia e au, fakaoti e aoga ti toka e kaina. Totogi e ia au 10 e Peso Mesikō ($1 a ia) he aho, mo e mai e tau mena kai ne moua he toloaga veve. Nofo au he fale ne tālaga aki e tau mena ne tolo ke he vao. Ko e tau tagata ne nonofo viko ia au ne fakaaoga e tau kupu kelea mo e mahani feuaki. Tokologa ia lautolu ne hufia ke he tau tulaki mo e inu kava tumau. Ko e magaaho kelea lahi a nei he mouiaga haaku, mo e tagi au he matakutaku he tau po oti. Ha ko e mativa mo e tote e fakaakoaga haaku, ne nakai moua e au e lilifu fakatagata. Tolu e tau ne nofo au he toloaga veve ato hiki au ke he taha matakavi i Mesikō. Gahua au he fonua ke tau e tau fiti, tau fulu vavae, fakaputu e tau to, mo e oko fua pateta.

Fa e tau he mole ti liu au ki Ciudad Obregón. Ko e taulatua e taha anitī haaku, ne mai e poko ke nofo ai au. Kamata au ke miti kelea mo e lahi e fakaatukehe ti manamanatu ke taupega. He taha po ne liogi au ke he Atua: “Iki na e, ka moui a koe, manako au ke iloa a koe, mo e fekafekau ki a koe tukulagi. Manako au ke iloa e lotu mooli.”

Manako tumau au ke iloa atu foki e Atua. He magaaho ne tote au, ne fano au ke he tau lotu ne kehekehe e tau taofiaga ka e nakai moua e fiafia. Nakai fai ia lautolu ne fakatutala ke he Tohi Tapu po ke lagomatai au ke iloa e Atua. Tokologa ne fiafia lahi ke moua e tupe, mo e falu ha lautolu ne mahani feuaki.

He 19 e tau haaku, ko e taane he mahakitaga haaku ne pehē ko e Tau Fakamooli ha Iehova ne fakakite age e talahauaga he Tohi Tapu he fakaaoga e tau fakatino fakalotu. Totou e ia a Esoto 20:4, 5 ki a au. Talahau mai aua neke eke e tautolu ha tupua ne tā. Pehē e kupu 5: “Aua neke hufeilo a koe ki ai, aua foki neke fekafekau ki ai; ha ko au ko Iehova hau a Atua, ko e Atua ita tafua au.” Ti hūhū mai a ia ki a au, “Ka fakaaoga he Atua e tau fakatino ke taute e tau mana po ke fakaatā a tautolu ke fakaaoga he tapuakiaga, ti ko e ha ne pā e Ia ke nakai fakaaoga e tau mena ia?” Manamanatu lahi au ki ai. Loga e tau fakatutalaaga ha maua ke he tau tala he Tohi Tapu. Mafiti e magaaho he fakatutala a maua mo e fiafia lahi au.

He taha magaaho, ne uta e ia a au ke he feleveiaaga he Tau Fakamoli ha Iehova. Ofo au he mena ne kitia mo e logona. Ko e tau fuata foki ne fakalataha ke he fakaholoaga, mo e maama mitaki e tau lauga ha lautolu! Manamanatu hifo au, ‘Ko e tau fakaakoaga mitaki lahi anei ha lautolu!’ Pete he loloa e ulu haaku mo e kiva e foliga, ne mafanatia e fakafeleveia mai he Tau Fakamoli ki a au. Uiina he taha magafaoa a au ke kai mo lautolu he oti e feleveiaaga!

Mai he fakaako Tohi Tapu haaku mo e Tau Fakamoli, ne ako e au ko e Atua ko Iehova ko e Matua ne leveki a tautolu pete he nakai fai tupe, tuaga, tau tagata kehekehe po ke fakaakoaga. Nakai fakamailoga tagata mooli a ia. (Gahua 10:34, 35) Kua moua e au mogonei e makona fakaagaaga. Hane galo fakahaga e nakai fiafia haaku.

Ko e moui haaku kua mafiti e hikiaga! Fakaoti e ula, fakaaoga hehē e kava mo e kupu kelea. Galo fakahaga e ita ne logona e au tali mai he vahā tote mo e tau miti kelea. Ti kautū a au mai he tū tokolalo kelea lahi mahaki, ha ko e tau mena ne kua lauia e moui tali mai he vahā tote mo e nakai lahi e fakaakoaga.

Fulufuluola e hoana haaku ne fakaalofa ki a Iehova mo e lahi e lalago ki a au. Ko e leveki takaiaga he Tau Fakamoli ha Iehova a au mogonei, ahiahi ke he tau fakapotopotoaga ke atihake mo e fakaako e magafaoa fakaagaaga. Fakaaue ke he tau fakamauluaga mai he Tohi Tapu mo e fakaakoaga mitaki lahi mai he Atua, mo e moua e au e lilifu fakatagata.