Kusukela ekudalweni kwabantu, uMdalethu bekakhuluma nabantu asebenzisa iingilozi nabaphorofidi. Ngaphezu kwalokho, wakhetha bona imilayezo neethembiso zakhe zitlolwe phasi. Iinthembiso zakaZimu ziyalithinta ingomuso lethu. Singazifumanaphi iinthembiso zakaZimu namhlanjesi?

Umlayezo kaZimu siwufumana eliZwini lakhe iBhayibheli. (2 Thimothi 3:16) UZimu ubasebenzise njani abaphorofidi bona batlole umlayezwakhe? (2 Pitrosi 1:21) UZimu wafaka imicabangwakhe emikhumbulwenabo, ngemva kwalokho bayitlola phasi. Nanamhlanjesi kusafana. Nange usomabhizinisi asebenzisa unobhalakhe bona amtlolele incwadi, sisaqala incwadi leyo njengevela kusomabhizinisi. Ngokufanako, nanyana uZimu asebenzise abantu bona batlole umlayezwakhe, nguye umTloli wamambala weliZwi eliCwengileko.

Umlayezo kaZimu uqakatheke khulu ngombana ufuna boke abantu bafunde bebazwisise okutjhiwo liBhayibheli. Namhlanjesi ‘iindaba ezimnandi’ zifumaneka “kizo zoke iintjhaba, iinkoro, amalimi nabantu.” (IsAmbulo 14:6) Ngesibusiso sakaZimu, imiTlolo eCwengileko ifumaneka ngamalimi angaphezu kwee-3 000, ukudlula nanyana ngiziphi iincwadi ezifumaneka ephasini.